Kim-kù Ê Kò͘-sū 09
Kim-kù Ê Kò͘-sū
1959 9 Ge̍h
9 Ge̍h 6 Jı̍t
Kim-kù: Iâ-hô-hoa hó khoán-thāi bān-lūi, I ê lı̂n-bín tı̀-ı̀m I it-chhè só͘ chò ê. (Si-phian 145: 9)
Ū chı̍t jı̍t thiⁿ chin o͘, hong tı̍t-tı̍t teh thàu, Gı̄-sı̀n tùi ha̍k-hāu chhut-lâi, seng-khu phāiⁿ chheh-pau, chhiú nı̍h the̍h piān-tong, khí-thâu chin toā-pō͘ teh kiâⁿ, khoàⁿ-tio̍h hong chin toā tı̍t-tı̍t lâi, koh lûi iā teh tân, chin hoân-ló, sim-lāi teh siūⁿ ún-tàng sı̄ beh lo̍h sai-pak hō͘, nā beh tńg-khı̀ kàu i ê chhù tio̍h ài koh cháu chı̍t-tiám cheng-kú, koh tio̍h ài keng-koè tek-phō chin choē, lûi jú-tân jú toā-siaⁿ, sih-nà iā teh lâi. Gı̄-sı̀n kiaⁿ kàu beh háu chhut-lâi, in-ūi i bat thiaⁿ-kı̀ⁿ lâng teh kóng lûi oē kòng-sí lâng, taⁿ beh cháiⁿ-iūⁿ, oa̍t-thâu khoàⁿ āu-bı̄n, lóng bô khoàⁿ-kı̀ⁿ in ê tông-ha̍k-seng teh lâi, í-keng kàu tek-phō piⁿ chiū chhiáⁿ tı̄ hia thêng chhoán.
Hut-jiân lûi kòng chı̍t-ē chin toā ē, Gı̄-sı̀n tio̍h-kiaⁿ khı̀ phak tı̄ tē nı̍h chiū chhut-siaⁿ kiò ma-ma, tùi i ê chheh-pau lám tiâu-lè, tı̄ i só͘ lám ê chheh tē-á lāi i ê chhiú ū bong-tio̍h choá só͘ áu ê mı̍h, hit-sı̂ tı̄ i ê sim-lāi chin kan-khó͘, ah......ah, chit ê sı̄ 20 kho͘, goá kā sian-siⁿ moâ-phiàn kóng goá teh kan-khó͘, chiū-sı̄ kiaⁿ-liáu goá chit 20 kho͘ khı̀ hō͘ sian-siⁿ chhiau tio̍h, chiah ê chı̂ⁿ sı̄ tông-ha̍k ê chheh-chı̂ⁿ goá kā the̍h-lâi, ún-tàng i tı̄ hia teh chhoē bô; m̄-chai ū teh háu á-bô? Tı̄ án-ni teh siūⁿ ê tiong-kan, lûi koh tı̍t-tı̍t tân, chit ê sı̂-chūn Gı̄-sı̀n taⁿ bô kiò ma-ma, sı̄ hoán-tńg kiò Siōng-tè kóng, Goá m̄-káⁿ koh tham-sim, kiû Siōng-tè sià-bián i, i beh chiong chiah ê chı̂ⁿ the̍h tńg-khı̀ hêng i ê pêng-iú.
