Kim-kù Ê Kò͘-sū 05
Kim-kù Ê Kò͘-sū
1959 5 Ge̍h
5 Ge̍h 3 Jı̍t
Kim-kù: Iâ-hô-hoa ah, kiû Lí ēng Lí ê tō-lō͘ chí-sı̄ goá. (Si-phian 27:11)
Í-chêng ū chı̍t ê Sı̂n-ha̍k-seng, tú-tú pit-gia̍p Sı̂n-ha̍k-ı̄ⁿ hit-jı̍t ê sū. ----In-ūi i ê sêng-chek iu-siù, chin choē lâng kā i chiok-hō. Ta̍k-lâng to o-ló i chin khó-chhú koh gâu tha̍k-chheh, i ê kò͘-hiong ê bo̍k-su iā lâi, kóng-khí i siàu-liân ê sı̂ chiū chin koai, Chú-jı̍t-o̍h m̄-bat khiàm-se̍k, hiàn-kim sı̄ choè siōng chē ê, bat chò bō͘-hoān-seng, chiong-lâi ū toā sêng-kong ê ǹg-bāng. I pún-sin iā teh siūⁿ, pit-gia̍p āu beh toà toā-keng koh chhut-miâ ê kàu-hoē, thang chò chı̍t ê ū miâ-siaⁿ lâng-lâng o-ló ê bo̍k-su. Hit-jı̍t chih-chiap lâng-kheh chin bô êng, chóng-sı̄ chin khoài-lo̍k, chin tek-ı̀.
Kàu àm-sı̂, i chin ià-siān siūⁿ beh khı̀ khùn, chiū kūi tı̄ bı̂n-chhn̂g chêng kı̂-tó, kám-siā Siōng-tè hō͘ i lóng sūn-sū pit-gia̍p Sı̂n-ha̍k-ı̄ⁿ, iā kiû Siōng-tè pang-chān i hō͘ i oē-thang chiàu só͘ kè-oē tı̍t-tı̍t sêng-kong. Āu-lâi chiūⁿ chhn̂g khı̀ khùn.
Chóng-sı̄ chin kı̂-koài, hit àm i khoàⁿ-kı̀ⁿ i ka-kı̄ í-keng pı̀ⁿ-choè chin lāu ê lāu-lâng, khiā tı̄ chı̍t-tiâu chin súi chhin-chhiūⁿ pho͘ kim oē hoat-kng ê lō͘, chim-chiok khoàⁿ i ê seng-khu, thâu-mn̂g, chhùi-chhiu lóng pe̍h, bı̄n jiâu-jiâu seng-khu ku-ku, sı̄ í-keng chin lāu, chhēng ê saⁿ phoà-phoà, kha-chiah-phāiⁿ chı̍t-ki seⁿ-sian ê sı̍p-jı̄-kè, sı̀-bı̄n khoàⁿ, kong-kéng chin súi ná chhin-chhiūⁿ m̄-sı̄ tı̄ sè-kan. Tú-teh kı̂-koài ê sı̂ thâu-chêng chı̍t ê chhēng pe̍h-saⁿ ê lâng teh lâi. I chiū mn̄g i khoàⁿ chia sı̄ sím-mı̍h só͘-chāi, hit ê lâng kā i kóng: “Chit tiâu lō͘ sı̄ thiⁿ-lō͘ thàu-kàu thiⁿ-siâⁿ ê, iā lín sı̄ teh kiâⁿ thiⁿ-lō͘ ê, goá sı̄ thiⁿ-sài teh àn-nāi kiâⁿ thiⁿ-lō͘ ê lâng.”
