Tē IV Bō͘
Bō͘-āu soat-bêng : Keng-kè 15 nı̂, Chó-chı̀ tùi sió-o̍h chı̀n kàu toā-o̍h, lóng sı̄ ná choè kang thàn chı̂ⁿ lâi oân-sêng ha̍k-gia̍p.
Tāi-ha̍k-seng Chùn-gē: Lē-ná, kin-á-jı̍t sı̄ pit-gia̍p ê jı̍t-chí. Lí kám-kak cháiⁿ-iūⁿ?
Lē-ná : Goá bô te̍k-pia̍t ê kám-kak, chí-ū kám-kak kiaⁿ-hiâⁿ pâi tı̄ bı̄n-chêng, chiū-sı̄ sı̍t-chè ê chhut-lō͘ ê būn-toê.
Chùn-gē: Lē-ná. Lí m̄-bián ūi-tio̍h chiah ê lâi hoân ló. Goá tùi sió-o̍h kàu hiān-sı̂, m̄-chai sím-mı̍h kiò-choè hoân-ló. lí khoàⁿ! Goá ê lāu-pē ū chı̂ⁿ koh ū toē-ūi, tiān-iáⁿ-koán ū 6 keng, chúi-nı̂ kang-chhiúⁿ nn̄g keng, chè-io̍h-chhiúⁿ, bō͘-e̍k-hâng, hō͘ lí sǹg boē liáu. Chí-ū lí tông-ı̀, goá thang hō͘ lí ge̍h-hōng choè hó, iā choè khin-sang ê kang-chok.
Lē-ná : Lí kóng ū thang chia̍h, ū thang ēng, iā bián keng-giām hoân-ló ê sū, chit khoán ê seng-oa̍h kap kı̂-thaⁿ ê tōng-bu̍t bô koh-iūⁿ, chit khoán ê jı̂n-seng ū sím-mı̍h bo̍k-tek?
Chùn-gē : Lí m̄-thang ēng chit khoán ê oē lâi chhı̀-chha̍k goá. Sı̀ nı̂ lâi goá tùi lí ê ài-chêng bô piàn-oāⁿ, lí siông-siông kò͘-ı̀ ûi-lân goá. Lē-ná. Goá í-keng tán 4 nı̂ lah. Kin-á-jı̍t chhiáⁿ lí tio̍h tông-ı̀ goá ê iau-kiû?
Lē-ná : Goá í-keng kā lí kóng, goá choa̍t-tùi bô tông-ı̀ lí ê iau-kiû, chhiáⁿ lí m̄-thang koh lâi kô-kô-tı̂ⁿ. Chóng kóng, lí kap goá ê jı̂n-seng-koan bô saⁿ-tâng.
Chùn-gē : Goá chai lí ūi-hô m̄ ài goá. Lí ê sim í-keng hō͘ hit ê o͘-lâng só͘ bê. 4 nı̂ lâi lí siông-siông chhē ki-hoē kap hit ê o͘-lâng kóng oē, kiám ū iáⁿ goá chit ê pah-bān hù-ong ê kè-sêng-jı̂n oē khah su Chó-chı̀ mah? Lē-ná. Goá ê sim í-keng chhùi lah, ūi-tio̍h lí chhùi lah!
Lē-ná : Sı̄, goá ê sim í-keng hō͘ Chó-chı̀ lah, in-ūi i ū kàu-gia̍h ê jı̂n-keh kap súi ê jı̂n-seng-koan, koh i ū chhiau-oa̍t ê tı̀-hūi (Chó-chı̀ kap lēng-goā chı̍t ê tông-o̍h siōng tâi).
Chó-chı̀ : Kin-á-jı̍t sı̄ tāi-ke só͘ kı̂-thāi ê pit-gia̍p ê jı̍t-chí.
