Kim-kù Ê Kò͘-sū 07

Kim-kù Ê Kò͘-sū
1959 7 Ge̍h 7 Ge̍h 5 Jı̍t Kim-kù: Só͘-í tio̍h thiàⁿ iâ-hô-hoa lí ê Siōng-tè, siông-siông siú I só͘ hoan-hù lí siú ê. (Sin-bēng-kı̀ 11: 1) Í-chêng ū chı̍t-ê siàu-liân ông. Tú chiap i ê lāu-pē chò ông, koat-ı̀ beh thóng-tı̄ i ê kok chò chin-hó ê kok-ka, chiū chng-choè piān-sin lâng chhut ông-kiong kàu i ê kok lāi, sı̀-koè táⁿ-thàm kok-lāi ê sı̍t-chāi sū-chêng, kàu kúi-nā ūi thàm-thiaⁿ chiah-chai, i ê koaⁿ-oân chin-choē sı̄ tham-koaⁿ ú-lí, pak-siap peh-sı̀ⁿ, khó͘-chhó͘ hó-lâng. Ū chı̍t-jı̍t tı̄ soaⁿ-kan í-keng àm, chhoē chı̍t-keng chhù-á, chiū kā phah-mn̂g. Ū chı̍t-ê choh-sit lâng chhut-lâi, ông kā i kóng: “Goá sı̄ chhut-goā-lâng, í-keng àm bô tè thang hioh, chhiáⁿ lí hō͘ goá tiàm-chia koè chı̍t-mê hó bô?” Hit-ê lâng kóng: “Hoan-gêng, hoan-gêng, put-kò só͘-chāi bái-bái-à, iā bô sím-mı̍h hó-mı̍h thang chia̍h.” Ông hit-àm tı̄ hia hō͘ in chhiáⁿ hân-chı̂-moê phoè kiâm-koe-á, m̄-bat chia̍h tio̍h chiah-nı̍h bái, chóng-sı̄ in-ūi pak-tó͘ iau, iā kám-kak boē pháiⁿ-chia̍h, chia̍h-pá ông khoàⁿ chhù-lāi ê chêng-hêng kám-kak tio̍h-kiaⁿ. In-ūi sui-jiân chhù, piah phoà-phoà, só͘ ēng ê mı̍h-kiāⁿ chho͘-ló͘, iáu-kú tı̄ bı̂n-chhn̂g ê tû-á nı̍h ū chin-choē chheh, koh tı̄ tû-á téng-bı̄n ū chı̍t-hù kū-kū ê chiàn-kah. I chiah mn̄g chit-ê choh-sit lâng, chiah ê chheh kap chiàn-kah sı̄ siáⁿ lâng--ê, chit ê choh-sit lâng chiah kóng, che sı̄ i ê, i í-chêng m̄-sı̄ choh-sit lâng, sı̄ chı̍t-ê chiong-kun, i kúi-nā ê chiong-kun phoāⁿ bô chiàu kong-tō, pak-siap, khó͘-chhó͘ hiah-ê hó peh-sı̀ⁿ, i kā in khoàn-bián hoán-tńg hō͘ in siū-khı̀, kā ông chàu i ê pháiⁿ-oē, āu-lâi ông thiaⁿ in ê oē kā i bián-chit, i koh kóng, “Goá bô oàn-hı̄n ông, chí-ū iu-būn só͘ ài ê kok-ka jı̍t-jı̍t teh pāi-hoāi, chóng-sı̄ thiaⁿ kóng siàu-liân ông taⁿ chē-ūi, ǹg-bāng i gâu thóng-tı̄ hō͘ chit ê kok-ka khah kong-gı̄.” Siàu-liân ông thiaⁿ-liáu siū toā kám-tōng, keh-jı̍t tò-khı̀ ông-kiong, chiū