Jı̂n- bu̍t
Se-bûn, Phek-san: Hu-hū.
Chó-chı̀: (Tông-liân kap sêng-jı̂n).
Má-lı̄: Se-bûn hu-hū ê lô͘-lē, Chó-chı̀ ê lāu-bú.
Thó͘-húi: A. B. C.
Sió-ha̍k-seng sò͘ miâ (數名).
Sian-siⁿ: Ha̍k-hāu ê lāu-su.
Chùn-gē: Tāi-ha̍k-seng, sı̄ hó-gia̍h chú-tē.
Lē-ná: Tāi-ha̍k-seng sò͘ miâ(若干名）.
Tāi-ha̍k hāu-tiúⁿ.
Lông-bı̂n: A. B. C. D.
Gín-ná nn̄g lâng.
Séng-tiúⁿ.
Koān-tiúⁿ.
Chóng-thóng pı̀-su.
Sı̍p-jı̄-hoē hoē-tiúⁿ.
Tē I Bō͘
Se: Pkek-san! Kin-á-jı̍t goá tı̄ sı̍p-jı̄-lō͘ kháu khoàⁿ-tio̍h chı̍t tiuⁿ ê kò-sı̄, kiò lâng tio̍h chù-ı̀, sió-sim pó-hō͘ ka-kı̄ ê lô͘-lē, in-ūi thó͘-húi í-keng kàu lán ê kéng-kài lah!
Phek: Tio̍h, goá iā ū thiaⁿ-kı̀ⁿ, chhài-chhı̄-á lāi ê lâng lóng teh kóng-khí chit hāng tāi-chı̀.
Se: Kūn-lâi thó͘-húi khah gâu sǹg, in chai chhiúⁿ-lia̍h lô͘-lē pí chhiúⁿ-the̍h pa̍t hāng mı̍h khah hó.
Phek: Goá siūⁿ ê-àm tio̍h kiò Má-lı̄ kap i ê kiáⁿ, chhoā lâi chia khùn khah an-choân.
Se: M̄-bián lah! Lán bô ta-po͘ ê lô͘-lē, thó͘-húi it-tēng m̄ lia̍h cha-bó͘ ê kap gín-ná. In ta̍t bô saⁿ chiam-chı̂ⁿ, thó͘-húi bô hiah gōng.
Phek : M̄-kú goá boē hòng-sim, Má-lı̄ sı̍t-chāi sı̄ chı̍t ê khó-chhú ê lô͘-lē, ū i koán-kò͘ lán ê lông-tiûⁿ sı̍t-chāi chin hó, i sui-jiân lú ê (cha-bó͘ ê), chóng-sı̄ só͘ choè bô su ta-po͘ ê.
Se: Ū iáⁿ! Má-lı̄ sı̄ kham-tit hō͘ lâng o-ló ê lô͘-lē. Í-keng àm lah, lán lâi-khı̀ khùn.
(Lóng-chóng lo̍h tâi). (Hn̄g-hn̄g káu teh pūi, 3 ê thó͘-húi kap chı̍t ê lú lô͘-lē phō chı̍t ê eⁿ-á siōng tâi).
Thó͘-húi A: Lia̍h chit ê lú ê, goá siūⁿ chin mâ-hoân. Kiám-chhái lán 3 lâng oē ūi-tio̍h chit ê lú ê khí oan-ke.
Thó͘-húi B: Sio-phah to ū o͘h! Tài-liām lí sı̄ láu-toā, lí nā ū ı̀-sù goán beh niū lí.(Tāi-ke chhiò)
Thó͘-húi A: Chhiáⁿ lí m̄-thang gō͘-hoē, goá sı̄ kóng chit ê kâⁿ chı̍t ê soè-hàn gín-ná, hō͘ lán ê hêng-tōng chin bô lı̄-piān. Goá siūⁿ chiong in bú kiáⁿ pàng hō͘ khı̀, koh lâi lia̍h pa̍t ê.
Thó͘-húi C: M̄-thang, siâⁿ-chhı̄ lú ê lô͘-lē khah ta̍t-chı̂ⁿ.