I koh mn̄g kóng: “Nā án-ni goá thài chhēng kàu phoà-phoà, chit-ki sı̍p-jı̄-kè chiah-nih bái?” Thiⁿ-sài chiah kā i kóng: “Kiâⁿ thiⁿ-lō͘ ū nn̄g-khoán ê lâng. Chit-khoán sı̄ hi-seng ka-kı̄ ê miâ-siaⁿ, châi-lı̄, chí-ū ūi-tio̍h Siōng-tè ê êng-kng, hit-khoán ê lâng, i ê saⁿ súi koh pe̍h, i giâ ê sı̍p-jı̄-kè kim kàu oē hoat-kng, lí khoàⁿ āu-bı̄n teh lâi hit ê lâng.....” Thiⁿ-sài pò i khoàⁿ chı̍t ê chhēng pe̍h-saⁿ, giâ chit-ki kim ê sı̍p-jı̄-kè ê lâng tùi āu-bı̄n teh lâi, chiū koh kóng: “Iáu ū chı̍t-khoán kiâⁿ thiⁿ-lō͘ ê lâng, sui-jiân ūi-tio̍h Siōng-tè chò-kang, chóng-sı̄ toā-pō͘-hūn sı̄ ūi-tio̍h ka-kı̄ ê miâ-siaⁿ, châi-lı̄ teh tô͘-bô͘--ê, chiū-sı̄ chhin-chhiūⁿ lí. Lí sè-hàn tı̄ Chú-jı̍t-o̍h sui-jiân chin khó-chhú, nā-sı̄ lí ê chhut-sek sı̄ ūi-tio̍h siúⁿ-phín, lí ê hiàn-kim sı̄ ūi-tio̍h hō͘ lâng o-ló, lí tha̍k Sı̂n-ha̍k-ı̄ⁿ iā sı̄ chí-ū ūi-tio̍h miâ-siaⁿ, lí tı̄ kàu-hoē chí-ū tui-kiû ka-kı̄ ê tē-ūi kap bêng-ū, só͘-í lí ê sı̍p-jı̄-kè seⁿ-sian, lí ê saⁿ phoà-phoà.”
Chit ê lâng thiaⁿ liáu-āu hui-siông tio̍h-kiaⁿ, iā toā iu-būn, chiū tı̄ hia khui-siaⁿ thı̂-khàu.
In-ūi i khàu ê siaⁿ, i chiah chhíⁿ khí-lâi, chiah chai i sı̄ teh chò-bāng, the̍h kiàⁿ khoàⁿ ka-kı̄ ê bı̄n, iáu siàu-liân chiah an-sim, chiū kūi-teh chhàm-hoé kı̂-tó kóng: “Chú ah, kám-siā lí ū ēng lí ê tō-lō͘ chí-sı̄ goá. Taⁿ kiû Lí, hō͘ goá iáu siàu-liân ê sı̂ oē-hiáu hi-seng ka-kı̄, ūi Lí chò kang bô hiâm kan-khó͘, chí-ū kiû êng-kng Siōng-tè. Chı̍t-sı̀-lâng kiâⁿ Lí ê tō-lō͘.” (T. T. T. siá)
5 Ge̍h 10 Jı̍t
Kim-kù: Chiàu goán ê hı̄-khang só͘ thiaⁿ-kı̀ⁿ ê, bô chı̍t ê oē pí tit Lí. Lí í-goā bô ū Siōng-tè. (Ⅱ Sat-bó-jíⁿ 7:22)
Chha-put-to 200 goā nı̂ chêng, ū chı̍t lâng miâ kiò Hu-lia̍t-chiá, sı̄ tı̄ Sūi-se chhut-sı̀, tı̄ Eng-kok chò chin chhut-miâ ê bo̍k-su. In-ūi i ê chò lâng chin hó, só͘-í thiaⁿ i kóng-oē, khoàⁿ i só͘ chò, ná chhin-chhiūⁿ thiⁿ-sài ê khoán-sit, só͘-í chē-chē lâng chin chun-kèng i, chin ài kap i choè-hoé. M̄-nā chin-chē gín-ná beh cháu lâi chhoē i, liân tı̄ khòng-soaⁿ teh chò-kang ê kang-lâng, í-kı̍p tāi-ha̍k ê kàu-siū ha̍k-seng ia̍h lóng him-bō͘, ài lâi siū i kà-sı̄.