sûi-sı̂ chhut-chiàu kóng: “Hoān-nā iú-sim ài-kok ê chı̀-sū, 5 jı̍t āu lóng tio̍h chhēng chiàn-kah lâi tiau-kı̀ⁿ ông.” 5 jı̍t āu, kok-lāi ê bûn-bú pah-koaⁿ lóng chhēng chin súi ê chiàn-kah chê kàu ông ê bı̄n-chêng. Kı̂-tiong chı̍t-ê, só͘ chhēng ê chiàn-kah kū-kū seⁿ-sian, ta̍k-lâng lóng teh kā chhiò, chóng-sı̄ ông chhut-lâi chiū chù-ı̀ chit-ê chhēng kū chiàn-kah ê ióng-sū bēng-lēng i chhut-lâi thâu-chêng, chiu-ûi ū chhiò-siaⁿ, chhiò i chhēng kū chiàn-kah, i iā tio̍h-kiaⁿ, lia̍h-chún ông beh hêng-hoa̍t i lè, thâu chhih-chhih m̄-káⁿ gia̍h-koân, chóng-sı̄ ông kiò i gia̍h-thâu, i chı̍t-ē khoàⁿ-tio̍h toā-kiaⁿ, tang-sı̂-á chit ê siàu-liân ông sı̄ cha-jı̍t kàu i ê chhù ê siàu-liân lâng. Ông tı̄ hit-sı̂ soan-pò͘ kóng: “Chit-ê lāu chiong-kun chiah-sı̄ sı̍t-chāi ài-kok ê chı̀-sū. Ū ha̍k-būn kap ióng-kám, thiàⁿ ông iā thiàⁿ peh-sı̀ⁿ.” Chiū bēng-lēng i kóng: “Chū kim í-āu phài lí tı̄-lí 30 koān, siong-sı̀n lí tek-khak tı̄-lí chin hó, iā oē hó khoán-thāi it-chhè kan-khó͘ ê peh-sı̀ⁿ.” Āu-lâi chit ê lāu chiong-kun chò 30 koān ê tē-hng-koaⁿ, kó-jiân tiong-kun ài-bı̂n, hō͘ hit tē-hng ê peh-sı̀ⁿ lóng tit an-ki lo̍k-gia̍p, kàu āu-tāi lâng-lâng to teh siàu-liām i. Lán tio̍h chhin-chhiūⁿ chit ê chiong-kun thiàⁿ i ê ông án-ni thiàⁿ Iâ-hô-hoa, iā tio̍h chhin-chhiūⁿ i siú ông só͘ hoan-hù i siú ê, lâi siú Siōng-tè hoan-hù lán só͘ siú ê. (T. T. T. siá) 7 Ge̍h 12 Jı̍t Kim-kù: To̍k-to̍k chip-siú lu̍t-hoat ê, chiū ū hok-khı̀. (Chim-giân 29:18) Bô loā-kú í-chêng, ū chı̍t ê lāu-lâng phoà-pı̄ⁿ teh beh sí lah, só͘-í koáⁿ-kín kiò i kúi-nā ê sun lâi kā in kóng: “Goá ài lâu tām-po̍h ê mı̍h hō͘ lín...... Nā-sı̄ ài 300 kho͘ ê lâng, thang the̍h 300 kho͘, nā ài goá só͘ ēng ê Sèng-keng ê lâng, thang the̍h goá ê Sèng-keng.” Hit-pún Sèng-keng sı̄ chin kū, phoà-siùⁿ bô sím-mı̍h kè-ta̍t, nā the̍h-khı̀ kū chheh-tiàm bē khoàⁿ ū 1 kho͘ bô. Tāi-ke lóng saⁿ-chiⁿ ài 300 kho͘, bô-ài hit-pún Sèng-keng, chí-ū chı̍t ê