Kim-kù Ê Kò͘-sū 02

Kim-kù Ê Kò͘-sū
1959 2 Ge̍h 2 Ge̍h 1 Jı̍t Kim-kù: Lín tio̍h chiong Kai-sat ê mı̍h la̍p hō͘ Kai-sat, chiong Siōng-tè ê mı̍h la̍p hō͘ Siōng-tè. (Lō͘-ka 20:25). Chêng jı̍t Ngá-hūi kap Êng-chong in pa-pa chhoā in 2 hiaⁿ-moāi-á khı̀ Jı̍t-goa̍t-thâm thit-thô. In chē chhia se̍h chin tn̂g ê soaⁿ-lō͘ chiah kàu-ūi. Lō͘-tiong Êng-chong mn̄g pa-pa kóng, “Chiah-nih hn̄g ê lō͘ sı̄ sáⁿ lâng lâi chō ê.” Pa-pa kóng che sı̄ lán kok ê chèng-hú ēng chı̂ⁿ chhiàⁿ kang-lâng chō-ê. Jı̍t-goa̍t-thâm chin toā, ná chhin-chhiūⁿ hái, pa-pa kā in kóng, “Chiah ê chúi sı̄ beh chò hoat-tiān ê lō͘-ēng. Hit pêng ū chı̍t ê hoat-tiān-só͘, lán chhù-nih ê tiān-hoé, thiān-hong, siu-im-ki, ut-táu ê tiān lóng sı̄ tùi chia sàng chhut-khı̀ ê.” In lo̍h-khı̀ chē chûn-á, Ngá-hūi thiaⁿ pa-pa án-ni kóng ná siūⁿ, tàu-tí sı̄ sáⁿ-lâng hiah-nı̍h hó-sim chò chit ê hoat-tiān-só͘, ún-tàng tio̍h khai chin choē chı̂ⁿ, chiū mn̄g in pa-pa, in pa-pa kóng, “Che sı̄ kok-ka ê chı̂ⁿ lâi khí ê.” Chûn-á tı̍t-tı̍t chı̀n-chêng, āu-bı̄n ê chhù ná sè-keng khı̀. In pa-pa koh kóng, “Lán tit-tio̍h kok-ka ê pó-hō͘ kap un-hūi chin choē, m̄-nā chō toā-lō͘, m̄-nā chō hoat-tiān-só͘, iā ū khí ha̍k-hāu, iā ū kun-tūi pó-hō͘ lán bián-siū goā-kok ê chhim-hāi, iā ū kéng-chhat lia̍h pháiⁿ lâng, hō͘ hó-lâng an-sim koè-jı̍t.” Êng-chong kóng, “Pa-pa! Kok-ka thài ū hiah-nı̍h choē chı̂ⁿ.” Pa-pa ı̀n kóng, “Chiū-sı̄ choè peh-sı̀ⁿ ê lâng ta̍k ê la̍p-soè, kok-ka chiah ū chı̂ⁿ, só͘-í lán la̍p-soè iā sı̄ teh hō͘ lán hióng-siū khah hó ê seng-oa̍h. I chē ê chûn-á sái kàu Jı̍t-goa̍t-thâm ê tiong-ng, Ngá-hūi oa̍t-thâu sı̀-kho͘-liàn-tńg khoàⁿ, in-ūi kéng-tı̀ chin súi hui-siông kám-kek, kā in ko-ko kóng, “Ko-ko lí khoàⁿ! Hiah ê soaⁿ, hiah-ê chúi-iáⁿ! Sı̍t-chāi chin súi.” Êng-chong siūⁿ khí Sèng-si tē 3 siú “Chhiū-ba̍k chhân-hn̂g chúi-choâⁿ, kiong-chhong toā-hái koân-soaⁿ......” Chiū tı̄ chhùi-lāi sè-siaⁿ gı̂m, (chhiáⁿ kàu-oân gı̂m tē-it chat iā hó), Ngá-hūi iā toè i gı̂m, gı̂m liáu in pa-pa chhiò-chhiò kā in kóng, “Lín lóng chai, chiah ê soaⁿ, chiah ê thian-jiân sı̄ Siōng-tè chhòng-chō ê, Siōng-tè m̄-nā chhòng-chō chiah ê iā hō͘ lán oa̍h-miā, hō͘ bān-mı̍h sêng-tióng, lán chiah ū thang chia̍h, ū thang chhēng, ū thang