Kim-kù Ê Kò͘-sū 03
Kim-kù Ê Kò͘-sū
1959 3 Ge̍h
3 Ge̍h 1 Jı̍t
Kim-kù: Liân gín-ná tı̄ só͘ choè ê, iā hián-bêng i ê pún-sèng. (Chim-giân 20:11)
Tı̄ A-hui-lı̄-ka ê bó͘ chı̍t só͘-chāi. Ū chı̍t-jı̍t chı̍t ê phah-la̍h--ê tı̄ chhiū-nâ lāi chhoē-khoàⁿ ū sím-mı̍h khı̂m-siù thang lia̍h bô. Hut-jiân tú-tio̍h chı̍t ê chhim-chhim ê hām-khiⁿ, oá-khı̀ khoàⁿ-māi, tı̄ hit lāi-bı̄n ū chı̍t ê gín-ná, chı̍t-chiah pà, chı̍t-chiah niáu-chhí, chı̍t-boé to̍k-choâ, in sı̄ poa̍h-lo̍h chit ê hām-khiⁿ boē tit khí-lâi ê. In khoàⁿ-kı̀ⁿ chit ê phah-la̍h ê chiū âu-kiò kóng, “Khó-lı̂n kiù goán khí-lâi ah.” Hit ê phah-la̍h ê sûi-sı̂ kiù hit ê gín-ná khí-lâi. Chóng-sı̄ tùi pà kóng, “Lí siông-siông thau kā goán ê iûⁿ-á goá m̄ kiù lí.” Tùi choâ kóng, “Lí siông-siông ài kā lâng goá iā m̄ kiù lí.” Tùi niáu-chhí kóng, “Lí ài thau chia̍h lâng ê mı̍h m̄ kiù lí chhut-lâi.” Chit 3 chiah tōng-bu̍t tùi án-ni lâu ba̍k-sái ai-kiû, “Chhiáⁿ lí khó-lı̂n goán, lí nā kiù goán, goán āu-lâi tek-khak oē pò-tap lí ê un.” Tùi án-ni i lóng kā in kiù khí-lâi, tāi-ke kā i seh-siā chò in khı̀. Chóng-sı̄ chit ê gín-ná bô chhù thang tò-khı̀, chit ê hó-sim ê la̍h-jı̂n chiū chhoā i khı̀ in chhù toà.
Koè bô joā-kú hit-chiah choâ the̍h chı̍t-pau ê io̍h-á lâi sàng chit ê la̍h-jı̂n, kóng, “Bô-lūn sím-mı̍h to̍k-choâ kā tio̍h kā i boah tiàm khang-chhùi tek-khak oē hó, goá ēng che kā lí tap-siā.” I chiū siu khí-lâi toà tı̄ i ê sin-khu. Hit chiah pà iā ta̍k chá-khí kā lo̍k-á á-sı̄ thò͘-á, á-sı̄ pa̍t-hāng ê cheng-siⁿ lâi hō͘ in chia̍h. Tùi án-ni chit ê la̍h-jı̂n m̄-bián koh chhut-khı̀ phah-la̍h, hit ê gín-ná iā kap i saⁿ-kap hióng-siū. Koè bô joā-kú hit-chiah niáu-chhí kā chı̍t-tē ê pò͘-tē lâi sàng hit ê lâng kóng: “Chit lāi-bı̄n ū kim-gûn pó-poè chhiáⁿ lí siu khí-lâi thang hióng-siū.” I khui khoàⁿ-māi kó-jiân lāi-bı̄n lóng sı̄ chin ta̍t-chı̂ⁿ ê mı̍h. I chiū boē tām-po̍h khí sin-chhù, boé sin-saⁿ pı̀ⁿ-chò chin hó-gia̍h ê lâng. Hit ê gín-ná iā tı̄ hia hō͘ i hó khoán-thāi, m̄-nā bô kám-siā hit ê lâng kiù i, hoán-tńg khí pháiⁿ-sim siūⁿ beh hāi hit ê lâng, thang tit-tio̍h i ê pó-poè.