Sió pêng-iú Siōng-tè moá ū lı̂n-bín thiàⁿ-sioh I só͘ chhòng-chō ê lâng; chiū hō͘ lûi tiām-khı̀, hong iā bô hiah nı̍h teh thàu, Gı̄-sı̀n chiū khí-lâi ba̍k-sái chò chúi bı̄n chhit-chhit lè, chiū oa̍t-tò-tńg khı̀ ha̍k-hāu, kàu ha̍k-hāu mn̂g, tı̄ chiàⁿ-chhiú-pêng ê chháu-po͘, khoàⁿ-kı̀ⁿ i ê pêng-iú chiong chheh-pau lāi ê mı̍h kap chheh lóng tò tı̄ chháu-po͘ tı̍t-tı̍t teh péng teh chhoē, i chiū kiâⁿ oá-khı̀ kā i kiò, Tō-jı̂n lí teh chhoē sím-mı̍h, i ı̀n i kóng, Goán ma-ma tùi chhù-piⁿ chioh 20 kho͘ beh hō͘ goá kau chheh-chı̂ⁿ, goá kı̀-tit khǹg tı̄ chit-chàn sè-chàn ê lāi-bı̄n ê tē-á lāi, taⁿ chit-chūn beh the̍h khı̀ kau soà the̍h bô, só͘-í chiong tē-á lāi ê mı̍h lóng tò chhut-lâi teh chhoē.
Gı̄-sı̀n khû lo̍h-khı̀ tùi Tō-jı̂n ê chhiú kā khan-lè, tı̍t-tı̍t háu, Tō-jı̂n mn̄g i lí teh háu sím-mı̍h tāi-chı̀ lí ê iā phah m̄-kı̀ⁿ sı̄ m̄-sı̄?
Gı̄-sı̀n kā Tō-jı̂n kóng, Tō-jı̂n chhiáⁿ lí sià-bián goá hó m̄-hó, chiū chiong 20 kho͘ khǹg tı̄ Tō-jı̂n ê chhiú, Tō-jı̂n chin hoaⁿ-hí, m̄-sı̄ hoaⁿ-hí 20 kho͘ chhoē-tio̍h, sı̄ hoaⁿ-hí Gı̄-sı̀n ê hoán-hoé, in-ūi Gı̄-sı̀n sı̄ chı̍t ê chin gâu thau-the̍h ê, koh m̄ tha̍k-chheh, in ma-ma siông-siông kā i kòng, iā m̄ hoán-hoé, kin-á-jı̍t cháiⁿ-iūⁿ beh hoán-hoé, chiū mn̄g Gı̄-sı̀n kóng chı̂ⁿ lí kā goá the̍h khı̀, á-sı̄ khioh-tio̍h; Gı̄-sı̀n kā i kóng sı̄ tı̄ lí ê chheh-pau lāi the̍h khı̀ ê, Tō-jı̂n kā i kóng chin kám-siā Siōng-tè, lí ū hoán-hoé, Siōng-tè sı̄ lı̂n-bín ê Siōng-tè, tı̄ i só͘ chhòng-chō it-chhè ê oa̍h-miā, Siōng-tè lóng thiàⁿ-thàng pó-sioh i, án-ni chin hó, taⁿ goá beh kā lí ê ma-ma kóng, in-ūi lí ū hoán-hoé Siōng-tè ū lı̂n-bín lí, khoàⁿ-kò͘ lí, taⁿ lán tio̍h ta̍k lé-pài lâi-khı̀ tha̍k Chú-jı̍t-o̍h, Siōng-tè chiū beh kè-sio̍k thiàⁿ lí. (Saⁿ-kap lâi liām kim-kù) (Âng Siok-kheng)
9 Ge̍h 13 Jı̍t
Kim-kù: Iâ-hô-hoa ū un-hūi, ū lı̂n-bín, bô khoài-khoài siū-khı̀, toā-toā ū chû-ài. (Si-phian 145: 8)
