Kha̍p thô͘ ê gín-á boē piàn pháiⁿ

Ū lâng kóng, kin-á-jı̍t Tâi-oân ê siā-hoē chin bô bı̄, chū-su-chū-lı̄, kiàn-lı̄-bōng-gı̄, pêng-iú chhut-jı̍p chiú-bah tı̂ⁿ, chhut mn̂g kò͘ thàn-chı̂ⁿ, jı̍p-mn̂g chiú tiān-sı̄, ū chhù-piⁿ ná bô chhù-piⁿ, put-pí khah chá án-kong ê sı̂-tāi, sui-jiân seng-oa̍h kan-khó͘, saⁿ-tǹg chia̍h khah bái, chóng-sı̄ hoān sū chı̍t tō sı̄ chı̍t, nn̄g tō sı̄ nn̄g, m̄ bián hoân-ló chhut mn̂g bô lâng thang chioh-mn̄g, m̄ bián hoân-ló tó-teh khùn boē kàu thiⁿ-kng, jı̂n-lûn hun oē chheng, gı̄-lí khoàⁿ oē bêng, ta̍k-ê kı̀ⁿ bı̄n sioh lâu saⁿ-hun chêng. Lı̄ goán-tau bô joā-hn̄g, ū chı̍t-ê kò͘ hı̂-ùn-á ê Ngô͘ sian-seⁿ, sui-jiân chheh tha̍k bô choē, chóng-sı̄ chò-lâng chin chhin-chhiat, hāu-siⁿ, cha-bó͘-kiáⁿ lóng chhut-goā tı̄ to͘-chhı̄ teh thàn-chia̍h, i kā in kóng: “Sun phō tńg-lâi hō͘ goá chhoā, kap lín tiàm chhı̄-lāi ia̍h bô thô͘ thang chhio̍k, m̄ hó, tán toā-hàn lín chiah koh chhoā tńg-khı̀.” chiū án-ni, hiah ê sun àn sè-hàn tō lóng toè tı̄ i ê sin-piⁿ, chı̍t-ê chı̍t-ê oa̍h kah ióng-khiat-khiat, put-koán-sı̂ khoàⁿ tio̍h in lóng chhiò-bi-bi, a-chek, a-chím kiò boē lı̄, chit-khoán ê gín-á chū-jiân tit lâng thiàⁿ, thò chı̍t-kù liû-hêng ê oē: “Kha̍p thô͘ ê gín-á boē piàn pháiⁿ”, siōng bô mā tùi hiong-thó͘ khah ū kám-chêng. (Gân Sı̀n-seng Tâi-gí Bûn-ha̍k soán, 2002 nı̂ Chin-pêng Khı̀-gia̍p Chhut-pán)