Lē-ná : Chó-chı̀ kiong-hí ! Goá í-keng khoàⁿ-kı̀ⁿ sêng-chek pò-kò, lí sı̄ tē it miâ, sı̍t-chāi chin lân-tit, chhin-chhiūⁿ lí chit khoán tı̀-hūi ê lâng goá bē bat khoàⁿ-kı̀ⁿ.
Chó-chı̀ : To-siā lí ê o-ló, sı̍t-chāi chin boē kham-tit.
Tāi-ha̍k-seng A : Lán ê tông-o̍h chiām-chiām lâi lah. Sı̂-kan iā kàu lah, hāu-tiúⁿ iā teh lâi lah. (4 ūi tông-o̍h siōng tâi).
Tāi-ha̍k-seng B : Tāi-ke kiong-hí! Taⁿ kin-á-jı̍t í-āu chiū-sı̄ sûi-lâng kiâⁿ ka-kı̄ ê lō͘ lah, siūⁿ-tio̍h beh jı̍p-khı̀ siā-hoē chiah chai 4 nı̂ ê Tāi-ha̍k kàu-io̍k chin bô kàu-gia̍h. (Ǹg chêng khoàⁿ, hāu-tiúⁿ chhut-tiûⁿ). Oh! Lán ê hāu-tiúⁿ lâi lah.(Ha̍k-seng pâi tı̄ chı̍t pêng, hêng-sêng beh khui-hoē ê tūi-hêng).
Hāu-tiúⁿ: Chu-ūi tông-ha̍k, múi nı̂ chit-ê sı̂-chūn lán lóng ū sio-siāng ê pit-gia̍p-sek, cheng-chha pit-gia̍p ê lâng bô saⁿ-tâng nā-tiāⁿ. Chóng-sı̄ múi nı̂ goá lóng ēng chit kù oē lâi bián-lē tāi-ke, “Jı̂n-seng í ho̍k-bū ūi bo̍k-tek,” ǹg-bāng lín chhut-khı̀ oē toā-toā lı̄-ek lâng. Chit sı̂ goá beh hoat chèng-su kap chióng-chn̄g. Chit kài ê tē it miâ ū táⁿ-phoà le̍k-nı̂ lâi ê kı̀-lio̍k, 4 nı̂ chóng pêng-kun sı̄ 98 hun, sı̍t-chāi chin lân-tit. Koh i só͘ hoat-piáu ê pit-gia̍p lūn-bûn sı̄ “Thó͘-toē kap jı̂n-lūi ê koan-hē.” I ê lūn-bûn kap sı̍t-giām ū toā-toā kòng-hiàn choân Bí-kok. Put-tàn kái-liông, chiū-sı̄ tùi thô͘ (thô͘-jiōng) hoat-kiàn ní-sek(染料), chit ê lâng chiū-sı̄ Chó-chı̀ tông-o̍h. (Chèng-lâng phah chhiú o-ló). Tông-sı̂ goá-tāi-piáu pún-hāu táng-sū-hoē kap kàu-siū-hoē phèng-chhiáⁿ Chó-chı̀ tông-o̍h, tùi kin-á-jı̍t khí choè pún-hāu Lông-ha̍k-ı̄ⁿ ê kàu-siū. Che sı̄ thâu chı̍t tāi ê o͘-lâng kàu-siū. Chit sı̂ chhiáⁿ Chó-chı̀ tông o̍h hoat-piáu ián-soat:
Chó-chı̀ : Goá boē-oē kóng sím-mı̍h, goá ê ba̍k-sái í-keng thoè goá ı̀n-tap lah. Goá chiū-sı̄ ēng chı̍t chiah bé oāⁿ tńg-lâi ê sı̀ⁿ-miā, chhin-chhiūⁿ chı̍t châng iá mûi-kùi seng-tióng tı̄ chhiū-nâ lāi, āu-lâi siū poaⁿ-soá kàu tı̄ hoe hn̂g.Oh! Goá ê sim chhiong moá kám-kek kap kám-siā ê ba̍k-sái. (Chı̍t ê the̍h phoe ê chhut).