Thó͘-húi B: Chù-ı̀ thiaⁿ ! Ū bé kha-tê ê siaⁿ. Aih ! Un2-tàng sı̄ siâⁿ-lāi ê bı̂n-peng beh lâi lia̍h lán, taⁿ tio̍h koáⁿ-kín cháu.
(Lóng-chóng lo̍h tâi, lô͘-lē kún-liòng chiah lo̍h tâi. Se-bûn kap nn̄g ê chheng-liân siōng tâi).
Chheng-liân A: Tı̄ chia, tı̄ chia! ū sin ê kha-tê hō, sı̍t-chiā chin gâu cháu, lán í-keng chhē 3 mı̂ 3 jı̍t lah, iáu-kú jip boē tio̍h.
Se: (Ǹg nn̄g ê chheng-liân lâng). Lín khah siàu-liân koáⁿ-kín khı̀ chhē, it-tēng bô chin hn̄g lah, nā chhē-tio̍h kap in kóng tiâu-kiāⁿ, nā-sı̄ ko͘-put-chiong tio̍h ēng goá hit chiah siāng hó ê bé, iā bô iàu-kín, he sı̄ choè-āu ê tiâu-kiāⁿ. Goá chin thián, bô hoat-tō͘ koh-chài kiâⁿ lō͘ lah, goá tı̄ chit châng toā chhiū-kha tán lín ( Tùi siong-tùi ê hong-hiòng jı̍p). (Thó͘-húi A siōng tâi khiā tı̄ chit pêng,nn̄g ê chheng-liân siōng tâi, khiā tı̄ koh chı̍t pêng).
Thó͘-húi A: Lín nn̄g lâng beh choè sím-mı̍h? Chiong lín ê bú-khı̀ khǹg leh , chı̀n-chêng lâi kóng tiâu-kiāⁿ.（Sió thêng）. Goán í-keng khoàⁿ tio̍h hit ê lú lô͘-lē ê thâu-ke hit chiah o͘-sek ê bé, lín nā chiong hit chiah bé khan lâi,in bú-kiáⁿ goán chiū beh pàng in tńg-khı̀.
Chheng-liân A: Ēng pa̍t ê tiâu-kiāⁿ cháiⁿ-iūⁿ? In-ūi goán ê chú-lâng hit chiah bé sı̄ choân koān tē it hó ê bé. I thiàⁿ hit chiah bé chhin-chhiūⁿ I ka-kı̄ ê kiáⁿ.
Thó͘-húi A: Boē ēng-tit! Goán ài hit chiah bé chiū-sı̄. Lín khı̀ chiong hit chiah bé pa̍k tı̄ hit châng toā chhiū-kha, jiân-āu lín tio̍h lı̄-khui, goán oē chiong lín só͘ ài ê lâng pàng toà chia hêng lín. Nā hō͘ goán hoat-kiàn tio̍h ū khi-phiàn ê só͘-chāi, chiū lín lóng oē bô miā. Taⁿ koáⁿ-kín khı̀.
(Chheng-liân lâng lo̍h tâi, Thó͘-húi A pûn pi-á, chèng thó͘-húi Má-lı̄ bú kiáⁿ siōng tâi).
Thó͘-húi A: Goá í-keng kap in kóng tiâu-kiāⁿ, chiū-sı̄ ēng hit chiah o͘-bé lâi oāⁿ chit nn̄g ê bú-kiáⁿ. (Ǹg Má-lı̄). Taⁿ lín thang koh tò-tńg khı̀ lín thâu-ke ê chhù lah. Ū hoaⁿ-hí bô?
Má-lı̄: Chin to-siā, hō͘ goá oē thang koh tńg-khı̀, goá thâu-ke kap thâu-ke-niû sı̄ chı̍t ê chin hó ê lâng.
Thó͘-húi B: Sió tán leh! Goá tı̄ o͘-lâng ê tiong-kan m̄-bat khoàⁿ-tio̍h chiah-nih súi ê cha-bó͘ lâng, chhin-chhiūⁿ lí. Goá siūⁿ ài lâu lí lâi choè goá ê bó͘. (Ǹg Thó͘-húi A). Láu-toā ê! lí m̄-tang pàng i tńg-khı̀.
