Kim-kù Ê Kò͘-sū 10

Kim-kù Ê Kò͘-sū
1959 10 Ge̍h 10 Ge̍h 3 Jı̍t Kim-kù: To̍k-to̍k Sèng Sı̂n lı̂m-kàu lín ê sı̂, lín beh tit-tio̍h châi-lêng; koh tı̄ Iâ-lō͘-sat-léng, piàn Iû-thài, kap Sat-má-lı̄-a, tı̍t-kàu toē-ke̍k, beh choè Goá ê kan-chèng. (Sù-tô͘ Hēng-toān 1: 8) Sió pêng-iú Sèng Sı̂n sı̄ sím-mı̍h? Lín bat khoàⁿ-kı̀ⁿ á m̄-bat? Tio̍h tio̍h m̄-bat khoàⁿ-kı̀ⁿ. Goá koh mn̄g lín chı̍t-hāng, hong lín bat khoàⁿ-kı̀ⁿ bô? (Hō͘ ha̍k-seng ı̀n, koh chiàu in ı̀n ê lâi soat-bêng.) Ū-iáⁿ lán nā khoàⁿ-tio̍h chhiū-hio̍h teh tín-tāng, lán chiū chai-iáⁿ ū hong, Sèng Sı̂n iā-sı̄ chhin-chhiūⁿ hong, chı̍t-ē kàu oē iô-tāng lâng ê sim, hō͘ lâng ài chò I ê kang ū khùi-la̍t, oē i-pı̄ⁿ, oē hō͘ siáu-lâng tit-tio̍h hó. Ū chı̍t-pái A-hô hiaⁿ kap Chûn-gı̄ hiaⁿ sı̄ chin hó ê pêng-iú, A-hô hiaⁿ tāi-seng tit-tio̍h tō-lí, ū ín-chhoā Chûn-gı̄ hiaⁿ lâi thiaⁿ. Keng-koè 5 nı̂-āu, ū chı̍t pái chı̍t ê bo̍k-su lâi poê-lêng-hoē. Chit 2 ê hó pêng-iú siū chin toā ê kám-tōng, chiū koat-ı̀ beh chhut-mn̂g kóng tō-lí hō͘ lâng thiaⁿ. A-hô hiaⁿ siông-siông kı̂-tó kiû siōng-tè chhiong-moá i ū lêng-le̍k, thang hcò I ê kang. Chûn-gı̄ hiaⁿ iā-sı̄ chhut-mn̂g khı̀ thoân tō-lí, i chin gâu kóng tō-lí, kóng kò͘-sū hō͘ lâng thiaⁿ; kóng hō͘ lâng thiaⁿ kàu chin ài chhiò, ū sı̂ kúi-nā chheng-lâng lâi thiaⁿ, khó-sioh lâi jı̄n-choē chhiam-miâ ê lâng chin chió. A-hô hiaⁿ nā chhut-khı̀ pò͘-tō ê sı̂, thiaⁿ ê lâng oá 4, 5 pah-lâng lâi thiaⁿ; m̄-kú thiaⁿ ê lâng chin siok-chēng teh thiaⁿ, thiaⁿ-liáu oē bêng-pe̍k ka-kı̄ ê choē, hoán-hoé jı̄n-choē ê lâng chin choē. Tı̄ chı̍t-àm Chûn-gı̄ hiaⁿ teh khùn, khoàⁿ-kı̀ⁿ chı̍t 5 só͘-chāi chiū-sı̄ ū 2 khu ê hoe-hn̂g, chin toā-khu tiong-ng chı̍t-tiâu kau, ū chin o͘ ê chúi, ū chı̍t lâng lâi kā i kóng, Tò-pêng chit-khu sı̄ lí ê, chiàⁿ-pêng chit-khu sı̄ A-hô hiaⁿ ê, lín 2 lâng pı̂ⁿ-pı̂ⁿ thang iōng chit ê hô ê chúi ak-hoe. Chı̍t-ē khoàⁿ chúi chin o͘, i khoàⁿ-liáu ka-kı̄ án-ni siūⁿ, goá chin ióng-chòng ū la̍t, chit-khoán chúi o͘ goá bô ài, só͘-í goá beh tùi piⁿ-a ka-kı̄ khui chı̍t ê chíⁿ, lâi tit-tio̍h chúi thang lâi ak chiah ê