Kiáⁿ khah iâⁿ lāu-pē
Tı̄ Goā-kok ū chı̍t-ê choh-sit-lâng tùi chhân--nı̍h tò-tńg--lâi; i ê sè-kiáⁿ hut- jiân chiū kā i mn̄g kóng, "Pē ah! goá siūⁿ ài jı̍p-kàu, nā-sı̄ tú-tio̍h Boán-chhan ê jı̍t ē thang kap lāu-pē lāu-bú saⁿ-kap khı̀ siú kui-kí hó mah?" In lāu-pē thiaⁿ chiah ê oē toā hoaⁿ-hí, chiong i ê kiáⁿ phō--teh, liân-siaⁿ o-ló kóng, "Koai ê kiáⁿ ah! lí tùi chhut-sı̀ kàu taⁿ lóng hō͘ goá hoaⁿ-hí, goá chin-chiàⁿ sı̄ thiàⁿ--lí; chóng-sı̄ in-ūi lí chit-tia̍p iáu sè-hàn thài-chíⁿ-chhioh, goá pàng bē lo̍h-sim thang hō͘ lí khı̀, goá siūⁿ thèng-hāu pa̍t- jı̍t tióng-sêng chiah lâi jı̍p-kàu, chiong lí ê miâ hē tı̄ kàu-hoē-phō͘; án-ni khiok iā bē tı̂". Sè-kiáⁿ thiaⁿ chit hō ê oē toā- toā sit-lo̍h ǹg-bāng, sim-koaⁿ kek-kàu cha̍t thóng-thóng, liân poàⁿ-kù-oē iā bē kóng-chhut, chiū tiām-tiām bô koh chò siaⁿ, ka-tı̄ cháu khı̀ phian-phiah ê só͘-chāi kūi--teh kiû Iâ-so͘ lâi pang-chān i.
Koè kúi-nā-jı̍t chit ê gín-ná kap i ê lāu-bú chò-hoé toà tı̄ chhù-lāi, in pē khı̀ soaⁿ--nı̍h tò--lâi, hut-jiân siūⁿ--tio̍h hiah- ê iûⁿ-á bē kı̀-tit koáⁿ--lâi, chiū kiò i ê gín- ná kā i kóng, "Kiáⁿ lâi! lí ē thè goá khı̀ chhân--nı̍h khoàⁿ iûⁿ-á ū tò--lâi á-bē?" Gín-ná hoaⁿ-hí ı̀n kóng, "Ē no͘h! liâm- piⁿ chiū khı̀". In lāu-pē khoàⁿ i hoaⁿ- hoaⁿ hí-hí chhut-mn̂g.
Bô loā-kú sè-kiáⁿ koh tò-tńg--lâi, in pē chiū mn̄g i, "Khoàⁿ iûⁿ-á ū koáⁿ tò-- lâi bô?" Kiáⁿ ı̀n kóng, "Ū ah!" In lāu- pē koh mn̄g kóng, "Ū lóng jı̍p-tiâu bô, tiâu-mn̂g ū soà só bô?" Kiáⁿ ı̀n kóng, "Ū ah! lóng siu hó-hó". In pē sim-koaⁿ m̄ an-ún, chiū koh chài mn̄g i, "Liân hiah-ê iûⁿ-á kiáⁿ ū lóng siu jı̍p-tiâu-lāi bô?" Hit-sı̂ in kiáⁿ chiū ēng un-jiû kiong- kèng lâi kóng, "Pē ah! goá siūⁿ hiah-ê sè-chiah iûⁿ-á iáu iù-chíⁿ, chiah hō͘ i tiàm tı̄ goā-bı̄n, thèng-hāu kàu pa̍t-jı̍t hō͘ i toā chiah, hit-sı̂ chiah ka jı̍p-tiâu-lāi iā bē tı̂ lah!" In pē thiaⁿ che oē sim-lāi chhiok--tio̍h. Chiū sûi-sı̂ kı̄n-oá lâi kā sè- kiáⁿ kóng, "Gâu kiáⁿ ah! lí ê tı̀-sek pí goá khah iâⁿ, goá āu lé-pài chiū beh tùi Bo̍k-su kóng-khí lí ê miâ-jı̄, khoàⁿ ē-tit thang soà hō͘ lí jı̍p kàu-hoē á-bē?"
