Koa Bo̍k-su sı̄ Toā-tiū-tiâⁿ Ē-gû-bō-chhia koe ê lâng. I iáu-bē chhut-sı̀ ê sı̂ i ê pē-bú í-keng sı̄ pài Siōng-tè, sio̍k Toā-tiū-tiâⁿ ê kàu-hoē. I soè-hàn ê sı̂ ū tha̍k kàu-hoē ê Gı̄-sio̍k. Kàu 1894 nı̂ ū jı̍p Tām-súi Sı̂n-ha̍k-hāu. 1899 nı̂ ū chut-gia̍p, chiū siū phài choè thoân-tō-su khı̀ tiàm kúi-nā ūi ê kàu-hoē, chiū sı̄ Pat-lí-hun, Îⁿ-khut-á, Koe-lâng, Kı̂-lí-gān, Lâm-khàm, Toā-kho-hām; Pang-kiô, Saⁿ-kak-po͘. 1914 nı̂ ū khó choè Kàu-su, tâng-nı̂ 4 ge̍h 14 jı̍t ū siat-lı̍p choè Saⁿ-kak-po͘ Tông-hoē ê Bo̍k-su. Put-hēng ū jiám-tio̍h kúi-nā khoán ê phoà-pı̄ⁿ, chia̍h io̍h bô èng-hāu, chiū lâi jı̍p tı̄ Má-kai i-ı̄ⁿ tı̄-liâu ia̍h bô chhái-kang. Pún-nı̂ 2 ge̍h 17 jı̍t ē-po͘ 2 tiám poàⁿ cheng kè-óng, hióng-siū 42 hè. Āu-lâi ū chiong sí-thé kng tńg-khı̀ in chhù, kàu 19 jı̍t ē-po͘ 2 tiám poàⁿ cheng ū lâi Toā-tiū-tiâⁿ lé-pài-tn̂g chòng-sek. Gô͘ Bo̍k-su choè chú-lí, Siau Bo̍k-su kı̂-tó, Tân Bo̍k-su tha̍k Sèng-keng, Keh Bo̍k-su kóng lâi-le̍k, Gô͘ Bo̍k-su soat-kàu kap chiok-tó, lâi sàng-chòng ê lâm-lú kiōng ū 200 goā lâng.
Sàng-chòng ê hâng ngó͘ put-chí chhù-sū. Ta̍k lâng chin iu-būn, in-ūi Koa Bo̍k-su it-seng ê choè lâng, put-chí tek jı̂n hô, i kàu ta̍k só͘-chāi thoân tō-lí ū chı̄n pún-hūn, m̄-nā kàu-hoē lāi ê lâng khim-kèng i, chiū kàu-hoē goā ê lâng iā o-ló i, só͘-í it-tàn thiaⁿ-kı̀ⁿ i kè-óng ta̍k lâng chin siong-sim. I choè Chú ê kang thâu-bé 20 nı̂, choè thoân-tō-su 15 nı̂, choè Bo̍k-su oá 4 nı̂. Taⁿ i ê kang í-keng bêng-pe̍k, tit-tio̍h Chú ê kéng-tiàu, tńg-khı̀ chó͘-ke. Si-nı̍h ū kóng:
“Ū thó͘-toē i ê kng iâⁿ jı̍t-tàu.
Nā chhim-sı̀n chiū oē khoàⁿ kàu chin bêng.
Lán ê Pē tiàm tı̄-hia teh thèng-hāu.
Ū pı̄-pān ke̍k an-lo̍k ê pâng-keng.”
Koa An-lo̍k Bo̍k-su í-keng khı̀ kàu an-lo̍k ê pâng-keng. Lán ia̍h tio̍h ǹg-bāng āu-jı̍t ê an-lo̍k, oē saⁿ-kı̀ⁿ tı̄ êng-kng ê thian-kok, chiū-sı̄ thang koh-chài kap Koa An-lo̍k Bo̍k-su saⁿ-kı̀ⁿ, lâi tiàm tı̄ an-lo̍k ê pâng-keng.
Hiān-sı̂ Koa Bo̍k-su niû kap i ê kiáⁿ-jı̂ iáu tiàm tı̄ Saⁿ-kak-po͘ lé-pài-tn̂g, chhiáⁿ tāi-ke thoè i kı̂-tó, hō͘ i ê sim oē tit-tio̍h siū an-ùi. I ê tiōng-hu An-lo̍k í-keng tit-tio̍h an-lo̍k ê pâng-keng, só͘-í m̄ bián kè-thâu iu-būn, tio̍h ǹg-bāng pa̍t jı̍t oē kàu an-lo̍k ê pâng-keng, lâi kap i ê tiōng-hu An-lo̍k saⁿ-kı̀ⁿ, hióng-siū kú-tn̂g an-lo̍k ê hok-khı̀.
