Kim-kù Ê Kò͘-sū 08
Kim-kù Ê Kò͘-sū
1959 8 Ge̍h
8 Ge̍h 2 Jı̍t
Kim-kù: Só͘-í goá ka-kı̄ iàm-ò͘ⁿ, tı̄ tı̂n-ai kap hé-hu ê tiong-kan hoán-hoé. (Ioh-pek-kı̀ 42: 6)
Taⁿ sió pêng-iú ū chı̍t ê A-peh-à kiò chò A-hiàn i sı̄ khiā-khí tı̄ soaⁿ-lāi, khí-thâu i sı̄ teh chhò-chhâ, hit-lia̍p soaⁿ ê chú-lâng sı̄ chèng-hú, só͘-í i ū khı̀ chhoē chèng-hú kā i kóng hit lia̍p soaⁿ lâi soè--goá; tùi chèng-hú cho͘ chin sio̍k, tı̄ hia keng-êng tùi soaⁿ thàn chin choē chı̂ⁿ, āu-lâi chiū chhoā bó͘ iā siⁿ-kiáⁿ. A-hiàn i tùi sè-hàn tō ū tha̍k Chú-jı̍t-o̍h, m̄-kú jı̍p-khı̀ tı̄ soaⁿ-lāi lóng bô lé-pài-tn̂g, chóng-sı̄ i tı̄ chhiū-nâ-lāi chhoā i kiáⁿ-jı̂ ho̍k-sāi Siōng-tè, iā ín-chhoā hiah ê tı̄ hia hō͘ i chhiàⁿ ê lâng lâi lé-pài, ū ê lâi ū ê tian-tò thí-chhiò i, kā i kóng, “Chit-chūn lín ê Siōng-tè hō͘ lí khui-tio̍h soaⁿ thàn toā-chı̂ⁿ, lí chiah teh pài Siōng-tè, nā siat-sú Siōng-tè hō͘ lí ê ke-hoé sit-pāi bô chı̂ⁿ, goá khoàⁿ lí lóng boē kı̀-tit ū Siōng-tè.”
A-hiàn hiaⁿ kā i kóng, Goá chhut-sı̀ ê sı̂ Siōng-tè iā-sı̄ hō͘ goá khiā tı̄ chin sàn-hiong ê ka-têng, ta̍k-jı̍t toè lāu-pē sı̀-koè khı̀ khioh-chhâ, siông-siông bô chı̂ⁿ thang ēng, ū sı̂ phoà-pı̄ⁿ iā bô io̍h-á thang chia̍h, chí-ū goá ê pa-pa thoè goá kı̂-tó lim chúi chò io̍h-á; goá hiah-nı̍h teh kan-khó͘ goá to teh kèng-pài Siōng-tè, nā siat-sú chit-chūn Siōng-tè hō͘ goá khah sàn-hiong tú-tio̍h loā-nı̍h toā ê chai-ē, goá iā-sı̄ beh kèng-pài Siōng-tè. A-hiàn hiaⁿ ê sū-gia̍p jú-chò jú-toā, kiáⁿ-sun iā chin heng-ōng.
Keng-koè 3 nı̂ āu, i ê toā-kiáⁿ kap hiah ê sun-á ū chı̍t-jı̍t, tı̄ soaⁿ-nı̍h ê chhù-á teh hioh tiong-tàu, m̄-chai sím-mı̍h goân-in hut-jiân hoé sio soaⁿ, A-hiàn ê kiáⁿ miâ kiò Se-hiông, chiū kín khí-lâi beh phah-hoé, 3 ê gín-ná, 2 ê ta-po͘, 1 ê cha-bó͘ gín-ná kap i tı̄ chhù-á ê lāi-bı̄n teh khùn, hoé teh sio chin kín kui ê liâu-á lóng pau khí-lâi, gín-ná cheng-sı̂n beh cháu í-keng cháu boē chhut-lâi, toā-siaⁿ hoah-hiàm, Se-hiông thiaⁿ tio̍h i ê 3 ê kiáⁿ koáⁿ-kín lâi, cháu jı̍p-khı̀ beh chhoā i ê gín-ná, chiū chông jı̍p hoé-tiong phō chı̍t ê gín-ná chhut-lâi, chı̍t-ē khoàⁿ sı̄ í-keng sio sí-khı̀, lāu-pē kui seng-khu hō͘ hoé sio kàu chin thiám, A-hiàn hiaⁿ khoàⁿ-tio̍h hoé teh sio-soaⁿ, iā-sı̄ kín piàⁿ khí-khı̀, hoé chin iām iû-goân sı̄ hō͘ hoé sio kah kui seng-khu.