hoe, ún-tàng oē chin súi, iā oē kiat-sı̍t tit-tio̍h chí chin choē. A-hô hiaⁿ kap Chûn-gı̄ ta̍k-jı̍t lóng chhut-lâi chia teh ak-hoe, A-hô hiaⁿ sı̄ ēng hô nı̍h ê chúi, chóng-sı̄ hia bô chin súi, hoe chin toā-lúi m̄-kú khui bô chin choē. Chûn-gı̄ ê hoe khui chin choē. Ū chı̍t-pái 2 lâng pı̂ⁿ-pı̂ⁿ tı̄ hia teh ak-chúi, Chûn-gı̄ hiaⁿ tùi A-hô hiaⁿ kóng hit khoán chúi m̄ hó, chhiáⁿ lí ak goá só͘ khui ê chúi, lí khoàⁿ goá ê chiah nı̍h gâu khui hoe, āu-pái só͘ beh siu-sêng ê hoe-chí pí lí ê beh ke kúi-nā pah poē. A-hô hiaⁿ ı̀n i kóng: “Lí khoàⁿ goá chit-tiâu chúi, sı̄ tùi thian-tông thàu lo̍h-lâi, ún-tàng oē kiat-sı̍t choē-choē thang lı̄-ek choē-choē lâng.” Khui-hoe ê kı̂ í-keng koè, hiah ê hoe lóng teh kiat hoe-chí. Chûn-gı̄ hiaⁿ ê hoe chı̍t-chheng lúi, chí ū chı̍t-lúi kiat-chí nā-tiāⁿ, só͘ siu khí-lâi ê hoe-chí khah bô chı̍t tê-au. Chóng-sı̄ A-hô hiaⁿ ê sı̄ ēng toā-tè oáⁿ-thâu lâi té oá 10 oáⁿ khah ke, Chûn-gı̄ hiaⁿ chiū khí siū-khı̀ chiong au-á nı̍h hiah ê hoe-chí beh piàⁿ hiah-kak ê sı̂. Téng-jı̍t lâi hit ê lâng koh chhut-hiān kiò i ê miâ, kā i kóng, Chûn-gı̄ lí cháiⁿ-iūⁿ siū-khı̀ tiong-ng chit tiâu hô, sı̄ thàu-kàu thiⁿ-téng, ū pûi-hūn, iā chúi ê lāi-bı̄n ū la̍t, ū oa̍h-miā, só͘-í oē kiat choe8-choē ê hoe-chí, lí beh oá-khò lí ka-kı̄ ê khùi-la̍t lâi ku̍t chíⁿ tit-tio̍h chúi, lí só͘ ku̍t ê chíⁿ lāi-bı̄n ê chúi bô oa̍h-miā. Lí siūⁿ lí koè-khı̀ ê thoân tō-lí, beh oá-khò lí ê kháu-châi, lí ê khùi-la̍t, lí só͘ kóng ê bô ū Sèng Sı̂n kap lí saⁿ-kap tı̄ teh, boē oē hō͘ lâng hoán-hoé tit-tio̍h kiù. Goá kā lí kóng, lí tio̍h o̍h A-hô ê khoán, siông-siông kı̂-tó tit-tio̍h Sèng Sı̂n ê khùi-la̍t lí chiū beh tit-tio̍h châi-lêng; oē kàu ta̍k só͘-chāi lâi thoân hok-im, hō͘ choē-choē lâng hoán-hoé kái-piàn. Chûn-gı̄ thiaⁿ-kı̀ⁿ án-ni, koáⁿ-kín kūi-lo̍h tùi Chú jı̄n-choē, kiû Chú tek-khak tio̍h hō͘ i chhiong-moá Sèng Sı̂n, chiū khui-siaⁿ háu; teh háu ê sı̂ hut-jiân cheng-sı̂n. Liáu-āu Chûn-gı̄ chiū siông-siông kı̂-tó, kiû Chú ēng Sèng Sı̂n lâi chhiong-moá i, hō͘ i sı̀-koè thoân hok-im. Kó-jiân Chú thiaⁿ i kı̂-tó Sèng Sı̂n kap i