Ko Kim-seng ê phoe

Kin-nı̂ chiaⁿ-goe̍h kan Toā-o̍h ê ha̍k-seng, Ko Kim-seng, ū khı̀ kàu Hok-chiu jı̍p hit só͘-chāi ê Eng-hoâ Chu-ı̄ⁿ,ài o̍h Eng-kok oē kap kok-iūⁿ ê se-ha̍k. Hit-sı̂ Toā-siā kàu-hoē ê chip-sū, Phoaⁿ Ta-mo͘-lí, thiaⁿ-chai, i chiū sūn ki-hoē chhe i-ê hāu-siⁿ Mâu-keh kap i saⁿ-kap khı̀. In nn̄g lâng í-keng kàu-ūi jı̍p-o̍h, teh tha̍k-chheh; taⁿ chiong in-ê siau-sit ı̀n tı̄ ē-té:

Chiaⁿ goe̍h 24 jı̍t chiah khui-o̍h. Ha̍k-seng ū 200 goā lâng, goā-kok sian-siⁿ 4 lâng, pún-tē ê sian-siⁿ 8 lâng. Hit-jı̍t teh khui o̍h, tāi-seng tio̍h siá iok-jı̄, āu-lâi tiám-miâ, tiám-liáu chiàⁿ pài sian-siⁿ, soà pun iok-jı̄ hō͘ lán, lán tio̍h chiong iok-jı̄ kap sok-kim gı̂n pâng-soè the̍h-khı̀ kau kam-ı̄ⁿ, i chiū chhut siu-gı̂n toaⁿ. Kàu bı̂n-á-jı̍t teh tha̍k-chheh ê sı̂, nā ū hit-tiuⁿ chiah niá ū chheh. Chit o̍h-lāi chú-chia̍h ê lâng 6 lâng, ku-lí 3 lâng. Hoé-sı̍t lóng hō͘ in pau, chı̍t-goe̍h jı̍t tio̍h nn̄g-kho͘. O̍h-tn̂g í-kı̍p lâu-téng lâu-ē lóng-sı̄ ku-lí teh piàⁿ.

Goá tı̄ 2 goe̍h 29 jı̍t ū tú-tio̍h chı̍t-ê lâng lâi chhoē goá, goá lóng m̄-bat i, i kóng i sı̄ Tâi-pak-hú ê thoân-tō sian-siⁿ. Ia̍h ū thiaⁿ-kı̀ⁿ i kóng chit Tâi-lâm-hú ê sı̍t-chêng, só͘-í goá phah-sǹg i sı̄ láu-sı̍t, goá chiū pài-thok lâng khı̀ kā Si--Sian-siⁿ kóng, Si--Sian-siⁿ khiok hoaⁿ-hí chiap-la̍p i.

Hiān-sı̂ goán chit o̍h-nı̍h chá-àm í-keng ū chò lé-pài lah, chêng sı̄ kan-ta chá-khí sı̂ nā-tiāⁿ. Kàu chit kúi-jı̍t chiah chai ha̍k-seng ê sı̍t-gia̍h ū 236 lâng. Kı̄n-lâi chit o̍h-nı̍h ta̍k lé-pài ê pài-jı̄ iā ū siat kı̂-tó-hoē. Chit Hok-chiu pún-tē ê kı̂-tó-hoē sı̄ ta̍k lé-pài pài-sı̀ e-hng. Ia̍h ta̍k goe̍h-jı̍t ū siat chı̍t-pái siàu-liân ê lâng ê kı̂-tó-hoē, hiaⁿ-tı̄ chū-chı̍p saⁿ bián-lē.

Tı̄ chit-ūi ū kúi-nā hāng tāi-chı̀ chin kı̂. Tı̄ lé-pài-tn̂g-nı̍h cha-bó͘ gín-ná ē sái--tit khiā-khí kóng-oē chhin-chhiūⁿ ta-po͘ lâng ê khoán. Hiaⁿ-tı̄ ū-sı̂ teh kı̂-tó-hoē, khah chē lâng sûi-lâng kı̂-tó, thong lé-pài-tn̂g jióng kàu hoā-hoā háu, Bo̍k-su iû-goân sı̄ án-ni.

Ū chı̍t-ê ē-lâm lâng khı̀ Hok-chiu khiā-khí, ang-bó͘ bē thn̂g-á thàn-chia̍h, khiû-khiām lâi hō͘ i-ê kiáⁿ khı̀ Eng-hoâ chu-ı̄ⁿ tha̍k-chheh, tha̍k-kàu 4,5 nı̂ soà sí-khı̀. Taⁿ chit-chūn ang-bó͘ teh kā lâng kò͘-bōng.

