Kim-kù Ê Kò͘-sū 06
Kim-kù Ê Kò͘-sū
1959 6 Ge̍h
6 Ge̍h 7 Jı̍t
Kim-kù: Lín tio̍h soé lâi ka-kı̄ chheng-khı̀; tùi Goá ê ba̍k-chiu chêng tû-khı̀ lín só͘ kiâⁿ ê pháiⁿ. (Í-sài-a 1:16)
Í-chêng ū chı̍t ê thoân-tō ê lâng, sı̀-koè chhut-khı̀ thoân hok-im kiò lâng hoán-hoé sı̀n Iâ-so͘. I só͘ toà ê mı̍h-kiāⁿ chin kán-tan, chí-ū chı̍t-pún Sèng-keng, chá-àm thang tha̍k, chı̍t-ki teng-hoé thang tı̄ àm-sı̂ tha̍k Sèng-keng, chı̍t-chiah ke-kak, chá-khí sı̂ thang kiò i khí-lâi tha̍k Sèng-keng, chı̍t-chiah bé thang khiâ khı̀ sı̀-koè thoân-tō, án-ni nā-tiāⁿ.
Ū chı̍t-pái kàu tı̄ chı̍t ê soaⁿ-kan ê sió hiuⁿ-siā. I chiū jı̍p-khı̀ tı̄ hia kiò lâng tio̍h hoán-hoé, tû-khı̀ ta̍k-hāng ê pháiⁿ, tùi Chú Iâ-so͘ ê pó-huih lâi soé sim-lāi hō͘ chheng-khı̀. Chóng-sı̄ chit-chng ê lâng ta̍k-ê chin pháiⁿ, chin hiong-ok, m̄-nā m̄ hoé-kái lâi sı̀n Iâ-so͘, hoán-tńg koáⁿ chit ê thoân-tō ê lâng chhut in ê hiuⁿ-siā, chit ê lâng ko͘-put-chiong chhut chit ê chng-goā, in-ūi í-keng àm, chiū tı̄ hū-kı̄n ê chhiū-kha hioh mı̂. I kám-kak chin kan-khó͘; chiah-nih koâⁿ iā bô chhù-téng jia hō͘, iā bô piah thang jia hong, m̄-kú i ê sim iā-sı̄ kám-siā Siōng-tè, siūⁿ kóng Siōng-tè só͘ choè ê lóng sı̄ tio̍h, chiū tiám teng-hoé tha̍k Sèng-keng, chóng-sı̄ bô joā-kú chı̍t-chūn hong lâi, chiong teng-hoé thàu-hoa. I siūⁿ kóng, taⁿ sı̄ cháiⁿ-iūⁿ, liān beh tha̍k Sèng-keng ia̍h bô hoé?
Chóng-sı̄ Siōng-tè só͘ choè ê lóng sı̄ tio̍h, chiū siūⁿ beh khùn, hit sı̂ chı̍t-chiah chhâi-lông lâi, tùi hit chiah ke-kak kā teh cháu. I chiah thó͘-khùi kóng, goá cháiⁿ-iūⁿ chiah put-hēng, liân chá-khí-sı̂ thang kiò goá khí--lâi tha̍k Sèng-keng ê ke-á ia̍h bô khı̀, chóng-sı̄ Siōng-tè só͘ chò ê bô m̄-tio̍h. Tú teh kóng ê sı̂ chı̍t-chiah sai chhut-lâi, i kiaⁿ kàu phı̍h-phı̍h-chhoah, hit-chiah sai khoàⁿ-tio̍h bé chiū kā kā-khı̀ chia̍h. Só͘-í i chin siong-pi. Ah! Goá só͘ ū ê tâng-phoāⁿ lóng bô khı̀ lah, taⁿ beh cháiⁿ-iūⁿ, chóng-sı̄ koh siūⁿ Siōng-tè só͘ chò ê lóng sı̄ hó ê, hit-àm in-ūi chin siān chiū khùn-khı̀, chı̍t-chhíⁿ kàu thiⁿ-kng, keh chá-khí i jı̍p-khı̀ chng-lāi chiah tio̍h toā-kiaⁿ. In-ūi cha-àm chı̍t-tı̄n kiông-tō lâi chhiúⁿ-kiap, só͘ ū ê lâng lóng thâi-sí, só͘-ū ê mı̍h-kiāⁿ lóng chhiúⁿ liáu-liáu.