Chı̍t-ē kàu-ūi khoàⁿ-tio̍h kiáⁿ teh beh sí, 3 ê sun-á lóng hō͘ hoé sio sí, A-hiàn hiaⁿ khoàⁿ chı̍t-ē chin kan-khó͘, koh kui seng-khu hō͘ hoé sio kàu chı̍t-phā, chin thàng-thiàⁿ thòng-khó͘ kūi tı̄ hoé sio-lō͘ ê tiong-kan kı̂-tó Siōng-tè kóng, Siōng-tè ah, goá khoàⁿ goá ê sin-thé sı̄ ke̍k bô lō͘-ēng, lâ-sâm, goá chhim-chhim thòng-hoé jı̄n-choē, kiû Siōng-tè sià-bián i ê choē, kı̂-tó liáu kā chiu-ûi ê lâng kóng, Siōng-tè hō͘ goá hó-gia̍h, hō͘ goá kiáⁿ-sun, goá tio̍h kám-siā, chóng-sı̄ Siōng-tè kā goá thó tńg-khı̀, goá iā chin kám-siā. Chiàu kū jia̍t-sim ho̍k-sāi Siōng-tè, hiah ê pêng-iú khoàⁿ-kı̀ⁿ i chiàu-kū kèng-pài Siōng-tè, tùi án-ni chin toā siū kám-tōng, chiū kap i saⁿ-kap lâi pài Siōng-tè.
Siōng-tè khoàⁿ-kı̀ⁿ A-hiàn án-ni, chiū chiàu í-chêng koh hō͘ i ê châi-sán ho̍k-goân, soè-hàn kiáⁿ iā-sı̄ chin choē sun.
Taⁿ sió pêng-iú lâng nā tú-tio̍h cháiⁿ-iūⁿ, tio̍h hoán-hoé iā tio̍h jı̄n-choē Siōng-tè beh thiàⁿ hit-khoán ê lâng.
(Koh lâi liām kin-á-jı̍t ê kim-kù) (Âng Siok-kheng)
8 Ge̍h 9 Jı̍t
Kim-kù: Lí m̄-thang him-soān pháiⁿ-lâng, to̍k-to̍k tio̍h thong-jı̍t kèng-ùi Iâ-hô-hoa. (Chim-giân 23:17)
Bo̍k-tek: Só͘-lô-bûn ông nı̂-lāu ê sı̂, tùi i koè-khı̀ só͘ keng-giām, chai sè-kan ê khang-hi, jı̄n-bat chí-ū kèng-ùi Siōng-tè, chun-thàn I ê bēng-lēng chiah ū hok-khı̀.
Lán tio̍h kà-sı̄ ha̍k-seng hō͘ in bêng-pe̍k, tio̍h tı̄ Iâ-so͘ Ki-tok tui-kiû chiah ê chin-lí, chin ê hok-khı̀.
Sió pêng-iú, lín bat khoàⁿ lâng teh hip-siōng bô? Chin sim-sek hò͘ⁿ? Chhiak! Chı̍t-tiuⁿ lah...... sè-kài chē-chē chiàu-siòng-ki ê tiong-kan, Kho-lat-khuh ê chiàu-siòng-ki chin chhut-miâ. Chá-khí beh kóng hit ê thâu-ke ê kò͘-sū. I tı̄ sè-kài ê múi chı̍t só͘-chāi lóng ū i ê hun-tiàm. Se poàⁿ-kiû ê tiàm khui-mn̂g chò seng-lí, Tang poàⁿ-kiû ê tiàm koaiⁿ-mn̂g teh khùn; Tang poàⁿ-kiû khui-mn̂g chò seng-lí, Se poàⁿ-kiû koaiⁿ-mn̂g teh khùn, thang kóng mê-jı̍t lóng teh chò seng-lí.