toà, Siōng-tè ê un pí kok-ka khah toā. Lán tùi kok-ka la̍p-soè, iā tio̍h koh-khah hoaⁿ-hí hiàn-kim hō͘ Siōng-tè.” Êng-chong siūⁿ kóng, Siōng-tè ài lán ê hiàn-kim m̄-chai beh chò sím-mı̍h lō͘-ēng? Pa-pa chiah kóng, “Siōng-tè ài lán sè-kan lâng lóng tit-tio̍h kiù, ū kiò chin choē lâng choan-sim thoân tō-lí, ı̀n Sèng-keng, siá tō-lí ê chheh, khí lé-pài-tn̂g, iáu ū chin choē lâng, chiah ê lóng tio̍h ēng chin choē chı̂ⁿ, lán tio̍h hōng-hiàn thang hō͘ Siōng-tè só͘ ài chò ê kang ū chı̂ⁿ thang chò.” Êng-chong kap Ngá-hūi thiaⁿ tio̍h án-ni chiū koat-sim chit lé-pài beh khiām khah chē chı̂ⁿ thang tı̄ Chú-jı̍t-o̍h ê sı̂ hiàn-kim. Jı̍t-thâu ê kng chiò lâi, liâng-hong bı̂-bı̂-á chhoe-lâi, in chē ê sè-chiah chûn bān-bān-á tı̄ chúi téng teh sái, in ê sim moá-moá ê kám-siā. (T. T. T. siá) 2 Ge̍h 8 Jı̍t Kim-kù: I m̄ sı̄ sí-lâng ê Siōng-tè, sı̄ oa̍h-lâng ê Siōng-tè. (Lō͘-ka 20:38) Chha-put-to 100 nı̂-chêng, tı̄ Au-lô-pa ê chı̍t-kok Ò-tāi-lı̄-a ê sū. Tı̄ hit ê kok ū chı̍t ê hiuⁿ-siā kiò-chò He-lu-tō-ki-luh. Hit-sı̂ tú-tú sı̄ hit ê chhut-miâ ê Ná-pho-lûn Tāi-tè kap Ò-tāi-lı̄-a teh sio-chiàn ê sı̂, só͘-í Ná-pho-lûn kéng chit ê sió hiuⁿ-siā iā tio̍h chiàm khí-lâi chiah oē ēng-tit, só͘-í bēng-lēng chı̍t ê tāi-chiòng chhoā 1 bān 8 chheng miâ ê tāi-kun kong lâi kàu chit ê hiuⁿ-siā. Hit sı̂ tú-tú sı̄ Koh-oa̍h-cheh ê chı̀n-chêng mê. Keh-chá-khí chit ê hiuⁿ-siā ê lâng ūi-tio̍h kóng kin-á-jı̍t sı̄ Koh-oa̍h-cheh, só͘-í thàu-chá, chin hoaⁿ-hí khí-lâi, seng khoàⁿ tang-pêng ê soaⁿ. Ūi-tio̍h hō͘ jı̍t-thâu ê kng chiò tio̍h, ū kim-sih-sih, oē siā lâng ê ba̍k-chiu ê mı̍h tı̄ soaⁿ moá-moá sı̄. In tio̍h chı̍t-kiaⁿ, chim-chiok khoàⁿ, chiū-sı̄ Ná-pho-lûn ê kun-tūi í-keng kong lâi kàu hia lah. Tāi-ke m̄-sı̄ teh Koh-oa̍h-cheh ê hoaⁿ-hí lah, hiuⁿ-siā lóng toā iô-choah, toā iô-tāng, m̄-chai án-choáⁿ khah hó. Hiuⁿ-siā ê gâu-lâng saⁿ-kap chham-siông kóng, Lán ê hiuⁿ-siā iā bô bú-khı̀, iā bô peng, boē-thang chò sím-mı̍h, chí-ū tâu-hâng. Tāi-ke siūⁿ beh koat-tēng ê sı̂, hit tiong-kan ū chı̍t ê bo̍k-su khiā khí-lâi kóng: “Chu-ūi, kin-á-jı̍t sı̄ lán chı̍t-nı̂ tiong tē-it hoaⁿ-hí ê Koh-oa̍h-cheh. Chit-khoán ê jı̍t m̄-thang siūⁿ chit-khoán siong-sim ê sū. Kin-á-jı̍t sı̄ Kiù-chú koh-oa̍h ê