Chit ê Hu-lia̍t-chiá sè-hàn ê sı̂ iā chin thih-khí, chò chē-chē gûi-hiám ê tāi-chı̀. Kúi-nā pái khı̀ khe-nih siû, kúi-nā pái hiám-hiám sí, ū-sı̂ bat chia̍h-chúi chia̍h kàu m̄-chai lâng, soà lâu khı̀ chin hn̄g, hō͘ chúi-chhia ê chhia-lián kńg jı̍p-khı̀. Chóng-sı̄ lóng tit-tio̍h Siōng-tè ê chín-kiù, ū chı̍t-pái kap i ê ko-koh ēng kiàm liān saⁿ tu̍h ê sı̂, hō͘ to tu̍h tio̍h pak-tó͘ iā hiám-sí, ū-sı̂ tùi chhiûⁿ-á téng poa̍h lo̍h-lâi, ū-sı̂ hō͘ sio kún-chúi thǹg tio̍h, chóng-sı̄ lóng siū Siōng-tè ê pang-chān bô tı̀-kàu sí. I nā siūⁿ chiah-ê sū, chin kám-kek Siōng-tè ê un-ài, boē-thang bô sı̀n Siōng-tè, pò-tap Siōng-tè ê thiàⁿ, só͘-í pı̀ⁿ-chiâⁿ hiah-nih hó ê lâng.
Sió pêng-iú, lán chin ài thiaⁿ, chin gâu ê Tāi-pı̍t iā-sı̄ chin chē pái siū Siōng-tè pó-hō͘ ê lâng. I sè-hàn ê sı̂ teh kò͘-iûⁿ, bat chı̍t-pái hı̂m lâi kā iûⁿ-á, i chiū jiok khı̀ phah-sí hı̂m, ū chı̍t-pái sai lâi kā iûⁿ-á i ia̍h sı̄ khı̀ phah-tó sai, chhiúⁿ iûⁿ-á tò-tńg. Siōng-tè lóng pó-siú i. Ia̍h āu-lâi Sat-bó-jíⁿ siat-jı̍p i chò tē 2 ê ông.
Koh keng-koè chin kú i siū pa-pa ê bēng-lēng, koāⁿ piān-tong khı̀ hō͘ tı̄ chiàn-tiûⁿ ê ko-koh ê sı̂, iā phah-sí toā-hàn lâng Ko-lı̄-á. In-ūi Siōng-tè pang-chān i chiah oē-thang iâⁿ Ko-lı̄-a, sı̄ m̄-sı̄?
Āu-lâi in-ūi Tāi-pı̍t ê só͘ chò, chèng-lâng lóng o-ló, tı̀-kàu Sò-lô ông khí oàn-hūn beh hāi-sí Tāi-pı̍t, Tāi-pı̍t iā tú-tio̍h chin-chē ê gûi-hiám, chóng-sı̄ lóng tit-tio̍h Siōng-tè ê pó-hō͘, kàu-boé Tāi-pı̍t chiū chò ông lah.
Tāi-pı̍t siūⁿ kàu i ê koè-khı̀ kap thiaⁿ koè-khı̀ ê le̍k-sú, hō͘ i chhim-chhim kám-kak Iâ-hô-hoa Siōng-tè í-goā bô pa̍t ê Siōng-tè. Só͘-í kám-kak kóng: “Iâ-hô-hoa Siōng-tè ah, Lí sı̄ chı̀-toā, chiàu goán ê hı̄-khang só͘ thiaⁿ-kı̀ⁿ ê, bô chı̍t-ê oē pí-tit Lí, Lí í-goā bô ū Siōng-tè.”
