Kı̀-liām Kai Bo̍k-su ê Si
1. Sèng Sı̂n kàng-lı̂m tı̄ Kai Joē-lí,
Chú-āu it-pat-ngó͘-sam liâm sı̂;
Sui-jiân i sı̄ cha̍p-hè gín-ná,
Siū Sèng Sı̂n liáu-āu chiū hó-táⁿ.
Kı̀-tit Chú bēng-lēng chiū koat-sim,
Beh khı̀ phó͘-thiⁿ-ē thoân Hok-im;
I keng-kè saⁿ-sı̀ keng tāi-ha̍k,
Ūi-tio̍h Chú ta̍k-sı̂ jı̄n-chin tha̍k.
Chún-pı̄ hiàn hō͘ Chú choè khı̀-khū,
Lūn tı̀-hūi kap kháu-châi lóng ū;
Hit-sı̂ Bú-hoē khoàⁿ i chin khí,
Phài i khı̀ ı̄ⁿ-pang thoân tō-lí.
Kai Joē-lí ê sim-koaⁿ pek-chhiat,
Chiū kap i ê chhin-cho̍k lı̄-pia̍t;
It-pat-chhit-it nı̂ ê sı̂-tāi,
Tah chûn lâi kàu Tang-iûⁿ só͘-chāi.
Thài chai Tâi-oân Pak-pō͘ tē-hng;
Peh-sı̀ⁿ lóng bô chiò-tio̍h chin kng;
Ta̍k lâng gûi-hiám teh-beh tı̂m-lûn,
I koat-ı̀ lâi chín-kiù lêng hûn.
Lí Bo̍k-su chhoā i kàu Tām-súi,
I sàng i kàu Toā-siā hit-ūi;
Tńg kàu Tām-súi sı̀-ge̍h chhe-la̍k,
Chhut-la̍t chio hó ha̍k-seng lâi tha̍k.
2. Lūn Kai Joē-lí i ê choè lâng,
Sı̀n-gióng kian-kò͘ m̄-bat iô-tāng;
Sui-jiân tú-tio̍h sı̀ⁿ-miā gûi-hiám,
Hó-táⁿ ūi Chú choè kang m̄ siám.
Kà-sı̄ ha̍k-seng kiam sûn kàu-hoē,
Chı̄n-la̍t choè, bô hiâm sū-bū choē;
Hioh-khùn ê sı̂ i chiū khoàⁿ chheh,
Kiaⁿ kà pa̍t-lâng ka-kı̄ khiàm-kheh.
Kai Joē-lí ke̍k-kı̂ ū jı̂n-ài,
Siông-siông khoà-lū pa̍t lâng ê tāi;
Ka-kı̄ khek-khó͘ pang-chān pa̍t lâng,
M̄-ài miâ-siaⁿ kap Chú saⁿ-tâng.
Iā bat i-su̍t kiù-tı̄ pı̄ⁿ-lâng,
I gâu tông-chêng in ê khó͘-thàng;
Chit-khoán chhut-la̍t thian-kok Keng-êng.
Kiàn-siat pài-tn̂g gō͘-cha̍p-la̍k keng.
Ū khui i-koán, siu-iông hoān-chiá,
Si-liâu hó io̍h, hō͘ lâng lâi niá;
Iā khí ha̍k-hāu ióng-sêng jı̂n-châi,
Ūi Chú lō͘-ēng chhut-khı̀ saⁿ-thâi.
It-kiú-khòng-it nı̂ Ia̍k-ge̍h jı̄, Siōng-tè tiàu Kai Joē-lí kui I; Siat-kàu chı̀ kim ū la̍k-cha̍p nı̂, Tui-liām i khó͘-sim thoân tō-lí.
[Koà-chhài-chí Tē 77 hō (Tâi-oân Kàu-hoē-pò Tē 567 hō, 1932 nı̂ 6 ge̍h]
