Ka-sin
10 goe̍h-chhoe, thiⁿ-khı̀ khah bô hiah hip hiah sio-joa̍h--a, tiàm--nih mā bô téng goe̍h-jı̍t hiah-nı̄ bô-êng chhih-chhah, m̄-koh tn̄g-tio̍h goe̍h-té kiat-siàu, A-hōng mā sı̄ ta̍k-àm ka-pan, kín beh kā siàu-toaⁿ chéng-lí hó-sè, thang hó sàng hō͘ thâu-ke khui-phiò. Eng-àm chhit-peh tiám-á hia, A-hōng tú kā chhiú-thâu ê khang-khoè chhú-lí soah, tō khoàⁿ-tio̍h thâu-ke mo͘h chı̍t-siuⁿ chheh kiâⁿ--jı̍p-lâi, kau-tài chı̍t-koá tāi-chı̀ soah tō àn-sǹg beh cháu--a, A-hōng thàn ki-hoē kap thâu-ke chò-hoé kiâⁿ--chhut-khı̀, ū kúi-hāng tāi-chı̀ ài chhoē i chham-siông. Téng goe̍h-jı̍t khang-khoè-liōng toā kah kiaⁿ--lâng, ta̍k ê kang-chok jı̂n-oân lóng chih-chài bē tiâu, ū chı̍t-ê lāu-chiáu bē kham-tit ap-le̍k siuⁿ toā, ka-tı̄ koh tio̍h chún-pı̄ khó-chhı̀, í-keng bô chò--a, koh lâu--leh ê lâng, kui-kang teh chhá beh ka-sin, bô, hioh-khùn-jı̍t ê sin-súi mā tio̍h ke khah koân--koá, A-hōng chai-iáⁿ ta̍k-ê lóng chò kah chiâⁿ piàⁿ-miā, ū kháu-thâu ín in kóng ē kā thâu-ke cheng-chhú khoàⁿ-māi. A-hōng in chit-keng tiàm kang-chok jı̂n-oân ê khí-sin pún-té tō ke khah kē, m̄-koh chı̍t-siaⁿ beh kiò thâu-ke kā ta̍k-ê lóng ka-sin, pah-hun chi nn̄g-pah bô khó-lêng, m̄-chiah A-hōng kā thâu-ke kóng hioh-khùn-jı̍t ê pan khoàⁿ ē-tàng ke khah chē chı̂ⁿ--bô, án-ne lâng khah beh lâi siōng, bô, te̍k-pia̍t sı̄ liân-soà ká-jı̍t ê pan lóng chhoē bô lâng beh siōng, koh-chài kóng, chóng-kong-si hit-pêng ê chè-tō͘ ū ká-jı̍t ka-sin chit-tiâu. Thâu-ke thiaⁿ--tio̍h sûi hàiⁿ-thâu kóng bē-sái, i kóng chia chı̍t-tiám-cheng ê sin-súi 75~90 kho͘ í-keng chiok koân--a, liân chóng-kong-si hit-pêng ê kang-tho̍k-seng mā toè leh tiâu kàu 75~90 kho͘, pún-té chóng-kong-si ê kang-tho̍k-seng ká-jı̍t ū ke khah chē chı̂ⁿ, sı̄ in-ūi in ê sin-súi sı̄ 60 kho͘ khí-thiàu chiah ū, chit-má sin-súi tiâu koân, só͘-í i kā ká-jı̍t ka-sin chhú-siau--a. Thâu-ke koh kā A-hōng kóng bē-sái in boài siōng ká-jı̍t-pan tō choaⁿ-á bô pâi, ngē chhiâu mā ài chhiâu--chhut-lâi, bô, tō-sı̄ ta̍k-ê lûn-liû, kai siáng siōng ê pan tō siáng ài siōng, boài--ê, hit-ê lâng tō mài chò, lán koh chhoē mā ū lâng. Koè 2~3 kang, chóng-kong-si ê Hok-chek--á lâi tı̄ tiàm--nih tàu-saⁿ-kāng, i ū thiaⁿ thâu-ke teh náu kóng chit-hāng tāi-chı̀, tiong-tàu hioh-khùn ê sı̂ i kap A-hōng kóng-tio̍h che, i kiàn-gı̄ A-hōng ài ū chò tiàm-tiúⁿ ê ui-giâm kap pān-sè, m̄-thang kang-tho̍k-seng hoah beh ka-sin tō thè in cheng-chhú, i jı̄n-ūi chò tiàm-tiúⁿ ê lâng ài thè kong-si siat-sióng, thè kong-si séng sêng-pún chiah tio̍h. A-hōng thiaⁿ chı̍t-ē chiâⁿ bē-sóng, bô siáⁿ hó siaⁿ-sàu ı̀n-kóng i jı̄n-ūi chit-ê iau-kiû sı̄ ha̍p-lí--ê, m̄-chiah ē thè lâng cheng-chhú, m̄-koh Hok-chek--á thiaⁿ-liáu mā sı̄ bô siáⁿ beh chiap-siū ê khoán. Hok-chek--á tı̄ chóng-kong-si chò beh la̍k-tang--a, sı̄ ûi-it chu-chhim ê oân-kang, i ka-tı̄ mā tùi kong-si ê chè-tō͘ hām hok-lı̄ chiâⁿ put-boán, mā bat kā A-hōng kóng thâu-ke tùi oân-kang ê hok-lı̄ sı̄ jú-lâi-jú khok-hêng, tı̄ hia chò bô chiân-tô͘. Hit-chūn A-hōng iáu tı̄ chóng-kong-si ê sı̂, tông-sū chi-kan lóng ē thó-lūn kóng beh án-choáⁿ kā thâu-ke cheng-chhú hok-lı̄, A-hōng siūⁿ bô sı̄ án-choáⁿ chit-má oāⁿ-chò sı̄ kang-tho̍k-seng beh iau-kiû eng-kai ū ê hok-lı̄, chò choân-chit--ê soah piàn-chò kap thâu-ke khiā kāng-pêng teh kā lâng ah? Ta̍k-ê pêⁿ-pêⁿ sı̄ chia̍h lâng thâu-lō͘ niá lâng sin-súi--ê, cheng-chha chı̍t-ê niá goe̍h-kip, chı̍t-ê sǹg tiám-cheng--ê, nah ē hit-tiâu soàⁿ oē kah chiah chheng-chhó͘? Chóng-kong-si ê lâng lâi-lâi khı̀-khı̀, liû-tōng-lu̍t koân, tō-sı̄ chè-tō͘ bô hó hok-lı̄ bô hó chiah lâu lâng bē tiâu, chit-má A-hōng toà--ê chit-keng hun-tiàm, kan-taⁿ A-hōng chı̍t-ê choân-chit, kı̂-thaⁿ lóng sı̄ kang-tho̍k-seng, nā bô hiah-ê kang-tho̍k-seng, kan-taⁿ khò chı̍t-ê choân-chit, tiàm kám khui ē sêng? Tùi thâu-ke lâi kóng, ká-jı̍t ka 5 kho͘ 10 kho͘ bē cheng-ka joā chē sêng-pún, lâng chò--khí-lâi khi-mo͘-chih ke chiâⁿ-sóng, mā khah lâu lâng ē tiâu, án-ne mā bô thang? A-hōng jú siūⁿ jú siān, jú chò jú ià--a. (TGB Thong-sı̀n tē 74 kı̂, 2005 nı̂ 11 goe̍h)