tı̄ teh, choè chı̍t ê toā ê pò͘-tō-ka khı̀ kàu ta̍k só͘-chāi thoân tō-lí. Sió pêng-iú lín tio̍h kı̂-tó kiû Chú hō͘ lín ū Sèng Sı̂n ê khùi-la̍t lâi ín-chhoā lín ê pêng-iú. (Âng Siok-kheng) 10 Ge̍h 11 Jı̍t Kim-kù: Chit ê Iâ-so͘, Siōng-tè í-keng hō͘ I koh-oa̍h, goán chiah ê lóng choè I ê kan-chèng. (Sù-tô͘ Hēng-toān 2: 32) Ho̍k-heng hiaⁿ, iáu-boē chhut-sı̀, in chhù í-keng sı̄ sı̀n Chú ê ka-têng, pa-pa, ma-ma to lóng chin iàu-kín lé-pài, iā tı̀-ı̀ hō͘ in khı̀ hù Chú-jı̍t-o̍h, chha-put-to ta̍k ē-hng lóng ū ka-têng lé-pài. Chóng-sı̄ Ho̍k-heng hiaⁿ kàu ko-tiong it-liân ê sı̂, chiū kap kàu-hoē chiām-chiām khah se, soà tı̍t-tı̍t má-má hu-hu khı̀, bô kú ko-tiong pit-gia̍p, khó jı̍p Tâi-tāi, chin tı̀-ı̀ tha̍k-chheh, bô iàu-kín chham-ka ha̍k-seng ê chong-kàu oa̍h-tāng. Tāi-ha̍k pit-gia̍p liáu, tı̄ chı̍t-keng toā kang-chhiúⁿ ho̍k-bū, khiok iû-goân ū khı̀ siú lé-pài, in-ūi án-ni i ê tông-sū ū ê kā i chhiò, ū ê mn̄g i Ki-tok kàu ê sū soà m̄-káⁿ kóng, sı̄m-chı̀ kiaⁿ lâng chai i sı̄ sı̀n Chú ê lâng, chóng-sı̄ i ê lāu-pē, lāu-bó lóng chin khoà-lū i tùi tı̄ kèng-pài Siōng-tè ê sū má-má hu-hu, siông-siông teh thè i kı̂-tó. Ho̍k-heng hiaⁿ 25 hoè ê sı̂, tú-tio̍h chin siong-tiōng ê pı̄ⁿ, tio̍h jı̍p-ı̄ⁿ, in choân-ke ê lâng, kap choân kàu-hoē ê lâng lóng thè i kı̂-tó, choè-āu kóng tio̍h chhiú-su̍t, chóng-sı̄ lâng í-keng chin soe-jio̍k, tāi-ke lóng teh khoà-lū chhiú-su̍t liáu ū gûi-hiám, kó-jiân chhiú-su̍t āu sı̍t-chāi gûi-hiám, i-seng iā khoàⁿ bô ǹg-bāng lah, tı̄ hit-mı̂ i khoàⁿ-kı̀ⁿ chı̍t ê ı̄ⁿ-siōng, ū chı̍t lâng chhēng pe̍h-saⁿ, khiā tı̄ i ê sin-piⁿ, ēng chhiú hoāⁿ i kóng: “Goá sı̄ koh-oa̍h ê Chú, koh-oa̍h kap oa̍h-miā sı̄ chāi-tı̄ Goá, taⁿ lí beh tit-tio̍h i-hó, lí tit-tio̍h hó liáu-āu tio̍h hó-táⁿ chò Goá ê kan-chèng.” Chin kı̂-biāu, gûi-ki tit-tio̍h bán-hoê, chiām-chiām hó khí-lâi, choân-ke, choân kàu-hoē iā toā hoaⁿ-hí, khui kám-siā hoē, i pún-sin iā tı̄ kàu-hoē hiàn kám-siā, kóng khí koh-oa̍h ê Chú ê koân-lêng. Chit-tia̍p í-āu, Ho̍k-heng hiaⁿ, bô-lūn tı̄ in ê tông-sū ê tiong-kan, á-sı̄ tı̄ sím-mı̍h chı̍p-hoē ê