kóng: “Chı̂ⁿ oē-thang koh thàn, a-kong ê Sèng-keng sı̄ bô tàng bé, loā-chē chı̂ⁿ iā bé boē tio̍h--ê.” Só͘-í chiū kā a-kong thó Sèng-keng. Kı̂-û ê lâng lóng chhiò i sı̄ gōng-lâng, chóng-sı̄ cháiⁿ-iūⁿ? Bô loā-kú i teh tha̍k Sèng-keng ê sı̂, tùi Sèng-keng ê lāi-bı̄n ū kúi-nā tiuⁿ 1 bān kho͘ ê chı̂ⁿ-phiò chhut-lâi. Sió pêng-iú, chit ê sun tit-tio̍h Sèng-keng kap sím-mı̍h? (kúi-nā bān) Sı̄, kan-ta Sèng-keng tō chin pó-poè, koh ke tit kúi-nā bān kho͘ án-ni sím-mı̍h lâng kéng liáu khah tio̍h? (kéng Sèng-keng--ê) Sı̄, kéng Sèng-keng ê khah tio̍h. Mô͘-se í-keng chhoā Í-sek-lia̍t peh-sı̀ⁿ, kàu ū thang khoàⁿ-tio̍h lâu ni kap bı̍t ê Ka-lâm tē ê hū-kūn lah, chóng-sı̄ Mô͘-se boē tit thang jı̍p èng-ún ê tē, tio̍h kap peh-sı̀ⁿ lı̄-khui, só͘-í kàu Iok-tàn-hô chiū chū-chı̍p chèng-lâng, kā in kà-sı̄ chē-chē hāng tāi-chı̀: “Lín 40 nı̂ kú tı̄ khòng-iá, lóng ū chhin-ba̍k khoàⁿ-kı̀ⁿ Siōng-tè tùi lín chò ê sū. Siōng-tè tı̄ lín ê bı̄n-chêng, bia̍t-bô hiong-béng ê tùi-te̍k, lín bô thang chia̍h ê sı̂, ūi-tio̍h lín pı̄-pān chia̍h-niû, ūi-tio̍h beh hō͘ lán chē-chē lâng thang hó khiā-khí, thang chò hó ê kok, siúⁿ-sù lán lu̍t-hoat, sı̍t-chāi lán nā toè chit ê Siōng-tè lóng bián kiaⁿ, bián tú-tio̍h kan-khó͘ sū. Iā m̄-bián hō͘ goā-kok lâi kā lán chhim, thang chiâⁿ-chò hó ê kok, chóng-sı̄ nā m̄ thiaⁿ-thàn Siōng-tè ê kà-sı̄, siú I só͘ kau-tài ê lu̍t-hoat (10 tiâu kài), khı̀ pài m̄ eng-kai pài ê ngó͘-siōng, bô beh siú Sèng-jı̍t, oē tú-tio̍h chin chhi-chhám. Taⁿ teh beh chı̀n-jı̍p Ka-lâm, lín tio̍h oē-hiáu siūⁿ, oē-hiáu kóng, khoàⁿ sı̄ beh sūn-chiông Siōng-tè ê oē (lu̍t-hoat), á-sı̄ beh lı̄-khui m̄-thiaⁿ Siōng-tè, nā kéng m̄-tio̍h sı̄ toā tāi-chı̀, lín tek-khak m̄-thang boē kı̀-tit. In-ūi in tı̄ khòng-iá ū tú-tio̍h chē-chē tāi-chı̀, koh Mô͘-se hó-hó kā in kóng, só͘-í chin bêng-pe̍k, tı̄ Mô͘-se sí liáu-āu iā thiaⁿ Siōng-tè ê lu̍t-hoat, só͘-í chiām-chiām chı̀n-pō͘, chiâⁿ-chò chin hó ê kok, te̍k-pia̍t