Goân-chok-chiá : Amelia B. Edwads
Chı̍t,
Che-sı̄ chı̍t-ê chin-chiàⁿ ê kò͘-sū, to̍h sǹg kóng í-keng keng-kè jı̄, saⁿ-cha̍p-tang--a, hit-àm só͘ hoat-seng ê múi chı̍t-hāng tāi-chı̀, goá iû-goân lóng kı̀ tı̄ sim-koaⁿ-toé. Jı̄, saⁿ-cha̍p-tang lâi, goá kan-na pat kóng hō͘ chı̍t-ê-lâng thiaⁿ kè nā-niā, ta̍k-piàn siūⁿ--khí-lâi, koe-bú-phê to̍h ē chhàng--khí-lâi.
Chhiáⁿ lí bô-lūn jû-hô, it-tēng ài ū nāi-sim, thiaⁿ goá chiong kò͘-sū kóng hō͘ soah, lí bô su-iàu hâm goá chı̀ⁿ siáⁿ-mé, mā bô su-iàu choè jı̄m-hô ê kái-seh, chit-koá tùi goá lâi-kóng lóng bô su-iàu. M̄-koán án-noá, chit-kiāⁿ tāi-chı̀ goá í-keng siūⁿ chiok chiok jı̄-cha̍p-tang--a.
Tng tong-sı̂, goá khı̀ Eng-kok pak-pêng chı̍t-ê chin phian-phiah. hong-kau-iá-goā ê só͘-chāi, tı̄ chı̍t-ê soaⁿ-lûn-á hiâ tih phah-la̍h, goá chah chı̍t-ki chhèng, kui-jı̍t tı̄ goā-kháu pha-pha-cháu, tān-sı̄ liân poàⁿ-chiah ia̍h bô phah--tio̍h. Cha̍p-jı̄-ge̍h-thiⁿ koâⁿ-kiuh-kiuh, tang-hong it-tı̍t chhe, o͘-im-o͘-im ê thiⁿ-téng khai-sí tih lo̍h-seh, thiⁿ-sek soah jú-lâi-jú àm, goá chiah hoat-hiān í-keng chhē bô lō͘--a. Goá sı̀-koè sûn-sûn khoàⁿ-khoàⁿ--leh, chı̍t-tiám-á lâng-iáⁿ mā bô.
Goá sim-lāi tih siūⁿ : " An lah ! goá it-tēng ài kè-sio̍k kiâⁿ, bô-tek-khak koh kè bô goā-kú, to̍h ē-tàng tú-tio̍h jı̂n-ke. " Goá ná chiong chhèng siu--khí-lâi, ná kè-sio̍k kiâⁿ-lō͘.
Seh lo̍h chin toā, thiⁿ-khı̀ jú-lâi-jú koâⁿ, thiⁿ-sek nia-mi to̍h tńg àm. Goá í-keng kiâⁿ kui kang--a, chū chá-tǹg liáu-āu, to̍h m̄-pat chia̍h kè mı̍h-kiāⁿ, chit-má m̄-nā thiám, jı̂-chhiáⁿ koh put-chí-á iau. Chit-ê sı̂-chūn, goá khai-sí tih su-liām goá-ê ài-chhe, i chit-má tı̄-leh chng-kha ê chı̍t-keng lú-koán. Goá siūⁿ, i it-tēng ē chiok hoân-ló goá-ê an-choân, in-ūi goá ū tap-èng beh tı̄ jı̍t-thâu-lo̍h-soaⁿ chı̀n-chêng to̍h tńg--khı̀. Chit-má, goá goā-nı̍h-á hi-bāng ē-tàng chun-chiàu chit-ê iok-sok !
Goán chiah kiat-hun sı̀-kò-ge̍h niâ, thn̂g-kam-bı̍t-tiⁿ, hui-siông un-ài, jı̍t-chí mā chin khoài-lo̍k kè. Goá bô-ài i ūi goá lâi hoân-ló !
Goá koh tùi ka-kı̄ kóng : " Bô-iàu-kín ! Bô-tek-khak nia-mi to̍h ē chhē-tio̍h chı̍t-ê thang-hó hioh-khùn ê só͘-chāi, mā khó-lêng ē tú-tio̍h lâng, i ē chí-tiám goá tńg-khı̀ lú-koán ê lō͘, nā ān--ne, goá to̍h ē-sái tı̄ poàⁿ-mı̂ chı̀n-chêng tńg-khı̀ kàu goán ài-chhe ê sin-khu-piⁿ.
Seh kè-sio̍k tih lo̍h, thiⁿ jú-lâi-jú àm, múi kiâⁿ kúi pō͘ lō͘, goá lóng ē thêng-khùn lo̍h-lâi hoah--chı̍t-ē, khoàⁿ ū-lâng ē-tàng hoat-hiān goá bô. m̄-koh, tı̄ chit-ê hong-kau-iá-goā, goá kan-na thiaⁿ-tio̍h hong hiù-hiù-kiò. Goá khai-sí tih hoân-ló, tih kín-tiuⁿ--a. goá pat tha̍k kè chı̍t phiⁿ sió-soat, tih kóng chı̍t-ê lú-hêng ê-lâng, tı̄ toā seh tiong chhē bô lō͘, kiat-kó i kiâⁿ kàu thiám kah kiâⁿ boē tín-tāng ûi-chí, i to̍h chē--lo̍h-lâi, jı̂-chhiáⁿ khùn--khı̀, chū ān--ne bô koh-chài cheng-sı̂n...