Tāi-pı̍t sı̄ chin ióng ê tāi-chiòng, ia̍h sı̄ chin gâu ê ông, iā chin gâu gı̂m-si, in-ūi i tùi Siōng-tè sêng-sı̍t sūn-thàn, só͘-í tit Siōng-tè ê pó-siú kàu chı̍t-sı̀-lâng, iā chò lán ê Chú Iâ-so͘ ê chó͘-sian. Goān lán chı̍t-sı̀-lâng lia̍h Siōng-tè chò ı̂-it ê Siōng-tè, lâi ho̍k-sāi I. (T. H. C. siá)
5 Ge̍h 17 Jı̍t
Kim-kù: “Iâ-hô-hoa ah, chun-toā, lêng-le̍k, êng-kng, tek-sèng, ui-giâm lóng sı̄ Lí ê.” (Ⅰ Le̍k-tāi chı̀-lio̍k 29:11)
Ha̍k-seng lán téng lé-pài ū tha̍k tio̍h sím-mı̍h lâng choè ông? Lán lóng ē kı̀-tit, sı̄ chı̍t ê chin chhut-miâ ê ông kiò-choè Tāi-pı̍t. Tāi-pı̍t ông ê só͘ choè, lín siāng ē kı̀-tit--ê sı̄ i ū choè sím-mı̍h? Chiū-sı̄ tng choè gín-ná ê sı̂, i ū khò Siōng-tè, chiū ēng chio̍h-thâu-á tı̀m-sí Ko-lı̄-a sı̄ m̄-sı̄? Āu-lâi i ū soà-chiap Sò-lô ê ūi choè Í-sek-lia̍t kok ê ông, koán-lí Í-sek-lia̍t 40 nı̂-kú.
Taⁿ i ū chı̍t ê kiáⁿ chin gâu, miâ kiò chò Só͘-lô-bûn. I ū chiap-soà lāu-pē Tāi-pı̍t ê ūi, i iā tı̄-lí Í-sek-lia̍t 40 nı̂. Lán chá-khí beh lâi kóng chit ê ông ê sū. Tng chit ê Só͘-lô-bûn ông tı̄-lí Í-sek-lia̍t ê sı̂ chiū-sı̄ in ê kok siāng-heng, siōng êng-iāu ê sı̂.
Taⁿ lán lâi kóng chit ê ông só͘ choè siāng chhut-miâ ê sū, kı̂-tiong ê kúi-nā hāng.
1. I ū khí sèng-tiān, Só͘-lô-bûn iáu-boē khí sèng-tiān ê í-chêng, Iâ-hô-hoa ê iok-kūi sı̄ khǹg tı̄ hoē-bō͘ nih. Hoē-bō͘ chiū-sı̄ pò͘-pı̂ⁿ ê ı̀-sù. Lán chai hoē-bō͘ m̄-sı̄ chin hó ê chhù, sı̄ lı̂m-sı̂ ēng pò͘ lâi tah--ê. Sı̄ chá-sı̂ Í-sek-lia̍t peh-sı̀ⁿ chhut Ai-kı̍p, tı̄ khòng-iá phiau-liû, lâi-lâi khı̀-khı̀ toè Í-sek-lia̍t lâng soá-lâi soá-khı̀ ê pò͘-pı̂ⁿ. Taⁿ Í-sek-lia̍t lâng í-keng kiàn-kok lah. Pún i ê lāu-pē Tāi-pı̍t chiū pı̄-pān beh khí. Nā-sı̄ Siōng-tè m̄ ài Tāi-pı̍t khí, I ài Só͘-lô-bûn khí. Só͘-lô-bûn chiū chiàu Siōng-tè só͘ chí-sı̄ i ê lāu-pē Tāi-pı̍t ê hong-hoat lâi khí. Chhâi-liāu lóng ēng chin hó ê bo̍k-chhâi, hó chio̍h, kim, gûn, tâng, he̍k-chiá sı̄ tiû, si, pó-chio̍h. Khí liáu hui-siông súi. Chū kó͘-chá kàu hiān-kim, boē-bat ū hiah súi ê tiān.