tiong-kan to hó-táⁿ ūi Chú chò kan-chèng. Taⁿ Chú Iâ-so͘ ê ha̍k-seng, tı̄ gō͘-sûn-cheh í-chêng, beh lé-pài tio̍h koaiⁿ mn̂g, kiaⁿ lâng chai, kàu khoàⁿ-kı̀ⁿ koh-oa̍h ê Chú, koh thiaⁿ-kı̀ⁿ Chú kā in kóng, “Koh bô kúi-jı̍t, lín beh siū Sèng Sı̂n, iā Sèng Sı̂n lı̂m-kàu lín ê sı̂, lín beh tit-tio̍h châi-lêng, koh tı̄ Iâ-lō͘-sat-léng, piàn Iû-thài, kap Sat-má-lı̄-a, tı̍t-kàu tē-ke̍k, beh chò goá ê kan-chèng.” In kap Sı̀n ê lâng tâng-sim kı̂-tó ê sı̂, Sèng Sı̂n kàng-lı̂m, kı̀-jiân siū Sèng Sı̂n chhiong-moá, chiū ēng choē-choē ê khiuⁿ-kháu lâi kan-chèng koh-oa̍h ê Ki-tok, ín Kū-iok ê kan-chèng, kan-chèng koh-oa̍h ê Ki-tok siū chiap-la̍p tı̄ Pē Siōng-tè ê toā-pêng, bô-lūn tı̄ tiān-nı̍h, tı̄ jı̂n-ke, á-sı̄ tı̄ kong-hoē ê bı̄n-chêng, koaⁿ-hú ê bı̄n-chêng, to hó-táⁿ soan-thoân, chit ê Iâ-so͘, Siōng-tè í-keng hō͘ I koh-oa̍h, goán chiah ê lóng chò I ê kan-chèng. (T. K. J.) 10 Ge̍h 18 Jı̍t Kim-kù: Kim gûn goá lóng bô; to̍k-to̍k goá só͘ ū ê hō͘ lí. Tı̄ Ná-sat-le̍k Iâ-so͘ Ki-tok ê miâ, lí khí-lâi kiâⁿ. (Sù-tô͘ Hēng-toān 3: 6) Sió pêng-iú chiàu lín teh siūⁿ; tı̄ chia nā ū chı̍t ê chin gâu, ū khùi-la̍t, koh chin pù-ū ê tāi-ông. I kóng, Beh chhut-chāi lín ài sím-mı̍h, lín nā thó, i chiū beh hō͘ lín. Hit sı̂ lín ū hoaⁿ-hí á-bô? Iā hit sı̂ lín beh thó sím-mı̍h? Goá chai, pêng-sı̂ seng-oa̍h siāng hó-koè ê lâng, tian-tò ē thó khah bô lō͘-ēng ê mı̍h, seng-oa̍h ná kan-khó͘ ê lâng, in só͘ thó ê, chiū-sı̄ sı̍t-chāi ū lō͘-ēng ê mı̍h, koh siāng chhi-chhám ê lâng, só͘ kiû--ê, siông-siông sı̄ in só͘ bô bē-ēng-tit ê. Khó-pí A-jı̂n in tau chin hó-gia̍h, i só͘ ài ê mı̍h ta̍k-hāng to͘ ū, i soà siūⁿ bô mı̍h thang thó, kiám-chhái sı̄ thó thit-thô-mı̍h nā-tiāⁿ. A-hoa in tau chin sàn-hiong; i chin koâⁿ, chóng-sı̄ i lóng bô hiû-á thang chhēng. Hit sı̂ i ún-tàng beh thó chı̍t-niá hiû-á. Koh chı̍t ê Thian-lâi-à i koh khah khó-lı̂n, i sı̄ pái-kha bē kiâⁿ. Lí siūⁿ hit ê tāi-ông i nā-sı̄ ta̍k-hāng ē-tit ūi-tio̍h kiû i ê lâng lâi choè, Thian-lâi-à i ún-tàng beh kiû ǹg-bāng kha ē kiâⁿ. Pí thit-thô-mı̍h, pí hiû-á khah iàu-kín. Goá tı̄ iok 35 nı̂ chêng