Bí-kok múi chı̍t-keng toā ê gûn-hâng lóng ū i ê chûn-khoáⁿ, i thang sûi-ı̀ khui chi-phiò niá-chı̂ⁿ. I ê thàn-chı̂ⁿ m̄-sı̄ ēng 1 nı̂ á-sı̄ 1 goe̍h-jı̍t sı̄ ēng múi bió lâi kè-sǹg. I thang chiàu ka-kı̄ só͘ ài, hióng-siū it-chhè ê hok-lo̍k. I ta̍k-hāng lóng chiâu-pı̄, khó-sioh khiàm chı̍t-hāng, chiū-sı̄ bô Siōng-tè; bô Siōng-tè chiū bô pêng-an. Pa̍t-lâng khoàⁿ i sı̄ hok-khı̀, khoài-lo̍k ê lâng, chóng-sı̄ i pún-sin sı̄ cha̍p-hun ê thòng-khó͘. Lāi-sim ê thòng-khó͘, pí jio̍k-thé ê thòng-khó͘ khah siong-tiōng. I m̄-chai tio̍h cháiⁿ-iūⁿ chò chiah oē hó. Sè-kan lâng só͘ ēng ê hong-hoat, i lóng í-keng chò liáu, ū chı̂ⁿ ū sè, sím-mı̍h chò boē kàu?
Chóng-sı̄ Siōng-tè ê pêng-an m̄-sı̄ ēng chı̂ⁿ ū tàng bé ê! Só͘-í koh-khah kan-khó͘, choè-āu i siūⁿ beh se̍h sè-kài, iû sè-kài khoàⁿ tı̄ sè-kài ê sím-mı̍h só͘-chāi thang hō͘ i tit-tio̍h chin ê pêng-an, kái-koat i ê khó͘-thàng? I chhoē pêng-an, chóng-sı̄ bô-ài Siōng-tè, kiat-kó sè-kài í-keng iû liáu lah, khó͘-būn koh-khah chhim-tāng, kàu-boé tùi choa̍t-bāng lâi hoê-sim, tùi hoê-sim lâi siūⁿ kiâⁿ té-pō͘, choè-āu beh tńg-khı̀ Bí-kok ê lō͘-tiong thiàu-hái chū-sat!
Sió pêng-iú, chit ê hó-gia̍h lâng hiah-nı̍h hó-gia̍h, kàu-boé tit-tio̍h sím-mı̍h? Siáⁿ-sū oē án-ni? (Bô Siōng-tè) Sı̄ chin gâu. Nā bô Siōng-tè, boē-hiáu kèng-ùi Siōng-tè ê lâng sı̄ chin khó-lı̂n.
Kó͘-chá Só͘-lô-bûn ông, i chò ông, ū chı̂ⁿ ū sè, koh ū ha̍k-būn, chóng-sı̄ i iā bat keng-giām tio̍h chhin-chhiūⁿ Kho-lat-khuh ê thâu-ke ê kan-khó͘, chóng-sı̄ kai-chài i choè-āu ū chhoē tio̍h Siōng-tè, oē-hiáu kèng-ùi Siōng-tè chiah bô kiâⁿ chū-sat ê lō͘. Āu-lâi i ū siá i ê keng-giām lâi kà-sı̄ lán. Kin-á-jı̍t ê kim-kù iā-sı̄ i só͘ siá--ê. Lán koh saⁿ-kap lâi liām: “Lí m̄-thang him-soān pháiⁿ-lâng, to̍k-to̍k tio̍h thong-jı̍t kèng-ùi Iâ-hô-hoa.” (Chim-giân 23:17)
Lán ê Chú Iâ-so͘ kóng: “Lâng nā tit-tio̍h choân sè-kài, lâi sòng-sit i ê sı̀ⁿ-miā ū sím-mı̍h lı̄-ek?” (Má-thài 16:26). Sió pêng-iú, lín ài choân sè-kài á-sı̄ sı̀ⁿ-miā? (sı̀ⁿ-miā), chin gâu, lán nā beh tit sı̀ⁿ-miā tio̍h siông-siông kèng-pài Siōng-tè, thiaⁿ Chú ê kà-sı̄, kiâⁿ Chú só͘ kà-sı̄ lán ê lō͘, án-ni chiū oē-thang tit éng-oán ê sı̀ⁿ-miā. (T. H. C.)