Má-lı̄ : (Ǹg Thó͘-húi B). Pài-thok leh! Goá í-keng ū nn̄g ê gín-ná, chhiáⁿ lí tio̍h hó-sim leh! pàng goá tńg-khı̀.
Thó͘-húi B: Bián kóng, lí tio̍h tè goá kiâⁿ. (Khan Má-lı̄ ê chhiú). Chiong lí ê kiáⁿ tàn toà chia, (chiong gín-ná chhiúⁿ khí-lâi, kā khǹg tı̄ thô͘-kha).
Má-lı̄: Oh! M̄-thang hō͘ goá kap goá ê kiáⁿ lı̄-khui, tio̍h pàng goá tńg-khı̀-----
Thó͘-húi B : Kín kiâⁿ.
Má-lı̄: Lí nā m̄ hō͘ goá kap goá ê kiáⁿ choè-hoé, tio̍h chiong goán thâi-sí, m̄-thang hō͘ goán oa̍h-oa̍h lâi saⁿ-lı̄.
Thó͘-húi B: Kín kiâⁿ--------
Thó͘-húi A: (Khui 3 mn̂g chhèng choè sı̀n-hō chiū lı̄-khui).
(Se-bûn kap nn̄g ê chheng-liân siōng tâi). (Saⁿ lâng choè siaⁿ hán-hoah Má-lı̄).
Se: (Toā siaⁿ kiò Má-lı̄). Chin kı̂-koài, tán lóng bô.
Chheng-liân A:Eh! Lí khoàⁿ, hia ū chı̍t pau mı̍h, m̄-chai sı̄ sím-mı̍h, lán lâi khoàⁿ. (chı̀n-chêng khioh khí-lâi khoàⁿ sı̄ eng-jı̂).
Se: Oh! Khó-lı̂n ê kiáⁿ, iau, chhùi-ta koh phoà-pı̄ⁿ, chhin-chhiūⁿ beh sí ê khoán. Oh! Khó-lı̂n ê kiáⁿ, lí chiah-nih soè-hàn chiū keng-giām tio̍h jı̂n-seng ê toā pi-ke̍k. Lí m̄-chāi tùi tó-ūi lâi, iā m̄-chai beh tùi tó-ūi khı̀. Goá m̄-chai lí ê lāu-pē tı̄ tó-ūi, chóng-sı̄ chai lí ê lāu-bú, kin-á-jı̍t iā lı̄-khui lí bô koh tò-tńg lâi. Tùi chit sı̂ khí lí beh choè goá ê kiáⁿ, beh sı̀ⁿ goá ê sı̀ⁿ, kap goá seng-oa̍h, iā beh tit-tio̍h chı̍t ê hó ê lāu-bú. Taⁿ lán tio̍h tńg-lâi. Má-lı̄ ê sit-chong (失落) chhin-chhiūⁿ chı̍t ê bāng, kı̂-sı̍t jı̂n-seng chiū-sı̄ bāng.
---------------Bō͘ lo̍h--------------------
Tē II Bō͘
Jı̂n-bu̍t: Se-bûn hu-hū, Chó-chı̀ (Gorege 10 hè lâm-tông).
Tē it tiûⁿ: Toē-tiám Se-bûn ê chhù, Phek-san teh pó͘-thı̄ⁿ, Se-bûn kia̍h tû-thâu tùi goā-bı̄n tńg-lâi.
Phek : Lí kin-á-jı̍t tńg-lâi lóng bô sio-siāng, sı̄ ū sím-mı̍h bô sim-sek ê sū, liân khoàⁿ to m̄ ài khoàⁿ goá.
Se: Bô sím-mı̍h toā tāi-chı̀, sı̄ hō͘ Chó-chı̀ mn̄g kàu cháu bô lō͘. Chit ê gín-ná chin kı̂-koài, būn-toê te̍k-pia̍t choē, goá teh khó-lū kiám-chhái tio̍h chhoā khı̀ hō͘ cheng-sı̂n kho ê i- seng khoàⁿ.