Iû chhe : Lín chia ū chı̍t ê kiò Chó-chı̀, Hoâ-sēng-tùn, Kat-ní Sian-siⁿ bô? Che sı̄ i ê hān-sı̂ koà-hō.
Chó-chı̀ : Sı̀ nı̂ lâi goá bē bat chiap-tio̍h chı̍t tiuⁿ phoe, cháiⁿ-iūⁿ oē tı̄ chia chiap-tio̍h koà-hō ê phoe? (Thiah-khui).
“Chó-chı̀ Sian-siⁿ, lán nn̄g ê bô sio-bat, chóng-sı̄ tùi choē-choē hong-bı̄n, goá chai lí sı̄ chı̍t ê kia̍t-chhut ê chheng-liân, iā sı̄ sió-sò͘ ê o͘-lâng siū Tāi ha̍k kàu io̍k ê chı̍t ê. Lí tı̄ siā-hoē siōng só͘ beh tit-tio̍h ê bêng-ū, toē-ūi kap kim-chı̂ⁿ sı̄ bô hān-liōng. Chóng-sı̄ goá ài ēng chı̍t kù khún-chhiat ê oē tùi lí ai-kiû, “Chhiáⁿ lí kè-lâi pang-chān goán.”Goá sı̄ chı̍t ê o͘-lâng, tı̄ Bí-kok Lâm-pō͘ ūi-tio̍h o͘-lâng teh hùn-tò͘, chiah ê lâng m̄-chai beh cháiⁿ-iūⁿ lê chhân, iā chéng-chí kap siu-koah. Koh goá tùi chiah ê sı̄ goā-hâng; goá oē thang kà in siá-jı̄, tha̍k-chheh kap cháiⁿ-iūⁿ khí-chhù, goá boē-oē pang-chān in sı̍t-chè ê būn-toê,só͘-í in siông-siông iau-gō. Ǹg-bāng lí, tek-khak tio̍h lâi pang-chān goán. Goá só͘ oē thang hō͘ lí ê sı̄ kang-chok , khùn-lân ê kang chok. Chiū-sı̄ beh chiong chit ê lo̍k-hō, pı̂n-khùn kap khó lı̂n ê bı̂n-cho̍k chhoā kàu tı̄ hong-hù ê jı̂n-seng.
A-lí-pa-má chiu Tek-su-ki Ki-tok-kàu Lông-gia̍p Kái-chı̀n Ha̍k-ı̄ⁿ Chú-pān-jı̂n : Bō͘-khek kèng-siōng.”
(Chó chı̀ khoàⁿ liáu, tı̄ tâi-téng kiâⁿ-lâi kiâⁿ-khı̀, jiân-āu tùi lak-tē-á lāi the̍h chı̍t tiuⁿ ê choá lâi siá “Goá beh khı̀.” Ēng tı̂m-tio̍k ê thài-tō͘ ). (Chó-chı̀ chı̀n-chêng tùi hāu-tiúⁿ kóng oē).
Chó-chı̀ : Hāu-tiúⁿ, chin sit-lé, goá boē thang chiap-siū lí ê phèng-chhiáⁿ. Goá ài chek-sı̂ khı̀ Bí-kok lâm-pō͘ ūi-tio̍h goá ê bı̂n-cho̍k ho̍k-bū
Hāu-tiúⁿ : Chó-chı̀, lí bô hō͘ goá sit-bāng. Lí tio̍h ióng-kám kian-chhı̂ lí ê sı̀n-gióng. Sui-jiân lí beh pàng-sak kim-chı̂ⁿ toē-ūi miâ-siaⁿ, chóng-sı̄ lí thang tit-tio̍h súi ké-chí . Lí khı̀, Siōng-tè kap lí tı̄-teh (ak-chhiú chài-hoē, hāu-tiúⁿ lo̍h). (Kı̂-thaⁿ ê tông o̍h chı̀n-chêng lâi saⁿ-kap ak-chhiú chài hoē. Tâi-á téng chí chhun Lē-ná kap Chùn-gē nn̄g lâng)
Chùn-gē : Lē-ná, ta̍k ê lâng lóng tńg-khı̀ lah, lí iáu teh siūⁿ sím-mı̍h? Kin-á-jı̍t sı̄ khoài-lo̍k ê pit-gia̍p kı̀-liām jı̍t, goá chhiáⁿ lí lâi-khı̀ Kok-chè toā bú-thiaⁿ thiàu-bú khèng-chiok.