Tāi-pı̍t ê sı̂ ū chin hó, chin toā ê kok, chóng-sı̄ khó-sioh in āu-lâi chiām-chiām boē kı̀-tit Siōng-tè, pài ké ê Siōng-tè, bô thàn Siōng-tè ê lu̍t-hoat, soà hō͘ goā-kok chiàm, hō͘ goā-kok bia̍t-bông. Sió pêng-iú, kin-á-jı̍t ê kim-kù kóng nā chı̍p-siú lu̍t-hoat ē án-choáⁿ? (chiū ū hok-khı̀) Sı̄, chiū ū hok-khı̀ lah. Ǹg-bāng lín chı̍t-sı̀-lâng lóng bô bē-kı̀-tit, thang tit-tio̍h Siōng-tè ê chiok-hok, nā ū koat-sim chı̍t-sı̀-lâng beh chı̍p-siú Siōng-tè ê kà-sı̄ ê, chhiáⁿ gia̍h-chhiú! Hó. Tāi-ke lóng ū gia̍h-chhiú. Siōng-tè tek-khak oē chiok-hok lín. Saⁿ-kap kı̂-tó, (chhiáⁿ lāu-su chhoā in kı̂-tó Siōng-tè hō͘ in só͘ koat-sim ê oē put-sı̂ kı̀-tit, kiû Siōng-tè hō͘ in ū khùi-la̍t thang chiàu án-ni kiâⁿ.) (T. H. C. siá) 7 Ge̍h 19 Jı̍t Kim-kù: Tio̍h hàu-kèng lí ê lāu-pē, lí ê lāu-bú. (Chhut Ai-kı̍p-kı̀ 20:12) Lán chit-kùi sı̄ beh gián-kiù Kū-iok tiong kúi ê khah chhut-miâ ê jı̂n-bu̍t lâi choè lán ê kà-sı̄, lán téng lé-pài ū ha̍k-sı̍p Mô͘-se ê sū, āu lé-pài lán beh koh ha̍k-sı̍p chı̍t ê chhut-miâ ê ông-hō Í-sū-thiap ê sū, chhin-chhiūⁿ án-ni lán kin-á-jı̍t beh lâi ha̍k-sı̍p chı̍t ê iú-hàu sim-pū Lō͘-tek ê sū. Lí khoàⁿ chit ê lú-chú sı̄ joā-úi-tāi thang choè lán ê bô͘-iūⁿ, taⁿ goá lâi kóng: Tı̄ kó͘-chá Í-sek-lia̍t kok lóng iáu-boē ū ông ê sı̂-tāi, hit-sı̂ peh-sı̀ⁿ ê léng-siù kiò choè Sū-su. Tng tı̄ Sū-su teh tı̄-lí ê sı̂, ū chı̍t sı̂ liân-liân toā ki-hng. Peh-sı̀ⁿ tú-tio̍h iau-gō, sí-sit, sı̀-kè phiau-liû lâi chhoē chia̍h ê kan-khó͘. Peh-sı̀ⁿ tiong ū chı̍t kháu-chàu chı̍t-ke 4 ê lâng. Lāu-pē kiò choè Í-lı̄-bí-le̍k, lāu-bú kiò choè Ná-o-bí, in ū 2 ê kiáⁿ, toā--ê miâ Má-lûn, tē-jı̄--ê Ki-liân. In ê kò͘-hiong sı̄ tiàm tı̄ Pek-lı̄-hêng. Taⁿ in chı̍t-ke ūi-tio̍h bô thang chia̍h, chiū poaⁿ khı̀ goā-kok kàu Mô͘-ap ê tē-hng khı̀ thàn-chia̍h. Khí-thâu khı̀ sı̀-kè chin chhiⁿ-so͘, nā-sı̄ in chin kut-la̍t koh khiām, m̄-nā ná koàn-sı̀, kàu āu-lâi seng-oa̍h chiū ná hó-koè. In khı̀ ê sı̂ kiáⁿ-jı̂ lóng iáu sè-hàn, kàu āu-lâi kiáⁿ-jı̂ chiū lóng toā-hàn, án-ni pē-kiáⁿ saⁿ-ê hia̍p-le̍k lâi phah-piàⁿ, chiū chiām-chiām khí-ke. Chhù-piⁿ lı̂n-iū ê lâng, chiām-chiām kap in se̍k-sāi hó kau-poê. Kàu kú in soà bô siūⁿ beh tò-lâi Ka-lâm-tē. Soà tı̍t-tı̍t sio̍k-hoà, koàn-sı̀ tiàm tı̄ sè-sio̍k tiong, m̄-nā kap in tiàm, in ê kiáⁿ soà tı̄ hia lâi chhoā sè-sio̍k-lâng choè sim-pū. Toā-kiáⁿ ū chhoā Gô͘-jíⁿ-pa, tē-jı̄ kiáⁿ ū chhoā Lō͘-tek. Án-ni chı̍t-ke pı̀ⁿ-choè 6 ê lâng. Ka-têng ná lāu-jia̍t, sim kám-kak pêng-an. Àn-sǹg beh tı̄ sè-sio̍k tiong lâi tèng-kin, soà bē-kı̀-tit Siōng-tè, bē-kı̀-tit in sı̄ Siōng-tè ê soán-bı̂n. Lín siūⁿ án-ni Siōng-tè ē hoaⁿ-hí á-bē? Bē lah. Ū chı̍t-jı̍t chai-ē kàu lah. Khó-lı̂n, thâu-boé tiàm hia iok 10 nı̂ chı̍t-ke 3 ê cha-po͘-teng lóng saⁿ-soà sí-khı̀, chiū-sı̄ lāu-pē Í-lı̄-bí-le̍k sí-khı̀. Bô loā-kú toā-kiáⁿ Má-lûn, jı̄-kiáⁿ Ki-liân iā saⁿ-soà sí-khı̀. Siūⁿ bô tio̍h ê chhiⁿ-chhám liân-liân tı̍t-tı̍t lâi, lāu ê sí, siàu-liân--ê iā sí. Toā-kiáⁿ sí, liân jı̄-kiáⁿ iā sí. Só͘ ū ê ke-hoé, só͘ chek-thiok ê chı̂ⁿ, ūi phoà-pı̄ⁿ, ūi song-sū lóng iōng liáu-liáu. Chı̍t-ke chhun 3 ê cha-bó͘-lâng, thâu-chêng chiân-tô͘ chin o͘-àm, gia̍h-thâu bô chhin, chhù-piⁿ keh-piah ta̍k-ê chin khoàⁿ-khin, liân seng-oa̍h to chin khùn-lân. Hit-sı̂ Ná-o-bí chai chhò lah. Chai in chı̍t-sı̂ ūi-tio̍h ki-hng, chiām-sı̂ lâi kià-kha tı̄ goā-kok, chham-chhap tı̄ sè-sio̍k tiong, che í-keng sı̄ chin put-eng-kai lah. Jı̂-chhiáⁿ chı̍t-ē toà chiū kui-cha̍p-nı̂, soà lı̄-khui Siōng-tè ê kà-sı̄, kap sè-sio̍k-lâng kiat-hun, àn-sǹg beh choè sè-sio̍k-lâng ê seng-oa̍h, lâi lı̄-khui Siōng-tè só͘ èng-ún ê Ka-lâm. Ah! Siōng-tè phah--i. Taⁿ i sit-lo̍h it-chhè ê oá-khò, kàu hit-sı̂ i chiū koh siūⁿ tio̍h Siōng-tè, koh siūⁿ tio̍h kò͘-hiong, siūⁿ tio̍h chhin-lâng, kap chá ê pêng-iú. Ū chı̍t-jı̍t i chiū koat-sim beh koh tò-khı̀ in kò͘-hiong Pek-lı̄-hêng. Hit-sı̂ i khó͘-khǹg i nn̄g ê sim-pū ta̍k-ê