Kim-kù Ê Kò͘-sū 11

Kim-kù Ê Kò͘-sū
1959 11 Ge̍h 11 Ge̍h 1 Jı̍t Kim-kù: Sı̀n ê lâng lóng chı̍t-sim chı̍t-ı̀, ...... ta̍k-hāng mı̍h choè kong--ê. (Sù-tô͘ hēng-toān 4:32) Thâu-sû: Chho͘-tāi ê sı̀n-tô͘, in hoé-kái kui Chú liáu-āu, chin jia̍t-sim lâi kun-toè tng-sı̂ ê sı̀n-tô͘ tiong. In sı̄m-chı̀ soà chiong só͘ ū ê chı̂ⁿ-châi bu̍t-chit, lóng-chóng hōng-hiàn tı̄ chèng hiaⁿ-tı̄ tiong, choè kong-kiōng ê lō͘-ēng. Lán nā thiàⁿ Chú, chiū oē siⁿ-chhut chit-téng-hō bô su-khia, hi-seng sió-ngó͘, sêng-choân tāi-ngó͘ ê cheng-sı̂n. Kò͘-sū: “Tàng-sng ê Sió-lı̂m” Tı̄ chı̍t-keng kàu-hoē ê Chú-jı̍t-o̍h, ū chı̍t-ê gín-ná kiò-choè “tàng-sng ê Sió-lı̂m”. Sió-lı̂m chai ài chı̂ⁿ, iā-sı̄ chin tàng-sng. I m̄-ài hōng-hiàn, m̄-ài pang-chān pa̍t-lâng, i siông-siông tùi a-pa a-bú thó chı̂ⁿ, kóng beh tı̄ lé-pài-jı̍t hiàn-kim, chóng-sı̄ lóng bô-iáⁿ, sı̄ khı̀ lo̍k tı̄ su-khia, pı̀-bı̍t ê chı̂ⁿ-tâng-á nı̍h, só͘-í án-ni i ê chı̂ⁿ-tâng-á, chiū chiām-chiām moá khí-lâi. Ū chı̍t-mı̂ i teh siūⁿ i ê chı̂ⁿ tio̍h lâi chò sím-mı̍h lō͘-ēng, bé súi ê saⁿ? Bô-ài, a-bú oē bé hō͘ goá, bé thit-thô mı̍h? M̄-bián, goá thang tùi a-ı̂, a-chek iàu-kiû. Kiat-kio̍k tàng-sng ê Sió-lı̂m chiū chiong hiah ê chı̂ⁿ koh siu khí-lâi. Ū chı̍t lé-pài, tı̄ Chú-jı̍t-o̍h lāu-su kóng, Sèng-tàn beh kàu lah, ài bé saⁿ lâi sàng hō͘ lō͘-piⁿ ê khit-chia̍h, só͘-í chhiáⁿ tāi-ke chı̄n-la̍t hōng-hiàn. Sió-lı̂m siūⁿ kóng án-ni chin bô-chhái. Koh chı̍t-pái, kàu-hoē ū chı̍t-ūi khó-lı̂n bô i-oá ê lāu-lâng phoà-pı̄ⁿ, lāu-su ài tāi-ke ūi-tio̍h i hōng-hiàn thang pang-chān i, Sió-lı̂m khiok siūⁿ án-ni sı̄ chin phah-sńg. Chí-ū i ê chı̂ⁿ-tâng-á jı̍t-jı̍t it-tı̍t tı̄ⁿ khí-lâi. Ū chı̍t-mê-hng Sió-lı̂m teh khùn ê sı̂, ū khoàⁿ-kı̀ⁿ chı̍t ê chhēng phoà-noā ê saⁿ, koâⁿ kàu chhun-chhiú tùi i kiû-khit kóng, “Tàng-sng ê Sió-lı̂m, chhiáⁿ lí khó-lı̂n goá!” Khiok Sió-lı̂m tio̍h chı̍t-kiaⁿ, kín-kín chiong chı̂ⁿ-tâng-á lám-oá khí-lâi kóng, “Bô-chhái, bô-chhái, che sı̄ goá ê chı̂ⁿ, bô-ài hō͘ lí!” Hit ê thang kiaⁿ ê khit-chia̍h tı̍t-tı̍t pek oá-khı̀, hō͘ Sió-lı̂m thoè kàu lóng bô ūi. Ko͘-put-chiong, in-ūi kiaⁿ-hiâⁿ, Sió-lı̂m chiū khui chı̂ⁿ-tâng-á, tùi hit lāi-bı̄n chhiau-chhoē chı̍t-tiuⁿ phoà-noā, beh tn̄g chò koe̍h ê gı̂n-phiò hiat hō͘ i. Hit ê khit-chia̍h chiū