Kı̀-liām Sūi-hūi Tē-it tāi ê Sı̀n-tô͘--Kò͘ Tiuⁿ Thô͘-kui hiaⁿ

Só͘ siàu-liām ê Thô͘-kui hiaⁿ, tı̄ Bûn-san-kūn toē-hng chhut-sı̀, sı̄ Hok-kiàn-jı̂n, chit-gia̍p sı̄ lông-gia̍p kap cha̍p-hoè, choè piáⁿ ê seng-lí. Jı̄-cha̍p-it hoè ê sı̂, kap Lí--sı̄ Îⁿ chí kiat-hun. In sı̄ ho̍k-sāi cha̍p-sı̂n kàu, ū choán-ki lâi Sūi-hūi-chhoan 38 nı̂ kú, tı̄ Chiau-hô 9 nı̂ 2 ge̍h tiong, thiaⁿ-tio̍h Ki-tok-kàu, hoaⁿ-hí lâi sı̀n Chú Iâ-so͘, pek-chhiat kı̂-tó, i ê kha ū siⁿ lia̍p-á 33 nı̂ kú, tit Chú ê un-tián oân-choân hó. Chiau-hô 9 nı̂ 8 ge̍h 12 jı̍t, in ang-bó͘ kap Lı̂m--sı̄ Phín chí, N̂g Pún-lâi hiaⁿ, N̂g--sı̄ Chhun-hoe chí, Tân Sûn-sûi hiaⁿ, 6 lâng choè-tı̄n khı̀ Gio̍k-lí kàu-hoē niá soé-lé. Ài ū chı̍t ê só͘-chāi thang ho̍k-sāi Siōng-tè, chiū chiong i ê toā-thiaⁿ hiàn choè chı̍p-hoē-só͘; N̂g Pún-lâi hiaⁿ ê chhù, hiàn 3 keng choè siok-sià, ū kap pa̍t-ūi ı̂-kı̍p khı̀ hia toà ê Ki-tok-tô͘ chham-siông, lâi pín-chhéng Thoân-tō-kio̍k phài chı̍t ê sian-siⁿ tı̄-hia thoân Hok-im. Lūn Káng-gı̄-só͘, siok-sià, cha̍p-hùi, in beh hū-tam. Tı̄ Chiau-hô 10 nı̂ 4 ge̍h 3 jı̍t, Thoân-tō-kio̍k bēng-lēng siáu-seng khı̀ tiàm hia thoân Ho̍k-im, Thô͘-kui hiaⁿ in ang-bó͘, kap í-goā ê sı̀n-tô͘, siông-siông tùi kò-jı̂n chèng-bêng tō-lí, lâi sı̀n Chú--ê ū ná ke-thiⁿ. Thô͘-kui hiaⁿ, Lí--sı̄ Îⁿ chí, N̂g Pún-lâi hiaⁿ, bat tú-tio̍h pek-hāi, ū siū-siong, iā bô sit-chı̀, ióng-kám sı̀n-khò Ki-tok, khı̀-sak siâ-kàu, ūi-tio̍h Sèng-hoē ài hō͘ i hoat-tián, hoaⁿ-hí chhut chı̂ⁿ, chhut kang, tàu kó͘-bú. Tı̄ Chiau-hô 10 nı̂ 11 ge̍h 14 àm khí, ló-ek-hiat pı̄ⁿ, 15 jı̍t ē-po͘ 6 tiám kui thian, bı̄n-iông hó khoàⁿ, 18 jı̍t ē-po͘ nn̄g-tiám choè kò-pia̍t-sek. (Tâi-oân Kàu-hoē Kong-pò tē 616 hō, 1936 nı̂ 7 ge̍h)