2. Ngiâ-chih Iok-kūi, lâi an-tı̀ tı̄ sèng-tiān ê chı̀-sèng-só͘, sèng-tiān ū hun chı̀-sèng-só͘ kap sèng-só͘, iā ū hun lāi-ı̄ⁿ kap goā-ı̄ⁿ. Sèng-só͘ ū khǹg kí-toh pâi-piáⁿ kap teng-tâi thang tiám-teng, tiong-ng ū khǹg hiuⁿ-toâⁿ thang sio-hiuⁿ. Hiah ê lóng sı̄ ēng siāng hó ê kim lâi choè--ê. Sèng-só͘ kap chı̀-sèng-só͘ ê tiong-kan ū chiong tiû-si khı̀ chit ū thiⁿ-sài ê pò͘-lı̂ cha̍h-teh. Lāi-bı̄n kiò-choè chı̀-sèng-só͘. Chı̀-sèng-só͘ chí-ū khǹg Iok-kūi tı̄ hia. Iok-kūi chiū-sı̄ piáu-sı̄ “Siōng-tè kap lâng saⁿ-kap tı̄-teh”. Iok-kūi sı̄ ēng kim choè--ê, kūi-téng ū nn̄g-sian thiⁿ-sài thián-khui sı̍t, sio-ǹg kióng-chhiú, kūi-lo̍h teh kı̂-tó ê siōng. Hit-ūi kiò choè “Si-un-só͘” chiū-sı̄ múi-nı̂ chè-si-thâu ēng iûⁿ-ko ê huih hiù tı̄ hia, lâi thè peh-sı̀ⁿ sio̍k-choē, koh kiû in. Kūi-lāi ū khǹg Má-ná, kap cha̍p-tiâu-kài ê chio̍h-pi.
Taⁿ Iok-kūi kú-kú ūi-tio̍h Í-sek-lia̍t lâng hoān-choē, hián-bêng Iâ-hô-hoa bô khoàⁿ-kò͘ in, chiū Iok-kūi bô tı̄ hoē-bō͘. Kàu Tāi-pı̍t ông ê sı̂, tiōng-kiàn hoē-bō͘, chiū ngiâ-chih Iâ-hô-hoa ê Iok-kūi kàu Iâ-lō͘-sat-léng ê hoē-bō͘. Taⁿ chit-pái Só͘-lô-bûn ū khí sèng-tiān, chiū chiong Iok-kūi ngiâ-chih jı̍p sèng-tiān. Tùi chit-chân sū Iâ-hô-hoa Siōng-tè hui-siông hoaⁿ-hí Só͘-lô-bûn ê só͘ choè. Siōng-tè I sı̄ chhòng-chō ú-tiū ê chin Sı̂n, I pún sı̄ bô su-iàu lâng khí-chhù hō͘ I tiàm. I iā bô tiàm lâng ê chhiú só͘ khí ê chhù. Chóng-sı̄ Só͘-lô-bûn só͘ choè sı̄ hián-bêng khiân-sêng, kiong-kèng ê sim. Só͘-í Siōng-tè chiū si-un sù-hok i. Siōng-tè tùi lán iā-sı̄ án-ni. Tng i hiàn tiān ê kı̂-tó ê sı̂, ke̍k-kı̂ khiam-pi, ke̍k-kı̂ khiân-sêng. Siōng-tè chiū siúⁿ-sù i ū tı̀-hūi, hiang-ngó͘, pù-ū, koh tn̂g hoè-siū.
