Kim-chı̂ⁿ teh sí Tâi-oân Jı̂n-bı̂n

Soán-kí nā kàu, chin-choē-lâng lóng chin hoaⁿ-hí, ū kài-choē hāu-soán-jı̂n ē lâi bé phiò, chit-ê nn̄g-pah, hit-ê saⁿ-pah, ū-ê the̍h gō͘-pah, tàu-tàu leh, ū thang chia̍h chı̍t-tǹg chho͘-pá. Ū chı̂ⁿ lâi, goá chiū tâu-hō͘--i, nā bô piⁿ--a “sâu-sı̍h”. Tān-sı̄, lí nā khoàⁿ tio̍h pún-khan chit-kı̂ ê chú-tê, lí chiū chai chiah-ê hāu-soán-jı̂n soán-kí ê sı̂, khai sió-khoá chı̂ⁿ, hō͘ lí sió-khoá tam chı̍t-ē tiⁿ, tòng-soán liáu āu, in (á-sı̄ in-ê tóng) tō lóng thio-thio tńg-lâi ah. Lán lâu-hoeh lâu-koāⁿ só͘ la̍p ê soè-kim, kok-khò͘ thàng in ê Tóng-khò͘; Sin-tâi-phiò toā-pé toā-pé the̍h khı̀ chhiàⁿ goā-kok-lâng khai; siā-hoē hok-lı̄ toā-pō͘-hūn sı̄ beh hō͘ kun-kong-kàu--ê, lí chí-ū giàn-sian-ko ....... Nı̂-té iū beh koh soán-kí ah, m̄-chai lí sı̄ m̄-sı̄ koh ē the̍h lâng ê chı̂ⁿ, sı̄ m̄-sı̄ koh hiah-nih ū-chêng ū-gı̄, i the̍h chı̂ⁿ bú-jio̍k lí, lí koh soán hō͘ i ? Nā sı̄ án-ni chiū-sı̄, tâu-phiò hō͘ Kok-bı̂n-tóng, hō͘ in ná ū koân-le̍k kā lí chia̍h kah sí-sí-sí. Chit-má Tâi-oân, hui-siông thái-ko, piàn-chò lah-sap-tó. Liân 3 hoè gín-á to chai, ù-jiám hui-siông m̄-hó. Só͘-í kok tē-hng lóng khí-lâi khòng-cheng, chó͘-chí ta̍k-chióng kang-chhiúⁿ ê toā ù-jiám. Tān-sı̄, chit-má kang-chhiúⁿ mā liû-hêng chı̍t-pō͘, chiū-sı̄ poah chı̍t-koá chı̂ⁿ lâi hoê-pò tē-hng. Iáu-siū, khoàⁿ tio̍h chı̂ⁿ, ta̍k-ê ba̍k-chiu lóng tián toā-lúi. Chit-má tē-hng ê jı̂n-bı̂n piàn-choè só͘ koan-sim--ê, m̄-sı̄ beh án-choáⁿ kái-koat ù-jiám, siōng koan-sim--ê sı̄, chı̍t-ê lâng beh hoê-pò goā-choē. Hûiⁿ-tı̍t ā bē sûi sí, ká pháiⁿ-ūn, tú-hó sı̄ goá tio̍h-gâm ? Beh ù-jiám chāi lí, ū chı̂ⁿ siōng-hó. Chin-chiàⁿ chı̂ⁿ ē teh sí lâng. Kang-chhiúⁿ hong-bı̄n chiū, “chı̂ⁿ tùi chhùi kā lí that leh, goá kè-sio̍k ù-jiám.” (Hong-hiòng Tē 17 kı̂, 1992 nı̂ 7 goe̍h)