8 Ge̍h 16 Jı̍t
Kim-kù: Goán bô tı̀-kàu bia̍t-bô, sı̄ tùi Iâ-hô-hoa chiah ê chû-ài. (Ai-ko 3:22)
Tı̄ chia kóng 3 ê soan-kàu-su ê kò͘-sū, in ūi-tio̍h Siōng-tè kang-chok tit-tio̍h I ê thiàⁿ-thàng m̄-nā ka-kı̄ bô sit-lo̍h sı̀ⁿ-miā, hoán-tńg tùi i lâi kiù loā chē ê lêng-hûn bô bia̍t-bô.
1. Tı̄ chı̍t-pah goā nı̂-chêng tùi So͘-kek-lân ū chı̍t-ūi soan-kàu-su, chı̀-goān kàu Lâm-iûⁿ ê tó-sū ū chē-chē chia̍h lâng-bah ê thó͘-lâng ê só͘-chāi thoân hok-im, ū chı̍t-pái chiah ê thó͘-lâng beh thâi i chiū pàng-hoé sio i ê chhù, chit ê soan-kàu-su tı̄ chhù-lāi chí-ū kūi teh kı̂-tó, hut-jiân-kan hong chin thàu, hoé soà poe tùi thó͘-lâng ê chhù, soan-kàu-su ê chhù bô sio khı̀ sı̀ⁿ-miā tit-tio̍h kiù, koh ū chı̍t-pái hō͘ thó͘-lâng tui kàu cháu bô lō͘, kàu chı̍t ê kiā-téng koh khı̀ chiū bô lō͘ ê sı̂, i chiū thiàu lo̍h-khı̀ kúi-nā tn̄g chhim ê só͘-chāi, in-ūi ū giâ chı̍t-ki hō͘-soàⁿ thí-khui i lóng bô tio̍h-siong.
2. Tı̄ chı̍t-pah goā nı̂-chêng, Eng-kok chı̍t-ūi i-seng chı̀-goān beh khı̀ A-hui-lı̄-ka thoân tō-lí, i tı̄ Eng-kok ê sı̂ kha hō͘ chhia kauh-tn̄g-khı̀, āu-lâi ēng chin ióng ê chhiū-leng choè chı̍t-ki ké ê kha tàu tı̄ kha-thúi, i kàu A-hui-lı̄-ka, hō͘ chia̍h lâng-bah ê thó͘-lâng lia̍h-khı̀, beh oa̍h-thâi lâi chia̍h i ê bah, i chiū kóng, Goá sı̄ Siōng-tè ê lâng, goá ê bah lín nā káⁿ chia̍h, to the̍h lâi goá koah chı̍t-tè hō͘ lín chia̍h, soan-kàu-su tit-tio̍h to chiū koah hit ê chhiū-leng ké-kha ê chhiū-leng chı̍t-tè hō͘ thó͘-lâng-thâu, thó͘-lâng kā hit-tè bah ê sı̂ chhùi-khí hiám tn̄g-khı̀, chiū kóng, Lín Siōng-tè ê lâng-bah chin thang kiaⁿ. Āu-lâi soan-kàu-su tı̄ hia thoân-tō chiâⁿ-choè A-hui-lı̄-ka ê kng-chheⁿ.
3. Tı̄ 80 goā nı̂-chêng Eng-kok chı̍t-ūi soan-kàu-su lâi Tâi-oân thoân tō-lí, ū chı̍t-pái kàu Koan-á-niá hū-kı̄n Pe̍h-chúi-khe ê hiuⁿ-siā thoân tō-lí tú-tio̍h thó͘-húi, ū chı̍t-mı̂ thó͘-húi beh thâi--i, chiū pàng-hoé sio soan-kàu-su só͘ toà hit keng chhù, sı̀-ûi lóng chin iām ê hoé sı̍t-chāi choa̍t-bāng, chóng-sı̄ soan-kàu-su kūi teh kı̂-tó, Siōng-tè chiū khui tı̀-hūi hō͘ i, i chiū chiong mı̂-chioh-phoē kńg-kńg leh, tùi toā-mn̂g khui chiū hiat chhut-khı̀, thó͘-húi lia̍h-chún soan-kàu-su cháu chhut-lâi, chiū tı̍t-tı̍t kā i kòng, tng hiah ê thó͘-húi chū-chı̍p teh kòng mı̂-chioh-phoē ê sı̂, soan-kàu-su tùi āu-boé-mn̂g cháu chhut-khı̀ lo̍h soaⁿ kàu Ka-gı̄ án-ni kiù tio̍h miā.