jı̍t, lán tāi-ke tē-it tāi-seng tio̍h lâi pài-tn̂g lé-pài, o-ló kám-siā oa̍h-oa̍h ê Siōng-tè. Só͘-í lín tio̍h chiàu-siông kòng toā-cheng, thang lóng lâi lé-pài. Oa̍h ê Siōng-tè beh chhin-chhiūⁿ kó͘-chá pó-hō͘ Mô͘-se, Tāi-pı̍t, Í-sài-á, tek-khak iā beh pó-hō͘ lán.” Thiaⁿ che, ū chı̍t-poàⁿ-ê-á bô sı̀n-gióng ê lâng thí-chhiò i, chóng-sı̄ choè-āu tāi-ke koat-tēng chiàu bo̍k-su só͘ kóng ê lâi chò. Khong, khong, khong......... hiuⁿ-siā ê lâng tı̄ chit-khoán chin gûi-hiám ê sı̂ ê Koh-oa̍h-cheh lé-pài, só͘-í tùi tang, tùi sai, tùi hia tùi chia, toā-lâng, gín-ná lóng chū-chı̍p lâi pài-tn̂g. Tùi soaⁿ-téng khoàⁿ chit ê khoán-sit ê tāi-chiòng siūⁿ-lâi siūⁿ-khı̀, siūⁿ kóng, “Che tek-khak ū toā ê kè-oē, tı̄ chit ê hiuⁿ-siā m̄-chai ū bih loā-chē ê peng iā bô tek-khak; nā bô in thài oē hiah-nih pêng-an, chiàu pêng-siông teh lé-pài.” Só͘-í koáⁿ-kín hoat bēng-lēng lı̄-khui chit ê hiuⁿ-siā. Khong, khong, khong. Pài-tn̂g ê toā-cheng tân liáu ê sı̂, soaⁿ-téng í-keng bô khoàⁿ-kı̀ⁿ chhiuⁿ, kiàm, lâng ê iáⁿ. Sió-pêng-iú, lán ê Siōng-tè sı̄ oa̍h ê Siōng-tè, lán bô-lūn pi-siong ê sı̂, thang kiaⁿ ê sı̂, tio̍h oē kı̀-tit, oa̍h ê Siōng-tè teh pó-hō͘ lán, chiàu-kò͘ lán, put-sı̂ kap lán saⁿ-kap tı̄-teh. Saⁿ-kap liām kin-á-jı̍t ê kim-kù. (T. H. C. siá) 2 Ge̍h 15 Jı̍t Kim-kù: Lí tio̍h chı̄n sim, chı̄n sèng, chı̄n ı̀, chı̄n la̍t thiàⁿ Chú, chiū-sı̄ lí ê Siōng-tè......koh tio̍h thiàⁿ lí ê chhù-piⁿ chhin-chhiūⁿ ka-kı̄. (Má-khó 12:29,30) Tng lán ê Chú Iâ-so͘ iáu tı̄ sè-kan ê sı̂ ū keng-ha̍k-sū, kap kà lu̍t-hoat ê sian-siⁿ, in chin ài chhoē phāng lâi ki-chhı̀, á-sı̄ po̍k-tó Iâ-so͘. Ū chı̍t-pái in ēng sím-mı̍h sı̄ choè toā ê kài lâi mn̄g Iâ-so͘. In ê ı̀-sù sı̄ ài hián-bêng in ka-kı̄ ê hó, kı̂-sı̍t in ê só͘-choè chē-chē sı̄ chin sio̍k-hoà, chin ké-hó. Goá bat ū chı̍t-pái tha̍k chı̍t ê kò͘-sū, kak-tit chin ū hâm-khǹg kà-sı̄, goá tı̄ chia lâi kóng hō͘ lín thiaⁿ. Ū chı̍t ê toā seng-lí lâng, i sı̄ tiàm tı̄ Hi-lia̍p ê Ko-lı̂m-to, Ko-lı̂m-to sı̄ tong-sı̂ ê toā káng-kháu. I pêng-sı̂ sı̄ choè bō͘-e̍k-siong, chiū-sı̄ tùi pún-kok the̍h chē-chē bu̍t-sán khı̀ goā-kok, iā tùi goā-kok chiah bé chē-chē goā-kok-hoè tò-lâi pún-kok. Put-chí hō͘-lı̄, put-chí hoat-châi, ka-kı̄ chéng-chûn, bé