I chiah siūⁿ tio̍h Siōng-tè tùi i ê thiàⁿ, cha-àm teng-hoé nā bô hō͘ hong thàu-hoa, kiông-tō tek-khak oē khoàⁿ-tio̍h kng lâi hāi i, ke kap bé nā bô hō͘ iá-siù kā-khı̀, tek-khak thiaⁿ-tio̍h chha̍t-bé ê siaⁿ oē tio̍h kiaⁿ chhut-siaⁿ, kiông-tō iā oē hoat-kak i tı̄ hia, só͘-í i chiū tı̄-hia kám-siā Siōng-tè tùi i hiah-nı̍h toā ê thiàⁿ.
Sió pêng-iú, Siōng-tè ū thiàⁿ hit ê sim chheng-khı̀ ê thoân-tō ê lâng, chóng-sı̄ hiah ê chng-nı̍h ê lâng, m̄ hoán-hoé tû-khı̀ in só͘ kiâⁿ ê pháiⁿ. Só͘-í Siōng-tè hō͘ in tú-tio̍h hit-khoán ê chai-ē, lán tio̍h chhin-chhiūⁿ chit ê thoân-tō ê lâng sim chheng-khı̀. (Liām kim-kù) (T. T. T.)
6 Ge̍h 14 Jı̍t
Kim-kù: I hoaⁿ-hí gı̄-lí kap kong-pêng Iâ-hô-hoa ê chû-ài moá-moá tı̄ tē-chiūⁿ. (Si-phian 33:5)
Chú-āu 1882 nı̂, chiū-sı̄ 77 nı̂ chêng. Ū chı̍t ê chheng-liân, miâ kiò Khu-li-su-chí, i sı̄ teh chò i-seng, iā-sı̄ thoân-tō sian-siⁿ. I ū tùi So͘-kek-lân ê só͘-chāi kàu tı̄ Boán-chiu ê Hong-thian. Tng-sı̂ Boán-chiu iáu-boē ū thih-lō͘, só͘-í oē tú-tio̍h chin kan-khó͘ kap gûi-hiám.
Khu-li-su-chí siū Siōng-tè ê chû-ài kám-tōng, sui-jiân chē-chē pêng-iú chó͘-chí i lâi hia, chóng-sı̄ i kóng “Tı̄ bô lâng beh kàu ê só͘-chāi kiám m̄-sı̄ khah tio̍h ài Iâ-so͘ ê hok-im; tı̄ bô khai-hoà ê só͘-chāi kiám m̄-sı̄ koh-khah tio̍h ài ēng bûn-bêng ê i-su̍t?” só͘-í koat-sim lâi kàu hia.
Í-āu 40 nı̂ kú, i choan-sim chı̍t-ı̀ ūi-tio̍h Boán-chiu lâng pàng-sak it-chhè, chı̄n-la̍t tı̄ thoân hok-im kap i-liâu.
Hit tiong-kan ū tú-tio̍h 2 pái ê toā chiàn-cheng kap chı̍t-pái ê pâi-thek goā-kok lâng, nā khoàⁿ-tio̍h pe̍h-bı̄n ê chiū hoah thâi ê sū-kiāⁿ, m̄-nā án-ni ū tú-tio̍h kúi-nā khoán ê liû-hêng pēⁿ----làu-sái-chèng, siong-hân iáu-sı̄ sió-khoá, choè lı̄-hāi ê sı̄ niáu-chhí chèng, bô kú ê tiong-kan, chhin-chhiūⁿ hoé-sio, sí 5 bān goā lâng. Khu-li-su-chí pún-sin kúi-nā pái hiám-hiám sí. I chı̍t-sı̀ lâng lı̄-khui kò͘-hiong, lâi kàu kap i lóng bô koan-hē ê Boán-chiu, ūi-tio̍h hiah ê lâng piàⁿ-miā chò-kang, chiong Chú ê chû-ài chhiong-moá tı̄ tē-chiūⁿ.