Lē-ná : Chhiáⁿ lí lı̄-khui, goá m̄-ài koh thiaⁿ lí hit khoán thn̂g-kam bı̍t-tiⁿ ê oē.(Chùn-gē iô thâu lı̄-khui) (Chó-chı̀ chiūⁿ, koāⁿ phê-siuⁿ)
Chó-chı̀ : Lē-ná, che sı̄ boē thang siám-pı̄ ê sū-sı̍t. Lán tio̍h lı̄-khui. Jı̂n-seng siông-siông boē thang chiàu lí-sióng lâi seng-oa̍h. Lē-ná, chit tiuⁿ sı̄ goá choè tek-ı̀ ê iû-ūi, sàng lí choè kı̀-liām.
Lē-ná : Chó-chı̀, chhiáⁿ lí chhoā goá khı̀. (lâu ba̍k-sái)
Chó-chı̀:Lē-ná, m̄-sı̄ hiah-nih kán-tan ê tāi-chı̀. Lâm-hng o͘-lâng ê toē-kài, m̄-sı̄ lí só͘ sióng-siōng oē kàu ê, tı̄ hia chhiong-moá iau-gō, sàn-chhiah, phoà-pı̄ⁿ kap sí-bông. Goá boē thang hōng-sū lí, siāng-sı̂ hōng-sū goá ê bı̂n-cho̍k. Lí nā siông-siông thoè goá kı̂-tó, chiū-sı̄ thiàⁿ goá ê piáu-hiān. (Chó-chı̀ chim Lē-ná ê siang chhiú lâi lı̄-khui).
-------------Bō͘ hā-------------
Tē V Bō͘
Lông-bı̂n A : Chó-chı̀ Sian-siⁿ, lí lâi chia sı̄ beh chí-tō goán, kái-siān goán ê seng-oa̍h. Lí khoàⁿ! Goán só͘ chèng ê mı̂-hoe chı̍t nı̂ chı̍t nı̂ kiám-chió siu-sêng, khoàⁿ goán beh cháiⁿ-iūⁿ tō hó!
Lông-bı̂n B: Chó-chı̀ Sian-siⁿ. Goá 3 kah ê chhân-hn̂g lóng chèng mı̂-hoe,chóng-sı̄ kin-nı̂ mı̂-hoe tio̍h thâng chin lı̄-hāi; goá ê chu-pún lóng hē lo̍h-khı̀, chóng-sı̄ siu bô chı̍t-poàⁿ.
Chó-chı̀ : Hiaⁿ-tı̄, goá kā lín kóng, lín nı̂-nı̂ chèng mı̂-hoe, chiū mı̂-hoe só͘ su-iàu ê chu-ióng chū-jiân chı̍t nı̂ put-jû chı̍t nı̂, koh mı̂-hoe ê thâng-hāi, lín bô siau-to̍k tı̄-thâng, thâng cháiⁿ-iūⁿ oē sí ? Kiám m̄-sı̄ koh-khah lı̄-hāi mah? Taⁿ goá kā lín kóng, lín tio̍h ēng lûn-chok ê hoat-tō͘ lâi cheng-ka seng-sán. Lín khı̀ chiong hn̂g lê hō͘ chheng-khı̀, āu-lâi chèng han-chû.