chin chē lô͘-châi, ēng in choè chúi-siú lâi kò-chûn. Tong-sı̂ ê kau-thong sı̄ ēng koà-phâng ê chûn lâi koè-hái, bô hong ê sı̂ chiū kúi-nā cha̍p-lâng lâi iô-ló͘, kò-chûn, ēng án-ni lâi kau-thong. Ū chı̍t pái i tùi Ai-kı̍p bé tio̍h boán-chài ê tiû-toān pò͘-phit, í-kı̍p chin chē ê toā-be̍h, kap kı̂-thaⁿ ê hó-mı̍h, beh tò-khı̀ in Hi-lia̍p. Pêng-sı̂ i kàu-ke̍k ge̍k-thāi hiah ê chúi-siú, siat-sú ū bô ha̍p i ê ı̀-sù ê, siông-siông ēng kùn, á-sı̄ phoê-piⁿ kā in phah, ū sı̂ hō͘ i thâi sí hiat-lo̍h hái ê iā ū. Sı̍t-chāi khoán-thāi hiah ê lô͘-châi tú-tú chhin-chhiūⁿ khoán-thāi gû, bé chı̍t-iūⁿ, tùi lâng iā-sı̄ ke̍k khek-po̍k, pàng tāng-lı̄, kau-kiat pháiⁿ-lâng lâi le̍k-sek lâng. Taⁿ chit pái chûn kiâⁿ kàu poàⁿ hái, hut-jiân tú-tio̍h hong-thai, kúi-nā jı̍t lóng bô khoàⁿ-kı̀ⁿ jı̍t, goe̍h, chhiⁿ ê kng. M̄-nā lo̍h-phâng, iā í-keng hiat-ka̍k chı̍t-pō͘-hūn khah tāng ê mı̍h, í-kı̍p chı̍t-pō͘-hūn ê toā-be̍h. Nā-sı̄ hong lóng bô khah tiām, toā éng iû-goân chı̍t-ē, chı̍t-ē phoah koè i ê chûn-pho téng, put-lūn i ēng piⁿ lâi phah, ēng kùn lâi kòng hiah ê lô͘-châi, sı̄m-chı̀ ū ê hō͘ i phah-sí, to-sı̄ sái bē chı̀n-chêng. Hit sı̂ i chiū tùi i ê sı̂n-bêng lú-sı̂n, ná-chún lán Tâi-oân sè-sio̍k lâng só͘ sı̀n ê Má-chó͘-pô lâi hē-goān. I kóng i nā ē-tit kiù pêng-an kàu chhù ū miā chiū hó, i kam-goān chiong chûn só͘ ū ê lâi hiàn, beh koh kā lú-sı̂n têng khí biō. Kó-jiân ū-iáⁿ hong chiām-chiām tiām khı̀, éng iā pêⁿ lah. Hit sı̂ i chin hō͘-hoé, kóng beh chai iā mài hiàn hiah chē. Āu-lâi i chiū kā lú-sı̂n kóng, goá sı̀n lí m̄ ài tē-chú hiah lōng-hùi, biō to iáu hó-hó, to iáu ē toà tit, goá lâi kā lí iû-chhat chiū hó lah. Kàu chhù ê sı̂ chı̍t ê hoáⁿ koè saⁿ-tang, soà kóng chit-sı̂ chin put kéng-khı̀, goá sı̀n lú-sı̂n lí ún-tàng m̄ ài lâng lōng-hùi, lô-sim, sún-chı̂ⁿ. Goá goān hiàn chı̍t-tùi gû-iûⁿ, ǹg-bāng lí kàm-la̍p, koh bô loā-kú, bô phah-sǹg i ê seng-lí ū sió-khoá liáu-chı̂ⁿ, i chiū chin m̄-goān, soà khan-thoa lú-sı̂n bô pó-pı̀, chiū chhú-siau i ê gû-iûⁿ, chí-ū the̍h tām-po̍h chhin-chhiūⁿ lán Tâi-oân lâng teh hiàn ê mı̄-ku khı̀ hiàn nā-tiāⁿ. Lí kā i khoàⁿ chit ê lâng, pêng-sı̂ m̄-bat teh kèng-sı̂n, sū kàu ê sı̂ chiū khàu-loā i ê sı̂n-bêng, sū koè-liáu ê sı̂ i chiū bē