piàn-choè chı̍t ê chin súi ê thiⁿ-sài, tùi Sió-lı̂m seh-sāi, lâi piàn bô-khı̀. Sió-lı̂m khai-sí ūi-tio̍h i hit ê phoà-noā ê gı̂n-phiò kám-kak bô-chhái lâi siong-sim. Tng i koh teh khùn ê sı̂, tàng-sng ê Sió-lı̂m chiū koh khoàⁿ-kı̀ⁿ, ū chı̍t ê tài tāng-pı̄ⁿ soe-jio̍k ê lāu-lâng khiā tı̄ i ê chhn̂g-chêng, chhun-chhiú tùi i ai-kiû kóng, “Tàng-sng ê Sió-lı̂m, chhiáⁿ lí khó-lı̂n goá!” Khiok Sió-lı̂m tio̍h-kiaⁿ, kín-kín chiong hit ê chı̂ⁿ-tâng-á lám tiâu teh, kóng, “Phah-sńg, phah-sńg, che sı̄ goá ê chı̂ⁿ, bô-ài hō͘ lí!” Hit-ūi hêng-iông thang kiaⁿ ê lāu-lâng tı̍t-tı̍t pek oá, hō͘ Sió-lı̂m thoè kàu lóng bô ūi. Ko͘-put-chiong, in-ūi kiaⁿ-hiâⁿ, Sió-lı̂m chiū koh khui chı̂ⁿ-tâng-á, tùi hit lāi-bı̄n chhiau-chhoē chı̍t-tiuⁿ phoà-noā, beh tn̄g chò koe̍h ê gı̂n-phiò hiat hō͘ i. Hit ê lāu-lâng chiū piàn-choè chı̍t ê chin súi ê thiⁿ-sài, tùi Sió-lı̂m seh-siā lâi piàn bô-khı̀. Sió-lı̂m koh khai-sí ūi-tio̍h hit-tiuⁿ phoà-noā ê gı̂n-phiò lâi siong-sim, tng i teh khoàⁿ hiah ê gı̂n-phiò ê sı̂, hut-jiân hiah ê gı̂n-phiò lóng khai-sí siⁿ thâng, thang kiaⁿ ê thâng chı̍t-chiah chı̍t-chiah tùi hit ê tâng-á lāi sô chhut-lâi, āu-lâi chiū sô moá i ê chhn̂g-téng kap pâng-keng, tı̍t-kàu hiah ê chı̂ⁿ lóng oân-choân piàn-choè thâng. Bô kú hiah ê thâng chiū tióng-toā khí-lâi khai-sí beh chia̍h Sió-lı̂m ê bah. Sió-lı̂m kiaⁿ kàu cháu lóng bô lō͘, i phe-miā teh cháu, hiah ê thâng tı̍t-tı̍t teh tui-jiok. Tı̀-kàu Sió-lı̂m tı̄ cháu bô lō͘ ê sı̂ soà poa̍h-lo̍h tı̄ chı̍t ê o͘-àm ê chhim-khiⁿ. Sió-lı̂m khoàⁿ-kı̀ⁿ hit ê chhim-khiⁿ ê lāi-bı̄n lóng sı̄ tún moá hú-pāi siⁿ-sian ê chı̂ⁿ-kak-á kap phoà-noā ê chı̂ⁿ-phiò, Sió-lı̂m khoàⁿ-liáu chin kiaⁿ. Bô-kú kó-jiân tùi hiah ê chı̂ⁿ ê ē-bı̄n ū bû-sò͘-bān ê chı̂ⁿ-thâng, sô chhut-lâi beh chia̍h Sió-lı̂m ê bah, Sió-lı̂m hō͘ hiah ê thâng kā i sô kàu moá sin-khu, chiū kiaⁿ-hiâⁿ hoah kiò kóng, “Kiù goá lah, kiù goá lah, goá m̄-ài chı̂ⁿ lah!” Ū nn̄g ê chhēng pe̍h-saⁿ ê thiⁿ-sài chhut-hiān tı̄ thiⁿ-nı̍h, tùi i kóng, “Tàng-sng ê Sió-lı̂m, lí ài goán kā lí choè sím-mı̍h?” Sió-lı̂m jı̄n-chhut hit nn̄g-ūi chiū-sı̄ khit-chia̍h kap lāu-lâng, chiū hoaⁿ-hí tùi in kiû kóng, “Chhiáⁿ lín kiù goá thoat-lı̄ chit ê chı̂ⁿ-thâng ê chhim-khiⁿ!” Hit nn̄g-ūi thiⁿ-sài chiū chiong Sió-lı̂m hō͘ in phoà-noā ê chı̂ⁿ-phiò the̍h tı̄ chhiú-nı̍h, tūi lo̍h-khı̀, chhiáⁿ Sió-lı̂m tio̍h khı̂ⁿ tı̄ hit ê chı̂ⁿ-phiò, lâi thoat-lı̄ chhim-khiⁿ. Sió-lı̂m kín-kín chı̍t-chhiú khı̀ khı̂ⁿ tı̄ chit-tiuⁿ chı̂ⁿ-phiò, khoàⁿ-tio̍h hit ê phoà-noā beh tn̄g ê chı̂ⁿ-phiò, hit-sı̂ Sió-lı̂m chiah hō͘-hoé, i án-choáⁿ bô ēng khah chē, khah hó ê chı̂ⁿ-phiò hiat hō͘ in, hit tiuⁿ chı̂ⁿ-phiò sı̄ hiah-nı̍h khò put-chū, hiah-nı̍h bô ǹg-bāng. I hō͘-hoé koh hō͘-hoé soà chek-pı̄ ka-kı̄ ê tàng-sng, iáu-kú i khı̂ⁿ tı̄ hit ê chı̂ⁿ-phiò, ǹg-bāng hit ê chı̂ⁿ-phiò bô tn̄g-khı̀. I ê sin-khu ū phû tı̄ khong-tiong, chı̂ⁿ-phiò chiām-chiām beh tn̄g khı̀ lah, hit ê sı̂ chı̍t-tiûⁿ thang-kiaⁿ, kín-tiuⁿ ê sı̂-kan. Kó-jiân kàu tı̄ poàⁿ khong-tiong ê sı̂ hiah ê chı̂ⁿ-phiò chiū tn̄g-khı̀, i chiū koh siak lo̍h-khı̀ lah. Sió-lı̂m tı̄ toā kiaⁿ-hiâⁿ ê sı̂ lâi chhíⁿ khí-lâi, chiah chai-iáⁿ goân-lâi sı̄ teh choè-bāng. I kín-kín khoàⁿ i ê chı̂ⁿ-tâng-á, iáu-kú tı̄ i ê sin-piⁿ, hiah-ê chı̂ⁿ iā lóng bô sit bô khı̀, i khai-sí tùi hiah ê chı̂ⁿ ū chı̍t-chióng ê put-an. Chóng-sı̄ kàu lé-pài-jı̍t, tàng-sng ê Sió-lı̂m chiū the̍h i ê chı̂ⁿ-tâng-á khı̀ hiàn hō͘ Chú, thang pang-chān hit nn̄g-ūi khó-lı̂n ê lâng, í-āu lâng chiū m̄-bat koh kiò i “tàng-sng ê Sió-lı̂m” lah. (N̂g. L. L.) 11 Ge̍h 8 Jı̍t Kim-kù: Sūn-thàn Siōng-tè khah kè-thâu tı̄ sūn-thàn lâng, sı̄ ha̍p-gı̂. (Hēng-toān 5:29) Ū chı̍t ê gín-ná miâ kiò Chú-hūi khı̀ goā-kok tha̍k-chheh, tāi-seng bô pêng-iú, chin bô phoāⁿ, i ê pa-pa kap ma-ma lóng bô kap i khı̀, i chin ài ū pêng-iú, āu-lâi chiū chiām-chiām kap tông-o̍h se̍k-sāi, bô-kú chiū pı̀ⁿ chin chē pêng-iú, ia̍h ū hó ê, ia̍h ū pháiⁿ ê, Chú-hūi ê lāu-pē siông-siông siá phoe hō͘ i, kā i kóng, “Lí m̄-thang kap pêng-iú khı̀ poa̍h pâi-á, m̄-thang khoàⁿ m̄ hó ê tiān-iáⁿ, m̄-thang ka-kı̄ chı̍t ê khı̀ iû-éng, lí tio̍h khı̀ lé-pài, ia̍h tio̍h khı̂n-khı̂n tha̍k-chheh, ia̍h tio̍h tú-hó ê ūn-tōng kap hioh-khùn.” Chú-hūi chai i ê pa-pa kap ma-ma sı̄ sè-kài siōng tē-it thiàⁿ i ê lâng, i siūⁿ kóng sui-jiân pē-bó bô tı̄ i ê sin-piⁿ, iáu-kú goá nā thiaⁿ in ê oē pa-pa ma-ma tek-khak chin hoaⁿ-hí, i ia̍h chai sūn-thàn pē-bó chiū-sı̄ iú-hàu, só͘-í i siông-siông siūⁿ-khí i ê pa-pa só͘ siá ê phoe. Ū chı̍t-jı̍t i ê pháiⁿ pêng-iú lâi beh chio i