Kàu tı̄ Gián-kiù Tô͘-su-koán ê piⁿ-á siàu-liām lí.
Bô chhiⁿ-hoe, bô si-koa, bô kı̀-liām-pi.
Chí-ū
Thàng-jı̍p kut-chhoé ê thiàⁿ.
It-kiú-pat-it goá jı̍p Tâi-Tāi,
Lí siōng-boé tó--lo̍h ê chháu-po͘ iáu chhiⁿ-chhiⁿ.
Tò-pêng Oa̍h-tāng Tiong-sim ê piah âng-kih-kih,
Chhin-chhiūⁿ tú lâu-koè ê huih.
Bông-bông-tiong poe-koè Thài-pêng-iûⁿ,
Tè lí poe-kàu Hiu-lûn-hô-piⁿ.
Png-á-hio̍h iáu boē hù âng,
Tông-hiong tiám pe̍h-sek ê la̍h-chek,
Tı̄ pe̍h-sek khióng-pò͘ ê sı̂-tāi,
In tı̀ pe̍h-sek ê bı̄n-tà siàu-liām lí.
Kan-ta káⁿ thí-khui
Sit-khı̀ huih-sek ê ba̍k-chiu,
Khàu lí ê sí,
Kap goán ê sin-sè.
Kı̀-liām-chheh--nih,
Lí tı̀ phok-sū-bō, chhiò kàu hiah phiau-phiat.
Gō͘--goe̍h AN Arbor seh tú iûⁿ,
Jı̍t-kng kiò-chhíⁿ tang-bı̂n ê thó͘-toē.
Tı̄ che seh-chúi sé-chheng ê ı̄-hiong,
Siáⁿ-lâng teh kè-oē
Bak-huih ê tê-piáⁿ-hoē?
Cha̍p-sı̀-nı̂ āu ê koâⁿ-thiⁿ,
Tò-lâi kāng-tè chháu-po͘ siàu-liām lí.
Oa̍h-tāng Tiong-sim ê piah àm koh âng,
Chhin-chhiūⁿ huih kian-choè pa.
Sa̍p-sa̍p-hō͘ tiong goá gia̍h-thâu ǹg thiⁿ,
Chhoē khoàⁿ ū kúi-lia̍p liû-chhiⁿ,
Bat chiò-koè bô goe̍h-kng ê mı̂.