M̄-nā Khu-li-su-chí, sı̀n Siōng-tè ê lâng, tùi kó͘-chá kàu taⁿ, ū chē-chē chhin-chhiūⁿ i hi-seng kiù lâng, kiâⁿ Siōng-tè ê chû-ài. Kin-á-jı̍t beh kóng Kū-iok tiong chı̍t ê sian-ti Í-lı̄-sa ê kò͘-sū hō͘ lín thiaⁿ.
Sū-lı̄-a kun ê tiong-kan ū chı̍t ê tāi-chiòng miâ kiò Nái-bān. I chin ióng, chóng-sı̄ khó-sioh tio̍h thái-ko ê pēⁿ, só͘-í chin kan-khó͘ sim, ài beh tit-tio̍h i-hó, chóng-sı̄ lóng bô pān-hoat. Hit sı̂ i ê chhe-ēng ê cha-bó͘ gín-ná, chiū-sı̄ i khı̀ Í-sek-lia̍t beh tńg-lâi--ê, khoàⁿ liáu chin khó͘-lı̂n, kā i ê thâu-ke-niû kóng Sat-má-lı̄-a ū chı̍t ê sian-ti chin gâu, bô-lūn sím-mı̍h pēⁿ lóng oē i-hó.
Thiaⁿ-tio̍h che ê Nái-bān hui-siông hoaⁿ-hí, kā ông kóng, ông iā sûi-sı̂ siá-phoe hō͘ Í-sek-lia̍t ê ông.
Nái-bān toà ông ê phoe kap chē-chē lé-mı̍h kap chı̂ⁿ, chiū lâi kàu Í-sek-lia̍t ê ông hia. Í-sek-lia̍t ông chin kiaⁿ, iā chin siū-khı̀.
Thiaⁿ tio̍h che ê Í-lı̄-sa chiū chhe lâng khı̀ kā ông kóng, kiò ông chhe Nái-bān khı̀ i hia. I sı̄ siūⁿ beh pang-chān kan-khó͘ ê Nái-bān.
Nái-bān chiū chē bé-chhia lâi kàu Í-lı̄-sa hia, chóng-sı̄ Í-lı̄-sa bô pún-sin chhut-lâi chiap i, chí-ū chhe lâng, kiò Nái-bān khı̀ Iok-tàn-hô sé chhit-pái. Nái-bān chin siū-khı̀, boē bêng-pe̍k siáⁿ-sū Í-lı̄-sa tùi i án-ni. I m̄ ài tı̄ chiah-nı̍h sè-tiâu kiaⁿ-lâng ê Iok-tàn-hô sé. I kóng “Goán A-lân ê hô, kiám boē pí Í-sek-lia̍t ê chúi khah hó mah? Goá tı̄ hia sé kiám m̄-sı̄ koh-khah oē chheng-khı̀?”
Chóng-sı̄ i ê pō͘-hā kā i khó͘-khǹg, só͘-í i chiū lo̍h khı̀ Iok-tàn-hô chı̀m 7 pái. Chı̍t-pái, nn̄g-pái......chhit-pái, o͘h! I ê seng-khu oân-choân hó, phoê-hu pı̀ⁿ chin kng-ku̍t, chin nńg.
