Kiaⁿ-to͘ Tāi-tián ê Chōng-hóng

Ùi Wiki Tô·-su-kóan

Chit pang goá ū kap goá ê hū-jı̂n-lâng khı̀ Kiaⁿ-to͘, tı̄ hia ge̍h goā jı̍t kú, sūn ki-hoē ū khoàⁿ Tāi-tián ê lāu-jia̍t. Tı̄ 11 ge̍h 7 hō Thian-hông pè-hā ū kàu Kiaⁿ-to͘. Kiaⁿ-to͘-chhı̄ ū chún-pı̄ chin-choē lâi hoan-gêng. Ū chhòng toā hoan-gêng-mn̂g tı̄ Thêng-chhia-tiûⁿ. Koe-lō͘ ê siang-pêng ū kat hoe-khoân, bān-soè kı̂ kap tiān-teng, iā piàⁿ-sàu chin chheng-khı̀. Tùi Thêng-chhia-tiûⁿ khı̀ kàu Hông-kiong, hit tiâu koe-lō͘ siang-pêng ū chē 25,0000 lâng, ia̍h ū chhòng ūi-só͘ tı̄ tiàm-lāi hō͘ lâng chē teh boē lâng, chı̍t ūi 2 kho͘, ia̍h ū chı̍t-kho͘-poàⁿ. Hit jı̍t chin-chiàⁿ sı̄ lāu-jia̍t. Ū ê tùi chin-hn̄g lâi. Kiaⁿ-to͘-hú ū chhut bēng-lēng kóng, Thian-hông pè-hā iáu-boē kàu-ūi ê í-chêng 6 tiám-cheng kú, koe-lō͘ ê thong-hêng beh kı̀m-chí. Tùi án-ni thiⁿ bē kng chiū khı̀ koe-lō͘-piⁿ chē. Thian-hông pè-hā 2 tiám kàu Thêng-chhia-tiûⁿ, hit-tia̍p ū pàng 101 mn̂g ê toā-phàu, kap pûn ga̍k-tūi. Tùi Thêng-chhia-tiûⁿ khí-sin kàu Hông-kiong ê pâi-lia̍t. 1. Kiaⁿ-to͘-hú ê kèng-sı̄ bé-tūi. 2. Kūn-oē khı̂-peng-tūi. 3. Hiân-só͘ gū-ú-chhia. 4. Chiáng-tián ê bé-tūi. 5.Sek-pō͘ koaⁿ ê bé-chhia. 6. Kiong-lāi chhù-koaⁿ kap Tāi-lé sài-tiúⁿ-koaⁿ ê bé-chhia. 7. Kiong-lāi tāi-sı̂n ê bé-chhia kap khı̂-peng Thian-hông-kı̂. 8. Kūn-oē chiòng-hāu bé-tūi. 9. Sèng-siōng ê bé-chhia, Sı̄-chiông-tiúⁿ poê-sèng. 10. Chú bé thâu kap tē 16 Su-thoân-tiúⁿ ê bé. 11. Tāi-lé sài chóng-chhâi, kap Hông-cho̍k ê bé-chhia. 12. Sı̄-chiông bú-koaⁿ ê bé-chhia. 13. Loē-koh chóng-lí tāi-sı̂n ê bé-chhia. 14. Sı̄-i pı̀-su-koaⁿ, Sù-ki-koaⁿ ê bé-chhia. 15. Kiaⁿ-to͘-hú ê kèng-sı̄ bé-tūi. Í-siōng ê pâi-lia̍t chin-chiàⁿ sı̄ hó-khoàⁿ. Ta̍k lâng khoàⁿ chin hiān, chèng peh-sı̀ⁿ chin hoaⁿ-hí. Ta̍k ê-hng ū thê-teng hêng-lia̍t tı̄ koe-lō͘ kap Hông-kiong-goā hoah bān-soè. Tiān-chhia ia̍h ū kat hoe chiok-hō. Kàu 10 hō ū chē-ūi-sek, hit-jı̍t ia̍h chin lāu-jia̍t. Ē-po͘ sı̂ 3 tiám poàⁿ choân-chhı̄ ê peh-sı̀ⁿ ū hioh 3 hun kú, hoah bān-soè, ia̍h pûn chúi-lê, pàng toā-chhèng. Hoah bān-soè ê siaⁿ hō͘ choân-chhı̄ tín-tāng. Cha̍p-it hō téng-po͘ 10 tiám cheng, choân kok ê Ki-tok kàu-hoē ū chū-chı̍p tı̄ Tông-chı̀-siā ê hāu-tiâⁿ, kú-hêng Gū-tāi-tián hōng-hō-sek. Kok phài ê kàu-hoē ū phài tāi-piáu lâi hù-hoē. Chí-ū Tâi-oân ê kàu-hoē bô phài lâng khı̀ nā-tiāⁿ. Hit jı̍t goán ia̍h ū khı̀ hù hoē, lóng-chóng ū chheng goā lâng. Tông-chı̀-siā ê hāu-tiúⁿ choè Su-hoē-chiá. Sūn chit-ê ki-hoē, choân kok ê Ki-tok kàu-hoē ū khui toā ián-soat-hoē tı̄ phok-lám-hoē ê mn̂g-kháu. Ta̍k jı̍t ū ián-soat 3 pái. Ū tiâu-chhoân koh chhut-miâ ê bo̍k-su lâi ián-soat. Hū-jı̂n Kiáu-hong-hoē ia̍h ū chhòng chiap-thāi-só͘ tı̄ hoē-tiûⁿ-piⁿ teh chiap-thāi lâng-kheh, chhòng tê hō͘ lâng lim. Ia̍h ū ı̀n 30,0000 pún ê pò͘-tō chheh teh sàng lâng, sı̄ choân-kok chhut-miâ ê bo̍k-su só͘ choè ê lūn. Ia̍h ū chū-chı̍p sı̀n-tô͘ ê tāi-hoē tı̄ Chheng-liân-hoē-koán, chhiáⁿ put-chí choē ūi chhut-miâ lâng lâi ián-soat. Tāi-ke put-chí oa̍h-tāng. Lūn chit pang Tāi-tián ê lāu-jia̍t, thiaⁿ-kı̀ⁿ kóng, tùi ū Jı̍t-pún kok kàu taⁿ, iáu-boē bat án-ni. Thian-hông pè-hā kap chhin-ông kok tāi-sı̂n, í-kı̍p kok kok ê kong-sài tiàm tı̄ Kiaⁿ-to͘ 20 jı̍t kú. Tı̄ hia ia̍h ū khui kok-hoē kúi-nā pái. Kàu 27 jı̍t chiū tńg-khı̀ Tang-kiaⁿ. Ǹg-bāng āu-koàn oē siá lūn pa̍t hāng. (Tâi-oân Kàu-hoē-pò tē 370 kı̂, 1916 nı̂ 1 goe̍h)