kı̀-tit, jı̂-chhiáⁿ soà koè-siàu i ê sı̂n-bêng bô pó-pı̀. Chit-khoán sim ê kèng-sı̂n lí siūⁿ tio̍h, á m̄-tio̍h. M̄-tio̍h, chin kiàn-siàu, án-ni i ê sim sı̄ lia̍h sı̂n choè i ê lô͘-châi, sı̄ kap i siāng-khoán pang-chān i ê tham-sim ê lâng. Iâ-so͘ ê sı̂-tāi ê Hoat-lı̄-sài lâng iā ū chit-khoán ê su-siúⁿ, kà lâng khek-po̍k pē-bó, iā chiah lâi hiàn po̍k-hô, má-khûn, ke̍k sió-khoá ê mı̍h, lâi beh piáu-sı̄ i kèng-sı̂n ê jia̍t-sim. Sı̍t-chāi chin kiàn-siàu, chin chha-biū Siōng-tè ê kà-sı̄. Kèng-sı̂n m̄-sı̄ án-ni. Tē-it sı̄ lāi-sim, lāi-sim ū chı̀-sêng, chin-chiàⁿ sı̄ chı̄n-sim, chı̄n-sèng, chı̄n-ı̀ chı̄n-la̍t lâi thiàⁿ Chú. Koh tùi pē-bó, hiaⁿ-tı̄, chhù-piⁿ lâi hián-bêng bô ké ê thiàⁿ-sim. Che chiah sı̄ chin-chiàⁿ ê kèng-sı̂n. Taⁿ chá-khí lán tio̍h lâi hoán-séng, lán koè-khı̀ ê kèng-pài Sı̂n, Siōng-tè sı̄ ēng sím-mı̍h khoán-sit. Lán bat ēng goā-phoê, kı̂-sı̍t lán ū kàu khiân-sêng á-bô? Lán nā ū-iáⁿ thiàⁿ Siōng-tè, iā ún-tàng ē thiàⁿ lâng chiah tio̍h, ū á-bô? (L. J. S. siá) 2 Ge̍h 22 Jı̍t Kim-kù: Lín kı̀-jiân kiâⁿ i tı̄ goá ê hiaⁿ-tı̄ chı̀-bı̂-sè ê chı̍t ê, chiū-sı̄ kiâⁿ i tı̄ goá. (Má-thài 25:40) Kó͘-chá kó͘-chá chı̍t-chheng goā-nı̂ chêng, kiò choè Sū-lı̄-a ê kok-ka ū chı̍t ê chin-chiàⁿ jia̍t-sim pài Siōng-tè ê lāu a-peh kap lāu a-pô, Siōng-tè hō͘ in 2 ê lāu kong-pô chin hó-gia̍h, chha-put-to choân kok tē-it hó-gia̍h ê lâng, chóng-sı̄ chin khó-sioh lóng bô seⁿ kiáⁿ, in chiū mê-jı̍t tùi Siōng-tè kiû ài beh tit-tio̍h chı̍t ê hāu-seⁿ, kó-jiân Siōng-tè ū chiâⁿ in ê kı̂-tó, tı̄ a-pô lāu-lāu-lāu ê sı̂ chiah seⁿ chı̍t ê hāu-seⁿ chin kó͘-chúi, pē-bú chin hoaⁿ-hí chiū chiong chit ê hāu-seⁿ beh hiàn hō͘ Siōng-tè ēng, iā hō-miâ kiò-choè Ni-ko-la-su. Chóng-sı̄ chin-chiàⁿ khó-lı̂n, chit ê gín-ná iáu sè-hàn ê sı̂ pē-bú í-keng nı̂-lāu chiū sí khı̀ lah. Ni-ko-la-su ū tit-tio̍h pē-bú ê sı̀n-gióng iā koat-sim beh choè Siōng-tè ê kang. Chóng-sı̄ i ū siūⁿ kóng beh choè Siōng-tè ê kang, bô su-iàu choè hó-gia̍h ê lâng, i chiū siông-siông toà chin chē chı̂ⁿ chhut-khı̀, boé chia̍h-mı̍h á-sı̄ saⁿ-khò͘ sàng hō͘ chin chē khó-lı̂n ê lâng. I iā hoan-hù hiah ê lâng m̄-thang hō͘ lâng chai, ū sı̂ boé chin chē mı̄-pau, piáⁿ, thn̂g-á, ēng chı̍t ê chin toā ê tē-á té leh sı̀-koè