khı̀ poa̍h pâi-á, tı̍t-tı̍t kā i chio, chóng-sı̄ Chú-hūi kóng goá ê lāu-pē kiò goá m̄-thang, só͘-í goá m̄ kap lí khı̀, koh chı̍t-pái i ê pêng-iú lâi beh koh chio i khı̀ khoàⁿ tiān-iáⁿ, Chú-hūi chiū kā i kóng goá ê lāu-pē siá phoe lâi kiò goá tio̍h khı̂n-khı̂n tha̍k-chheh, koh lán khó-chhı̀ teh-beh kàu là, goán m̄-ài khı̀, hit ê pêng-iú chiū chin siū-khı̀, bô-ài kap Chú-hūi chò pêng-iú, hit ê pháiⁿ pêng-iú chiū khı̀ chio chin chē pêng-iú kap Chú-hūi pháiⁿ, Chú-hūi ê sim chin kan-khó͘, chóng-sı̄ i chai sūn-thàn lāu-pē ê oē sı̄ khah tio̍h, āu-lâi i sui-jiân bô chin chē ê pêng-iú, iáu-kú i jı̄n-chin tha̍k-chheh, kàu-boé chò chin gâu ê phok-sū, i sı̄ chı̍t-ūi sūn-thàn pē-bó ê lâng, Siōng-tè ū chiok-hok i chin sêng-kong. Lán ê Sèng-keng ū kà-sı̄ lán, sūn-thàn Siōng-tè khah koè-thâu tı̄ sūn-thàn lâng sı̄ ha̍p-gı̂, ı̀-sù sı̄ thiaⁿ Siōng-tè ê oē khah tio̍h, thiaⁿ lâng ê oē khah m̄-tio̍h, Siōng-tè chiū-sı̄ lán thiⁿ-téng ê lāu-pē, I ū kià phoe lâi hō͘ lán, chiū-sı̄ Sèng-keng, Siōng-tè ê oē lóng kı̀ tı̄ Sèng-keng, lán nā sūn-thàn Thiⁿ-pē kiám-chhái oē hō͘ lâng oàn-hı̄n, hō͘ lâng mē, chóng-sı̄ lán nā o̍h Chú-hūi teh sūn-thàn i ê lāu-pē ê kà-sı̄ kàu-boé lán ê Thiⁿ-pē beh chiok-hok lán, lán tio̍h hó-táⁿ tio̍h oē kı̀-tit Sèng-keng ê oē kóng, “Sūn-thàn Siōng-tè khah koè-thâu tı̄ sūn-thàn lâng sı̄ ha̍p-gı̂. (T. K. C.) 11 Ge̍h 15 Jı̍t Kim-kù: Tiàm tı̄ siúⁿ-sù goá khùi-la̍t ê, goá sū-sū lóng oē. (Hui-lı̍p-pí 4:13) Sió pêng-iú lí ka-kı̄ bat siūⁿ, lí sı̄ chin loán-jio̍k, á-sı̄ chin ū le̍k-liōng? Kiám-chhái ū lâng ka-kı̄ bat siūⁿ i sı̄ chin ū le̍k-liōng, kı̂-sı̍t bô-iáⁿ. Lí ē-kı̀-tit koè-khı̀ 8 ge̍h, Tiong-pō͘ ê toā chúi-chai á-bē? Goá pún-sin ū khı̀ khoàⁿ hiah ê tú-tio̍h chai-ē ê lâng, soà phoè-ūn kiù-chè-phín khı̀ hō͘ in. Khı̀ kàu-ūi chı̍t-ē khoàⁿ, ū só͘-chāi kui ê chng-siā lâu liáu-liáu, chhù lóng tó, liân tek-phō, toā-chhiū iā lóng khau khí-lâi, chúi-chùn ēng chúi-nı̂ choè ê chúi-mn̂g, kiô-niû, liân thih-kiô to chhoah tn̄g lâu-khı̀. Goá iā bat khoàⁿ hong-thai āu ê chêng-kéng, phài-chhut-só͘ ê cheng-thah, á-sı̄ tiān-le̍k tiān-soàⁿ ê thih-thah, hō͘ hong chhoe, soà chhin-chhiūⁿ iû-chia̍h-koé án-ni kńg-lún-chūn tó tı̄ thô͘-kha. Ah! Lí siūⁿ Siōng-tè ê khùi-la̍t ê thang kiaⁿ. (tı̄ Hoa-liân ê sū) Koh bat khoàⁿ tı̄ chı̍t-àm tng lâng teh khùn ê tiong-kan, Siōng-tè ēng toā-hong kńg khí thô͘-soa lâi khàm chı̍t ê tek-ûi, chhin-chhiūⁿ án-ni goá bat khoàⁿ Hong-oán (chá kiò-choè Hoan-á-oah) hū-kı̄n ê chng-siā hō͘ thô͘-soa khàm-khı̀. Lí siūⁿ lâng tı̄ Siōng-tè ê bı̄n-chêng ū sím-mı̍h le̍k-liōng á-bô? Bô, oân-choân bô. Só͘-í lâng bē-tit tí-te̍k Siōng-tè, chí-ū sūn-ho̍k nā-tiāⁿ, siat-sú lí nā sūn-ho̍k Siōng-tè, lâi tiàm tı̄ I ê khùi-la̍t, lí chiū beh choè-chhut lí ka-kı̄ siūⁿ bô kàu ê sū. Lí bat thiaⁿ Bí-kok He-len-khe-lah sian-siⁿ ê sū á-bô? I sı̄ chı̍t ê thang khó-lı̂n sè-sè ê cha-bó͘ gín-ná. Tng i sè-hàn ê sı̂ chiū é-káu, chhiⁿ-mı̂, koh chhàu-hı̄-lâng, lí siūⁿ che sı̄ joā-nı̍h chhi-chhám ê sū, chhiⁿ-mı̂ lóng bô khoàⁿ-kı̀ⁿ sím-mı̍h, to chhi-chhám lah, soà iā bô thiaⁿ-kı̀ⁿ sím-mı̍h siaⁿ, koh é-káu kan-khó͘, pak-tó͘ iau iā bē-hiáu kóng. Lâng nā kā i hiat teh, i ka-kı̄ tı̄ hia ná chún sí ê kan-khó͘, kin-tú iā bô khoàⁿ-kı̀ⁿ sím-mı̍h sı̀-piⁿ àm-bı̂n-bong. Koh iā bô thiaⁿ-kı̀ⁿ sím-mı̍h, sim-koaⁿ siūⁿ iā bē-hiáu kóng, thong-jı̍t kan-ta tiām-tiām chē. Lí siūⁿ ū kan-khó͘ á-bô? Nā sı̄ i sı̀n Siōng-tè, ū thiaⁿ Chú Iâ-so͘. I chhim-chhim oá-khò Chú, oá-khò Siōng-tè pang-chān, bô loé-chı̀ lâi ló͘-le̍k, kàu-boé i pı̀ⁿ chin gâu, i choè phok-sū, taⁿ ē kóng-oē, kàu ta̍k só͘-chāi káng-ián. I tù chē-chē chheh, soà ūi-tio̍h phoà-siùⁿ, chân-hoè ê pháiⁿ-miā-lâng lâi cho͘-chit chē-chē kiù-chè ê ki-koan, pı̀ⁿ choè tng chit ê sı̂-tāi m̄-nā Bí-kok lâng iā-sı̄ sè-kài chı̍t ê chin toā ê jı̂n-bu̍t. Hián-bêng lâng nā tiàm tı̄ Siōng-tè ê un-tián, khùi-la̍t ê tiong-kan lâi ló͘-le̍k ê, bān-sū to ē. Sió pêng-iú lí sı̀n Siōng-tè mah? Lí ū khùn-lân mah? Kau-tài Chú, sı̀n I lâi ló͘-le̍k, kàu-boé tek-khak ē sêng-kong. (L. J. S.) 11 Ge̍h 22 Jı̍t Kim-kù: Goān lín pêng-an; Goá chhe lín, chhin-chhiūⁿ Pē ū chhe Goá. (Iok-hān 20:21) Ū chı̍t-pái kàu-hoē siū toā khún-tio̍k, hoē-iú lóng chin kiaⁿ, in-ūi nā hō͘ lâng chai-iáⁿ i sı̄ thiaⁿ tō-lí ê, lâng chiū lâi lia̍h in, chiong in ê ke-hoé lóng the̍h-khı̀, lâng iā soà lia̍h-khı̀ koaiⁿ tı̄ kaⁿ-nı̍h, ū ê hō͘ lâng hāi-sí. Só͘-í in nā beh kèng-pài Siōng-tè lóng tio̍h koaiⁿ-mn̂g, iā chin kiaⁿ lâng chai-iáⁿ, Sèng-keng, sèng-si lóng tē tiàm la̍k-tē-á lāi-bı̄n, m̄-káⁿ hō͘ lâng khoàⁿ-kı̀ⁿ. Tı̄ hit ê kàu-hoē lāi ū 3 ê chheng-liân lâng, ū chı̍t ē-hng khı̀ chhoē bo̍k-su, kóng, “Bo̍k-su kiám ū-iáⁿ ū Iâ-so͘, nā ū thái bô tùi thiⁿ-téng chhe thiⁿ-sài lâi lia̍h chiah ê hām-hāi lán ê lâng.” Bo̍k-su kā i kóng, Lí m̄-thang giâu-gı̂ Siōng-tè, Siōng-tè só͘ chò ê tāi-chı̀, bô chiàu lâng ê só͘ siūⁿ, lín tio̍h m̄-thang giâu-gı̂, it-hoat pek-chhiat kı̂-tó, chiū beh khoàⁿ-kı̀ⁿ Siōng-tè ê koân-lêng. Hit sı̂ bo̍k-su chiū chio hit 3 ê chheng-liân lâng kūi tı̄ pài-tn̂g-thiâⁿ kı̂-tó. Hit 3 ê chheng-liân chiàu lûn kı̂-tó, lûn liáu bo̍k-su koh kóng lóng chhut-siaⁿ pek-chhiat kı̂-tó. 4 ê lâng ê kı̂-tó hut-jiân chhin-chhiūⁿ kui-pah lâng ê siaⁿ, pài-tn̂g chhin-chhiūⁿ jı̍t--sı̂ ê khoán, kng iàⁿ-iàⁿ. Thiaⁿ-kı̀ⁿ siaⁿ kóng, “Goān lín tāi-ke pêng-an; Goá beh chhe lín khı̀ sı̀-koè thoân hok-im.” Saⁿ ê chheng-liân ê tiong-kan, kı̂-tiong chı̍t ê kiò-chò Jı̂n-tek, chhut-siaⁿ hoah chhut-lâi, bo̍k-su ah...... sı̄ Iâ-so͘ ê siaⁿ, oa̍h-oa̍h ê Chú kó-jiân bô lı̄-khui lán, Ha-le-lu-iah, sı̀ ê lâng chhut-siaⁿ gı̂m-si. Sèng-si 103 siú Hok-im cheng-siaⁿ teh toā-tân,
Thiaⁿ-kı̀ⁿ kàu chèng-hái kap soaⁿ,
Pò-thoân tı̍t-kàu hoaⁿ-hí siau-sit,
Pe̍h-pe̍h siúⁿ-sù lí kap goá;
“Siōng-tè chiong to̍k-siⁿ ê kiáⁿ,
Siúⁿ-sù sè-kan bān-bān lâng,
Sı̀n-khò Kiù-chú put-lūn chı̄-chūi,
Oē-tit éng-oán oa̍h ún-tàng.” (Chit ê sı̂-chūn chhiáⁿ kàu-oân kiò ha̍k-seng lóng gı̂m chit-chat liáu chiah koh kóng) Chit 4 ê gı̂m liáu, sim chhiong-moá khoài-lo̍k, koat-sim beh jı̍p soaⁿ thoân tō-lí, tùi hit-tiap khí m̄-kiaⁿ khún-tio̍k, m̄-kiaⁿ sí phe-miā ūi Chú chò kiàn-chèng, tit-tio̍h choē-choē lâng hoán-hoé lâi sı̀n Iâ-so͘. Chhiáⁿ koh lâi liām kin-á-jı̍t ê kim-kù. (I. L. Chh.) 11 Ge̍h 29 Jı̍t Kim-kù: Lâi tè Goá, Goá beh hō͘ lín tit-tio̍h lâng chhin-chhiūⁿ thó-hı̂ ê. (Má-thài 4:10) Kò͘-sū: “Bē koé ê Má-lē” Má-lē khı̀ sı̀n Iâ-so͘ liáu-āu, m̄-nā ka-têng ê lâng pháiⁿ khoán-thāi i, liân choân chng ê lâng lóng hoán-tùi kong-kek i. Siong-sim ê Má-lē khiok chiàu-siông tı̄ chng-lāi teh bē a-má só͘ chò ê chı̀ⁿ-koé, chóng-sı̄ tùi i sı̀n Iâ-so͘ liáu-āu bô lâng ài koh kā i boé, tı̀-kàu i chí ū khang-khang tı̄ hit ê hân-léng ê ke-lō͘ teh kiâⁿ-se̍h. Má-lē bô sit-bōng bô hoê-sim, sui-jiân i tńg-khı̀ it-tēng oē hō͘ a-má