Kı̂-koài ê ı̀n-tap

Khah-chá ū chı̍t-ê sı̀n Chú ê lâng, i sı̄ chò ún-ki ê tha̍k-chheh lâng, lóng bô ài chhap sio̍k-sū. Tú--tio̍h bó͘-jı̍t chı̍t-ê lâng-kheh lâi thàm--i. Hit-ê lâng-kheh chiū mn̄g i kóng, Lí sı̄ pài Siōng-tè ê lâng ho͘hN? Ìn kóng, Chiàⁿ-sı̄. Lâng-kheh chiū koh kóng, chiàu lín pài Siōng-tè ê lâng teh kóng, “Thiⁿ-tē-kan chí-ū chı̍t-ê Siōng-tè ta̍k só͘-chāi tı̄-teh”. Nā sı̄ goá lóng m̄ bat khoàⁿ-tio̍h Siōng-tè, chiah m̄-ài sı̀n; chhiáⁿ lí chhoā goá khı̀ khoàⁿ chiū beh sı̀n lah.

Hit-ê sı̀n Chú ê lâng chēng-chēng bô ı̀n. Thêng-chı̍t-ē chiū àⁿ-lo̍h thô͘-kha khioh chı̍t-tè thô͘-oân, tùi hit-ê lâng- kheh ê thâu-khak chhut toā-la̍t chiū kā i tı̀m-lo̍h-khı̀. Hit-ê lâng-kheh hō͘ i tı̀m-tio̍h thiàⁿ, chiū toā siū-khı̀, tùi koaⁿ- hú khı̀ kò.

Koaⁿ-hú chiū chek-sı̂ khı̀ tiàu hit-ê sı̀n Chú ê tha̍k-chheh lâng lâi mn̄g i kóng, I chhéng-káu, lí kı̀-jiân m̄ ı̀n--i, chiū siáⁿ-sū hoán tńg ēng thô͘-oân tı̀m-- i, he ū sím-mı̍h chêng-lí ah? Hit-tia̍p hit ê sı̀n Chú ê tha̍k-chheh lâng, khài- jiân khài-jiân tùi koaⁿ-hú ê bı̄n-chêng ı̀n kóng, Goá ēng thô͘-oân tı̀m i-ê thâu- khak, chiū-sı̄ teh ı̀n-tap i só͘ mn̄g. Lūn thâu-khak tı̀m--tio̍h ē thiàⁿ, chit- hō sı̄ lâng-lâng só͘ sı̀n, só͘ chai ê chêng- lí; m̄-kú bô lâng bat khoàⁿ--tio̍h hit-ê thiàⁿ seⁿ-chò án-cháiⁿ iūⁿ. Iā lóng bô chı̍t- lâng káⁿ-kóng, thiàⁿ bô khoàⁿ-kı̀ⁿ bô iáⁿ ū thiàⁿ. Án-ni Siōng-tè sı̄ Sı̂n, bô-hêng bô-siōng, éng-lêng sèng-thé, bû-só͘ put- chāi. Tùi kó͘-chá-í-lâi bô lâng bat khoàⁿ- tio̍h. Nā sı̄ tùi Siōng-tè só͘ chhòng-chō ê thiⁿ-tē bān-mı̍h, thang chai ū chı̍t-ê Siōng-tè. Che sı̄ chū-jiân ê lí-khı̀, bô thang piān-pok. Tek-khak m̄-thang in- ūi ba̍k-chiu bô khoàⁿ-kı̀ⁿ, soà m̄ sı̀n, chiū ke̍k toā chha-biū.

Koaⁿ-hú thiaⁿ-liáu kı̂-koài i só͘ ı̀n-tap, Lia̍h i-ê oē sı̄ tio̍h. Lâng-khek kiàn-siàu chiū khı̀.

(Tâi-lâm Hú-siâⁿ Kàu-hoē-pò tē 150 koàn, 1897 nı̂ 9 ge̍h)