Ū chı̍t-jı̍t chit ê gín-ná thiaⁿ-tio̍h ông ê kò-sı̄ kóng: “Nā ū lâng lia̍h-tio̍h á-sı̄ lâi pò thau-the̍h ông-kiong ê pó-mı̍h ê beh chiong hiah ê pó-mı̍h ê chı̍t-poàⁿ siúⁿ i.” Chit ê gín-ná siūⁿ kóng sı̄ chin hó ê ki-hoē chiū khı̀ pò, kiò kúi-nā ê peng-á lâi lia̍h chit ê la̍h-jı̂n khı̀. Ông chin siū-khı̀ sûi-sı̂ bēng-lēng keh-jı̍t tio̍h kā i chhú sí-hêng. Taⁿ tú-tú beh sí-hêng ê sı̂, ū thiaⁿ kóng ông-chú hō͘ choâ kā-tio̍h tit beh sí, chit ê lâng thiaⁿ-tio̍h chiū kóng i ū chin hó ê io̍h-á tek-khak oē hó, chiū the̍h to̍k-choâ hō͘ i ê io̍h-á khí-lâi, hō͘ ông-chú chhı̀-kô͘. Kô͘ liáu kó-jiân hó, ông chiū sià-bián i bô choē, āu-lâi tiau-cha liáu chiah chai hiah ê pó-poè m̄ sı̄ i thau-the̍h ê, sı̄ chha̍t-á thau-the̍h chhut-lâi chhàng tı̄ chhiū-nâ lāi ê, hō͘ niáu-chhí thoa-khı̀ sàng hit ê la̍h-jı̂n ê. Nā-sı̄ hit ê pháiⁿ-sim gín-ná, ông bēng-lēng lia̍h-khı̀ koaiⁿ-kaⁿ kā i hêng-hoa̍t.
Chham-khó ----
1) Lâng ū sı̂ pí cheng-siⁿ khah bông-in poē-gı̄.
2) Chú Iâ-so͘ lâi sè-kan kiù choē-jı̂n, hoán-tńg hō͘ lâng tēng-choē.
3) Chit-tè kò͘-sū sı̄ thoân-soat, m̄-sı̄ sū-sı̍t ê.
3 Ge̍h 8 Jı̍t
Kim-kù: Goān lí hō͘ chit ê poe lı̄-khui goá, chóng-sı̄ m̄-sı̄ chiàu goá só͘ ài, sı̄ chiàu lí só͘ ài. (Má-khó 14:36)
Ū chı̍t só͘-chāi ū chı̍t ê gín-ná miâ kiò Pat-lông, sı̄ chı̍t ê hui-siông pháiⁿ, hui-siông bân-phoê, thih-khí ê gín-ná. Phah keh-piah ê gín-ná, kóng pe̍h-chha̍t, thau-the̍h mı̍h lâi chia̍h......hō͘ chhù-piⁿ ê lâng chin kan-khó͘ sim.
Ū chı̍t-pái iû-goân chò pháiⁿ, hō͘ lâng mē, chóng-sı̄ i chin bân-phoê lóng bô beh jı̄n m̄-tio̍h, bô beh kā lâng hoē sit-lé. Pat-lông in-ūi i ê pa-pa khı̀ sio-thâi, hō͘ lâng thâi-sí, só͘-í chí-ū kap ma-ma chò-hoé toà nā-tiāⁿ. Só͘-í i ê ma-ma ēng chin hó-chhùi, ûn-ûn-á kā i kóng lí m̄-tio̍h, só͘-í tio̍h kā lâng kiû sià-bián, chóng-sı̄ i iā lóng tèⁿ m̄-chai. In ma-ma koh ēng chē-chē phı̀-jū, ēng chē-chē ê tō-lí kā i kóng chóng-sı̄ lóng bô beh chu-táu, ná chhin-chhiūⁿ khoàⁿ-chò chāu-liām-pô m̄ chhap i. Chóng-sı̄ kàu 12 tiám, í-keng chin ài khùn lah, ko͘-put-chiong ēng chhùi-boé kóng: “Goá m̄-tio̍h, chhiáⁿ sià-bián.” Chū án-ni bih lo̍h-khı̀ khùn. Kàu keh chá-khí lóng boē kı̀-tit liáu-liáu lah.