Lông-bı̂n A: Han-chû sı̄ cheng-siⁿ ê chia̍h-mı̍h, bô ta̍t chı̂ⁿ. Lí beh kiò goán chia̍h han-chû lâi kè jı̍t sı̄ mah? (Chó-chı̀ lo̍h-khı̀ the̍h chı̍t kha siuⁿ)
Chó-chı̀ : Pêng-iú, chhiáⁿ lí khoàⁿ. Che sı̄ goá ēng nn̄g lé-pài kú ê sı̂-kan tı̄ sı̍t-giām-sek só͘ chai ê han-chû ê iōng-tô͘. (Chó-chı̀ the̍h chı̍t koàn, kóng che sı̄ sím-mı̍h?)
Lông-bı̂n B: (Phı̄ⁿ-khoàⁿ leh) Oh! che sı̄ chiú, che sı̄ chhò͘, sı̄ mı̄-hún, sı̄ thn̂g ,sı̄ ka-pi, thn̂g-chiùⁿ, tiān-hún, koh ū iû, o͘ oê-ko, kô͘-á. Oh! iáu koh ū, sǹg boē liáu.
Chó-chı̀ : Chiah ê lóng sı̄ tùi han-chû só͘ tit-tio̍h ê mı̍h-kiāⁿ.
Lông-bı̂n A: Oh! Koh ū chin hó chia̍h ê piáⁿ-lūi, chóng-kiōng ū 118 chióng, sı̍t-chāi chin kı̂-biāu.
Chó-chı̀: Bo̍h-tit lia̍h choè kı̂-koài, chiah ê lóng sı̄ Chú beh hō͘ lán ê, lán tio̍h ēng kám-siā lâi sêng-siū. (Nn̄g ê lông-hu chhiú lóng the̍h chı̍t tē thô͘-tāu chhut).
Lông-bı̂n C : Chó-chı̀ Sian-siⁿ, goán tùi lâm-pêng ê koâiⁿ soaⁿ-toē, lâi kiâⁿ 3 mı̂ 3 jı̍t chiah lâi kàu chia. Kè-khı̀ goán ê thó͘-toē lóng chèng mı̂-hoe,chóng-sı̄ thâng-hāi chin lı̄-hāi, nn̄g, saⁿ nı̂ chêng goán ê toē-hng ū thiaⁿ lí ê kiàn-gı̄ lóng-chóng chèng thô͘-tāu, thâu chı̍t nı̂ goán ū tit-tio̍h chin hó ê kè-siàu. Chóng-sı̄ kin-nı̂ thô͘-tāu toā hong-siu, tı̀-kàu kè-siàu chin bái, kúi-nā pah tùn ê thô͘-tāu hiat tı̄ chhân-nih bô lâng beh boé.
Lông-bı̂n D : Goán nā mài thiaⁿ lí ê oē, mā iáu ū tām-po̍h ê siu-jı̍p. Thô͘-tāu choè chhı̄-liāu sı̄ bô ta̍t chı̂ⁿ; choè lâng ê chia̍h-mı̍h chin hó chia̍h, chóng-sı̄ chia̍h boē pá. Khoàⁿ beh án-choáⁿ? Lí tio̍h thoè goán siūⁿ pān-hoat, nā bô goán chiū beh chhoā bó͘-kiáⁿ lâi hō͘ lí chhı̄.
Chó-chı̀: Chhiáⁿ lín lóng lı̄-khui goá, goá su-iàu an-chēng ê sı̂-kan.(Chó-chı̀ í-goā ê lâng lóng thè)
Chó-chı̀ : Oh! Goá ê Siōng-tè, Lí tio̍h pang-chān goá, goá ēng choē-choē hong-hoat beh pang-chān lông-bı̂n, chóng-sı̄ kin-á-jı̍t só͘ tú-tio̍h ê chiū-sı̄ hoán-tùi kap oàn-giân. Chú ah! Lí siáⁿ-sū chhòng-chō thô͘-tāu? Lí kı̀-jiân siúⁿ-sù goán kàu-gia̍h ê thô͘-tāu, lí it-tēng beh tùi thô͘-tāu siúⁿ-sù goán choē-choē mı̍h. Chú! Chhiáⁿ lí it-tēng chiong ò-biāu chí-sı̄ goá.