kiâⁿ khoàⁿ-tio̍h sàn-hiong khó-lı̂n ê gín-ná lóng pun hō͘ in chia̍h. Ni-ko-la-su put-sı̂ to ē-kı̀-tit Iâ-so͘ ê oē kóng: “Lín kı̀-jiân kiâⁿ i tı̄ goá ê hiaⁿ-tı̄ chı̀-bı̂-sè ê ê chı̍t ê chiū-sı̄ kiâⁿ i tı̄ goá.” Iā siông-siông teh siūⁿ siat-sú Chú Iâ-so͘ nā tı̄ chia, I tek-khak ē pang-chān chiah ê sòng-hiong lâng, goá tio̍h lâi kā Chú Iâ-so͘ choè. Ni-ko-la-su tı̄ hoē-tn̂g tam-tng Siōng-tè ê kang í-goā siông-siông phāiⁿ toā-pau ê mı̍h khı̀ pun sòng-hiong lâng, Ni-ko-la-su tı̄ in ê tē-hng hō͘ lâng kiò-choè gâu thiàⁿ lâng ê sian-siⁿ, āu-lâi tı̄ kàu-hoē hō͘ lâng kéng choè choè-koân ê tē-ūi, i ê miâ-siaⁿ thàu-kàu ta̍k só͘-chāi, tāi-ke lóng kiò i “Siōng-tè ê Ni-ko-la-su”. Chin chun-kèng i. Bô-lūn toā-lâng á-sı̄ gín-ná lóng khoàⁿ i choè sèng-jı̂n, só͘-í Siōng-tè ê Ni-ko-la-su ê tāi-chı̀ tùi pa-pa thoân kàu kiáⁿ tùi kiáⁿ thoân kàu sun chı̍t-tāi chı̍t-tāi teh siàu-liām i, chiū i ê miâ hō͘ lâng kiò-choè “Sèng ê Ni-ko-la-su”, āu-lâi i ê miâ piàn-thoân kàu choân sè-kài, chiâⁿ-choè kiōng-tông ê miâ chiū-sı̄ San-ta-ku-lo-su, che sı̄ tùi Sèng ê Ni-ko-la-su lâi piàn-im ê. Lán tú-chiah koè Sèng-tàn bô loā-kú, Chú Iâ-so͘ ê chhut-sı̀ hō͘ choân peh-sı̀ⁿ lâi siàu-liām i ê kiù-un, chóng-sı̄ in-ūi chit ê Ni-ko-la-su ū chiàu Iâ-so͘ ê kà-sı̄ khı̀ kiâⁿ tı̄ I ê hiaⁿ-tı̄ chò-bı̂-sè ê chı̍t ê, án-ni tı̄ Sèng-tàn ê sı̂ hō͘ tāi-ke siang-sı̂ siàu-liām i ê hó só͘ kiâⁿ, te̍k-pia̍t lán sió-pêng-iú chiū-sı̄ chin hoan-gêng chit-ūi San-ta-ku-lo-su. Lán tio̍h o̍h i ê bô͘-iūⁿ ū chiàu Iâ-so͘ ê kà-sı̄ siông-siông pang-chān khó-lı̂n hiah ê bı̂-sè tiong ê chı̍t ê. Chiū-sı̄ kan-khó͘ lâng sàn-hiong lâng, lāu-toā-lâng bô pē bô bú ê pháiⁿ-miā lâng, án-ni lán chiū ū kiâⁿ tı̄ lán ê Chú Iâ-so͘ lah. (C. S. L. siá) Lâng nā ū phāu-tiāⁿ ko-siōng ê bo̍k-tek, gōng-lâng iā oē piàn-chiâⁿ toā jı̂n-bu̍t. (Hui-lı̍p-pí 3:14) Chí-ū kiâⁿ chiàⁿ-lō͘, chí-ū choè chèng-tong ê tāi-chı̀, nā án-ni chiū-sı̄ thiⁿ poa̍h-lo̍h-lâi, á-sı̄ chı̍t-bān ki chhèng ǹg lí teh biâu-chún, lí iā m̄-bián kiaⁿ. Chú sı̄ goá ê po̍k-chà-la̍t, chà-chhùi goá ê sim, hō͘ goá thòng-hoé choē, chà-chhùi goá ê kiau-ngō͘ ngı̄-sim. Chà khui goá ê choē-gia̍t. Ū Chú saⁿ-kap tı̄-teh, chiū oē chai-iáⁿ sím-mı̍h khoán ê kı̂-tó sı̄ ha̍p I ê chí-ı̀.