Ke-thúi ê Chu-bı̄
Ke-thúi sı̄ goá chı̍t-sı̀-lâng siōng ià-siān ê chia̍h-mı̍h, in-ūi i tāi-piáu--ê sı̄ goá sè-hàn tit bē tio̍h ê thiàⁿ kap siū-siong ê thiàⁿ. Ta̍k pái koè-nı̂ koè-chiat, khoàⁿ-tio̍h a-bú koh teh thâi-ke thâi-ah khoán seng-lé teh pài, tō ē hō͘ goá siūⁿ-tio̍h khah-chá chin chē tāi-chı̀. Te̍k-pia̍t sı̄ a-bú nā khai-sí khû tı̄ chàu-kha teh tok ke-á ah-á ê sı̂, goá ê sim-chêng tō bē pêng-chēng. Sè-hàn ê sı̂, a-bú lóng sı̄ kā ke-thúi giâ hō͘ sió-tı̄ (lēng-goā chı̍t-ki sı̄ lâu hō͘ a-kong chia̍h), kiò goá chia̍h sı̍t-kò͘. Khut-kiông ê goá ūi-tio̍h chı̍t-ki ke-thúi siū-chı̄n úi-khut kap put-ho̍k. Goá kan-taⁿ sı̄ siūⁿ bô sı̄ án-choáⁿ cha-po͘--ê chiah ē-tàng chia̍h ke-thúi , cha-bó͘ gín-á tio̍h-ài jı̄n pún-hūn. Goá nā thó bô ke-thúi , tō ē khioh-hūn, put-pêng kap kui pak-tó͘ ê úi-khut. Sió-tı̄ sı̄ a-bú liân-soà seⁿ saⁿ ê cha-bó͘ gín-á liáu chiah seⁿ--tio̍h ê cha-po͘--ê. Goá kap sió-tı̄ chha chı̍t-hoè goā, a-bú seⁿ sió-tı̄ liáu-āu, só͘-ū ê koan-ài tō lóng tùi sió-tı̄ hia khı̀. Goá siong-sı̀n sui-bóng sı̄ âng-eⁿ-á, i ê sim-lêng oan-na tùi “pı̄ pak-toa̍t ê kám-siū” chiâⁿ bín-kám, hoān-nā ū piàn-hoà, i kiû seng-chûn ê pún-lêng tō ē khòng-gı̄ kap té-khòng. siūⁿ-siūⁿ--leh, saⁿ-hoè gín-á tō ē hoán-khòng, lâng pı̄ ap-pek pı̄ pak-siah, ūi seng-chûn ē hoán-khòng sı̄ chin pún-lêng koh chū-jiân ê tāi-chı̀. Sió-tı̄ seⁿ--lo̍h-lâi, siū-siong siōng toā--ê tō-sı̄ goá. Sió-sió ê nı̂-kí tō-sı̄ siūⁿ bô sı̄ án-choáⁿ ta̍k-hāng ài niū kap goá nı̂-hoè chha chı̍t-hoè goā ê sió-tı̄, goá tō-sı̄ m̄ kam-goān, pún-lêng tō piàⁿ sèⁿ-miā kap sió-tı̄ chhiúⁿ, kap sió-tı̄ cheⁿ. Goá jú cheⁿ, tō jú bē tit-lâng-thiàⁿ; jú bô tit-tio̍h lâng ê koan-ài, goá tō jú ài nāu jú ài o͘-pe̍h-hoe. M̄-koh jı̍t-chí kú--lâi, goá mā bô thó-tio̍h siáⁿ-mih hó--chhù, tian-tò chia̍h bē-chió tek-á-si. A-bú sui-bóng sı̄ chheⁿ-mê-gû, m̄-bat poàⁿ-jı̄, soah mā chai “kùn-á kap âng-chhài-thâu ê lí-lūn”. I ē khai-sí lo̍h-nńg hō͘ goá khah jı̄n-hūn--ê, tng sió-tı̄ ū nn̄g-lia̍p thn̂g-á, i ē khó͘-khǹg sió-tı̄ hō͘ goá chı̍t-lia̍p, goá mā ta̍uh-ta̍uh-á ē phoè-ha̍p, chai-iáⁿ koai-koai--a tō khah hó koè jı̍t. Ta̍uh-ta̍uh-á, goá ê sim-thāi piàn-chò chiok kiaⁿ sió-tı̄, kiaⁿ i poa̍h-tó, kiaⁿ i háu, ta̍k-hāng chū-tōng beh niū sió-tı̄, bô beh cheⁿ bô beh chhá tō-sı̄ beh hō͘ a-bú hoaⁿ-hí. Goá chóng-sǹg chai-iáⁿ sió-tı̄ sı̄ a-bú ê sim-koaⁿ pó-poè, goá sı̄ seⁿ lâi pó-hō͘ i ê pó-poè. Jı̄n-miā koh jı̄n-hūn, kóng-oē hêng-tōng lóng khoàⁿ lâng bı̄n-sek, in-ūi goá sı̄ “cha-bó͘ gín-á-phí”. Tng goá cheⁿ bē iâⁿ ê sı̂, tō khai-sí tián-hiān goá ê lô͘-châi sèng-keh, ùi hoán-khòng kàu oân-choân phoè-ha̍p, tùi goá lâi kóng, che tō-sı̄ seng-chûn ê tō-lí. Chit-má ê gín-á it-tēng siūⁿ lóng bô ūi-tio̍h chı̍t-ki ke-thúi, ū siáⁿ-mih thang hó cheⁿ thang hó siū-siong--ê, m̄-koh goá soah chiok chheng-chhó͘ i tı̄ goá sèⁿ-miā tiong, lâu lo̍h tn̂g-tn̂g àm-àm ê iáⁿ-jiah. (TGB Thong-sı̀n tē 86 kı̂, 2006 nı̂ 11 goe̍h)