tı̄ Lâm-chú kàu-hoē ê Tek-á-mn̂g chng, ū tú-tio̍h chı̍t ê chheng-liân hiaⁿ-tı̄, bô tiuⁿ-tı̂ hō͘ chin tāng ê mı̍h tǹg tio̍h kha-poâⁿ, tùi án-ni soà bē kiâⁿ, pún chin ū la̍t, ē taⁿ chhek-tàⁿ, koah tiū-á, so chháu lóng ē, sı̄ chı̍t ê ū ǹg-bāng ê chheng-liân. Tùi hit sı̂ kha bē chih-la̍t, gia̍h koáiⁿ-á lâi pài, taⁿ chí ū tı̄ chhù-lāi kò͘ chhù, tàu hiâⁿ-hoé, chhı̄ ke-á, ah-á, í-goā bē-tit choè sím-mı̍h. Pún chin chē lú-chú siūⁿ beh kè--i, liân siāng chhin-bı̍t ê sió-chiá, chiap-chiap lâi khoàⁿ i, ǹg-bāng i chá chı̍t-jı̍t ē hó, hit ê sió-chiá chı̍t nı̂, nn̄g-nı̂ āu iā bô lâi thàm i lah. Pē-bó ūi-tio̍h i ū chı̂ⁿ khai kàu bô chı̂ⁿ, iā bat khı̀ lán ê i-koán jı̍p-ı̄ⁿ, lóng bô chhái-kang, lâng pı̀ⁿ chin sán, chı̍t-têng phoê nê chı̍t-ki kut, chin chiàⁿ sı̄ khó-lı̂n, bı̄n tài iu-iông, sim chin loé-chı̀. Kai-chài i ū sı̀n Siōng-tè, sı̄ lán ê hiaⁿ-tı̄, goá siông-siông khı̀ thàm i, khah siông in tau bô lâng tı̄ teh, chí ū i teh kò͘ chhù. Goá khı̀, an-ùi i, kap i kı̂-tó, i siông-siông lâu ba̍k-sái, oàn-thàn i ê chiân-tô͘. Āu-lâi goá kó͘-bú i lı̄-ēng chit ê ki-hoē tha̍k Sèng-keng the̍h Thian-lō͘ le̍k-thêng téng-téng hō͘ i tha̍k. Tùi án-ni i ê sı̀n-sim put-chí chı̀n-pō͘ siū an-ùi. Ū chı̍t-jı̍t goá koh khı̀ chhoē--i, i hut-jiân cháu oá-lâi kap goá ak-chhiú, ba̍k-sái tùi i ê ba̍k-chiu liàn chhut--lâi, piáu-hiān moá-moá ê kám-siā. Goá chin kı̂-koài, sim-té giau-gı̂ i thái bô gia̍h koáiⁿ-á. I kā goá kóng, “Bo̍k-su, chin kı̂-koài, Siōng-tè thiaⁿ goá kú-kú ê kı̂-tó, tı̄ kúi-jı̍t chêng, hut-jiân goá ê kha ū la̍t, kin-thâu lóng lēng, goá tı̄ cha-hng í-keng ē khı̀ chhân-nı̍h taⁿ tiū-kó-chháu, taⁿ chin chē iā lóng bô kia̍h koáiⁿ-á. Ah! Kám-siā Chú, o-ló Chú.” I ê chhùi chin chhiò, bı̄n chin hoaⁿ-hí, chóng-sı̄ i ê ba̍k-chiu ū moá-moá ê ba̍k-sái. Tùi goá ê chhiú giú tiâu-tiâu. Goá iā bē kı̀m-tit, kap i saⁿ-kap lâu ba̍k-sái, kūi-lo̍h tı̄ in ê chàu-kha kı̂-tó, kám-siā Siōng-tè bô-hān ê un-tián. (Í-siōng sı̄ sı̍t-chāi ê kò͘-sū, sı̄ Loā Jı̂n-seng bo̍k-su tı̄ Lâm-chú kàu-hoē bo̍k-hoē ê hoê-kò͘ tâm.) Ah! Chú ê koân-lêng, un-tián, lı̂n-bín