3. Ūi-tio̍h i ê tı̀-hūi, chiū só͘ choè bān-sū heng-thong. Kok-ūi toā-chı̀n, sı̀-bı̄n ê kok lóng lâi hâng-ho̍k, lóng lâi chı̀n-kòng. Tùi án-ni miâ-siaⁿ thiaⁿ kàu chin hn̄g. Liân Lâm-hng Ai-thê-o-pek ê lú-ông iā thiaⁿ-kı̀ⁿ, chiū chhin-sin tùi hn̄g-hn̄g ê só͘-chāi (Lâm A-hui-lı̄-ka) tiâu-tı̂ lâi kàu Iâ-lō͘-sat-léng lâi pài-kı̀ⁿ Só͘-lô-bûn, ài thiaⁿ i ê kà-sı̄. Kàu ūi ê sı̂ chı̍t-ē khoàⁿ hui-siông ê tio̍h-kiaⁿ. Kóng i tı̄ chhù-nih só͘ thiaⁿ, m̄-ta̍t-tio̍h chhin-ba̍k só͘ khoàⁿ-kı̀ⁿ ê chı̍t-poàⁿ. Chin-chiàⁿ sı̄ bē-hiáu hêng-iông ê hiang-ngó͘.
Taⁿ Só͘-lô-bûn i beh thái ū chit-hō châi-tiāu thang tı̄-lí kok-ka kàu án-ni. Bô m̄-sı̄ tùi i pêng-sı̂ ê khiân-sêng ho̍k-sāi Iâ-hô-hoa. I siông-siông tùi lâng kóng, iā choè Chim-giân ê chheh kóng: “Kèng-pài Iâ-hô-hoa sı̄ tı̀-sek ê kun-pún.” Koh i hoān-sū chun Iâ-hô-hoa choè toā.
Saⁿ-kap lâi liām kim-kù. Lâi kı̂-tó ǹg-bāng lán saⁿ-kap o̍h Só͘-lô-bûn ê khiân-sêng. (L. J. S. siá)
5 Ge̍h 24 Jı̍t
Kim-kù: To̍k-to̍k ài lí kiâⁿ kong-gı̄, sim chûn lı̂n-bín, khiam-pi kap lí ê Siōng-tè saⁿ-kap kiâⁿ. (Bí-ka 6:8)
Ū chı̍t ê toā-hàn ta-po͘-lâng, lâng lóng chheng-ho͘ i choè Tāi-le̍k-sū. I chin pûi, kui seng-khu bah-bah-bah, kha-kut chhiú-kut chin toā-kho͘, koh chin ū la̍t, i nā phō gín-ná chı̍t-ki chhiú chiū oē phō khí-lâi. Chı̍t-tiuⁿ chin tāng ê toh, i chı̍t-ē chhiú chiū kā the̍h khí-lâi se̍h kúi-nā-liàn, koh oē phah sí iá-siù, sı̍t-chāi chin ū la̍t.
Tāi-le̍k-sū ū chı̍t ê ta-po͘-kiáⁿ, kiò-choè Ióng-sū, i chin ài i ê kiáⁿ iā oē chhin-chhiūⁿ i án-ni hiah-nih ū la̍t, chiong-lâi choè tāi-chiòng, choè chhut-miâ ê eng-hiông, só͘-í Ióng-sū soè-hàn ê sı̂, chiū siū lāu-pē giâm-keh ê hùn-liān. Tāi-le̍k-sū múi-jı̍t tio̍h hùn-liān Ióng-sū giâ thih-lián, thé-chhau, hàiⁿ siang-khoân.....téng chéng-chéng ê ūn-tōng, hō͘ i chiâⁿ-choè ū la̍t ê lâng. Beh chiâⁿ-choè eng-hiông tāi-chiòng m̄-nā sı̄ án-ni ê hùn-liān nā-tiāⁿ, koh tē-it iàu-kín--ê, sı̄ tio̍h hùn-liān táⁿ, sim-chōng tio̍h kiông, táⁿ-thâu tio̍h chāi, chiah ē pı̀ⁿ-choè chin-chiàⁿ ê eng-hiông.