mē lâi kūi tı̄ tn̂g-nı̍h, khiok i iáu-kú sêng-jı̄n sı̄ chı̍t ê sı̀n Iâ-so͘ ê lâng. In-ūi i chai-iáⁿ sı̀n Iâ-so͘ chiah ū Siōng-tè ê sù-hok. I kiâⁿ koè cha̍p-hoè tiàm ê a-peh ê mn̂g-kháu koè-khı̀ ê sı̂, a-peh chiū léng-chhiò i kóng, “Sè-sè ê poē-kàu-chiá.” I tùi piáⁿ-tiàm ê a-pô ê mn̂g-kháu koè ê sı̂ a-pô chiū bı̀-chhùi kā keh-piah ê lâng kóng, “M̄-chiâⁿ-kúi, sı̀n Iâ-so͘ ū sím-mı̍h lı̄-ek.” I kiâⁿ koè phah-thih ê a-chek ê tiàm-kháu koè-khı̀ ê sı̂, a-chek chiū kap tâng-phoāⁿ ê ta-po͘-lâng kóng-oē lâi thiau-lân i, “Sı̀n Iâ-so͘ m̄-bián bē koé hó lah, Iâ-so͘ oē siúⁿ-sù lah.” Bē-chhài ê a-chím, bē-bah ê lāu- a-peh lóng sı̄ lāu-iūⁿ tùi i chin hoán-kám. Liân ke-lō͘ ê gín-ná iā thí-chhiò i soà kā i phùi-noā, ūi-tio̍h án-ni kàu chin àm, Má-lē ê koé iáu-boē bē khı̀. Má-lē m̄-káⁿ tńg-khı̀ chí-ū khang-khang teh kiâⁿ. I kiâⁿ kàu tı̄ chı̍t ê an-chēng ê sı̍p-jı̄-lō͘ thâu ê sı̂, ū tú-tio̍h chı̍t ê pái-kha ê ta-po͘-lâng, poa̍h-tó tı̄ lō͘-nı̍h teh peh boē khí-lâi, Má-lē kín-kín pàng i ê koé-siuⁿ-á, lâi hû-chō͘ hit ê pái-kha ê lâng kàu tı̄ lō͘-piⁿ ê chio̍h-téng. “A-peh, lí án-choáⁿ tio̍h bô?” Má-lē án-ni mn̄g i. “Goá sı̄ chı̍t ê chhut-goā lâng, goá í-keng bô la̍t thang kiâⁿ lah.” Má-lē khoàⁿ i pak-tó͘ chin iau ê khoán, chiū the̍h i ê chı̀ⁿ-koé khí-lâi hō͘ i chia̍h. “Chin to-siā, lí sı̄ choè hó-sim ê cha-bó͘ gín-ná, goá kú-kú kiâⁿ-iû teh chhoē chit-khoán ê lâng, taⁿ goá bô chı̂ⁿ thang hō͘ lí, chí-ū chiong chit-pau lé-mı̍h sàng lí, chit ê lé-mı̍h tùi tı̄ kut-la̍t, hó-sim ê lâng sı̄ chin ū lı̄-ek, tùi tı̄ pı̂n-toāⁿ, pháiⁿ-sim ê lâng chiū bô ū lō͘-ēng.” Kàu-boé Má-lē chin hoaⁿ-hí toà hit ê lé-mı̍h tńg-khı̀ chhù-nı̍h. A-má chiap tio̍h hit pau lé-mı̍h, kā i tháu-khui lâi khoàⁿ, goân-lâi sı̄ kim-koe-chí, “Ū sím-mı̍h lō͘-ēng!” A-má chiū chiong hiah ê hiat tùi āu-bı̄n tiâⁿ khı̀. Keh-jı̍t iû-goân lóng bô lâng beh kā Má-lē bé koé, Má-lē tı̄ ke-lō͘ khang-khang teh kiâⁿ-se̍h, kàu chin àm, m̄-káⁿ tńg-khı̀. Āu-lâi tı̄ chı̍t ê piⁿ-kak ê lō͘-nı̍h khioh-tio̍h chı̍t ê moá-moá ê chı̂ⁿ-tē-á, lāi-bı̄n ū siá jı̄ kóng, Tiong-sı̍t-lō͘ saⁿ-hāng cha̍p-la̍k hō ê Nı̂-kek-lah a-peh ê...... Má-lē chiū chiong hit ê chı̂ⁿ-tē-á the̍h khı̀ kàu hit ê a-peh ê só͘-chāi. Hit ê lāu-lâng sı̄ ko͘-toaⁿ tài-pı̄ⁿ ê lâng, khoàⁿ-tio̍h