Chóng-sı̄ tio̍h koh khai-sí chá-khí ê lé-pài, sui-jiân chí-ū 2 ê lâng, gı̂m-si, tha̍k Sèng-keng liáu, in ma-ma chiū khai-sí kı̂-tó. Ma-ma kı̂-tó kóng Pat-lông oē hiah-nih pháiⁿ sı̄ ūi-tio̍h goá ê m̄-tio̍h, ūi-tio̍h goá ê ham-bān, ūi-tio̍h goá ê ...... tı̍t-tı̍t lâu ba̍k-sái tùi Siōng-tè kiû sià-bián. Kı̀m boē-tiâu ê ba̍k-sái, chin kan-khó͘ sim teh kı̂-tó kàu 20 hun, 30 hun ...... Ngē-sim, bân-phoê ê Pat-lông iā thiaⁿ chit ê kı̂-tó, tùi sim-té lâi hoán-hoé, jı̄n m̄-tio̍h. Koat-sim kóng: “Nā tio̍h hō͘ ma-ma chiah-nih kan-khó͘, goá tek-khak m̄ koh chò pháiⁿ lah.” Chit-khoán lāu-bú ê ba̍k-sái chı̍t-pái koh chı̍t-pái ê tiong-kan, Pat-lông chin-chiàⁿ oāⁿ chò sin ê lâng. Hiān-sı̂ teh chò bo̍k-su, ūi-tio̍h Siōng-tè teh chò kang.
Iâ-so͘ lâu hoeh-koāⁿ ê kı̂-tó, iā-sı̄ chhoā lán kàu tit-tio̍h kiù--ê. Kiám m̄-sı̄ chin thang kám-siā?
3 Ge̍h 15 Jı̍t
Kim-kù: Lín nā kiâⁿ Goá só͘ bēng-lēng lín ê, chiū-sı̄ Goá ê pêng-iú. (Iok-hān 15:14)
Sió pêng-iú lín tı̄ ha̍k-hāu ū hó pêng-iú á-bô? Ū kúi ê? Tı̄ lín chhù-piⁿ ū hó pêng-iú á-bô? Ū kúi-ê? In khah-siông kap lí choè-hoé chhòng sím-mı̍h? Choè-hoé thit-thô, choè-hoé iōng-kong, sím-mı̍h? Choè-hoé oan-ke, jı̂-chhiáⁿ saⁿ pang-chān. Tāi-ke siong-hó, saⁿ chiàu-kò͘, bô sio-hāi. Lín ū hoaⁿ-hí chit-khoán pêng-iú á-bô? Goá siong-sı̀n lán lóng ài ū hó pêng-iú, ná chē-ê ná hó. Siat-sú nā ū lâng lóng ài bô pêng-iú, lí siūⁿ hó--bô? Un2-tàng chin kan-khó͘, ka-kı̄ chı̍t ê bô phoāⁿ, bô lâng beh kap i thit-thô, tha̍k-chheh bē-hiáu iā bô lâng beh saⁿ pang-chān. Koh siat-sú nā tú-tio̍h pháiⁿ-lâng beh hāi--i, iā bô lâng thang ūi--i. Lí siūⁿ ū hó ê pêng-iú sı̄ hô-téng ê iàu-kín.
Taⁿ lán chá-khí tı̄ chia saⁿ-kap lâi siūⁿ lán ê Chú só͘ tú-tio̍h ê kan-khó͘, chin-chiàⁿ ta̍t-tit lán hoán-séng ê só͘-chāi. Lán ê Chú tng i beh sí ê í-chêng chin-chiàⁿ ūi-tio̍h lán siū bān-poaⁿ ê kan-khó͘, chhin-chhiūⁿ lán chai I ū siū kong-hoē bô kong-tō ê sím-mn̄g kap phoàⁿ-koat, koh hō͘ peng-teng hí-lāng, pı̄ⁿ chhı̀-á ê bián-liû kā i tı̀, chhı̀-á chı̍t-ki, chı̍t-ki lóng tu̍h-jı̍p i ê thâu-khak, huih chim-chim-lâu. Koh ēng lō͘-tek-á kā i ng ba̍k-chiu, chiah kā i siàn chhùi-phoé, koh kā i cheng, chiah mn̄g i khoàⁿ chit-pái tó chı̍t ê phah--i.
