Tāi-tē teh iô,
Iô tı̄ lo̍h-bı̂n ê àm-mı̂,
Tùi bı̂n-bāng tiong siū kiò chhíⁿ,
Bû-giân hâm-lūi lâi mn̄g thiⁿ,
Sin-piⁿ ê chhin-lâng, cháu tùi tó-ūi khı̀,
Phò-chhùi ê ka-hn̂g, siáⁿ sı̂ oē koh khí,
Thô͘-chio̍h-liû sé koè ê san-hô,
Choáⁿ-iūⁿ phı̄ⁿ chı̄n tham-lâm ê chhàu-bı̄.
Chiàn-hoé teh to̍h,
To̍h tı̄ tà-bông ê sè-kí,
Tùi ke̍k bûn-bêng ê piau-chı̀,
Ba̍k-chiu kim-kim lán khoàⁿ-kı̀ⁿ,
Oàn-hūn ê hân-liû, chhian poé poé boē lı̄,
Siâ-ok ê loat kin, chhù-chhù iā chéng-chí,
Ian-bū tiong chiâⁿ hêng ê sat-tàn,
Sûi hong chhiàu chı̄n jı̂n-sèng ê bû-ti.
Tō-tek ê bê-hâng,
Sim-lêng ê hi-khang,
Tāi-tē ēng lân gô ê khó͘-thàng,
Iô chhíⁿ lán teh khùn ê bı̂n-bāng,
Tham-lâm sim tiong pàng,
Oàn-hūn koaiⁿ jı̍p láng,
Kiâⁿ chhut chêng-io̍k ê lô-bāng,
Kap chhun-hong chò-hoé ngiâ-chih nı̂-tang.
(Gân Sı̀n-seng Tâi-gí Bûn-ha̍k soán, 2002 nı̂ Chin-pêng Khı̀-gia̍p Chhut-pán)