Sió pêng-iú, lín bat siūⁿ kóng goá só͘ bô ài ê lâng pa̍t lâng iā bô ài i á m̄-bat? Koh lín bat siūⁿ kóng goá só͘ oàn-hūn ê lâng, ǹg-bāng ū pa̍t-lâng oē kā phah, á-sı̄ khoàⁿ Siōng-tè oē kā hêng-hoa̍t, hō͘ i tú-tio̍h kan-khó͘ á m̄-bat? Sui-jiân lán siūⁿ án-ni, iáu-kú jı̍t-thâu iā-sı̄ teh chiò in, hō͘ in ū sio-lō. Tı̄ chin joa̍h ê sı̂ lán siūⁿ kóng oē hō͘ lán liâng-khoài ê sai-pak hō͘ kan-ta lo̍h tı̄ lán chia, mài lo̍h tùi goá só͘ oàn-hūn, thó-iàm ê lâng hia, chóng-sı̄ sai-pak hō͘ mā sı̄ bô hun-pia̍t sím-mı̍h lâng teh lo̍h, chhin-chhiūⁿ án-ni thiⁿ-tē chū-jiân kài bô koan-hē lâng ê kám-chêng, pêⁿ-pêⁿ sù un-hūi hō͘ lâng. siōng-tè tùi bān-lâng iā lóng-sı̄ án-ni pêng-téng ê siúⁿ-sù un-hūi. Chit ê toā ê chin-lí chin oh-tit bêng-pe̍k, chóng-sı̄ Iâ-so͘ ū kā lán kóng-bêng. Kó͘-chá Iok-ná iā boē bêng-pe̍k chit ê sū, āu-lâi Siōng-tè ēng hoat-tō͘ hō͘ i bêng-pe̍k. Lán kin-á-jı̍t beh lâi thiaⁿ chit ê kò͘-sū.
1. Chêng lé-pài koan-hē Iok-ná ê kò͘-sū kóng kàu sím-mı̍h só͘-chāi? (toā-hı̂ thò͘ Iok-ná tı̄ ta-tē) Tio̍h, tāi-ke chin hó kı̀-tı̂. Taⁿ Iok-ná hō͘ toā-hı̂ thò͘ tı̄ lio̍k-tē liáu-āu, Siōng-tè tē-jı̄ pái tùi Iok-ná kóng khí--lâi, khı̀ Nı̂-nı̂-bı̂ hit ê toā-siâⁿ, goá só͘ bēng-lēng lí thoân--ê, lí thoân hō͘ i. Chit pái Iok-ná sûi-sı̂ khı̀ lah.
2. Iok-ná chiàu Siōng-tè ê oē, lâi kàu Nı̂-nı̂-bı̂ siâⁿ, chiū kiâⁿ tang pháu sai, soan-thoân kóng koh sı̀-cha̍p-jı̍t Nı̂-nı̂-bı̂ beh tó-hoāi, che sı̄ Siōng-tè tùi chit ê pāi-hoāi ê siâⁿ ê sı̀n-sek.
Nı̂-nı̂-bı̂ siâⁿ ê peh-sı̀ⁿ khoàⁿ chhut in kong-ngı̄ ê sim kap chân-jím ê só͘ chò, ū toā-toā tek-choē Siōng-tè, chóng-sı̄ in ū chı̍t ê ǹg-bāng, kiám-chhái Siōng-tè hoê-sim tńg-ı̀, bán-hoê I ê toā siū-khı̀, hō͘ lán bô bia̍t bô iā káⁿ. Tùi án-ni téng kàu tı̄ ông-kiong ê ông, ē kàu cheng-siⁿ, choân-pō͘ kı̀m-chia̍h, ông thǹg i ê tiâu-ho̍k, tùi pó-chō lo̍h--lâi, chhēng moâ-saⁿ chē tı̄ hoé-hu téng, piáu-sı̄ in-ūi só͘ hoān ê choē iu-siong. I bēng-lēng kóng lâng, cheng-siⁿ iā lóng m̄-thang chia̍h, m̄-thang lim, ......lóng tio̍h chhēng moâ, toā siaⁿ kiû-kiò Siōng-tè, ta̍k-lâng lı̄-khui i ê pháiⁿ lō͘. Só͘ ū ê lâng lóng khiam-pi, ai-khàu, kı̂-kiû Siōng-tè. Tùi án-ni Siōng-tè chiū bô kàng chai-ē.