Nái-bān loā-nih hoaⁿ-hí ah! I ê lô͘-po̍k iā hoaⁿ-hí. In chiū koáⁿ-kín tò-tńg khı̀ kā Í-lı̄-sa seh-siā. Iā beh chiong chē-chē lé-mı̍h, chı̂ⁿ sàng Í-lı̄-sa. Chóng-sı̄ Í-lı̄-sa lóng m̄ siu.
Beh tû-khı̀ lâng ê kan-khó͘, pang-chān lâng sı̄ Í-lı̄-sa ê kang, i khoàⁿ-kı̀ⁿ Nái-bān iā sı̀n Iâ-hô-hoa, bô koh pài ngó͘-siōng, chí-ū kèng-pài piàn-kiâⁿ chû-ài tı̄ tē-chiūⁿ ê Siōng-tè iā hoaⁿ-hí.
Sió pêng-iú! Liān tùi-te̍k ê tāi-chiòng ê kan-khó͘ iā kā i tû-khı̀ ê sim sı̄ lán pài Siōng-tè ê lâng ê sim. Pang-chān lâng, kiù lâng ê kang sı̄ pài Siōng-tè ê lâng choè hoaⁿ-hí ê sū. In-ūi Siōng-tè tı̄ Ki-tok, chiong I ê chû-ài moá-moá tı̄ tē-chiūⁿ, lâi kiù lán, ǹg-bāng lán iā hoaⁿ-hí, chı̀n-chêng lâi pang-chān lâng. (T. H. C. siá)
6 Ge̍h 21 Jı̍t
Kim-kù: Iâ-hô-hoa ah, kiû Lí chiong Lí ê tō-lō͘ chí-sı̄ goá; goá beh chiàu Lí ê chin-lí lâi kiâⁿ. (Si-phian 86:11)
Ha̍k-seng, goá lâi mn̄g kúi-kù, khoàⁿ lín ū hó kı̀-tı̂ á-bó? Goá bat kóng chı̍t ê ông chin gâu, ū khí Iâ-hô-hoa ê sèng-tiān, koh iā ū siá Sèng-keng tiong ê kúi-nā-pún, hit ê ông kiò choè sím-mı̍h miâ?...... Hit ê ông kàu nı̂-lāu, i ê phín-hēng soà pı̀ⁿ cháiⁿ-iūⁿ?...... Ūi-tio̍h án-ni i ū chhut chı̍t ê put-siàu ê kiáⁿ, bô chhin-chhiūⁿ i hiah gâu, koh m̄-thiaⁿ lāu-lâng ê khó͘-khǹg, hit ê kiáⁿ kiò-choè sím-mı̍h miâ?...... Kàu hit sı̂ Í-sek-lia̍t-kok chiū pı̀ⁿ-choè cháiⁿ-iūⁿ?......
Án-ni tio̍h, taⁿ tùi kok-ka hun-lı̍h liáu-āu Lâm-tiâu tē-it tāi ê ông kiò choè Lô-pho-àm, chiū-sı̄ lín tú-á só͘ kóng hit ê. Tē 2 tāi kiò choè A-pí-iáng, tē 3 tāi A-sat. Taⁿ lán chá-khí beh saⁿ-kap lâi ha̍k-sı̍p tē 4 tāi, chiū-sı̄ A-sat ê kiáⁿ Iok-sa-hoat ông ê sū. Chit ê ū chin thang khó-chhú ê só͘-chāi.
Tng i chē-ūi ê sı̂, i jia̍t-sim kèng-pài Siōng-tè. Chhe lâng kàu ta̍k ê soaⁿ-thâu, chiong in chó͘ Só͘-lô-bûn ūi-tio̍h hiah ê phian-hui só͘ khí ê pu̍t-toâⁿ lóng kā in húi-hoāi, koh sı̀-kè thoân Siōng-tè ê kà-sı̄ kiò peh-sı̀ⁿ lâi siú. Tùi án-ni i ê kok chiū toā heng.