koh khı̀ kái-kè. Toā sim-pū thiaⁿ i ê ta-ke ê khó͘-khǹg chiū tò-khı̀ āu-thâu koh kái-kè. Nā-sı̄ tē-jı̄ sim-pū Lō͘-tek chin iú-hàu. I sim-koaⁿ-té siūⁿ kóng, ta-ke nı̂-lāu lah, kiáⁿ sí, tiōng-hu sí, chhun i chı̍t ê lāu hū-jı̂n-lâng, bô-i bô-oá, goá nā koh lı̄-khui, khoàⁿ lāu ta-ke beh án-choáⁿ. I chin m̄-kam chiū koat-sim m̄ tò-khı̀ āu-thâu, beh kap lāu ta-ke choè-hoé khı̀ Pek-lı̄-hêng. Ta-ke khǹg i kā i kóng, cha-bó͘-kiáⁿ ah, goá nı̂-lāu lah, iā bē koh siⁿ-kiáⁿ, iā sàn-hiong, chiah kan-khó͘, lí toè goá beh siáⁿ-pō͘. Lí tò-khı̀, siàu-liân koh kè, thang ū tiōng-hu chhiâⁿ-ke, goān Siōng-tè hō͘ lí hok-khı̀ toā-pha-boé. Lí toè goá khı̀ Pek-lı̄-hêng iā bô chhù, iā bô ǹg-bāng. Nā-sı̄ Lō͘-tek kóng, A-bú goá sí to beh toè lí, lí ê Siōng-tè chiū-sı̄ goá ê Siōng-tè, lí sí tı̄ hia, goá iā beh kap lí saⁿ-kap sí tı̄ hia. Ta-ke khoàⁿ i hàu-sim, chiū saⁿ-chhoā tò-khı̀ Pek-lı̄-hêng. Kàu-ūi Lō͘-tek khı̀ khioh be̍h-seh, kā lâng pang-bâng kang-chok thàn-chı̂ⁿ lâi chhı̄ ta-ke. Lâng nā sàng i chı̍t-tè piáⁿ, iā the̍h tò lâi hō͘ ta-ke chia̍h, chin-chiàⁿ sı̄ iú-hàu. Bián loā-kú thong siâⁿ lóng chai, chiū tit-tio̍h chı̍t ê toā hó-gia̍h-lâng kiò choè Pho-a-su thiàⁿ--i, chhoā i choè hū-jı̂n-lâng. Āu-lâi Lō͘-tek chiū siⁿ chı̍t ê hāu-siⁿ miâ O-pı̄-tek, O-pı̄-tek siⁿ Iâ-se, Iâ-se siⁿ Tāi-pı̍t ông. Lí khoàⁿ chit ê iú-hàu ê sim-pū Lō͘-tek Siōng-tè ū chiok-hok i á-bô? (Loā Jı̂n-seng siá) 7 Ge̍h 26 Jı̍t Kim-kù: Lín tio̍h ióng-kám chòng-táⁿ......in-ūi Iâ-hô-hoa lí ê Siōng-tè kap lí khı̀. (Sin-bēng-kı̀ 31: 6) Ū chı̍t-jı̍t tùi soaⁿ-téng ū chı̍t-tiâu sè-tiâu khe-chúi tı̍t-tı̍t ǹg toā-hái lâu lo̍h-khı̀. Keng-koè chı̍t ê pêⁿ-tē, piⁿ-á ū chı̍t-khut chúi-khut sı̀-bı̄n hō͘ chèng chhiū-ba̍k ê toā-hoāⁿ ûi-teh, khoàⁿ tio̍h khe-chúi siám tùi i ê piⁿ-á beh koè-khı̀ ê sı̂ chúi-khut chiū mn̄g khe-chúi kóng: “Pêng-iú lí beh lâu tùi tó-ūi khı̀?” Khe-chúi chiū ı̀n kóng: “Goá tı̍t-tı̍t ǹg toā-hái khı̀.” Chúi-khut chiū