Kam-chià peh

 Goán tau chhù-piⁿ ū chı̍t-ê, lâng-lâng kiò i Kam-chià-peh. 
  Kin-nı̂ tú koè la̍k-cha̍p hoè, chò lâng sim-sek bô teh[tè] chhoē. 
  Sui-jiân chia̍h kah chhùi-chhiu pe̍h, iû-goân chin ài kóng chhiò-khoe. 
  Chng lāi bô-lūn toā kap sè, ta̍k-ê kap lâng hó chò-hoé. 
 Tú-tú chhin-chhiūⁿ i ê miâ, Tâi-oân chhut ê hó kam-chià. 
  Chı̍t-ki m̄ bián loā-choē chı̂ⁿ, pō͘ jı̍p chhùi lāi siang-thâu tiⁿ. 
  Thian-seng chı̍t-hù toā nâ-âu, lâng iáu boē kàu siaⁿ seng kàu. 
  I tı̄ téng-chhù teh phò-tāu, ē-chhù thong lâng chai liáu-liáu. 
 Goán tau chhù-piⁿ ū chı̍t-ê, lâng-lâng kiò i Kam-chià-peh. 
  Kin-nı̂ tú koè la̍k-cha̍p hoè, sin-khu ióng-kiāⁿ bô teh[tè] chhoē. 
  Sui-jiân thâu-mn̂g ū khah se, kóng-oē ná chún ho͘ⁿ chúi-lê. 
  Bô-lūn peh koân á peh kē, kha-chhiú bô su siàu-liân-ke. 
 Lí ū tāi-chı̀ lâi chhoē i, chò oē kàu ê m̄ bat sı̂. 
  Chhù-téng phoà-khang hō͘ teh tih, chı̍t-pái pau lí hó-lı̄-lı̄. 
  Gín-á tńg-chiâⁿ hó io-chhı̄, i ū pı̀-hng chı̍t-toā-tui. 
  Siàu-liân loân-ài pēⁿ-siūⁿ-si, chhoē i khui-thiah sim-hoe khui. 
 Goán tau chhù-piⁿ ū chı̍t-ê, lâng-lâng kiò i Kam-chià-peh. 
  Kin-nı̂ tú koè la̍k-cha̍p hoè, chò lâng sóng-khoài bô teh[tè] chhoē. 
  Sui-jiân ke-hoé bô loā choē, put-sı̂ tō teh chhiáⁿ lâng-kheh. 
  Téng-jı̍t in sun tú chò “Moá-goe̍h”, kin-á-jı̍t tō siūⁿ beh chò “Tō͘-chè.” 
 Lâng mn̄g kóng:“Lín sun ná oē hiah gâu toā.” 
  I ı̀n kóng: “Kín chò-chò-lè kín khùiⁿ-oa̍h! 
  Mı̍h-kiāⁿ chhian-bān m̄ thang khǹg, khǹg kú chū-jiân oē chhàu-sng. 
  Chheng-chheng-lè hē tiàm pak-tó͘ lāi, 
  Beh sí mā tō chò pá-kúi chiah thang kng khı̀ tâi!”

(Tâi-oân Kàu-hò7 Kong-pò tē 2083 kı̂, 1992 nı̂ 1 goe̍h)