Má-lē chiū kóng. “Goá it-seng teh chhoē chı̍t ê choè sêng-sı̍t ê lâng, goá í-keng chhoē-tio̍h lah. Goá bô sím-mı̍h thang pò-tap lí, chí-ū chiong chit ê lé-mı̍h lâi sàng lí, chit ê lé-mı̍h tùi tı̄ kut-la̍t, sêng-sı̍t ê lâng sı̄ chin ū lı̄-ek, tùi tı̄ pı̂n-toāⁿ bô sêng-sı̍t ê lâng sı̄ bô sím-mı̍h lı̄-ek.” Má-lē chiap tio̍h hit pau lé-mı̍h, chin hoaⁿ-hí cháu kàu chhù, a-má chiong hit ê tháu-khùi, goân-lâi sı̄ pe̍h-moâ-chí, “Ū sím-mı̍h lō͘-ēng!” A-má chin siū-khı̀ chiong hiah ê hiat tùi thâu-chêng tiâⁿ khı̀. A-má ê chı̀ⁿ-koé tiàm soà tó-khı̀ lah. Hit ê toē-hng khai-sí ū toā ki-hng, chhân-hn̂g ê ngó͘-kok lóng sí liáu-liáu, chē-chē lâng lóng bô kàu thang chia̍h lâi kiò khó͘. Chóng-sı̄ chí-ū Má-lē ta̍k-jı̍t un-khûn chhiūⁿ chúi ak hiah ê kim-koe-chí kap pe̍h-moâ-chí. Só͘-í bô kú hiah ê chéng-chí lóng khai-sí pù-íⁿ khui-hoe kiat-chí, ū ı̀-goā ê siu-sêng. A-má chiū chiong hiah ê khı̀ choè kim-koe-hún kap pe̍h-moâ-iû lâi tún moá in ê chhù-lāi. Āu-lâi ēng kim-koe-hún kap pe̍h-moâ-iû khı̀ chò chı̀ⁿ-koé, choân-chng ê lâng lóng chū-chı̍p pâi-lia̍t tı̄ Má-lē ê a-má ê chı̀ⁿ-koé tiàm lâi saⁿ-chiⁿ bé-koé. Hit ê koé-tiàm chiū tı̍t-tı̍t hoat-tián, khí sin-chhù, koà chiau-pâi kóng “Thiàⁿ kap sêng-sı̍t ê koé-tiàm” Má-lē tı̄ múi chı̍t-tè koé ê téng-bı̄n lóng khàm “Thiàⁿ kap Sêng-sı̍t” ê jı̄, choân-chng ê lâng khai-sí ūi-tio̍h Má-lē ê só͘ choè lâi kám-ho̍k i. Hit ê toē-hng soà chiâⁿ-chò kim-koe-hún kap pe̍h-moâ-iû ê chhut-sán-tē. Tùi án-ni choân-chng lóng chin toā hoat-tián. Chēng kàu-taⁿ léng-chēng ê pài-tn̂g í-keng chē-moá chē-chē sı̀n Chú ê lâng. Má-lē ê a-má toā hoat-châi, múi chı̍t-keng tiàm lóng oāⁿ sin, khiok chí-ū Má-lē chiàu kū ēng sêng-sı̍t, thiàⁿ-sim tı̄ hit ê chng-siā teh bē chı̀ⁿ-koé, taⁿ bô lâng oē koh pháiⁿ khoán-thāi i, á-sı̄ khi-hū i, cha̍p-hoè tiàm ê a-peh tùi i chiau-ho͘ kóng, “Sè-sè ê thiⁿ-sài goān lí pêng-an!” Piáⁿ-tiàm ê a-pô tùi i bı̂-chhiò kóng, “Siōng-tè ê sió kang-lâng, goá ài lí!” Phah-thih ê a-chek tùi i gia̍h-chhiú kóng, “Choân-chng ê un-jiû.” Hiah ê ke-lō͘ ê gín-ná khoàⁿ-tio̍h i, chiū cháu-oá lâi kóng, “Siōng-tè ê Má-lē, kā lí bé thiàⁿ ê chı̀ⁿ-koé”, á-sı̄ kóng, “Sêng-sı̍t ê chı̀ⁿ-koé”, nā-sı̄ bo̍k-su kóng, “Má-lē sı̄ Siōng-tè ê thó-hı̂ lâng.” (H. U.)