Khiam-pi ê chiong-kun

Bí-kok ū chı̍t-ê Kek-lâm-tek chiong-kun. Ū chı̍t-pái i hiu-ká, beh tńg-khı̀ chhù-nih. I ê lāu-pē chhe lô͘-po̍k sái bé-chhia, khı̀ hoé-chhia-thâu ngiâ-chih i. Tng hoé-chhia kàu-ūi ê sı̂, hit-ê lô͘-po̍k sı̀-kè chhoē; beh chhoē chit-ê chhēng kun-ho̍k, koà hûn-chiong, ū ui-gı̂ ê chiong-kun. Chóng-sı̄ lóng bô chhoē-tio̍h chiong-kun. Lô͘-po̍k lia̍h-choè chiong-kun bô-chē hit-pang hoé-chhia tńg-lâi. Hō͘ lâng siūⁿ boē-kàu ê sū, sı̄ tng lô͘-po̍k teh-chhoē chiong-kun ê sı̂; chiong-kun khiok-sı̄ chhēng piān-ho̍k, ka-kı̄ phāiⁿ hêng-lí, ēng kiâⁿ-lō͘ tńg-khı̀ chhù-nih. Tek-kok ê toā chiong-kun Mô͘-kı̂; thâi-iâⁿ Hoat-kok, kong-hām Pa-lê, oa̍h-lia̍h Ná-pho-lûn tē-saⁿ-sè. Choân Tek-kok ê lâng lóng chin chun-kèng Mô͘-kı̂ chiong-kun. Tng Mô͘-kı̂ khái-soân hoê-kok ê sı̂; ū kun-ông tāi-sı̂n, seng-lí-lâng choh-chhân-lâng, lóng khı̀ ngiâ-chı̍h i, o-ló i. Chóng-sı̄ Mô͘-kı̂ chin khiam-pi, i kóng,“Goá bô-ài chit-khoán ê nāu-jia̍t; goá chí-ū sı̄ chı̄n goá ê pún-hūn, chhin-chhiūⁿ goá ê tông-sū tông-chı̀ chı̄n in ê pún-hūn siāng-khoán; chhiáⁿ tāi-ke hō͘ goá tńg-khı̀ chhù-nih, siu-lí goá ê mûi-kùi hoe-hn̂g.” (Tâi-oân Kàu-hoē Kong-pò tē 2082 kı̂, 1992 nı̂ 1 goe̍h)