Sèng-keng kóng, Siōng-tè nā ūi lán chı̄-chūi beh tí-te̍k lán, lán nā sı̄ Siōng-tè só͘ thiàⁿ ê, chiū tùi I ê chû-ài tek-khak bô tı̀-kàu bia̍t-bô. (I. L. Chhı̂)
8 Ge̍h 23 Jı̍t
Kim-kù: Kı̀ⁿ-nā hó ê siúⁿ-sù, kap oân-choân ê un-sù, lóng sı̄ tùi téng-bı̄n. (Ngá-kok 1:17)
Kok-ūi sió pêng-iú lín ta̍k-jı̍t só͘ chhēng ū súi ê saⁿ, só͘ chia̍h ê pn̄g kap hó chia̍h-mı̍h, lín ê chı̂ⁿ, lín só͘ tha̍k ê chheh sı̄ chı̄-chūi hō͘ lín ê? Sı̄, sı̄ lín pa-pa ma-ma siúⁿ-sù lín ê. In ta̍k-jı̍t ūi-tio̍h lín lâi bô-êng kap siū chin choē ê kan-khó͘, ēng só͘ tit-tio̍h ê oân-choân pe̍h-pe̍h siúⁿ-sù lín, sı̍t-chāi chin thiàⁿ lín, tı̄ chit sè-kài kiám-chhái sı̄ pa-pa ma-ma choè thiàⁿ lí, chóng-sı̄ tı̄ thiⁿ-téng ū chı̍t-ūi koh-khah thiàⁿ lí ê Siōng-tè.
I ta̍k-jı̍t lóng teh chiàu-kò͘ lí, sui-jiân lí bô khoàⁿ-tio̍h I chóng-sı̄ I lóng tiàm tı̄ lí ê sin-piⁿ teh pó-hō͘ lí, lí nā ū sím-mı̍h khiàm-khoeh I lóng ē siúⁿ-sù lín, ū-sı̂ lí khiàm ê mı̍h lí ê pa-pa ma-ma m̄-chai, tio̍h lí tùi in thó chiah oē hō͘ lí, chóng-sı̄ Siōng-tè chiū m̄-sı̄ án-ni, I oē khoàⁿ-chhut lí ê sim, chai-iáⁿ lí só͘ khiàm-khoeh ê, I tāi-seng kā lí pı̄-pān piān-piān. I só͘ siúⁿ-sù ê pí lí ê pa-pa ma-ma ke chin choē, I iā oē siúⁿ-sù tı̀-hūi, che sı̄ lâng choè boē kàu ê, só͘-í tú-tio̍h só͘ liām ê hit ê kim-kù kóng: “Kı̀ⁿ-nā hó ê siúⁿ-sù kap oân-choân ê un-sù, lóng sı̄ tùi téng-bı̄n lâi ê.”
Tı̄ sı̀-chheng goā nı̂-chêng Tiong-kok ū chı̍t ê hông-tè miâ kiò Sùn. I m̄-nā sı̄ chı̍t ê chin hó ê hông-tè, iā-sı̄ chı̍t ê chin iú-hàu ê lâng, só͘-í lâng-lâng lóng o-ló i, chun-kèng i.
I sı̄ chhut-sı̀ tı̄ chı̍t ê sàn-hiong ê choh-sit ê ka-têng, I ê lāu-pē miā kiò Kó͘-só͘, sı̄ chı̍t ê m̄-bat sè-sū, chin bô bêng-pe̍k ê lâng, lâng nā kóng án-choáⁿ-iūⁿ, i tio̍h chiàu án-ni sı̀n, chiàu án-ni chò, Sùn ê siⁿ-bó tı̄ i sè-hàn ê sı̂ chiū sí, i ê āu-bó sı̄ chı̍t ê gōng koh pháiⁿ ê hū-jı̂n-lâng, āu-bó siⁿ chı̍t ê sió-tı̄ miâ kiò-choè Chhiūⁿ, iā-sı̄ chı̍t ê chin pháiⁿ ê gín-ná.