Nā-sı̄ ū chı̍t-jı̍t hut-jiân ū tùi-te̍k saⁿ-kok liân-bêng beh lâi kong-kek Iû-tāi kok. (Lâm-tiâu hit sı̂ kiò-choè Iû-tāi, Pak-tiâu kiò-choè Í-sek-lia̍t.) Chiū-sı̄ Mô͘-ap, A-bûn, Bí-o͘-nı̂ ê liân-ha̍p-kun, lóng bô choh-siaⁿ, hut-jiân bô phah-sǹg, khí tāi-kun lâi phah Iû-tāi. Iok-sa-hoat ông chı̍t-sı̂ toā-kiaⁿ, in-ūi lóng bô pı̄-pān. Koh sı̄ 3 kok ê liân-ha̍p-kun, peng-bé chiàn-khı̀ chiàn-chhia béng-chiòng chin-chē. Sè-bı̄n chin-toā, hoā-hoā-háu tı̍t-tı̍t lâi, siú pian-kài ê peng cháu-lâi pò, kóng te̍k-kun í-keng lâi kàu Un2-ki-tí chiū-sı̄ Iû-tāi ê kok-kéng, taⁿ ông lí tio̍h kín siat-hoat. Ông chı̍t sı̂ siūⁿ bô pō͘, beh thoân-lēng chèng peng-bé mā bē hù, taⁿ beh án-choáⁿ.
Hit sı̂ ông siūⁿ kàu chin bô pō͘, thè bô lō͘. I chí-ū kūi-lo̍h ǹg Iâ-hô-hoa âu-kiò, koh thoân-lēng hō͘ thong kok bēng-lēng chèng peh-sı̀ⁿ tio̍h kı̀m-chia̍h. Koh kiò ta̍k-siâⁿ ê peh-sı̀ⁿ tio̍h kiò tāi-piáu kàu Iâ-hô-hoa ê tiān saⁿ-kap kı̂-tó tı̄ Siōng-tè ê bı̄n-chêng. Lí khoàⁿ che sı̄ hô-téng ê chhim-sı̀n. Tùi-te̍k kàu, tē-it ê hō-lēng m̄ sı̄ tiàu-chı̍p kun-peng, bé-tūi chiàn-chhia. I só͘ hoat ê tē-it bēng-lēng sı̄ kiò lâng kı̀m-chia̍h, tiàu tāi-piáu kàu sèng-tiān kı̂-tó. I pún-sin iā kı̀m-chia̍h kūi tı̄ Sèng-tiān, tı̄ Iâ-hô-hoa ê bı̄n-chêng lâi kı̂-tó.
Keh-jı̍t ông chiū tiàu-chı̍p peh-sı̀ⁿ tı̄ Thê-ko-a ê khòng-iá, tùi peh-sı̀ⁿ soan-giân kóng, “Peh-sı̀ⁿ ah, tio̍h thiaⁿ goá, lín tio̍h sı̀n Iâ-hô-hoa lín ê Siōng-tè, chiū beh khiā-chāi; sı̀n I ê sian-ti chiū beh heng-thong.”
Kóng-soah chiū siat-lı̍p chhiùⁿ-koa-tūi, hō͘ in chhēng sèng koh súi ê saⁿ kiâⁿ tı̄ kun-tūi ê thâu-chêng o-ló Iâ-hô-hoa, chhiùⁿ kóng, “Tio̍h kám-siā Iâ-hô-hoa; in-ūi I ê chû-ài éng-oán tı̄-teh.” Lín thiaⁿ liáu kám-kak cháiⁿ-iūⁿ? Ná ū hiah sim-sek, á-sı̄ hiah gōng ê kau-chiàn hoat. M̄ tio̍h kiò bé-peng, á-sı̄ chiàn-chhia choè thâu-chêng. Sím-mı̍h kiò sèng-koa-tūi chhēng súi-saⁿ, gı̂m-si kiâⁿ choè thâu-chêng. To m̄-sı̄ beh iû-hêng ngiâ lāu-jia̍t, kiâⁿ ke-lō͘--ê, tùi-te̍k khoàⁿ-tio̍h mā ài-chhiò. Nā-sı̄ Iok-sa-hoat ông i chai, kau-chiàn tek-sèng m̄ sı̄ chāi-tı̄ i kap i ê kun-peng, sı̄ chāi-tı̄ Iâ-hô-hoa.