Koh kā i pa̍k-iap-āu ēng piⁿ kā i phah, phah kàu thong seng-khu lóng o͘-chhiⁿ, chē-chē khang lóng lâu-huih. Thong-mı̂ bô khùn, lâi siū pah-poaⁿ bô-lí ê sím-mn̄g kap hêng-hoa̍t. Nā-sı̄ lán ê Chú lóng bô hián-chhut m̄-kam-goān, á-sı̄ hoán-khòng ê khoán. Chóng-sı̄ kı̂-sı̍t tı̄ i ê sim-té, iáu-ū pí chiah ê hō͘ i ê sim koh-khah kan-khó͘ ê sū. Lín siūⁿ he sı̄ sím-mı̍h? Chiū-sı̄ iú-chêng ê poē-poān.
Lí khoàⁿ, Chú ē hō͘ lâng lia̍h, goân-in tı̄ tó-ūi? Kiám-m̄-sı̄ hō͘ i ê ha̍k-seng Iû-tāi só͘ bē mah? Chiong chı̀ chhin-ài ê sian-siⁿ bē lâng 30 kho͘. Án-ni chiū chhoā pháiⁿ-lâng gia̍h thûi, gia̍h to, chhoā peng lâi chhin-chhiūⁿ teh lia̍h kiông-tō ê khoán lâi lia̍h Iâ-so͘. Jı̂-chhiáⁿ kàu-ūi koh ēng chim-chhùi, choè tē-it chhin-bı̍t, thiàⁿ-sim ê kı̀-hō lâi tùi Chú chhéng-an. Ēng án-ni choè àm-hō lâi kiò lâng lia̍h sian-siⁿ. Lí siūⁿ chit-khoán ha̍k-seng ū iú-gı̂ á-bô?
Koh lí khoàⁿ Iok-hān, Iok-hān pêng-sı̂ sı̄ Chú só͘ thiàⁿ ê ha̍k-seng. Bô-lūn tı̄ piàn-hoà iông-māu ê soaⁿ, tı̄ Gâi-ló͘ ê tau, chia̍h boán-chhan ê sı̂ chē tı̄ Iâ-so͘ ê sin-piⁿ, hiàⁿ tı̄ sian-siⁿ ê heng-chêng, kap Chú te̍k-pia̍t chhin-bı̍t lâi kóng-oē. Kàu-sı̂ toā-kiaⁿ, pàng-sak i ê goā-saⁿ piàⁿ cháu, lóng m̄-káⁿ koh oa̍t-thâu, bô chı̍t-tiám hián-bêng siàu-liām sian-siⁿ ê khoán-sit.
Koh lí khoàⁿ Pí-tek, Pí-tek pêng-sı̂ ke̍k jia̍t-sim, ke̍k hó-táⁿ jı̄n Chú. I bat kiâⁿ chúi-bı̄n chiū-kı̄n Chú. I kap Ngá-kok, Iok-hān ta̍k-pái te̍k-pia̍t siū Chú ê khan-kà. I thè ha̍k-seng hoat-piáu ı̀-kiàn, sêng-jı̄n Iâ-so͘ sı̄ to̍k-it-chin chin-oa̍h Siōng-tè ê Kiáⁿ Iâ-so͘ Ki-tok, Chú o-ló i choè chio̍h-poâⁿ. I tı̄ Chú ê bı̄n-chêng chiù-choā beh kap Chú saⁿ-kap sí. Taⁿ cháiⁿ-iūⁿ, kèng-jiân chiàu Chú só͘ kóng, ke boē-thı̂ ê tāi-seng, saⁿ-pái m̄-jı̄n Chú. Ah! Sı̍t-chāi chin kiàn-siàu, koh kàu-gia̍h ê bô chêng.
Koh kı̂-thaⁿ ê bı̂n-chiòng, chē-chē sı̄ chêng siū Chú i-tı̄, chia̍h Chú ê piáⁿ, bat thiaⁿ Chú kóng tō-lí, he̍k-chiá kúi-jı̍t chêng chiah tāi-ke chhò chhiū-ki, ēng hoe, ēng saⁿ pho͘-lō͘, chiap Chú khiâ-lû jı̍p Iâ-lō͘-sat-léng siâⁿ ê lâng. Kin-á-jı̍t kèng-jiân lóng piàn-sim lâi kong-kek Iâ-so͘.