Āu-bú ê sim chin to̍k, thiàⁿ i ka-kı̄ só͘ siⁿ ê, oàn-hūn Sùn, siông-siông pháiⁿ khoán-thāi i, i ê lāu-pē in-ūi thiaⁿ āu-bú ê oē, iā chin thiàⁿ i ê sió-tı̄, oàn-hūn i, liân i ê sió-tı̄ in-ūi siūⁿ pa-pa ma-ma lóng khah thiàⁿ i, só͘-í siông-siông tı̄ pē-bú ê bı̄n-chêng lâi kóng hiaⁿ-ko ê m̄-hó, lâi mē i, khi-hū i, āu-bú iā siông-siông tı̄ i ê lāu-pē ê bı̄n-chêng kóng i ê pháiⁿ-oē, chóng-sı̄ bô-lūn lâng tùi i cháiⁿ-iūⁿ pháiⁿ, i lóng bô kè-kàu, iā bô siū-khı̀, iā-sı̄ chin hàu-kèng i ê pē-bú, iā chin thiàⁿ i ê sió-tı̄.
In jú pháiⁿ khoán-thāi i, i jú hàu-kèng, ū chı̍t-pái siū koáⁿ chhut-khı̀, lı̄-khui ka-têng kàu ta̍k só͘-chāi khı̀ phiau-liû, chò ta̍k-khoán ê khó͘-kang, chóng-sı̄ i iā lóng bô chı̍t-kù ê oàn-giân, hoán-tńg koh-khah thiàⁿ i ê pē-bú kap sió-tı̄.
Sió pêng-iú, lí oē o̍h i boē? Nā ū pa̍t-lâng tùi lí pháiⁿ lí beh kap i pháiⁿ á-sı̄ beh chhiūⁿ Sùn koh-khah thiàⁿ i? Sùn sui-jiân án-ni tùi-thāi in chóng-sı̄ chân-jím ê pē-bú kap khiau-ngō͘ ê sió-tı̄ iā bô siū kám-tōng, hoán-tńg jú pháiⁿ khoán-thāi i, ū-sı̂ siūⁿ ài beh kā i hāi-sí. Ū chı̍t-pái kiò i khı̀ siu-lí chhù-téng, tng i chiūⁿ chhù-téng ê sı̂, i ê sió-tı̄ chiong thui giâ cháu jiân-āu tùi ē-bı̄n pàng-hoé sio-chhù, ài beh kā i sio sí, kai-chài i ū chún-pı̄ nn̄g-téng “koe-le̍h”, tng hoé sio kàu chhù-téng ê sı̂, i chiū kiap hit nn̄g-téng koe-le̍h thiàu lo̍h-lâi, bián-tit tı̀-kàu sí.
Āu-lâi koh ū chı̍t-pái i ê pa-pa kiò i lo̍h-khı̀ chı̍t ê kó͘-chíⁿ beh ó͘ khah chhim leh, tng i lo̍h-khı̀ ê sı̂, i ê sió-tı̄ tùi bı̄n-téng ēng chio̍h-thâu kap thô͘ chiong chit ê chíⁿ thūn khí-lâi, beh chiong i oa̍h-oa̍h tâi sí, chit pái i ê sió-tı̄ sim-lāi chin-chiàⁿ hoaⁿ-hí, lia̍h-choè i it-tēng cháu boē chhut-lâi sí tı̄ chíⁿ lāi lah, chiū chin hoaⁿ-hí khı̀ tùi i ê pē-bú kóng, “Hiaⁿ-ko ê gû-iûⁿ, chı̂ⁿ kap i ê châi-sán kap it-chhè só͘ ū ê lóng sio̍k tı̄ goá ê lah.”
Kóng liáu-āu chiū cháu-khı̀ i hiaⁿ-ko ê chhù beh khı̀ chiap-siu i só͘ ū ê, i chı̍t-bı̄n chhiùⁿ-koa chı̍t-bı̄n thiàu-bú chin tek-ı̀ beh khı̀, chóng-sı̄ tı̄ i tú-tú ta̍h jı̍p mn̂g ê sı̂ tio̍h chı̍t-kiaⁿ, i khoàⁿ-kı̀ⁿ i ê hiaⁿ-ko iā chin khoài-lo̍k chē teh toâⁿ-khı̂m, i siūⁿ m̄-chai sı̄ khoàⁿ tio̍h kúi sı̄ bô, chiū koh joê ba̍k-chiu kap ka-kı̄ siàn chhùi-phoé koh khoàⁿ khah siông-sè chit sı̂ i ê hiaⁿ-ko chiah ēng un-jiû ê siaⁿ kiò i, só͘-í Chhiūⁿ kám-kak chin-chiàⁿ kiaⁿ-hiâⁿ put-an, in-ūi kiaⁿ-liáu i ê hiaⁿ-ko tı̄ chit sı̂ lâi pò-siû thâi-sí i.
