Hoé-chhia lo̍h lâm tı̍t-tı̍t kiâⁿ, Lâm-chú koè-liáu sı̄ Chó-iâⁿ.
Sūn-gán oa̍t tùi chiàⁿ-bı̄n khoàⁿ, hn̄g-hn̄g chiū kı̀ⁿ Poàⁿ-pêng-soaⁿ.
Chı̍t-bı̄n kng-ku̍t pı̂ⁿ koh chhiâ, kúi-pó͘-sı̂n-kong ná to sià.
Ko-hiông káng-to͘ chō-mn̂g-sı̂n, jı̂n-kan kı̂-kéng ngiâ kùi-pin.
Che-sı̄ goá bı̄ oân-sêng ê si “Poàⁿ-pêng-soaⁿ ê kò͘-sū“ kı̂-tiong ê chı̍t-toāⁿ. Si tú siá chı̍t-poàⁿ chiū siá boē lo̍h-khı̀, in-ūi kin-nı̂ saⁿ-goe̍h tiong-sûn, goá siū Sek-an chheng-liân-siā ê iau-chhiáⁿ lo̍h-khı̀ Ko-hiông ián-káng, lō͘-tiong keng-koè Poàⁿ-pêng-soaⁿ, tiau-kang oa̍t-thâu chim-chiok khoàⁿ, bô khoàⁿ bô chún-siàu, khoàⁿ-chı̍t-ē lêng-kám lóng-chóng sûi-hong poe-liáu-liáu, téng-koân ná káu-khè, ē-té ná to̍h-hoé, tiong-ng boē su chı̍t-tui pha̍k-ta--ê gû-sái-poe, an-niâ-oê, hit-lō ná-sı̄ soaⁿ!
Siáⁿ-lâng chhı̄-ti m̄-ài ti-á pûi? Siáⁿ-lâng khiā-ke m̄-ài ka-hiong súi? Sı̀-pah goā tang chêng, lán ê chó͘-sian siang-kha ta̍h-chiūⁿ chit-tè thó͘-tē, sui-jiân koāⁿ-lâu-moá-bı̄n, chò kah ē-kho͘-ke boē-pûn-hoé, chóng-sı̄ kı̀ⁿ soaⁿ sı̄ soaⁿ, kı̀ⁿ hái sı̄ hái, siōng-bô beh hioh-khùn thàu chı̍t-ē khùi, mā m̄-bián tio̍h hùi cheng-sı̂n khı̀ chhoē só͘-chāi. Só͘-í han-chı̂ ah! Han-chı̂! Lán lêng-khó chı̂ⁿ kiám thàn chı̍t--koá, m̄-thang thó͘-tē pàng tè hō͘ noā, nā-ē-tàng, ke lâu chı̍t-koá chheng-san-le̍k-súi hō͘ lán āu-tāi ê kiáⁿ-sun thang chò-phoāⁿ.
(Tâi-oân Kàu-hoē Kong-pò tē 2071 kı̂, 1991 nı̂, 11 goe̍h)
(Gân Sı̀n-seng Tâi-gí Bûn-ha̍k soán, 2002 nı̂ Chin-pêng Khı̀-gia̍p Chhut-pán)