chiū chiâⁿ éng-oán tı̄-teh. In-ūi I beh chiong tē-it hó--ê hō͘ lán. (L. J. S.) 10 Ge̍h 25 Jı̍t Kim-kù: In-ūi goán só͘ bat khoàⁿ bat thiaⁿ ê, boē tit thang bô kóng. (Sù-tô͘ Hêng-toān 4:20) Kó͘-chá Chú Iâ-so͘ toà tı̄ sè-kan ê sı̂, ū chin chē lâng teh toè Iâ-so͘ siông-siông khoàⁿ I i-hó pı̄ⁿ-lâng, kap hoān-tio̍h kúi ê, iā siông-siông thiaⁿ I kóng tō-lí, āu-lâi Iâ-so͘ ūi-tio̍h lán ê choē hō͘ lâng tèng tı̄ sı̍p-jı̄-kè sí, tâi lo̍h bōng, chóng-sı̄ Siōng-tè hō͘ Iâ-so͘ koh-oa̍h, āu-lâi chiap I chiūⁿ thiⁿ. Taⁿ Iâ-so͘ bô tı̄ chit sè-kan, só͘-í chin chē lâng lâi toè Iâ-so͘ ê ha̍k-seng, in chiū chiong tùi Iâ-so͘ só͘ thiaⁿ ê tō-lí kà-sı̄, iā chiong in só͘ khoàⁿ Iâ-so͘ koh-oa̍h, chiūⁿ-thiⁿ ê sū kóng hō͘ in thiaⁿ. Chóng-sı̄ chèng-hú kı̀m-chí in m̄-thang koh kóng, chóng-sı̄ ha̍k-seng hō͘ Sèng Sı̂n chhiong-moá bô kóng boē ēng-tit, chiū koh kóng, āu-lâi soà hō͘ chèng-hú lia̍h khı̀ koaiⁿ, bô kú pàng chhut-lâi, in ia̍h koh kóng. Kàu-boé liân thiaⁿ ê lâng iā ē siū pek-hāi, āu-lâi in chiū bih tı̄ lâu-téng á-sı̄ tı̄ soaⁿ-tōng ê só͘-chāi lâi thiaⁿ ha̍k-seng kóng tō-lí. Keng-koè chin kú lah. Ha̍k-seng Má-thài, Iok-hàn chiū kiaⁿ-liáu bô ki-hoē thang kóng in só͘ khoàⁿ só͘ thiaⁿ ê, chiū siá iûⁿ-phoê thang lâu kàu āu-tāi ê lâng. Iā ū Má-khó, Lō͘-ka in tùi Pí-tek á-sı̄ Pó-lô só͘ thiaⁿ koan-hē Iâ-so͘ ê kà-sı̄ kap sı̂n-jiah téng, iā siá khí-lâi, lán chiah ū kin-á-jı̍t ê Hok-im-toān Sèng-keng. Kó͘-chá Iâ-so͘ bat chı̍t ê tiong-tàu sı̂ tı̄ chı̍t ê chíⁿ-piⁿ tú-tio̍h chı̍t-ūi chí-moē i khí-thâu m̄-bat Iâ-so͘. Chóng-sı̄ teh thiaⁿ i kóng, kap i tâm-lūn liáu chiah chai Iâ-so͘ sı̄ Kiù-chú, sı̄ Bí-sài-a, i chiū sûi-sı̂ chiong i só͘ khoàⁿ ê só͘ thiaⁿ ê, khı̀ pò chng-nı̍h ê lâng chai, iā chhoā in lâi khoàⁿ Iâ-so͘, āu-lâi hit chng ê lâng chin chē lâng lâi sı̀n Iâ-so͘. Chá-sı̂ ê sı̀n-tô͘, tú-tio̍h chē-chē pek-hāi, chóng-sı̄ in kóng, Goán só͘ bat khoàⁿ, bat thiaⁿ ê boē tit thang bô kóng. Kin-á-jı̍t lán chin chiàⁿ chū-iû, put-koán sı̂ ē-tàng thoân tō-lí. Lí só͘ thiaⁿ ê tō-lí, lí só͘ khoàⁿ ê pêng-an, lí ū kóng hō͘ lâng thiaⁿ á-bô? (I. L. Chh.)