Kı̂-thāi
Beh 60 hoè--a, i ta̍k-kang iû-goân thàu-chá 6-tiám-poàⁿ tō chhut-mn̂g, thang hó hù tı̄ 7-tiám chı̀n-chêng kàu kong-si, àm-sı̂ mā lóng tio̍h koè 7-tiám liáu-āu, chiah ē-tàng hā-pan tńg chhù chia̍h-pn̄g. Tı̄ chit-keng hoè-ūn kong-si chia̍h thâu-lō͘ beh oá 25 tang--a, ùi sái-chhia ùn-chiàng kàu chit-má seng kàu khò- tiúⁿ ê chit-bū, kang-chok sı̂-kan soah pí koè-khı̀ koh khah tn̂g, poàⁿ-mı̂ put-sı̂ koh ē chiap tio̍h tiān-oē, sūi-sı̂ to ài chún-pı̄ chhut-mn̂g chhú-lí kong-sū. Kúi goe̍h-jı̍t chêng, kong-si ùi Jı̍t-pún chhiàⁿ 3-ê “kò͘-būn” lâi, kóng beh chéng-tùn kong-si ê keng-êng. Chit 3-ê Jı̍t-pún kò͘-būn lâi kàu tè, tō tēng chin chē sin kui-tēng, te̍k-pia̍t sı̄ koán-lí kàn-pō͘, lóng hông iàu-kiû thàu-chá 7-tiám tō ài kàu kong-si, àm-sı̂ iáu-boē koè 7-tiám bē-tàng lı̄-khui kong-si, ài kā kong-si tòng-chò “chhù” kāng-khoán khoàⁿ-thāi. Kū-nı̂, chèng-hú soan-pò͘ “kun kong kàu ùi kin-nı̂ khai-sí 1 lé-pài hioh 2-kang”, kong-si pún-té mā soan-pò͘『比照辦理』. M̄-koh, Jı̍t-pún kò͘-būn lâi kàu chia, m̄-tāⁿ bô thang 1 lé-pài hioh 2-kang, lé-pài koh tiāⁿ-tiāⁿ ài lı̂m-sı̂ khı̀ kong-si chhú-lí tāi-chı̀, pêng-siông-sı̂-á siōng-pan ê sı̂-kan mā piàn-tn̂g, ke--chhut-lâi-ê lóng bô sǹg sı̄ “ka-pan”, Jı̍t-pún kò͘-būn kóng “nā ū kā kong-si tòng-chò ka-tı̄ ê chhù, seⁿ-sêng ài hù-chhut chit-koá khùi-la̍t!” I ū kúi-lō-ê 20 goā tang ê lāu tông-sū, koh bô joā kú tō ē-sái pān thè-hiu--a, choè-kı̄n soah 1-ê 1-ê hō͘ kong-si sı̂ thâu-lō͘, i kang-chok lêng-le̍k khah kiông chiah hông lâu--lo̍h-lâi, m̄-koh khang-khoè-liōng soah lú lâi lú tāng. In tı̄ kong-si lāi-té mā ū cho͘ kang-hoē, m̄-koh kang-hoē ū ná bô--leh, ū siáⁿ-mih lō͘-iōng? pn̄g-oáⁿ chóng--sı̄ khah tiōng-iàu, tō sǹg sı̄ kang-hoē kàn-pō͘, mā kan-taⁿ ē-tàng tiām-tiām phoè-ha̍p kong-si ê “chí-sı̄”. I sim-koaⁿ-té chiâⁿ m̄ kam-goān, m̄- koh chhùi-khí-kin kā--leh, mā tio̍h ngē thun-lún--lo̍h-lâi, i iû-goân khoà-liām i ê hāu-siⁿ. I 2-ê hāu-siⁿ lóng tāi-ha̍k chhut-gia̍p--a, mā lóng thè-ngó͘--a, m̄-koh thâu-lō͘ iáu-bē ún-tēng, mā lóng iáu-bē sêng-ke, i chit-ê thâu-lō͘, siōng bô mā koh ū ún-tēng ê siu-jı̍p thang ı̂-chhı̂ ka-têng. Tú-tio̍h lú lâi lú chē bô ha̍p-lí ê iàu-kiû, tông-sū ke-kiám ē put-boán, Jı̍t-pún kò͘-būn chóng--sı̄ án-ne khau-sé: “Lín Tâi-oân-lâng nah lóng chiah-nı̄ pháiⁿ khoán-thāi?” Piān-nā thiaⁿ-tio̍h Jı̍t-pún kò͘-būn án-ne teh siau-khián Tâi-oân-lâng, i chóng--sı̄ chiâⁿ bē-sóng, sui-bóng koè-khı̀ tiāⁿ-tiāⁿ thè tông-sū chhut-thâu, m̄-koh chit-má i mā bô hiah-ê Jı̍t-pún-á hoat-tō͘, kan-taⁿ ē-tàng ı̀n kóng: “Goán Tâi-oân-lâng chiah m̄ sı̄ án-ne--leh!” I tùi hiān-sı̍t bô siáⁿ-mih kı̂-thāi--a, ùi koè-khı̀ tóng-goā sı̂-tāi khai-sí, i tō it-tı̍t chi-chhı̂ giâ chhiⁿ-kı̂-á--ê, chit-má i chi-chhı̂ ê lâng cho͘-sêng sin chèng-hú--a, i soah tian-tò kám-kak ka-tı̄ lú lâi lú bô-la̍t kái-piàn siáⁿ-mih. I iû-goân ē koan-sim tiān-sı̄ pò-choá téng-thâu ê chèng-tı̄-tāi, m̄-koh sim-koaⁿ-té chá tō khoàⁿ-phoà chèng-kheh ê kha-chhiú, i kan-kaⁿ koh ū tām-po̍h-á kı̂-thāi, kı̂-thāi chit-chióng bô kong-pêⁿ ê siā-hoē, koh ē ū ki-hoē thang kái-piàn, kı̂-thāi i ê 2-ê hāu-siⁿ m̄-bián chhiūⁿ i kāng-khoán hō͘ lâng chau-that! (TGB Thong-sı̀n tē 21 kı̂, 2001 nı̂ 6 goe̍h)