3. Iok-ná cháiⁿ-iūⁿ nih? I m̄-sı̄ chhin-chhiūⁿ Siōng-tè chit khoán thiàⁿ lâng. I khoàⁿ in hoé-kái, Siōng-tè sià-bián in lâi bô hoaⁿ-hí, i siūⁿ Nı̂-nı̂-bı̂ nā chiàu i só͘ kóng bia̍t-bông m̄ chin hó, nā án-ni goán Iû-thài kok chiū m̄-bián koh hō͘ in ap-pek. Chóng-sı̄ in hoán-hoé bián bia̍t-bông lah, Iok-ná hui-siông ê m̄-goān, i chō chı̍t-keng liâu-á lâi siám jı̍t ài beh khoàⁿ hit ê siâⁿ cháiⁿ-iūⁿ. Chóng-sı̄ Siōng-tè tı̄ i ê liâu-á piⁿ hō͘ hoat chı̍t-châng pi-moâ chin toā châng, thang chò ı̀m-ńg hō͘ Iok-ná chin sóng-khoài, chóng-sı̄ Iok-ná iā boē lí-kái, só͘-í Siōng-tè chiū hō͘ thâng lâi kā hit châng, hō͘ ta lah khı̀. Iok-ná ūi-tio̍h hit châng chin bô chhái. Tı̄ chia Siōng-tè ê oē lı̂m-kàu i kóng, 4 chiuⁿ 10, 11 chat. Iok-ná boē-thang bô ho̍k-chiông Siōng-tè.
Lán tio̍h chhin-chhiūⁿ Iâ-so͘ kà-sı̄ lán, liân lán ê tùi-te̍k iā tio̍h thiàⁿ in, thè in kı̂-tó. (T. H. C.)
9 Ge̍h 20 Jı̍t
Kim-kù: Tio̍h chiàu chin-sı̍t ê kong-pêng lâi sím-phoàⁿ, tāi-ke ēng chû-ài lı̂n-bín lâi saⁿ khoán-thāi. (Sat-ka-lı̄-a 7: 9)
Lán chá-khí beh lâi kóng chı̍t ê sian-ti miâ Sat-ka-lı̄-a, i ū thoè Siōng-tè kóng oē, chiū-sı̄ èng-ún siū-lān ê Í-sek-lia̍t peh-sı̀ⁿ, in nā hoán-hoé hoê-thâu lâi chhoē-kiû Siōng-tè, Siōng-tè tek-khak beh èng-ún in tit-tio̍h pêng-an, chit sı̂ goá beh ēng chı̍t ê kò͘-sū lâi piáu-hiān chit ê kà-sı̄.
Chá tı̄ bó͘ siâⁿ ū chı̍t ê cha-bó͘ gín-ná kiò choè Bí-lē, Bí-lē pún m̄ sı̄ siâⁿ-lāi ke-chhı̄ ê lâng, i sı̄ soaⁿ lāi phian-phiah ê soaⁿ-lí-lâng, in tau sàn-hiong, chhù-nı̍h ū pē-bó, i bat ū chı̍t ê a-hiaⁿ, chóng-sı̄ tı̄ Bí-lē 5 hoè ê sı̂ hiaⁿ-ko chiū sí-khı̀. Taⁿ pē-bó chí-ū chhun i chı̍t ê kiáⁿ nā-tiāⁿ, pē-bó chin thiàⁿ i. In pa-pa teh chhò-chhâ taⁿ khı̀ ke-nı̍h bē. Tùi án-ni thang tia̍h-bí, bé chhài tò-lâi tō͘-oa̍h. Kàu cha̍p-goā hoè ê sı̂ i iā pang-chān pa-pa tàu khioh-chhâ, chóng-sı̄ i iáu boē ū la̍t thang taⁿ chhâ, kiâⁿ hiah-hn̄g ê soaⁿ-lō͘, só͘-í i lóng m̄-bat kàu siâⁿ-nı̍h khı̀ khoàⁿ-khoàⁿ. Chóng-sı̄ kàu i 15 hoè ê sı̂ pa-pa chiū ūi-tio̍h i bé chē-chē lé-mı̍h, ū súi-saⁿ, súi-ê, súi-súi ê hō͘-soàⁿ tò-lâi hō͘ i. Tùi án-ni i chiū siūⁿ siâⁿ-nı̍h to͘-chhı̄ ún-tàng sı̄ chin lāu-jia̍t, ún-tàng iáu ū koh-khah súi ê mı̍h, i chin ài khı̀ khoàⁿ-khoàⁿ.