Sió pêng-iú lín siūⁿ Sùn thái oē-thang koh tńg-lâi tı̄ i ê chhù-lāi, i kiám m̄-sı̄ hō͘ lâng tâi tı̄ chíⁿ lāi? Goân-lâi i tāi-seng chiū chai-iáⁿ lâng beh hāi i, chêng pái i chún-pı̄ nn̄g-téng koe-le̍h, chit pái i tāi-seng tùi chíⁿ-toé ó͘ chı̍t tiâu lō͘ thàu kàu i ê pâng-keng, tng i ê sió-tı̄ jı̍p-lâi ê sı̂ i iā ké chò m̄-chai in sı̄ tiau-kang beh hāi i ê, só͘-í tiau-kang kap i kóng tùi pa̍t hong-bı̄n ê oē, kóng kàu chin hoaⁿ-hí.
Tùi i chit-khoán ê hàu-sūn kap ū khoan-iông bô kı̀-tit lâng ê pháiⁿ ê sim, kàu āu-lâi iā kám-tōng liáu i ê pē-bú kap sió-tı̄, iā kám-tōng liáu chhù-piⁿ kap choân-chng ê lâng, ta̍k-ê lóng ài beh o̍h i choè hó-lâng, i chit-khoán ê hàu-tō, chiām-chiām hō͘ lâng soan-iông chhut-khı̀, thàu kàu hông-tè ê hı̄-khang, āu-lâi chiū chiong i ê cha-bó͘-kiáⁿ hō͘ i choè bó͘, choè-āu tı̄ hông-tè nı̂-lāu ê sı̂, chiū chiong hông-tè ê ūi hō͘ i, chiâⁿ-choè Tiong-kok le̍k-sú siōng úi-tāi ê jı̂n-bu̍t, kap choè tē-it chhut-miâ ê hông-tè.
Tùi chit ê kò͘-sū lán khoàⁿ Sùn sı̄ chı̍t ê chin khó-lı̂n ê lâng, i só͘ siū ê kan-khó͘ chin choē chóng-sı̄ che it-chhè lóng sı̄ Siōng-tè ê ı̀-sù kap an-pâi, in-ūi i ū kèng-ùi thiⁿ-téng ê Siōng-tè, (chù: khah chá lán Tiong-kok lâng sı̄ kèng thiⁿ kèng Siōng-tè). Chiàu thiⁿ ê tō-lí lâi kiâⁿ, só͘-í Siōng-tè chiām-chiām thoè i khui-lō͘ hō͘ it-chhè ê khó͘-lān chiâⁿ-choè i ê lı̄-ek. Pē-bú pháiⁿ khoán-thāi i, sió-tı̄ beh hām-hāi i chiah ê hoán-tńg pang-chān i jím-nāi, khoan-iông, hàu-kèng, thiàⁿ-sim tùi án-ni chit ê sòng-hiong ê chheng-liân oē thang chiâⁿ-choè Tiong-kok le̍k-sú siōng choè úi-tāi ê tè-ông, hō͘ Tiong-kok lâng lóng chheng-ho͘ i choè sèng-kun, che lóng sı̄ tùi téng-bı̄n Siōng-tè chı̀-hó ê siúⁿ-sù.