Lí siūⁿ lán ê Chú chhin-chhiūⁿ án-ni sı̀-piⁿ lóng sı̄ hoán-tùi, kong-kek. I ê sim kan-khó͘ mah? Chū-jiân chin kan-khó͘, chóng-sı̄ kı̂-tiong tē-it kan-khó͘ ê chiū-sı̄ iú-chêng ê poē-poān, che-sı̄ hián-bêng bô-chêng, thiàⁿ-sim ê pheng-hoai, Mô͘-kúi só͘ choè choè-toā khó͘-ò͘ⁿ ê sū, húi-bia̍t thiàⁿ-sim. Chú kin-á-jı̍t tùi lán iàu-kiû, chhiat-chhiat ǹg-bāng lán tùi I pó-siú chhin-bı̍t ê iú-chêng. Koh lán saⁿ-kap choè sı̀n-tô͘ ê tiong-kan iā tio̍h sı̂-sı̂ pó-siú chit ê thiàⁿ ê iú-chêng. I kóng, “Lín nā kiâⁿ Goá só͘ bēng-lēng lín ê, chiū-sı̄ goá ê pêng-iú.” (Iok-hān 15:14) Sió pêng-iú tùi chia khí goān lán tāi-ke saⁿ-kap lâi siú Chú ê kà-sı̄, saⁿ-kap lâi choè I ê pêng-iú.
3 Ge̍h 22 Jı̍t
Kim-kù: Pē ah, sià-bián in, in-ūi in só͘ choè ê in m̄-chai. (Lō͘-ka 23:34)
A-lı̂n chiū-sı̄ Sèng-tek kok-bı̂n ha̍k-hāu ê 4 nı̂ seng, tı̄ ha̍k-hāu tha̍k-chheh chin iu-siù, iā-sı̄ Chú-jı̍t-o̍h ê bō͘-hoān-seng. I ê pa-pa toà tı̄ gı̂n-hâng, ūi-tio̍h choán-khı̂n khı̀ pa̍t-ūi, A-lı̂n iā choán-ha̍k kàu Kong-ho̍k kok-bı̂n ha̍k-hāu, tú-chiah choán-ha̍k lóng bô pêng-iú, ha̍k-seng ū lâng soà ài mē i “Iâ-so͘ kàu”. Chóng-sı̄ i chin gâu tha̍k-chheh hó kui-kí, lāu-su chin thiàⁿ i, ha̍k-seng ná m̄-goān te̍k-pia̍t tha̍k 1 miâ ê Phok-bûn ê sêng-chek hō͘ A-lı̂n jiok-koè. Phok-bûn chiū koh-khah bô hoaⁿ-hí A-lı̂n, soà sái-lōng ha̍k-seng mài kap i kóng-oē.
Ū chı̍t-jı̍t A-lı̂n pàng-o̍h chiū sûi-sı̂ tńg-khı̀. Phok-bûn kap kúi-nā ê ha̍k-seng siūⁿ hoat-tō͘ ài beh hāi A-lı̂n, chiū chiong lāu-su ê toh-téng kap thoa-á kā i chhiau kah loān-chhau-chhau. Chiū kap kúi-nā ê ha̍k-seng khı̀ pān-kong-sek chhoē lāu-su kóng: “Lāu-su, A-lı̂n kā lí chhiau toh-á, iā chhiau kah loān-chhau-chhau chiū tńg-khı̀ lah.”