Saⁿ-goe̍h 10 jı̍t goá ū khı̀ chı̍t-ê hiaⁿ-tı̄ ê chhù hù kı̂-tó-hoē, khoàⁿ-kı̀ⁿ lâi hù-hoē ê lâng chin oa̍h-tāng. Chit-ê lâng hō͘ lâng kı̂-tó chit-ê hiaⁿ-tı̄, i pún-jiân sı̄ tı̄ Eng-hoâ chu-ı̄ⁿ tha̍k-chheh, tiàm-tı̄ o̍h-lāi sı̄ chin pháiⁿ, lóng m̄-ài tō-lí. Tha̍k bô loā-kú chiū chhut-khı̀ pa̍t-keng tha̍k; āu-lâi khı̀ Thian-chin o̍h i-seng. Kàu chit-pang tńg-lâi it-khài pı̀ⁿ-khoán, soà pı̀ⁿ-chò chin jia̍t-sim ê lâng, ū-sı̂ kóng-khí i-ê pháiⁿ-khoán lâi bián-lē--lâng, ū-sı̂ khı̀ ke-nı̍h bē-chheh. Ū chı̍t-jı̍t i khı̀ bē-chheh ê sı̂ tú-tio̍h kúi-nā ê koaⁿ chē-kiō pâi-hān chhut, i chiū khiā--teh thèng-hāu in lâi. Kàu hiah-ê koaⁿ kàu, i chiū ēng Sèng-chheh pun hō͘ i, koaⁿ-hú ū hoaⁿ-hí chiap-la̍p.

Tı̄ chit 3 goe̍h 15 jı̍t o̍h-nı̍h ū pàng-ká nn̄g-jı̍t kú; 15 goá ū khı̀ Bí-pō͘-hoē ê pài-tn̂g lé-pài, hit-sı̂ sı̄ teh siàu-liām Iâ-so͘ sí ê jı̍t. Thong pài-tn̂g chin lāu jia̍t, lâng chē kàu that-that tı̄ⁿ, lāi-bı̄n sı̀-kè pâi-kàu choan-choan hoe-phûn. Pún-tē lâng kap goā-kok lâng lóng khı̀ hù. Teh chū-hoē ê sı̂ chı̍t-ê lâng chò chú-lí, i seng kóng kúi-kù tō-lí, āu-lâi chhiáⁿ goā-kok sian-siⁿ 3 ê khí-lâi kóng kúi-kù bián-lē hiaⁿ-tı̄, iā chhiáⁿ 3 ê pún-tē sian-siⁿ khí-lâi kóng. Kàu liáu-āu chiū kéng 12 lâng gâu gı̂m-si--ê, khí-lâi gı̂m-si. Gı̂m-liáu chiū-liōng 12 tiám chhut-chāi hiaⁿ-tı̄ khiā-khí lâi kóng, hit-jı̍t chin-chē lâng khiā-khí lâi kóng. Khı̀ hù-hoē ê lâng chiū-sı̄ Bí-í-bí ,Bí-pō͘-hoē, An-lı̍p-kan ê lâng. Pún-jiân bô chit-ê hoē, nā kàu Iâ-so͘ hō͘ lâng tèng-sí ê jı̍t chiū sûi-lâng chū-chı̍p; taⁿ sı̄ chin jia̍t-sim ê hiaⁿ-tı̄ i chiū chhut-lâi sı̀-koè chhiáⁿ ta̍k o̍h-tn̂g ê ha̍k-seng kap ta̍k kháu-chàu ê hiaⁿ-tı̄ khı̀ hia chū-chı̍p. Goá kàu-hia thiaⁿ tō-lí chin-chiàⁿ hoaⁿ-hí chhin-chhiūⁿ jı̍p kàu Sèng ê só͘-chāi. Hiān-sı̂ Hok-chiu oē iáu-bē kóng, chóng--sı̄ ē thiaⁿ chám-jiân chē.

Chit-chūn tı̄ chit Eng-hoâ chu-ı̄ⁿ lāi ê tō-lí chám-jiân iô-choah, chē-chē siàu-liân lâng put-chí ū sim tı̄ tō-lí. Ē-mn̂g ê lâng á-sı̄ Hok-chiu ê pài Siōng-tè ê lâng ta̍k lé-pài chū-chı̍p chò bián-lē-hoē. Ū-ê bô chū-chı̍p--ê in lóng chhut-khı̀ ta̍k só͘-chāi kà Chú-jı̍t-o̍h á-sı̄ thoân tō-lí. Chu-ı̄ⁿ lāi lēng-goā ū siat chı̍t-ê siàu-liân ê Ki-tok-hoē, tāi-ke saⁿ kó͘-bú ài tō-lí heng-ōng. Goá thiaⁿ lâng kóng chá-nı̂ tı̄ chit o̍h-nı̍h ha̍k-seng chin-pháiⁿ, taⁿ kàu chit-sı̂ goá khoàⁿ-kı̀ⁿ lóng bē, phah-sǹg sı̄ tùi chit-ê siàu-liân ê Ki-tok-hoē só͘ kám-hoà--tio̍h.

(Tâi-lâm Hú-siâⁿ Kàu-hoē-pò tē 145~146 hō, 1897 nı̂ 4~5 ge̍h)