1. Lâm Tiong kàu-oân Siu-ióng-hoē,
Tùi thâu chiàu sǹg chin-chē hoê;
Chit pái koh-chài tit khai-chhui,
Lâi hù tâng-kang tùi ta̍k ūi.
2. Hoaⁿ hí thiⁿ-khı̀ ū khoe-ho̍k,
Hō͘ lán chhut-jı̍p hó kang-chok:
Ē tit chiah-nih hó kai-chài,
Kám-siā Thiⁿ-pē só͘ an-pâi.
3. Káng-su khún-chhiat lâi káng-gı̄,
Kù-kù ū la̍t hó ı̀-bı̄;
Thèng-chiòng jia̍t-sim chin tı̀-ı̀,
Ke-thiⁿ lêng-siu kap oa̍h-khı̀.
4. Phí-jı̂n siū phài bēng-lēng,
Chí-tēng tio̍h kóng chı̍t tiám cheng;
Kı̀-jiân siū-tio̍h chin hó ı̀,
M̄-káⁿ chài-saⁿ lâi the sı̂.
5. Tê-ba̍k chiū-sı̄ kóng-oē-hoat,
Kı̂-sı̍t kháu-châi chin ló͘-choat;
Taⁿ kóng sı̄ beh kóng án-choáⁿ,
Ài chiàu chhù-sū hun kúi toāⁿ.
6. Lūn oē piáu-pe̍k sim só͘ siūⁿ,
Hō͘ lâng chai lí ê chú-tiuⁿ;
Ti chia só͘ kóng ê soat-oā,
Sı̄ chí káng-tō kiù éng-oa̍h.
7. Káng-tō sı̄ chí kóng hok-im,
Kiù-chú kiù lâng ê thiàⁿ-sim;
Chióng-lūi ū tê-ba̍k, kái-sek,
Í-kı̍p tē-chí kap keng-le̍k.
8. Ha̍p sı̂ chiàu khoàⁿ lâi soán-te̍k,
Kóng-chhut hō͘ lâng chin iú-ek;
Beh kóng it-tēng bo̍h loān lām,
Toan-toan tiah tiah ài hun chām.
9. Kı̂-tiong só͘ hun ê phiau-chún,
Thâu-sū, pún-lūn kap kiat-lūn;
Teh kóng tio̍h kóng chin chhián-hiān,
Hō͘ thiaⁿ kám-kak tı̄ gán-chiân.
10.Ū sı̂ iā thang ēng tô͘ khoàⁿ,
Chhiok-bo̍k khoài kı̀ tı̄ sim-koaⁿ;
Só͘ kóng nā-sı̄ chin chhim-tı̂m,
Teh thiaⁿ chin-chiàⁿ oh chù-sim.
11.Kı̀-tit chāi-chá Sòng Bo̍k-su,
Tùi goán ū bat kóng chı̍t-kù,
Múi pái beh kóng só͘ pı̄-pān,
Tio̍h ài thé-thiap siāng ham-bān.
12. Oh bêng ê oē tio̍h ài san,
Soat-oā chiū boē kám khùn-lân;
Hō͘ lâng ē tit khoài bêng-pe̍k,
Só͘ kóng chiah ū ta̍t bo̍k-tek.
13. Beh kóng tio̍h ài chin chún-pı̄,
M̄-thang chhı̀n-chhái kóng bı̄-sı̄;
Sian-siⁿ nā bô chū-sı̀n la̍t,
Thái ē hō͘ thiaⁿ ē thong-ta̍t.
14. Ka-kı̄ bô ū kám chhù-bı̄,
Teh thiaⁿ oh bêng-liâu ı̀-gı̄;
Kóng kàu hō͘ lâng siū kám-kek,
Pún sı̄ khò Chú ê lêng-le̍k.
15. Chū-kí tio̍h ēng chı̄n só͘ ē,
Tio̍h cháiⁿ-iūⁿ chiàu ē té;
Soat-oā tio̍h ài chin oa̍h-tāng,
Teh thiaⁿ chù-sı̂n sim bē bâng.
16. Teh kóng tio̍h ēng chin chhiat-sı̍t,
Teh thiaⁿ chiū ē chı̍t soà chı̍t;
Soat-oā tio̍h ài chin hun-bêng,
M̄-bián têng liáu koh-chài têng.
17. Kóng liáu nā bô lám bô ne,
Pit tēng hō͘ thiaⁿ tuh-ka-chē;
Kóng-oē siaⁿ-im koh chı̍t toāⁿ,
Tio̍h toè káng-gı̄ lâi piàn-oāⁿ.
18. Hí, nō͘, ai, khū, ài, ò͘ⁿ, io̍k,
Chhit-chêng ê siaⁿ bô hut-lio̍k;
Ai-siong ê sim, siaⁿ iu-chhiû,
Jı̂n-ài ê sim, siaⁿ un-jı̂n.
19. Siū-khı̀ hoat-chhut siaⁿ chân-khok,
Hoaⁿ-hí ê sim siaⁿ khoài-lo̍k;
Kiau-ngō͘ ê siaⁿ chho͘ pê-pê,
Kiû lâng ê siaⁿ chin jiû sè.