Sió pêng-iú lín nā sı̀n-khò Chú koh kiâⁿ hó tı̄ chit sè-kan chiū Siōng-tè beh siúⁿ-sù koh-khah hó ê un-sù hō͘ lín, chhiáⁿ koh lâi liām kim-kù “Kı̀ⁿ-nā hó ê siúⁿ-sù, kap oân-choân ê un-sù, lóng sı̄ tùi téng-bı̄n.” (Ngá-kok 1:17)
8 Ge̍h 30 Jı̍t
Kim-kù: Toē-thó͘ ah, bo̍h-tit kiaⁿ, tio̍h hoaⁿ-hí khoài-lo̍k, in-ūi Iâ-hô-hoa kiâⁿ toā-sū. (Iok-jíⁿ 2:21)
A-bo̍k-á, ū kúi-nā ê hiaⁿ-tı̄, i sı̄ toā-kiáⁿ lāu-pē te̍k-pia̍t thiàⁿ i, iā kà i tio̍h kā sió-tı̄ sió-moē sé-bı̄n, sé seng-khu chhēng-saⁿ, ū-sı̂ iā tio̍h ài chhı̄ siāng sè-hàn ê sió-tı̄, i koh lo̍h-khı̀ ê sió-tı̄ tú-á beh jı̍p kok-bı̂n ha̍k-hāu, iā kau-tài i tio̍h chhoā sió-tı̄ chhut-jı̍p. Chóng-sı̄ A-bo̍k-á siông-siông put-pêng, bô hoaⁿ-hí lāu-pē só͘ kau-tài i chò ê sū, ū-sı̂ tih toā tih sè. Lāu-pē chin khó͘-sim, chı̍t-pái koè chı̍t-pái khó͘-khǹg i, chóng-sı̄ i ná m̄-goān, bô siūⁿ i sı̄ khah toā-hàn, khah ē-hiáu tit, eng-kai tio̍h thiaⁿ lāu-pē só͘ kau-tài ê, tàu khoàⁿ-kò͘ sió-tı̄ sió-moē, chí-ū goān siūⁿ kóng, Pêⁿ-pêⁿ sı̄ hiaⁿ-tı̄-á, goá cháiⁿ-iūⁿ, lēng-goā tio̍h kò͘ sió-tı̄ sió-moē ah?
Ná toā-hàn ná káu-koài. In-ūi án-ni in lāu-pē chiū siūⁿ pān-hoat, ké-ı̀ pı̀ⁿ-bı̄n m̄-tı̍h i, kiò lâng kā i chhoā khı̀ hn̄g-hn̄g ê chhin-chiâⁿ hia, hō͘ i tı̄ hia tha̍k-chheh, kàu i khah ē-hiáu siūⁿ ê sı̂, chiah chhe-lâng kā i kóng, Taⁿ lí bêng-pe̍k lí tio̍h cháiⁿ-iūⁿ khoán-thāi lí ê hiaⁿ-tı̄ lah, lí ê lāu-pē hoaⁿ-hí beh hō͘ lí koh tò-lâi lah, m̄-bián kiaⁿ, in-ūi lí ê lāu-pē thè lí pı̄-pān ta̍k-hāng lóng hó-sè, beh thang hō͘ lí tńg-lâi. (chhiáⁿ liām kim-kù)
“Toē-thó͘ ah”, sı̄ chí Siōng-tè ê peh-sı̀ⁿ khiā-khí ê tē, Í-sek-lia̍t peh-sı̀ⁿ sı̄ Siōng-tè te̍k-pia̍t thiàⁿ--ê, ū te̍k-pia̍t kéng-tiàu in, án-ni chiong Siōng-tè ê kiù in thoân hō͘ i ê hiaⁿ-tı̄, chiū-sı̄ ı̄ⁿ-pang-lâng, chóng-sı̄ in khoàⁿ khin ı̄ⁿ-pang, bô beh chun-thàn Siōng-tè ê chí-ı̀, só͘-í Siōng-tè chiū chiong in kau-tài Pa-pí-lûn, hō͘ lâng lia̍h khı̀ Pa-pí-lûn, kàu in bêng-pe̍k chhò-gō͘ ê sı̂, Siōng-tè chiah heng-khí sian-ti tùi in pò hó siau-sit, beh heng-khí I ê lô͘-po̍k chiàu kong-gı̄ hó khoán-thāi in. (Í-sài-a 42:1-4) Koh beh kā in pı̄-pān thó͘-tē, lâng hoān-choē, toē-thó͘ siū chiù-chó͘ (Chhòng-sè-kí 3:17) Ta̍k-hāng mı̍h ia̍h lóng thó͘-khùi khó͘-thàng. (Lô-má 8:19-20)
Taⁿ Siōng-tè kiâⁿ toā-sū, chiū-sı̄ bô kui-kı̀m lâng ê choē, sı̄ sià-bián chiông-chêng lóng-chóng ê choē, beh koh chhoā I só͘ thiàⁿ ê peh-sı̀ⁿ tò-tńg lâi só͘ èng-ún ê thó͘-tē, choē í-keng sià, só͘-í thó͘-tē iā beh hióng-siū in-hūi, peh-sı̀ⁿ beh tit-tio̍h sim-moá ı̀-chiok. (koh lâi liām kim-kù) (T. K. J.)