Khí-chho͘ lāu-su bô siong-sı̀n kóng A-lı̂n chin koai i boē choè chit ê sū. Chóng-sı̄ kái-nā ê ha̍k-seng saⁿ-kap kan-chèng kóng: “Lāu-su ah, A-lı̂n kóng lí chin thiàⁿ i boē kā i mē, ná kóng ná chhiau lí ê thoa-á o͘h”, āu-lâi lāu-su khı̀ kàu-sek khoàⁿ chin-chiàⁿ loān-chhau-chhau. Tı̄ keh-jı̍t chá-khí lāu-su chiū kiò A-lı̂n khí-lâi kā i mn̄g kiám ū chhiau lāu-su ê toh-á, i chin kı̂-koài chiū kóng goá cha-hng pàng-o̍h chiū sûi-sı̂ tńg-khı̀ goá bô choè chit ê sū, nā-sı̄ lāu-su kóng, “Lí kóng bô, cháiⁿ-iūⁿ kúi-nā ê ha̍k-seng kóng in ū khoàⁿ-kı̀ⁿ?”
Āu-lâi Phok-bûn kap kúi-nā ê ha̍k-seng chiū khí-lâi kan-chèng, hit-sı̂ A-lı̂n chiū sûi-sı̂ siūⁿ-tio̍h Chú-jı̍t-o̍h ê lāu-su só͘ kóng Iâ-so͘ beh lâi kiù lâng hoán-tńg hō͘ lâng tèng tı̄ sı̍p-jı̄-kè, iā Iâ-so͘ tı̄ sı̍p-jı̄-kè téng thè hiah ê tèng i ê lâng kı̂-tó kóng, “Pē ah, sià-bián in, in-ūi in ê só͘ choè ê in m̄-chai”, iā bat thiaⁿ-tio̍h lāu-su kóng, “Sū-thê-hoán teh kóng tō-lí ê sı̂, hō͘ lâng ēng chio̍h-thâu tı̀m iáu-kú i ū kı̂-tó kóng: “Chú ah, bo̍h-tit chiong chit ê choē kui-tı̄ in.”
A-lı̂n chiū chai in tùi oàn-hı̄n beh lâi hāi i, i chiū bô koh kóng sím-mı̍h thâu-khak àⁿ-lo̍h-khı̀. Lāu-su iā phah-sǹg sı̄ ū-iáⁿ chiū kā A-lı̂n hoa̍t-khiā chı̍t-tiám-cheng kú. Ū chı̍t-jı̍t Phok-bûn tı̄ ūn-tōng-tiâⁿ teh cháu ê sı̂ hō͘ po-lê chha̍k-tio̍h kha teh lâu-huih, tú-hó A-lı̂n tùi hia koè khoàⁿ-tio̍h koáⁿ-kín ēng ka-kı̄ ê chhiú-kin kā i pau kha, koh āiⁿ i khı̀ hō͘-sū hia tı̄-liâu, hut-jiân Phok-bûn toā-siaⁿ háu, tùi A-lı̂n seh-siā koh chhē m̄-tio̍h chiah kā i kóng í-chêng hō͘ lāu-su hoa̍t-khiā sı̄ i choè ê, soà kap i khı̀ lāu-su hia. Phok-bûn tı̄ lāu-su ê bı̄n-chêng jı̄n-choē. Āu-lâi lāu-su chiong A-lı̂n ê sū thê-chhut tı̄ kàu-oân-hoē, āu-lâi chiū choè Kong-ho̍k kok-bı̂n ha̍k-hāu ê bō͘-hoān-seng. Í-āu Phok-bûn chiū kap A-lı̂n choè hó pêng-iú chhoā-chhut chhoā-jı̍p, choân-pan ê ha̍k-seng iā kap A-lı̂n choè chin hó ê pêng-iú lah.