kóng: “Hò͘ⁿ! Beh kàu toā-hái, lí chin gōng, chhut-la̍t m̄-tio̍h thâu. Lí chit-khoán sè-tiâu-à khe-chúi cháiⁿ-iūⁿ ē-tàng kàu toā-hái, lí tek-khak ē pōng tio̍h toā-chio̍h-thâu koh kiâⁿ bê-lō͘, iā hit ê bô chêng ê iām jı̍t ē kā lí pha̍k kàu ta khı̀, lêng-khó͘ lí lâi jı̍p goá chia lâi, lí khoàⁿ m̄-bián tio̍h-boâ, chhiū-ba̍k hō͘ lán chin chhiⁿ-liâng, koh ū khong-tiong ê poe-chiáu lâi thit-thô, iā ū chē-chē gû lâi sé-ek, chē-chē iûⁿ lâi hioh-liâng, kiám bô chin hó?” Chóng-sı̄ sè-tiâu khe-chúi bô siū i ê ín-iú, iû-goân sūn hit tiâu ǹg toā-hái ê khe-lō͘ tı̍t-tı̍t chı̀n-chêng, in-ūi i ū kám-kak tio̍h lâu chı̀n-chêng sı̄ i ê chek-jı̄m, i siong-sı̀n sūn hit tiâu khe-lō͘ lâu ún-tàng ē kàu toā-hái. Āu-lâi hit tè chúi-khut chiām-chiām ta khı̀ bô kú soà bô poàⁿ tih chúi, gû-iûⁿ lâi iā sit-bāng, poe-chiáu iā bô lâi. Hit ê chúi-khut soà bô lō͘-ēng khı̀. Chóng-sı̄ hit tiâu sè-tiâu khe-chúi keng-koè chē-chē kan-lân, pōng tio̍h toā chio̍h-thâu chiū nǹg tùi sè-chio̍h phāng, oan-lâi oat-khı̀ lóng-sı̄ oá-khò hit tiâu khe-lō͘ ióng-kám chı̀n-chêng lō͘-boé kàu toā-hái, sè-tiâu khe-chúi lâu-jı̍p hái chiū pı̀ⁿ-choè chı̍t ê toā-hái ê chı̍t-pō͘-hūn lâi tit-sêng i ê bo̍k-tek lah. Sió pêng-iú, lán tiàm tı̄ chit ê sè-kan ū sı̂ oē tú-tio̍h chhin-chhiūⁿ chúi-khut ê chúi chin pêng-an, ū sı̂ oē tú-tio̍h chhin-chhiūⁿ sè-tiâu khe-chúi toā kan-lân. Chóng-sı̄ lán lóng m̄-thang thêng, lán tio̍h chı̀n-chêng, lán chiong-lâi beh choè kok-ka siā-hoē kàu-hoē ū lō͘-ēng ê lâng tio̍h ài hó-táⁿ chı̀n-chêng. Lán nā beh kiâⁿ kàu thian-tông éng-oán hok-khı̀ ê só͘-chāi, lán tio̍h ài hó-táⁿ chı̀n-chêng lâi kiâⁿ thiⁿ-lō͘. Chóng-sı̄ m̄-sı̄ oá-khò ka-kı̄, sè-tiâu khe-chúi sı̄ oá-khò hit tiâu khe-lō͘ kàu toā-hái, án-ni lán tio̍h ài oá-khò Siōng-tè, lâi kiâⁿ lâi choè, in-ūi Sèng-keng ū kó͘-lē lán kóng: “Lí tio̍h ióng-kám chòng-táⁿ......in-ūi Iâ-hô-hoa lí ê Siōng-tè kap lí khı̀.” (Chhiáⁿ saⁿ-kap liām kim-kù) (I. L. Chhı̂ siá)