(Chēng-be̍k,沉默, Lông-hu C. D. chiūⁿ-tâi)
Lông-hu C: Chó-chı̀ Sian-siⁿ, lí teh siūⁿ sím-mı̍h? Tio̍h koáⁿ-kín thoè goán siūⁿ pān-hoat.
Chó-chı̀ :（Khí-sin, the̍h chı̍t tē thô͘-tāu)Chhiáⁿ lí bo̍h-tit kiáu-jiáu goá, goá beh jı̍p-khı̀ tı̄ goá ê sı̍t-giām-sek thèng-hāu Chú (thêng chı̍t sı̂-á, ū nn̄g ê gín-ná phō chı̍t chiah káu-á lâi)
Gín-ná : Chó-chı̀ Sian-siⁿ ū tı̄-teh bô?
Lông-hu C: Lí beh chhē i chhòng sím-mı̍h? I jı̍p-khı̀ tı̄ sı̍t-giām-sek, bô ài kap lâng kóng oē.
Gín-ná : Goá beh phō chit chiah káu lâi hō͘ i khoàⁿ pı̄ⁿ, goán chit só͘-chāi nā ū káu á-sı̄ ti phoà-pı̄ⁿ, lóng tio̍h chhē i chiah ū hoat-tō͘.
Lông-hu C: Chóng-sı̄ gín-ná, goán í-keng tı̄ chia tán i kúi-nā jı̍t lah, i iáu-boē beh chhut-lâi (thêng chı̍t ē-á Chó-chı̀ chhut)
Lông-hu C: Ū sím-mı̍h kè-ta̍t ê hoat-kiàn bô? Khoàⁿ lí ê bı̄n ū chhiò-iông,ún-tàng ū hó siau-sit.
Chó-chı̀: Goá beh chèng-bêng hō͘ lín khoàⁿ Siōng-tè bô pàng-sak lán. Chhiáⁿ lín lâi poaⁿ mı̍h-kiāⁿ (lâi khı̀ the̍h chin choē khoán ê mı̍h)
Chó-chı̀: Chiah ê lóng sı̄ goán tı̄ sı̍t-giām-sek só͘ choè chhut-lâi ê mı̍h-kiāⁿ.
Lông-hu C: Sian-siⁿ, lí kiám m̄-sı̄ ka-kı̄ tı̄ sı̍t-giām sek mah?
Chó-chı̀ : M̄-sı̄, ū goá ê Siōng-tè kap goá ha̍p-chok, chhiáⁿ khoàⁿ che sı̄ sím-mı̍h.
Lông-hu C : Oh! Che sı̄ gû-leng, koh ū mı̄-pāu(chı̍t hāng soà chı̍t hāng)che sı̄ tê, thn̂g, ka-pi (ná kóng ná pun hō͘ gín-ná kap kı̂-thaⁿ ê lâng chia̍h).
Lông-hu D : Chó-chı̀ Sian-siⁿ chhin-chhiūⁿ teh piàn kı̂-su̍t, tùi bô piàn ū, tùi thô͘-tāu piàn choē-choē siūⁿ boē liáu ê mı̍h-kiāⁿ. Goá lâi sǹg khoàⁿ leh, lóng-chóng kúi hāng :Gû-leng, mı̄-hún, tê, chhò͘, thô͘-tāu chiùⁿ, ba̍k-chúi, kiông-le̍k kô͘, iû-chhat, chhiū-iû, hé-iû, phang-chúi, phang soat-bûn, ní-liāu; oh! Iáu-kú ū, goá sǹg boē liáu.