Phek: Sı̄ m̄-sı̄ lí bô pá-ak thang kà i, chiah cháu lâi goá chia siám-pı̄ (chhiò)?
Se : Ū iáⁿ, goá kám-kak beh tùi-hù chit ê gín-ná, lí khah ū pān-hoat, só͘-í i siông-siông ài kā lí soé oáⁿ koh tàu chú-pn̄g, thang kap lí kóng-oē.
Phek: Chit ê gín-ná chin chhong-bêng, i ū būn-toê chiū-sı̄ piáu-sı̄ i ū tui-kiû chai-bat. I m̄-sı̄ phó͘-thong ài kóng-oē ê gín-ná, ū sı̂ goá khoàⁿ i chēng-chēng koan-chhat chı̍t hāng mı̍h, bat chı̍t jı̍t bô kóng-oē, chóng-sı̄ iā bat khoàⁿ i tı̄ hoe-hn̂g lāi ka-kı̄ kóng-oē.
Se: Chit ê gín-ná siông-siông kā goá kóng, i nā ū būn-toê chiū mn̄g goá, goá nā boē thang kā i ı̀n, i chiū mn̄g Siōng-tè. Ū sı̂ hō͘ goá kám-kak chin thâu thiàⁿ, i í-keng chin bat iā oē hiáu-tit ,goá siūⁿ tio̍h siat-hoat hō͘ Chó-chı̀ khı̀ tha̍k-chheh, hō͘ i oē-hiáu khoàⁿ, bat jı̄, lâi tha̍k sèng-keng, koh-khah bat lán ê Siōng-tè.(Chó-chı̀ jı̍p chhù).
Phek : Oh! Chó-chı̀ chin hó, goán tú teh kóng lí ê tāi-chı̀. Eh! Lí ê tē-á lāi té sím-mı̍h? Nńg-nńg !!
Chó : Lí the̍h khí-lâi khoàⁿ chiū oē chai.
Phek: Oh! Tō͘-ún, tō͘-ún!! lí tē chit khoán kiaⁿ-lâng ê mı̍h beh choè sím-mı̍h?
Se : Lí kiám m̄-chai, che chiū-sı̄ i ê chhù-bı̄. Lí ū khoàⁿ-kı̀ⁿ i hit keng sió pâng-keng bô? Kui keng lóng sı̄ thâng lah, chháu lah, hoe lah, koh ū ta̍k khoán bô sio-siāng ê thô͘ kap chio̍h-thâu.
Chó : Goá m̄-sı̄ teh pān ke-ko͘ hé-á. Goá teh khoàⁿ siōng-tè choè chiah ê ū sím-mı̍h thang lı̄-ek lâng.
Phek: Chó-chı̀. Lí chin chhong-bêng, chóng-sı̄ chin khó-sioh lí m̄-bat jı̄, lí ū siūⁿ ài tha̍k-chheh bô?
Chó : Goá chin ài bat jı̄, oē thang chhin-chhiūⁿ lín án-ni tha̍k-chheh kap Sèng-keng, koh oē thang siá phoe. Chóng-sı̄ goá sı̄ o͘-lâng, beh khı̀ tó-ūi tha̍k-chheh.
Se : Lán tı̄ hū-kūn ū chı̍t keng ha̍k-hāu lí khı̀ chhē lāu-su, ǹg-bāng lán ê siōng-tè thoè lí khui lō͘.
------------O-------------
Tē III Bō͘
(Chı̍t kûn ê sió-ha̍k-seng 6-8 miâ. Chó-chı̀ tùi chı̍t pêng chhut)
Ha̍k-seng A : Lāu-su. Lí khoàⁿ, hia ū chı̍t ê o͘-lâng ê gín-ná, tùi chia tı̍t-tı̍t lâi.
Ha̍k-seng B: Lāu-su, chit ê gín-ná beh choè sím-mı̍h? chı̍t sin o͘-sô-sô, koh bô chhēng oê, khoàⁿ-tio̍h chin kiaⁿ-lâng.
