Kàu-hoē Kong-pò, tı̄ 1960 nı̂ 5 goe̍h hō ū pò Chong-kàu-su ê pò-kò, “Chhiáⁿ an-sim” ê loē-iông, kóng chèng-hú ū chún lán koh kè-sio̍k ēng pe̍h-oē-jı̄ ê sū, tâng-sı̂ iā ū Chiā Keng Sian-siⁿ teh lūn-khí “Siáⁿ-sū kı̀m-chí lán ēng pe̍h-oē-jı̄” ê ho͘-io̍k; chit nn̄g-hāng sū-sı̍t ê chêng-hêng lâi tùi-chiò, sı̄ chin thang kiám-thó ê só͘-chāi, Tâi-oân Tiúⁿ-ló Kàu-hoē, nā kı̀m-iōng pe̍h-oē-jı̄, chiū kàu-sè ê hoat-tián, sı̀n-gióng ê chı̀n-pō͘ put-chí ū būn-tê.
Kàu-sè, sı̀n-gióng kap pe̍h-oē-jı̄ ū sím-mı̍h kan-sia̍p? Kiám ū éng-hióng kàu án-ni mah? Lán khoàⁿ koè-khı̀ chiong-kı̄n 100 nı̂ ê Tiúⁿ-ló kàu-hoē, Tâi-oân chong-kàu-sú hit ê kàu-sè, sı̀n-gióng kap kı̂-thaⁿ ê chı̀n-pō͘, lóng-sı̄ tit-tio̍h pe̍h-oē-jı̄ ê kòng-hiàn chin toā. Sui-jiân Jı̍t-pún thóng-tı̄ Tâi-oân 50 nı̂, khoàⁿ pe̍h-oē-jı̄ Sèng-keng kap khoàⁿ Jı̍t-bûn ê Sèng-keng ê tùi pí, sı̄ thiⁿ chha tē; iā hiān-sı̂ leh, iā sı̄ án-ni, sui-jiân bô thóng-kè, lán siūⁿ ē chai; iā tı̀-ı̀ teh tha̍k Sèng-keng ê, toā to-sò͘ sı̄ lāu lâng; chóng kóng ēng pe̍h-oē-jı̄ só͘ poê-iúⁿ ê sı̀n-tô͘ sı̄ choa̍t-tùi tāi to-sò͘, iû-kı̂ sı̄ chhân-chng toā pō͘-hūn lóng bô tha̍k kok-bûn, lóng ēng pe̍h-oē-jı̄ teh chı̀n-pō͘ tı̄ Ki-tok-kàu kàu-io̍k.
Pe̍h-oē-jı̄ chiàu só͘ tha̍k ê jı̄-bó lâi èng-iōng, piàn-hoà, chiū ē bêng-pe̍k lóng-chóng ê ı̀-sù, nā kok-bûn leh, bat jı̄ iā tio̍h ē-hiáu kái-sek, sı̄m-chı̀ ū sı̂ tio̍h ı̀-e̍k chiah ē bêng-pe̍k; pe̍h-oē-jı̄ ēng pē-bó-oē siá ê, chin chhián-bêng, ē-hiáu kóng, chiū ē-hiáu tha̍k, iā ē-hiáu siá chin chū-jiân, chin lı̄-piān.
Taⁿ chèng-hú chún lán kè-sio̍k ēng pe̍h-oē-jı̄, m̄-kú lán ka-kı̄ ū hoat-seng mâu-tún ê siau-sit. Goá thiaⁿ kóng Chú-jı̍t-o̍h hāu-tiúⁿ hoē-gı̄, ū koat-tēng beh chiong Kok-bûn chò Chú-jı̍t-o̍h kàu-io̍k ê bûn-jı̄, bô beh kà pe̍h-oē-jı̄. Tı̄ Tâi-lâm ê kàu-hoē ū chit kiāⁿ sū, āu-lâi kàu-oân ê kiông-tiau, chiah-koh kè-sio̍k kà pe̍h-oē-jı̄. Tı̄ Tâi-lâm to ū án-ni lè, siong-sı̀n pa̍t ūi kiám bô chit ê sū mah? Siáⁿ-sū Chú-jı̍t-o̍h hāu-tiúⁿ hoē-gı̄ beh chiong Kok-bûn chò Ki-tok-kàu kàu-io̍k ê bûn-jı̄? Kok-lâng kiám m̄-sı̄ tùi pe̍h-oē-jı̄ lâi tha̍k Sèng-keng khah khoài, khah bêng-pe̍k. Nā siāng sı̂-chūn ha̍k-sı̍p pe̍h-oē-jı̄ kap ha̍k-sı̍p Kok-bûn kàu ē hiáu tha̍k Sèng-keng lâi tùi-pí, tah-lo̍h chı̍t pêng khah Khoài. Pe̍h-oē-jı̄ sı̄ kúi lé-pài chiū ē, nā ēng Kok-bûn kiám-chhái tio̍h joā kú, oh-tit àn-sǹg; in-ūi Kok-bûn jı̄ chē, kái-sek ho̍k-cha̍p, che sı̄ chèng-lâng só͘ chai. Chiàu Chiā Keng Sian-siⁿ ê ín-lē, ū sı̂ siông-siông tha̍k bē chheng-chhó, hō͘ lâng thiaⁿ bē bêng, che sı̄ sū-sı̍t, goá bián koh thê-khí. Nā ēng pe̍h-oē-jı̄ chò ki-chhó͘, chiū ı̀-sù ē khah bêng, chiū im iā khah chiàⁿ; m̄-nā án-ni, goá só͘ chai ê sı̍t-lē, bô jı̍p ha̍k-hāu ê lāu-lâng, tùi ha̍k-sı̍p pe̍h-oē-jı̄ ē tha̍k Kok-bûn, iā ē siá phoe, tùi pe̍h-oē-jı̄ to̍k-ha̍k khı̀ ha̍k-sı̍p Kok-bûn kàu ē chò thoân-tō-su iā kúi-nā lâng. Nā siat-sú m̄-sı̄ ū pe̍h-oē-jı̄ ê ki-chhó͘, chiū bô chit hō ki-hoē. Tı̄ lán Tâi-oân, chong-kàu-siōng ê khan-bu̍t (cha̍p-chı̀ á-sı̄ chheh) chin chió, kai-chài kı̄n-nı̂ ū Oa̍h-miā bí-niû, Ka-têng ê pêng-iú, Lú Soan-tō-hoē-chı̀, chāi-lâi ê Kong-pò, lóng ēng pe̍h-oē-jı̄, chiah ē thang phó͘-kı̍p, chiah ē thang ka-kiông poê-iúⁿ kiān-choân ê sı̀n-gióng, hō͘ kàu-sè chı̀n-tián. Pe̍h-oē-jı̄ ê kòng-hiàn m̄-sı̄ sió-khoá, chhú-āu kàu-hoē kàu-io̍k eng-kai ài ka-kiông kà pe̍h-oē-jı̄ sı̄ choè iàu-kín ê būn-tê.
(Tâi-oân Kàu-hoē Kong-pò tē 858 hō, 1960 nı̂ 6 goe̍h)