Taⁿ án-choáⁿ, Sèng-keng ê le̍k-sú siá kóng, “In tú-á chhiùⁿ-koa o-ló ê sı̂, Iâ-hô-hoa chiū phài bâi-ho̍k ê thiⁿ-peng kong-kek hiah ê lâi kong-kek Iû-tāi ê A-bûn, Mô͘-ap kap Se-jíⁿ-soaⁿ ê lâng; in chiū siū phah.” (II Le̍k-tāi 20: 22) Siōng-tè hō͘ in 3 kok ê peng ka-tı̄ khí-lâi loān, ka-tı̄ sio-thâi, ka-tı̄ thâi-sí liáu-liáu.
Tùi án-ni Iû-tāi ê peng lóng m̄-bián tāng-khí chhiuⁿ-to, iā bô sit-lo̍h chı̍t ê, chiū tit-tio̍h choân-sèng. Ông chhoā kun-peng lâi tit-tio̍h chiàn-lı̄-phín. Peh-sı̀ⁿ lóng chhut-lâi chhiúⁿ chiàn-lı̄-phín tit-tio̍h châi-bu̍t, i-ho̍k, pó-poè, chē kàu the̍h bē kiâⁿ. Án-ni liân-liân chhiúⁿ-mı̍h 3 jı̍t kú. Toā tek-sèng khái-soân. Tē 4 jı̍t chèng peh-sı̀ⁿ kap Iok-sa-hoat ông lóng chū-chı̍p tı̄ Pí-la̍h-ka ê soaⁿ-kok tı̄ hia lâi o-ló Siōng-tè. Tùi án-ni tùi-te̍k lóng m̄-káⁿ koh lâi, koh toā thài-pêng, in-ūi Siōng-tè siúⁿ-sù in pêng-an. Ha̍k-seng, lí thiaⁿ liáu ū chhù-bı̄, ū kám-kek á-bô? Chhin-chhiūⁿ án-ni, lán iā tio̍h sı̂-sı̂ thàn Siōng-tè ê oē lâi kiâⁿ. (Saⁿ-kap lâi liām kim-kù) (L. J. S. siá)
6 Ge̍h 28 Jı̍t
Kim-kù: Só͘-í goán iā beh ho̍k-sāi Iâ-hô-hoa, in-ūi I sı̄ goán ê Siōng-tè. (Iok-su-a 24: 18)
Chit ê kò͘-sū chiū-sı̄ Jı̍t-pún teh koán Tâi-oân ê sı̂-chūn ê tāi-chı̀. Tı̄ chı̍t ê só͘-chāi ê kàu-hoē Chú-jı̍t-o̍h ê ha̍k-seng sı̄ 12 hoè ê sió pêng-iú. I ê pa-pa sı̄ in ê kàu-hoē ê tiúⁿ-ló choân ka-cho̍k chin-chiàⁿ jia̍t-sim pài Siōng-tè, chá, àm, siông-siông choè ka-têng lé-pài, chóng-sı̄ Jı̍t-pún chèng-hú chin bô hoaⁿ-hí Tâi-oân lâng pài Siōng-tè, in-ūi in ài lán ho̍k-sāi in ê kok-sı̂n kiò-choè “A-ma-the-la-sù” ê sı̂n, iā ài lán kūi-pài in ê hông-tè kiò-choè “Thian-nó-hé-khà” só͘-í khoàⁿ lán Ki-tok-tô͘ jia̍t-sim pài Siōng-tè in chiū chin chù-ı̀ ài chhē ki-hoē lâi chó͘-tòng.