Ū chı̍t-jı̍t sı̄ i 18 hoè nı̂-thâu i chiū kap a-pa taⁿ chhâ chhut-khı̀ siâⁿ-nı̍h bē, kàu-ūi chı̍t-ē khoàⁿ, kó-jiân hō͘ i ê sim chin thang kiaⁿ, chin kı̂-ı̄ⁿ, i bô phah-sǹg to͘-chhı̄ ê seng-oa̍h sı̄ kàu hiah chhia-hoâ. I khoàⁿ-kı̀ⁿ toā-chhù koân-lâu, khı̀-chhia, tiān-teng, hı̀-ı̄ⁿ, chiú-lâu bû-kı̂ put-iú, iā khoàⁿ-kı̀ⁿ chē-chē lú-chú chhēng khí liû-hêng ê i-ho̍k kap koân-kia̍h-á-ê. Hit ê táⁿ-pān chiū tín-tāng i ê sim, put-ti put-kak hō͘ i seⁿ-khí him-soān ê sim.
Kàu tò-khı̀ i chiū tùi pē-bó thó, kóng i ài kàu to͘-chhı̄ lâi chhoē thâu-lō͘. I ê pē-bó kā i kóng, lí nı̂-kí iáu chió nā siū bê-he̍k hit ê tūi-lo̍h chiū m̄-sı̄ sió-khoá. Nā-sı̄ i m̄-thiaⁿ, ū chı̍t-jı̍t sēng i khı̀ soaⁿ-nı̍h beh chhò-chhâ ê ki-hoē, kèng-jiân thau-cháu, kàu i só͘ him-bō͘ ê to͘-chhı̄. Nā-sı̄ kàu-ūi, bô chhin-chhek, bô pêng-iú, taⁿ beh khı̀ chhoē chı̄-chūi? Tı̄ ke-lō͘ teh tōng-lâi tōng-khı̀, hut-jiân khı̀ tú-tio̍h chêng bat siông-siông kā i bé chhâ ê thâu-ke-niû, chiū kap i khı̀ in tau chiām-sı̂ lâi pang-bâng chú-chia̍h. Nā-sı̄ sim cho-cho siūⁿ ài tit-tio̍h khah liû-hêng ê chng-thāⁿ, him-bō͘ súi-saⁿ, súi-ê.
Ū chı̍t-jı̍t thâu-ke-niû bô tı̄-teh, hut-jiân soà saⁿ-khí tham-sim, soà kā thâu-ke-niû thau-the̍h chı̂ⁿ. Tùi án-ni cháu-chhut thâu-ke-niû ê chhù, kó-jiân khı̀ bé ê, bé súi-saⁿ, chhēng khí--lâi giám-jiân sı̄ hù-hō͘ ê chhian-kim sió-chiá. Tùi án-ni chiū kiat-kau pháiⁿ pêng-iú, soà tūi-lo̍h kàu tı̄ ian-hoa chiú-koán, thiàu-bú-tiûⁿ, ūi-tio̍h i ê súi kap sûn-chêng, chiū tit-tio̍h chē-chē lâm pêng-iú. Nā-sı̄ choē ê kang-chı̂ⁿ, eng-kai siū ê hêng-hoa̍t kàu lah, chiū-sı̄ chêng hō͘ i thau-the̍h ê thâu-ke-niû khı̀ pò kiaⁿ, kéng-chhat put-sı̂ teh tui-chhoē, kéng-jiân hō͘ lâng chhoē tio̍h lah, koh hoat-kak i sı̄ chı̍t ê bô siū hú-khó ê sı̄-èng-seng, kı̂-sı̍t i í-keng poâⁿ-koè sı̄-èng-seng ê seng-oa̍h, í-keng sı̄ chı̍t ê àm-chı̄ⁿ ê chhiong-ki.