3 Ge̍h 29 Jı̍t
Kim-kù: Goá bat sí, taⁿ lí khoàⁿ, Goá sı̄ oa̍h kàu tāi-tāi. (Khé-sı̄-lio̍k 1:18)
Kò͘-sū: Lán ê Chú Iâ-so͘ tùi Thiⁿ kàng-lı̂m lâi sè-kan, tı̄ tē-bı̄n-chiūⁿ kiâⁿ chin-choē sı̂n-jiah i-tı̄ chin-choē phoà-pı̄ⁿ ê lâng. Āu-lâi I ūi-tio̍h beh kiù sè-kan lâng, choè sèng ê Iûⁿ-ko hō͘ lâng siū tèng tı̄ Sı̍p-jı̄-kè téng, lâu-huih thè lán sí, só͘-í lán hiān-chāi ê sè-kan lâng, sui-bóng ū choē tio̍h eng-kai lo̍h tē-ga̍k. Chóng-sı̄ m̄-bián hoân-ló, in-ūi Chú í-keng thè lán khui-lō͘, só͘-í lán nā sı̀n I thè lán sí lán chiū oē tit-tio̍h kiù m̄-bián sí. Sió pêng-iú, lí ài sí bô? M̄ ài, tio̍h, tāi-ke m̄ ài sí, chóng-sı̄ nā ū choē ê lâng, chò pháiⁿ-sū ê lâng, chiàu Siōng-tè ê lu̍t-hoat tio̍h éng-oán sí siū kan-khó͘, lí ài bô? Bô ài, nā-sı̄ án-ni ū sím-mı̍h pān-hoat bián siū-khó͘, bián éng-oán sí, bia̍t-bông? Tio̍h sı̀n Chú Iâ-so͘! Tio̍h! Tāi-ke tio̍h sı̀n Iâ-so͘ chiah bián siū sím-phoàⁿ lo̍h tē-ga̍k.
Taⁿ Chú thè lán sí, I ū chiū án-ni sí-khı̀ bô? Bô! I ū koh-oa̍h, chiūⁿ-thiⁿ, hiān-chāi iā oa̍h-teh teh thiaⁿ lán ê kı̂-tó, chiàu-kò͘ pó-hō͘ lán.
Í-chêng ū chı̍t ê chin chhut-miâ ê bo̍k-su kiò-chò Lō͘-tek Má-teng, i sı̄ Tek-kok lâng. I bat ūi-tio̍h kàu-hoē choè chin-choē kang, ín-chhoā chin-choē lâng lâi sı̀n Chú Iâ-so͘, sı̄ chı̍t ê chin jia̍t-sim ê bo̍k-su.
Ū chı̍t-jı̍t i chin iu-chhiû, hoân-ló, in-ūi ū chı̍t hāng tāi-chı̀ pān liáu bô hó-sè, pêng-iú chin-choē lóng bô beh lâi chhap i, pang-chān i, só͘-í i chin sit-bāng lóng bô phoāⁿ. Lō͘-tek Má-teng bo̍k-su ê hū-jı̂n-lâng jı̍p-lâi i ê pâng-keng, Lō͘-tek Má-teng khoàⁿ-tio̍h i ê hū-jı̂n-lâng chhēng moâ-saⁿ jı̍p-lâi, chin tio̍h-kiaⁿ chiū mn̄g i ê hū-jı̂n-lâng kóng, “Sı̄ sím-mı̍h lâng sí-khı̀, lí teh chhēng moâ-saⁿ?” I ê hū-jı̂n-lâng ı̀n kóng, “Iâ-so͘ Ki-tok sí-khı̀, só͘-í goá chhēng moâ-saⁿ.” Lō͘-tek Má-teng thiaⁿ liáu chiū kóng, “Ki-tok thài oē sí Chú Iâ-so͘ sı̄ oa̍h-teh, I bô sí.” I ê hū-jı̂n-lâng ı̀n kóng, “Nā-sı̄ án-ni lí thài hiah-nih sit-chı̀, hoân-ló, lâng ê pang-chān, Ki-tok éng-oán oa̍h-teh teh chò lán ê pêng-iú, chò lâng ê pang-chān, lán thài tō hoân-ló bô lâng beh kā lán tàu kha-chhiú?”
Má-teng thiaⁿ-liáu chiah hiáu-ngō͘, toā-siaⁿ kóng, “Sı̄, Chú sı̄ oa̍h-oa̍h ê Chú, oa̍h kàu tāi-tāi teh chiàu-kò͘ lán, goá m̄-kiaⁿ, nā-sı̄ ū Chú ê chiàu-kò͘, goá iáu tio̍h kiaⁿ sím-mı̍h!” Āu-lâi Lō͘-tek Má-teng chin-chiàⁿ bô koh ūi-tio̍h sió-khoá ê sū hoân-ló lah, in-ūi i chai-iáⁿ Chú Iâ-so͘ sı̄ oa̍h-oa̍h ê Chú, ta̍k-jı̍t teh thiaⁿ lán ê kı̂-tó, koh chiàu-kò͘ pang-chān lán.