Sian-siⁿ : Tāi-ke an-chēng (ǹg Chó-chı̀). Sió pêng-iú, lí ū sím-mı̍h tāi-chı̀ cháu lâi chia.
Chó chı̀ : Lāu-su, goá chin ài tha̍k-chheh chin ài oē-hiáu siá jı̄, chhiáⁿ lí hō͘ goá kap chiah ê gín-ná chò-hoé tha̍k-chheh.
Sian-siⁿ : Lí sı̄ chiáⁿ-iūⁿ hiah-nih ài tha̍k-chheh?
Chó-chı̀: Goá khoàⁿ pa̍t lâng oē-hiáu khoàⁿ pò-choá, koh oē khoàⁿ Sèng-keng iā oē siá phoe, goá chin ài.
Sian-siⁿ: Oh! án-ni chin hó. Lí kiò sím-mı̍h miâ?
Chó-chı̀ : Goá ê miâ kiò-choè Chó-chı̀ Hoâ-sēng-tùn, Kak-ní. (Chèng ha̍k-seng toā chhiò)
Ha̍k-seng A : Oh! Thái ū hiah-nih tn̂g ê miâ, kiaⁿ sí lâng.
Chó-chı̀: In-ūi goá ū nn̄g ê sı̀ⁿ, só͘-í khah tn̂g, chóng-sı̄ lâng lóng kiò goá Chó-chı̀.
Ha̍k-seng B: Sian-siⁿ, goán ma-ma kóng Ou-lâng ê seng-khu chhàu-ko͘-ko͘, kiám ū iáⁿ? goá lâi phı̄ⁿ khoàⁿ leh.
Sian-siⁿ: Bô lah! o͘-lâng chí-ū phê-hu o͘ nā-tiāⁿ, boē chhàu-chhàu. Lí ê bah sui-jiân pe̍h, chóng-sı̄ nā bô siông-siông soé seng-khu, chiū oē chhàu-chhàu neh.
Ha̍k-seng C: Lāu-su, goá thiaⁿ lâng kóng nā kap o͘-lâng chò-hoé thit-thô oē hō͘ oè-tio̍h neh, goán nā hō͘ i tı̄ chia chò-hoé tha̍k-chheh, goán hō͘ oè chı̍t ê, ta̍k ê lóng pı̀ⁿ o͘ gín-ná to hāi lah (tāi-ke toā chhiò).
Chó-chı̀: Ou-bah chiū-sı̄ o͘-bah, pe̍h-bah chiū-sı̄ pe̍h-bah, boē sio oè. Goá khoàⁿ lí ū tha̍k-chheh, chóng-sı̄ pí goá khah gōng (tāi-ke koh chhiò).
Sian-siⁿ: (Ǹg Chó-chı̀) Sió pêng-iú, goá khoàⁿ lí chin khó-chhú, hoan-gêng lí tha̍k-chheh, ǹg-bāng lí phah-piàⁿ tha̍k,chiong-lâi it-tēng oē choè chı̍t ê gâu-lâng. Kok ūi sió pêng-iú, sím-mı̍h lâng beh kap i chē choè-hoé?
Hô-bí: Lāu-su, goá beh kap i chē chò-hoé. Goán ma-ma siông-siông kā goán kóng, bô-lūn sàn á-sı̄ hó-gia̍h, bô-lūn o͘-lâng á-sı̄ pe̍h-lâng, lóng tio̍h choè pêng-iú. Goá khoàⁿ-tio̍h chin-choē sió pêng-iú kā chhiò, chin khó-lı̂n (khan Chó-chı̀ ê chhiú kóng) lâi goá chia chē.
Sian-siⁿ: Chó-chı̀, Hô-bí sı̄ lán chit pan ê kip-tiúⁿ, i chin gâu tha̍k-chheh koh chin koai, ǹg-bāng lí í-āu chin gâu tha̍k-chheh.
Chó-chı̀ : Lāu-su chin to-siā, goá it-tēng beh jı̄n-chin tha̍k-chheh.
