Kóng-oē ha̍p chèng-lí

Só͘ kóng ê oē, ū-ê ē hō͘ thiaⁿ-kı̀ⁿ ê lâng seⁿ-khí iàm-chiān; ia̍h ū-ê ē hō͘ lâng siū kám-kek hiáu-gō͘. Che ı̀-sù chiū-sı̄ kóng-liáu ū ha̍p tō-lí kap bô ha̍p tō-lí ê in-toaⁿ niā-tiāⁿ. Chhin-chhiūⁿ tı̄ Ìn-tō͘-kok ū chı̍t-ê cha-bó͘ gín-ná, thang kan-chèng i só͘ kóng ū ha̍p tō-lí ê oē. Ū chı̍t-jı̍t cha- bó͘ gín-ná taⁿ chı̍t-tàⁿ chhâ beh tò-khı̀, tı̄ lō͘-tiong ū ià-siān, keng-koè chı̍t-keng sı̂n-biō, chiū siūⁿ ài hioh-teh hō͘ keng- thâu chham seng-khu khah khin-sang. Sûi-sı̂ chiong keng-thâu taⁿ ê chhâ hioh tı̄ biō ê toā-mn̂g chêng, soà chē tı̄ chio̍h-gı̂m. Bô loā-kú ū chı̍t-ê hoê-siūⁿ chhut--lâi, khoàⁿ-kı̀ⁿ chiū bô hoaⁿ-hí lâi hoah i kóng, Lí chē tı̄ sı̂n-biō ê bı̄n- chêng beh siat-to̍k biō-lāi ê sı̂n-bêng, ho͘h! Lí tio̍h kín-kín khı̀ m̄-thang tiàm chia pêng-an teh chē. Cha-bó͘ gín-ná kóng, Chia kı̀-jiân m̄- thang chē, chhiáⁿ lí chí-bêng chı̍t só͘- chāi bô sı̂n ê tē, goá thang khı̀ hia chē. Hoê-siūⁿ chı̍t-ē thiaⁿ-kı̀ⁿ i-ê oē, tùi án- ni chhéⁿ-gō͘, soà bô oē thang ı̀n-i. In- ūi hoê-siūⁿ ia̍h chai biō-lāi ê sı̂n-pu̍t bô kàu-gia̍h thang tùi-tiōng, koh hō͘ cha- bó͘ gín-ná só͘ chhéng-mn̄g--ê, chiū-sı̄ chí thiⁿ-téng tē-ē chı̀-chun chı̀-kùi to̍k-it ê Siōng-tè. I bô só͘ put-chāi, bô só͘ put- ti, che chiàⁿ-chiàⁿ bē-ē siat-to̍k--ê, chhin- chhiūⁿ án-ni biō-lāi ê pu̍t bē-ē tùi- tiōng--tit; thang chai lán lâng oa̍h tı̄ sè-kan pài Siōng-tè chiū kàu-gia̍h; mih-sái tio̍h pài chhâ thô͘ ê pu̍t mah? Phı̀-jū ū chı̍t-ê Hông-tè tı̄-teh, lán m̄ pài Hông-tè, ài beh pài chhâ ê pu̍t, che kiám ū ha̍p-lí mah? To̍k-to̍k hiān-sı̂ ê lâng chhin-chhiūⁿ hoê-siūⁿ tāi-lio̍k chai sı̂n tı̄ biō-lāi sı̄ chin chē lâng ū chit-hō sim. Nā ē koh chhin-chhiūⁿ chit-ê hoê-siūⁿ chhéⁿ-gō͘, thiaⁿ-kı̀ⁿ cha-bó͘ gín-ná ê oē lâi siū kám- kek tı̄ sim-lāi, chiū thang khó-chhú. (Tâi-oân Hú-siâⁿ Kàu-hoē-pò tē 68 koàn,1890 nı̂ 12 ge̍h)