20. Im-tō͘ iā sı̄ ū khin-tāng,
Koân, kē tio̍h hun bô saⁿ-tâng;
Chiàu khoàⁿ thèng-chiòng ê chē-chió,
Í-kı̍p káng-tn̂g toā sió.
21. M̄-thang koân kàu ná hoah-hiu,
Kē chiū kē kàu bô boé-liu;
Koân, kē, khin, tāng tio̍h tú-hó,
Chiah ē tit-tio̍h hó kiat-kó.
22. Kóng ê kín, bān iā iàu-kín,
Siuⁿ kín, siuⁿ bān tio̍h kín-sı̄n;
Nā beh heng-hùn lâng só͘ thiaⁿ,
Chiām-chiām ke sok-le̍k ê siaⁿ.
23. Ài hō͘ thiaⁿ bêng-pe̍k ı̀-gı̄,
Teh kóng ê siaⁿ, choán chhı̂-chhı̂;
Teh kóng ēng hut-jiân thêng-thùn [khùn],
Hoàn-khí chù-tiōng só͘ káng-lūn.
24. Ū sı̂ tio̍h ài kā in mn̄g ,
Chiah hō͘ ha̍k-seng boē ài sńg;
Nā lí pı̂ⁿ-tı̍t kóng bı̄-sı̄,
Siⁿ-khí ià-siān ē hah-hı̀.
25. Chá ū goā-kok ê sian-siⁿ,
Gâu kóng chit ê Tiong-kok-gú;
Kóng liáu kip-sok tı̍t-tı̍t khı̀,
Hō͘ lâng m̄-chai kóng sím-mı̍h.
26. Khó-pí chia̍h san-tin hái-bı̄,
Kàu chhùi chı̍t ē thun lo̍h-khı̀;
M̄-nā bô kám hó chu-bı̄,
Liân sng á tiⁿ iā put-ti.
27. Só͘-í kín, bān tio̍h tiâu-hô,
Chı̍t jı̄, chı̍t kù, tio̍h chheng-chhó;
Ū sı̂ tio̍h ēng àm-sı̄ hoat,
Ia̍h [iā] sı̄ soat-oā put-khó khoat.
28. Bô chiong kò͘-sū ê kà-sı̄,
Bêng-bêng kóng-chhut lāi thê-khí;
Ka-tı̄ khı̀ siūⁿ lâi liáu-kái,
Kàu-hùn chū-jiân tit-tio̍h chai.
29. Soat-oā pit-tēng tio̍h chai-iáⁿ,
Kı̀-tit hun-piat kok-iūⁿ siaⁿ,
Boh3-tit ná hoê-siūⁿ liām keng,
Sè-sè-á siaⁿ thiaⁿ bē bêng.
30. Chhiú-sè iā ū thang pang-chān,
Hùn-khí cheng-sı̂n boē ià-lán;
Lūn kàu tō-māu kap bı̄n-iông,
Káⁿ kóng iā chin koan-tiōng.
31. Chú thiàⁿ hián-chhut bı̄n-iông siōng,
Lâng chiū kèng-ho̍k kap sūn-chiông;
Soat-oā tiong-sit ū chún-pı̄,
Só͘ kóng chiū ē khah chiàu sı̂.
32. Ū ha̍h loē-iông ê chong-chí,
Thiaⁿ-siū kám-kak ū chu-bı̄;
Siat-sú nā sı̄ bô pı̄-pān,
Só͘ kóng ê oē bô chè-hān.
33. Ná kóng ná tn̂g ná chiap-soà,
Kóng kàu cha̍p-saⁿ thiⁿ-tē goā,
Chú-iàu kà-sı̄ lóng thoat-soàⁿ,
Kang-chok kui tı̄ khang tio̍h-boâ.
34. Ū sı̂ khó-í koh piàn-thong,
Ē thang the̍h sı̍t-mı̍h lâi kóng;
Thiaⁿ ê lâng khoài tit liû-sim,
Chān in tit-tio̍h ı̀n-siōng chhim.
35. Iàu-kiāⁿ lūn-khí chē-chē khoán,
Sûi-ki èng-piàn ēng oán-choán;
Khûi-la̍t oá-khò Chú ê un,
Chò kang tio̍h chiàu lán pún-hūn.
36. Put-châi só͘ kóng sı̄ tām-po̍h,
Chhim bāng ē tit chò chham-khó;
Kèng-ı̀ sūn-soà saⁿ bián-lē,
Kàu-oân tio̍h ài tiōng jı̂n-keh.
37. Ē kóng tio̍h ū hó só͘ kiâⁿ,
Lí ê kang chiah ū oa̍h-miā;
Kóng kiâⁿ kó chin ū it-tı̀,
Ha̍k-seng chun-chiàu lí kà-sı̄.
38. Lán siū Siōng-chú sù un-hūi,
Tam-jı̄m kàu-oân chin chun-kùi;
Kiû Chú chān lán gâu chò kang,
Chú-jı̍t-o̍h ta̍k keng oa̍h-tāng.
(Tâi-oân Kàu-hoē Kong-pò, Tē 765-767 kı̂, 1952 nı̂ 9-11 goe̍h)