Chit ê sió pêng-iú sui-jiân chin koai koh gâu tha̍k-chheh, chóng-sı̄ ūi-tio̍h sı̀n Iâ-so͘ chiū boē-thang choè thâu-miâ. I ū chı̍t-pái hō͘ pêng-iú kā i chhiò kóng lín pài Siōng-tè iā teh pài sı̂n-siā, i chiū ı̀n kóng, “Goán pài Siōng-tè ê lâng sı̄ Siōng-tè í-goā bô ū pa̍t ê sı̂n, sui-jiân sian-siⁿ kiò goá tio̍h pài Jı̍t-pún sı̂n, che m̄ sı̄ tùi sim-té, sı̄ ko͘-put-chiong, in-ūi goán ū cha̍p-tiâu-kài ê tē-it tiâu kóng “Siōng-tè í-goā m̄-thang ū pa̍t-ê Siōng-tè.”
Āu-lâi chiah ê ha̍k-seng ū tùi in ê sian-siⁿ kóng chit ê sū, chiū pı̀ⁿ chin toā ê tāi-chı̀, i ê pa-pa chiū hō͘ ha̍k-hāu ê sian-siⁿ kiò khı̀ mn̄g. Pa-pa iā sı̍t-chāi án-ni piáu-bêng, i ê pa-pa chiū pı̀ⁿ choè kéng-chhat só͘ chù-ı̀ ê lâng, ū chı̍t-jı̍t in ê sian-siⁿ kiò sió pêng-iú lâi mn̄g “A-má-the-la-sù tāi-sı̂n khah-toā á-sı̄ lín ê Siōng-tè khah-toā.” I chiū ı̀n kóng: “Siōng-tè sı̄ chhòng-chō thiⁿ-tē bān-mı̍h, só͘-í I khah toā.” Koh mn̄g i “Thian-nó-hè-khà khah toā á-sı̄ lín ê Iâ-so͘ khah-toā.” I chiū kóng: “Iâ-so͘ sı̄ choân sè-kan lâng ê Kiù-chú, só͘-í Iâ-so͘ khah toā.”
Āu-lâi i hō͘ sian-siⁿ toā hêng-hoa̍t, bô kú i teh beh pit-gia̍p ài khó Tiong-ha̍k-hāu in ê sian-siⁿ siá sêng-chek-piáu ê sı̂ ū ke-thiⁿ kóng chit ê gín-ná kap i ê pa-pa sı̄ bô chun-tiōng Jı̍t-pún kok-thé ê Ki-tok-tô͘, tùi án-ni chit ê sió pêng-iú ê khó-chhı̀ sêng-chek sui-jiân chin hó iáu-kú boē thang jı̍p Tiong-o̍h, i ê pa-pa chiū kā i an-ùi kóng lán ē-thang pài Siōng-tè pí jı̍p sím-mı̍h ha̍k-hāu iáu khah hó, I tek-khak ē thè lí khui-lō͘.
Kó-jiân bô loā-kú Jı̍t-pún soà thâi-su lah, tı̄ Tâi-oân bô lâng koh pài in ê sı̂n, iā tı̄ Jı̍t-pún, in ê “Thian-nó-hé-khà” ū tùi kok-bı̂n seng-bêng kóng: “Goá sı̄ lâng m̄-thang kūi-pài goá.”
Kong-ho̍k-āu sió pêng-iú 14 hoè chiah jı̍p tiong-ha̍k kàu tāi-ha̍k, iā kap i ê pa-pa ta̍k só͘-chāi teh kóng kiàn-chèng lâi ko-kú Siōng-tè ê sèng-miâ. só͘-í lán tio̍h o̍h chit ê pē-kiáⁿ, bô lūn tú-tio̍h án-choáⁿ iā-tio̍h koat-toàn ho̍k-sāi Iâ-hô-hoa, in-ūi I sı̄ lán ê Siōng-tè. (Chhiáⁿ tāi-ke liām kim-kù.) (I. L. Chhı̂)