Chit téng-bı̄n só͘-siá--ê chiàu goá siūⁿ sı̄ ē kham-tit chò lán ê lı̄-ek, kiaⁿ-liáu lán Tâi-oân ê lâng iā ū chit-hō ê chhò- gō͘, éng-éng phah-sǹg gín-ná-lâng bē hiáu-tit, koh loán-jio̍k ê; siūⁿ thèng-hāu in kàu khah toā-hàn chiah beh siat hoat- tō͘ ín-chhoā, chāi in phah-sǹg sı̄ án-ni khah-tio̍h, khah ū lı̄-ek, sû-put-ti án-ni- seⁿ chin-chiàⁿ bô lı̄-ek: in-ūi chò pē-bú ê lâng khah-siông sı̄ ná-kú ná léng-tām, bô koán-kò͘ bô kà-sı̄, pàng kù hō͘ in khı̀ thit-thô, tı̀-kàu hō͘ chú-tē toā-hàn lóng m̄-bat tō-lí, lóng bô kui-kí; kàu hit-sı̂ chiah beh lâi bián-kióng ah-jı̍h, chò chı̍t- sı̂ áu-ut bē lo̍h, kiám m̄ sı̄ khah hùi-khı̀ mah? Put-jû thàn in sè-hàn hit-tia̍p; it--lâi su-io̍k iáu boē hoat-khí, jı̄--lâi tha̍k-chheh iā khah hó kı̀-tı̂, saⁿ--lâi ta̍k- jı̍t ū kang-hu teh ha̍k-sı̍p, iā koàn-sı̀, chū-jiân ē chiām-chiām bat tō-lí; kàu toā-hàn tióng-sêng ta̍k ê tio̍h chiâⁿ-kiáⁿ put-ti pháiⁿ kí-tōng. Chhiáⁿ lín kàu- hoē-lāi lâng put-lūn thoân-tō, tiúⁿ-ló, chip-sū, hiaⁿ-tı̄, chí-moāi tio̍h chı̄n-sim chı̄n-la̍t siat hó hoat-tō͘ lâi ín-chhoā kàu- hoē-lāi ê gín-ná o̍h Pe̍h-oē-jı̄, tha̍k Sèng-chheh lâi chiū-kı̄n Iâ-so͘. M̄ sı̄ kan-ta kà-in bat jı̄ kàu se̍k, chiū thang pàng-soah, kiaⁿ-liáu in iā soah--khı̀; chóng-sı̄ teh kà hit-tia̍p siông-siông kiaⁿ in jı̄ bē- kı̀--tit, só͘-í bô ki-hoē ē soà kóng hō͘ in thiaⁿ. M̄-kú nā kàu lé-pài tio̍h kap in chū-chı̍p kā in khui-thiah, soà kà in liām kúi-nā chat ê Sèng-keng, í-kı̍p kúi-nā mn̄g ê būn-tap; tē-it iàu-kín tio̍h thè in kı̂-tó, iā kap in kı̂-tó, ǹg-bāng Sèng-sı̂n khui in ê sim, hō͘ in tùi sè-hàn ē-hiáu chhim sı̀n lâi tit-tio̍h kiù.
Nā kó-jiân hō͘ ta̍k-ke ê lâng lóng bat Pe̍h-oē-jı̄ ē tha̍k Sèng-chheh, chiū gū- chá gū-àm thang chò lé-pài, tāi-ke lûn-liû tha̍k chı̍t nn̄g chat, á-sı̄ saⁿ-hô chò- hoé tha̍k; ēng án-ni sı̂-sı̂ kèng-pài Iâ-hô- hoa, chit-ê chin-chiàⁿ tē-it hó thiaⁿ lah!
(Tâi-lâm Hú-siâⁿ Kàu-hoē-pò, tē 84 tiuⁿ, 1892 nı̂ 4 ge̍h)