Bián loā-kú i chiū siū koaiⁿ tı̄ kaⁿ-ga̍k. Tng i 20 hoè ê nı̂-boé pēⁿ tó tı̄ kaⁿ-ga̍k lāi chı̍t-keng sè-sè ê kaⁿ-pâng ê pēⁿ-chhn̂g téng, kàu hit sı̂ i chiū siūⁿ tio̍h chhù-nı̍h ê pē-bó lah. Siūⁿ kı̀ⁿ i choè sè-kiáⁿ tı̄ chhù-nı̍h, sui-jiân tı̄ soaⁿ-nı̍h ê seng-oa̍h, iáu-kú tı̄ pē-bó thiàⁿ ê ē-bı̄n kap tı̄ soaⁿ-nı̍h hit khoán chheng-chēng, sûn-kiat ê seng-oa̍h sı̄ hô-téng ê hok-khı̀, hô-téng ê khoài-lo̍k kap pêng-an.
Taⁿ lâi kóng in chhù, i ê pē-bó tùi Bí-lē chhut-khı̀ liáu-āu hui-siông ê iu-būn. Chhun nn̄g ê hu-hū kúi-pái kám-kak oa̍h teh bô chhái-kang, siūⁿ beh sí, kai-chài tı̄ chı̍t ê bô phah-sǹg ê ki-hoē in chiū tit-tio̍h Chú ê hok-im. Tùi án-ni in chiū lâi pài Siōng-tè, nn̄g ê hu-hū chin jia̍t-sim ūi-tio̍h chit ê cha-bó͘-kiáⁿ lâi kı̂-tó, chhim-sı̀n Siōng-tè beh sià-bián, beh chín-kiù, beh èng-ún kı̀ⁿ-nā sı̀n I koh chin-chiàⁿ hoé-kái ê lâng tit-tio̍h chin ê pêng-an. Ū chı̍t-jı̍t tı̄ chı̍t ê te̍k-pia̍t ê chı̍p-hoē, bô phah-sǹg chêng choè Bí-lē ê thâu-ke-niû ê chí-moāi iā lâi thiaⁿ tō-lí.
Tū kı̂-tó tiong chiah chai chit ê sū, tùi án-ni thâu-ke-niû chiū chhoā in nn̄g ê hu-hū khı̀ thàm-kaⁿ, khı̀ ê sı̂ Bí-lē tó tı̄ chhn̂g-nı̍h sin-thé chin loán-jio̍k, khoàⁿ tio̍h pē-bó lâi sim chin kám-kek, khui-siaⁿ háu pē-bó iā háu, Bí-lē iā khoàⁿ thâu-ke-niû lâi, chin kiàn-siàu chhim-chhim jı̄n-choē, pē-bó thoè i kı̂-tó, iā khó͘-khǹg i chiap-siū Iâ-so͘. Bí-lē chiū chhim-chhim tùi Chú jı̄n-choē, sim-lāi kó-jiân tit-tio̍h toā pêng-an, kai-chài koh bián loā-kú hêng-kı̂ moá, chiū siū tháu-pàng. Hit sı̂ i ê lāu-pē lâi chiap i tò khı̀ chhù-nı̍h, kàu hit sı̂ i chiah thòng-kám hoê-thâu tı̄ pē-bó ê sin-piⁿ ê hok-khı̀. Siōng-tè ê peh-sı̀ⁿ iā-sı̄ chhin-chhiūⁿ án-ni, Siōng-tè ū èng-ún chin ê pêng-an beh hō͘ lâng, nā-sı̄ teh ǹg-bāng lâng hoán-hoé, hoê-thâu lâi kiâⁿ I ê kà-sı̄.