Ū chı̍t-jı̍t lāu-pē in-ūi beh hùn-liān kiáⁿ ê hó-táⁿ, só͘-í tio̍h kiò i lâi kóng: “A-pa hiah-nih ū la̍t, lâng kiò goá choè Tāi-le̍k-sū, chóng-sı̄ goá iā ài lí chhin-chhiūⁿ A-pa án-ni, ū la̍t koh hó-táⁿ. Taⁿ ê-hng-àm, A-pa beh chhoē lí lâi chhim ê chhiū-nâ lāi......tı̄ hia ū sím-mı̍h lí chai bô?” Ióng-sū ı̀n kóng: “Hia ū sai, ū pà, ū hó͘, soaⁿ-ti, soaⁿ-káu......te̍k-pia̍t tı̄ àm-sı̂ iā koh-khah chē, in lóng oē chhut-lâi thó-chia̍h. Goá thái ē káⁿ khı̀?” A-pa kóng: “Nā siat-sú it-tàn chhut-lâi, lí chiū ēng lí ê la̍t kap i tí-khòng, lí m̄-bián kiaⁿ, thiah-lı̍h in ê chhùi...... In-ūi lí chin ū la̍t.”
Kàu àm-sı̂ Tāi-le̍k-sū chiū chhoā i ê kiáⁿ Ióng-sū chı̍t-pō͘ chı̍t-pō͘ ǹg chhiū-nâ lāi teh kiâⁿ, iā chı̍t-pō͘ chı̍t-pō͘ kiâⁿ jı̍p chhim tı̄ soaⁿ-kan lāi.
Thiⁿ chin àm, tē chin àm, sı̀-ûi lóng chin àm, Ióng-sū tı̄ chit-ê o͘-àm ê khoân-kéng, ūi-tio̍h beh thiaⁿ-thàn A-pa ê oē, beh chiâⁿ-choè ióng-kám ê eng-hiông, só͘-í chin chù-ı̀, nā siat-sú ū iá-siù lâi i chiū beh khí-lâi tí-khòng. Tē-it thâu-á chin kiaⁿ, ná lâi chiū ná m̄-kiaⁿ, tı̄ hia Ióng-sū kò͘-siú kàu thiⁿ-kng, thong-mı̂ lóng bô sū, chin an-jiân.
Thàu-chá a-pa lâi chhoā i tńg-khı̀, a-pa mn̄g: “Lí cha-mı̂ ū kiaⁿ bô? Iá-siù ū lâi bô?” Ióng-sū ı̀n kóng: “Thâu-á oē kiaⁿ, kàu-boé chiū boē kiaⁿ lah, iá-siù iā lóng bô lâi, nā lâi, goá chiū beh thiah-lı̍h in ê chhùi phah-sí in.” Lāu-pē kóng: “Tı̄ cha-mı̂ tı̄ hia, nā-sı̄ a-pa iā tı̄ lí ê piⁿ-thâu thong-mı̂ teh kò͘-siú lí, goá koan-sim tı̄ lí, goá kiaⁿ-liáu lí it-tàn tú-tio̍h hiông-ok ê iá-siù ê sı̂, tí-tng bē khí, só͘-í thong-mı̂ kò͘-siú lí.”
Iâ-hô-hoa sı̄ goá oa̍h-miā ê khùi-la̍t, goá beh kiaⁿ chı̄-chūi? Sió-pêng-iú, Siōng-tè ài lán choè Ki-tok ê ióng-sū, Ki-tok ê cheng-peng, sui-jiân tı̄ chit ê sè-kài ū Mô͘-kúi chhin-chhiūⁿ pà, hó͘, choâ, sai, hiah-nih hiông-ok, nā-sı̄ Iâ-hô-hoa chin ū khùi-la̍t, i oē kò͘-siú lán, Iâ-hô-hoa ê khùi-la̍t toā pí Tāi-le̍k-sū ê la̍t khah toā, lán beh kiaⁿ sím-mı̍h lâng? Tı̄ o͘-àm ê khoân-kéng nih beh kiaⁿ chı̄-chūi? (L. L. H. siá)