Ū chı̍t kang, chı̍t ê cha-bó͘ lâng cháu lâi khoàⁿ mn̂g-chín, I kóng, “I-su--ah, cha-hng-àm goá ê sin-khu khí chı̍t-phā chı̍t-phā âng-âng, chiok-chiūⁿ chiok-chiūⁿ, kiaⁿ--sí-lâng, kui-àm chiūⁿ kah lóng bô khùn.”
Goá mn̄g, “Lí ū chia̍h sím-mı̍h te̍k-pia̍t ê mı̍h-kiāⁿ á-sı̄ io̍h-á--bô?”
I kóng, “Hō͘ goá siūⁿ khoàⁿ māi--leh. Bô--leh, goá bô chia̍h sím-mı̍h te̍k-pia̍t ê mı̍h-kiāⁿ. M̄-kú, chêng kúi lé-pài, goá ū chia̍h chı̍t chióng Tiong- io̍h, kóng ē kái-siān goá ê thé-chit, kám-sı̄ he ín-khí--ê?”
Goá kóng, “Chin ū khó-lêng. Lí che sı̄ kip-sèng ê piàn-hoà, nā thoa kú, chiū piàn-sêng bān- sèng--khı̀. Ē-tàng chia̍h io̍h-á kap boah io̍h-ko khòng-chè.”
Khí chhı̀n-nah chiū sı̄ lán kóng ê khí léng-sin, che sı̄ phoê-hu-chín ê piàn-hoà, chhin-chhiūⁿ tú-tio̍h moâ-á á-sı̄ chhoe tio̍h léng hong, tú tio̍h chhı̀-mô͘-thâng, só͘ sán-seng ê phoê-hu piàn-hoà. Sū-sı̍t-siōng, i sı̄ toā-toā sè-sè ē chiūⁿ ê âng-sek phòng-chín. Khah sè--ê chhin-chhiūⁿ báng-á tèng--tio̍h, chı̍t-phā chı̍t-phā, mā ē piàn toā phā. Ū ê tı̄ 24 sió-sı̂ í-lāi ē siau, ū ê ē chhut-hiān kúi lé-pài.
It-poaⁿ lâi kóng, khí chhı̀n-nah hun choè kip-sèng kap bān-sèng nn̄g chióng. Phoê-hu-chín tı̄ 6 lé-pài í-lāi siau-sit, bô koh giâ--ê, kiò choè kip-sèng. I ê goân-in khó-lêng sı̄ chia̍h-mı̍h á-sı̄ io̍h-bu̍t ín-khí ê koè-bín. Phoê-hu-chín hoat-seng chin kín, jı̂-chhiáⁿ hoān-ûi khah toā, ū khó-lêng kui sin-khu lóng ū, chin chiūⁿ. M̄-kú, giâ--khí-lāi kín, khı̀ mā kín. Tı̄-liâu āu tiám-goā-cheng khó-lêng ē siau. Kip-sèng khí chhı̀n-nah tı̄ koè-bín khah lı̄-hāi ê pı̄ⁿ-lâng, khó-lêng ē chhut hiān ba̍k-chiu-phoê chéng á-sı̄ chhùi-tûn chéng, kiò choè hoeh-kńg sèng ê chúi-chéng, jı̂-chhiáⁿ khó-lêng ē ū pak-tó͘ thiàⁿ, làu-sái, pháiⁿ chhoán-khùi, siōng giâm-tiōng--ê khó-lêng ē sí--khı̀.
Bān-sèng khí chhı̀n-nah sı̄ giâ chhiau-koè 6 lé-pài í-siōng, ū--ê mā ū khó-lêng chhiau koè kúi-nā nı̂. Bān-sèng khí chhı̀n-nah phoê-hu-chín hoat-seng khah bān, jı̂-chhiáⁿ hoān-ûi khah sè, khah bē chhiūⁿ kip-sèng khí chhı̀n-nah hiah chiūⁿ. I ê goân-in it-poaⁿ ia̍h sı̄ jı̄n-ûi kap koè-bín ū koan.
Khó-lêng ê koè-bín-goân ū:
1) Sı̍t-bu̍t: hái-sán, nn̄g, chiú.
2) Hoe-hún, thô͘-soa-hún, ko͘-khún.
3) Io̍h-bu̍t: khòng-seng-sò͘, hoeh-chheng.
4) Kám-jiám-sèng ê koè-bín-goân: sè-khún, ko͘-khún, thâng-thoāⁿ.
5) Thâng kā--tio̍h.
Ín-khí khí chhı̀n-nah ê goân-in chin choē, m̄-kú toā pō͘ hūn ê bān-sèng khí chhı̀n-nah ê hoān-chiá sı̄ chhoē bē chhut goân-in. Jı̂-chhiáⁿ bān-sèng khí chhı̀n-nah mā kap SLE(âng-pan-sèng lông-chhng), kah-chōng-soàⁿ ki-lêng siuⁿ koân, gâm-chèng, khah kín-tiuⁿ ū koan. Che lóng kap koè-bín bô tı̍t-chiap koan-hē.
(Tâi-oân-jı̄ Cha̍p-chı̀ tē 9 kı̂, 2001 nı̂ 9 ge̍h)