9 Ge̍h 27 Jı̍t
Kim-kù: Lâng khoàⁿ goā-māu, Iâ-hô-hoa sı̄ khoàⁿ sim-lāi. (I Sat-bó-jíⁿ 16: 7)
Thian-sù-chím sı̄ chı̍t-ūi jia̍t-sim pài Siōng-tè ê lâng, i ū 3 ê hāu-seⁿ lóng chin koai koh gâu tha̍k-chheh, chhù-piⁿ ê lâng lóng chin o-ló, ma-ma chin hoaⁿ-hí, ū chı̍t-jı̍t ma-ma beh chhut-goā khı̀ thàm chhin-chiâⁿ, kau-tài 3 ê hāu-seⁿ kò͘-chhù, 3 lâng lóng bô chhá beh toè ma-ma khı̀, ma-ma chiū an-sim chhut-goā, chit 3 ê hiaⁿ-tı̄ siūⁿ chē-chē hoat-tō͘ ǹg-bāng ma-ma tńg-lâi ê sı̂ ē hoaⁿ-hí in. Toā-kiáⁿ piáu-bêng i ū thiàⁿ ma-ma, chiū chéng-lí ma-ma ê pâng-keng kàu chin chheng-khı̀, tē 2 ê kiáⁿ tı̄ hoe-hn̂g bán chin chē hoe, chhah tı̄ hoe-kan, beh hō͘ ma-ma phı̄ⁿ-phang khoàⁿ-súi.
Nā-sı̄ tē 3 ê kiáⁿ lóng bô choè sím-mı̍h, chí-ū sim siàu-liām ma-ma, kiû Siōng-tè hō͘ i pêng-an tńg-lâi, ma-ma tńg-lâi ê sı̂ toā-kiáⁿ pò-kò chéng-lí pâng-keng, tē-jı̄ ê the̍h hoe-kan chhah-hoe lâi hō͘ ma-ma, ma-ma to chin hoaⁿ-hí, chóng-sı̄ tē-saⁿ ê kiáⁿ lâi kā ma-ma kóng, Ma-ma lí chhut-goā, goá ê sim iā kap lí chhut-goā, goá ta̍k-mê lóng chin siàu-liām lí koáⁿ-kín tńg-lâi, iā kiû Siōng-tè pó-hō͘ lí pêng-an tńg-lâi. Ma-ma thiaⁿ-tio̍h án-ni chiū phō i lâi chim, iā lâu hoaⁿ-hí ê ba̍k-sái.
Chit 3 ê kiáⁿ lóng hō͘ ma-ma hoaⁿ-hí chóng-sı̄ tē-saⁿ ê kiáⁿ sui-jiân bô ū sím-mı̍h piáu-hiān, iáu-kú i ê lāi-sim ê liām-thâu hō͘ i ê ma-ma tē-it hoaⁿ-hí. Sió pêng-iú! Siōng-tè tùi lán iā-sı̄ án-ni, I sı̄ khoàⁿ-kàu lán ê lāi-sim, só͘-í si-jı̂n án-ni kóng:
Siōng-tè ah, kiû Lí kàm-chhat goá,
Chai goá ê sim-su,
Chhı̀-giām goá, chai goá ê ı̀-sù,
Khoàⁿ goá lāi-bı̄n ū sím-mı̍h pháiⁿ só͘ kiâⁿ á-bô.
Lán bô-lūn hó á-sı̄ pháiⁿ, lán ê sim-lāi ê liām-thâu Siōng-tè lóng khoàⁿ ē chhut, chhiáⁿ lán tio̍h siông-siông kiû Siōng-tè hō͘ lán ê lāi-sim put-sı̂ chheng-khı̀ hō͘ Chú khoàⁿ-kı̀ⁿ lâi hoaⁿ-hí. (I. L. Chhı̂)