Chó-chı̀ : Koh chı̍t hāng sı̄ choè ko-kùi ê io̍h-phín chiū-sı̄ eng-jı̂ ê phê-hu ko.
Lông-hu C : Kin-á-jit Chó-chı̀ Sian-siⁿ chiah-nı̍h toā ê hoat-kiàn, ū thoè lán ê bı̂n-cho̍k tı̄ siā-hoē siōng thó͘ chı̍t ê toā-khùi.
Chó-chı̀ : Chhiáⁿ lí m̄ thang kóng-khí goá ê miâ, chiū-sı̄ tio̍h chiong it-chhè ê êng-kng kui hō͘ Chú.
Lông-hu D: Oh ! Lí chin-chiàⁿ sı̄ Siōng-tè kap lí tông-chāi ê lâng.
(Koān-tiúⁿ, séng-tiúⁿ, Sı̍p-jı̄-hoē tāi-piáu, chóng-thóng pı̀-su chhut-lâi)
Chóng-thóng pı̀-su: Goá tāi-piáu Lô-su-hok Chóng-thóng hiòng lí piáu-sı̄ kèng-ı̀. Lí tùi thô͘-tāu só͘ hoat-kiàn ū toā kòng-hiàn jı̂n-lūi. Lí it-seng ho̍k-bū ê cheng-sı̂n sı̄ choân Bí-kok ê êng-kng.(chı̀n-chêng chiong chı̍t tiâu âng-sek ê hun-chiong kat tı̄ Chó-chı̀ ê sin-chiūⁿ)
Koān-tiúⁿ : Lí ê kòng-hiàn ū toā toā thê-ko o͘-lâng ê siā-hoē toē-ūi, goá tı̄ chia ài hiòng lí piáu-sı̄ kèng-ùi (siúⁿ i mûi-kùi hun-chiong).
Séng-tiúⁿ : Lí sı̄ bô͘-hoān ê kong-bı̂n, goá tāi-piáu choân séng ê jı̂n-bı̂n piáu-sı̄ kèng-ùi (chiong chı̍t tiâu nâ-sek chhái-toà sàng hō͘ i ).
Sı̍p-jı̄-hoē tāi-piáu: Lí sui-jiân m̄-sı̄ i-seng,chóng-sı̄ lí só͘ hoat-bêng ēng thô͘-tāu iû só͘ choè ê io̍h-phín ū chin toā ê kòng-hiàn(the̍h chı̍t pau chı̂ⁿ). Che sı̄ Kok-chè Sı̍p-jı̄-hoē ê choè toā chióng-kim(chiong kim-chı̂ⁿ sàng hō͘ i ).
Gín-ná : (chı̀n-chêng) Lí só͘ choè ê thô͘-tāu piáⁿ kap gû-leng chin hó chia̍h. Goá khoàⁿ-tio̍h chin choē lâng lóng teh kā lí o-ló koh sàng kı̀-liām mı̍h; goá iā ài ēng chit chiah kó͘-chui ê káu sàng lí choè kı̀-liām.
Chó-chı̀ : (Kiâⁿ kàu tâi-chêng, bı̄n ǹg téng-bı̄n). Chú ah! Goá sı̄ ēng chı̍t chiah bé oāⁿ lâi ê sı̀ⁿ-miā, lí iáu bô khoàⁿ-khin goá. Oh ! Kám-siā Chú, o-ló Chú, tio̍h chiong it-chhè ê êng-kng kui hō͘ Iâ-hô-hoa, kui hō͘ Iâ-hô-hoa.
Chèng-lâng : Goān it-chhè ê êng-kng kui hō͘ Iâ-hô-hoa. À-bēng.
------------The end-----------------
(Tâi-oân Kàu-hoē Kong-pò tē 959 hō, 1965 nı̂ 6 ge̍h)