Goá kā ka-kı̄ kóng : " Chit-khoán tāi-chı̀ choa̍t-tùi boē hoat-seng tı̄ goá sin-khu-téng, goá boē-sái sí--khı̀, iah-koh ū chin-choē tāi-chı̀ ài choè, nā-chún sit-khı̀ goá, goán khó-liân ê ài-chhe beh án-noá ?... Goá kín chiong chit-koá khióng-pò͘ ê siūⁿ-hoat koáⁿ cháu.
Goá toā-siaⁿ hoah, kı̂-thāi ū-lâng ı̀n-siaⁿ. Āu--lâi, tû-liáu pi-siong, chhe-liâng ê hong-siaⁿ í-goā, goá ná-chhiūⁿ thiaⁿ-tio̍h hn̄g-hn̄g ê só͘-chāi mā ū-lâng tih hoah ; goá hoah koh-khah toā-siaⁿ, goá siūⁿ, í-keng ū-lâng kā-goá hoê-èng--a. Liáu-āu, tı̄ o͘-àm tiong, chhut-hiān chı̍t-si-á kng-soàⁿ, kiâⁿ jú oá, to̍h jú-lâi-jú kng, goá chin hoaⁿ-hí, cháu--kè-khı̀. lo̍h-bé, tú-tio̍h chı̍t-ê lāu-hè-á, i gia̍h chı̍t-ki chhàu-iû-teng.
"Thiⁿ-kong-peh--á pó-pı̀ ! " goá kám-tōng kah ba̍k-sái lı̀n-lı̀n-kô, chin-chiàⁿ hoaⁿ-hí ē-tàng tn̄g-tio̍h i.
M̄-koh, i khoàⁿ--khí-lâi ná-chhiūⁿ bô-siáⁿ hoan-gêng goá. I chhàu-iû-teng gia̍h koân, it-tı̍t kā-goá gı̂n.
"Lí tih kám-siā siáⁿ-mé ? " I ê thài-tō͘ chin léng-tām.
"Ouh, goá-sı̄ in-ūi tı̄ chiâ tú-tio̍h lí, chiah lâi kám-siā thiⁿ-kong-peh--á ê pó-pı̀. Goá chin kiaⁿ goá tı̄ toā-hong-seh tong-tiong se̍h boē chhut--khı̀. "
"Lí beh khı̀ tó-ūi ? "
"Tó͘-tèng(Dwoldeng). " Goá mn̄g i : " Lı̂ chiâ goā hn̄g ? "
Chit-ê lāu-hè-á kóng : " Chha-put-to saⁿ-cha̍p-kúi khí-lò. Ia̍h to̍h-sı̄ kóng, lí í-keng kiâⁿ m̄-tio̍h lō͘--a. "
"A ! Taⁿ hāi--a... Nā ān--ne, chiâ lı̄ tó chı̍t-ê chng-thâu siōng kūn ? "
"Siōng kūn ê chng-thâu sı̄ Oài-khù(Wyke), lı̄ chiâ mā-ū jı̄-cha̍p khí-lò chó-iū. "
"... kám ē-sái chhiáⁿ-mn̄g, m̄-chai-iáⁿ lí toà tó-ūi ? "
I chiong chhàu-iû-teng gia̍h khí-lâi pí : " hiâ ! "
" Só͘-í, nia-mi lí beh tńg--khı̀ ? "
" Bô-tek-khak. "
" Ān--ne, chhiáⁿ lí ún-chún goá tè lí tńg--khı̀. "
" Ān--ne kám thang ? " Chit-ê lāu-hè-á ná hàiⁿ-thâu ná kóng : " i boē hō͘-lí jı̍p--khı̀. "
" Boē lah ! Goá siong-sı̀n i ē hō͘-goá jı̍p--khı̀... chhiáⁿ-mn̄g i sı̄ siáⁿ-lâng ? "
" Goán chú-lâng. "
" Lí-ê chú-lâng sı̄ siáng ? "
" Lí koán hiah choē ! " I phái-chhèng-chhèng.
" Sit-lé sit-lé... Nā-bô, chhiáⁿ lí chhoā goá khı̀, goá siong-sı̀n lí-ê chú-lâng ē thê-kiong goá hioh-khùn kah chhiáⁿ goá chia̍h àm-tǹg. "
" Sûi-chāi lí, m̄-koh goá siūⁿ, i boē lah, chóng--sı̄ lí ū koân-lı̄ iau-kiû i. " I thâu hàiⁿ--chı̍t-ē, ná khai-sí kiâⁿ.
Tı̄ toā-seh tiong, goá tè i chhàu-iû-teng ê kng-soàⁿ kiâⁿ. Hut-jiân kan, goá khoàⁿ-tio̍h chı̍t-ê o͘-iáⁿ, chı̍t chiah toā-káu cháu--kè-lâi, tı̍t-tı̍t tùi goá pūi.
"Cháu ! kok-ông ! " Lāu-hè-á tih hoah.
Goá kā mn̄g : " kám to̍h-sı̄ chit-keng ? "
" Hàⁿ-nò͘, to̍h-sı̄ chit-keng..., Kok-ông, lí kā-goá lo̍h--khı̀ ! " i ùi lak-tē-á gı̂m só-sı̂.
Chit-ê toā-mn̂g chin tāng-thâu, khoàⁿ--khí-lâi ná-chhiūⁿ chı̍t keng kàm-ga̍k. Lāu-hè-á chiong mn̂g phah-khui, chit-ê sı̂-chūn, goá chhē-tio̍h ki-hoē--a, sûi kā-i sak--khui, chông-jı̍p-khı̀ chhù lāi-toé.
