Tāi-seng lâi khoàⁿ nn̄g chat ê Sèng-keng. Pí-tek chiân-su tē 2 chiuⁿ tē 1 chat kap tē 2 chat.“Lín kı̀-jiân tû-khı̀ it-chhè ê ok-to̍k, khúi-khiat, kap ké-hó, oàn-tò͘, kap it-chhè húi-pòng ê oē, chiū tio̍h ài-bō͘ hit ê choan ê sı̂n-lêng ê lin, chhin-chhiūⁿ tú-á chhut-sı̀ ê eⁿ-á ài-bō͘ lin chı̍t-iūⁿ, hō͘ lín tùi chit ê, chiām-chiām tióng-toā, kàu tit-tio̍h kiù.”
Tı̄ chia kā lán kóng í-keng têng-thâu-siⁿ ê lâng khiàm-ēng sio̍k-lêng ê lin. Sím-mı̍h sı̄ sio̍k-lêng ê lin? Sèng-keng (Siōng-tè ê oē) chiū-sı̄ sio̍k-lêng ê lin. EN-á chhut-sı̀ í-āu, chiū khiàm-ēng chia̍h-mı̍h. Tāi-seng ēng lin iúⁿ-chhı̄, khah toā-hàn chiū chia̍h bê, koh-khah toā-hàn ê sı̂ chiū chia̍h-pn̄g. Chia̍h-mı̍h hō͘ eⁿ-á chiām-chiām tióng-toā, pó-siú jio̍k-thé ê oa̍h-miā. Tú chhin-chhiūⁿ án-ni, í-keng têng-thâu-siⁿ ê lâng, sı̄ sio̍k-lêng ê eⁿ-á, iā khiàm-ēng sio̍k-lêng ê lin. Tha̍k Sèng-keng chiū-sı̄ chia̍h sio̍k-lêng ê lin. Chit-pún Sèng-keng sı̄ kı̂-biāu ê chheh, m̄-nā sı̄ sio̍k-lêng ê lin, iā sı̄ sio̍k-lêng ê bê, iā sı̄ sio̍k-lêng ê pn̄g. Só͘-í bô-lūn lí têng-thâu-siⁿ loā-choē nı̂, bô-lūn lí ê lêng-sèng loā-nı̍h tióng-chı̀n, sı̄m-chı̀ chiâⁿ-choè sio̍k-lêng ê toā-lâng, lí iû-goân sı̄ khiàm-ēng chit pún Sèng-keng lâi pó-siú lí ê lêng-miā.
Tú-chiah só͘ tha̍k Sèng-keng ê lō͘-bé kù kóng: “Hō͘ lín tùi chit ê, chiām-chiām tióng-toā, kàu tit-tio̍h kiù.” Chit-kù ê ı̀-sù m̄-sı̄ kóng tio̍h tha̍k Sèng-keng chiah oē tit-tio̍h kiù. Lán tit-kiù sı̄ tùi un-tián. Lán ê choē tit-tio̍h sià-bián, koh chiap-siū Sèng Sı̂n, á-sı̄ chheng choè gı̄, lóng sı̄ un-tián. Sı̄ tùi sı̀n Iâ-so͘ lâi tit-tio̍h pe̍h-pe̍h ê un-tián. Lán m̄-bián lo̍h Tē-ge̍k oē thang chiūⁿ Thian-tông chiah ê un-tián tı̄ lán têng-thâu-siⁿ ê sı̂, Chú í-keng sù hō͘ lán lah. Só͘-í m̄-sı̄ oá-khò tha̍k Sèng-keng lâi tit-tio̍h kiù. Tú-chiah só͘ tha̍k “Hō͘ lín tùi chit ê (tha̍k Sèng-keng), chiām-chiām tióng-toā kàu tit-tio̍h kiù” ê ı̀-sù, sı̄ kóng tha̍k Sèng-keng oē hō͘ lán ê lêng-sèng tióng-chı̀n, koh oē pó-siú lán ê lêng-miā.
Lí him-bō͘ ka-kı̄ ê lêng-sèng tióng-chı̀n mah? Lí ài lí ê lêng-miā ióng-kiāⁿ hoa̍t-phoat á-bô? Tio̍h tha̍k Sèng-keng.
“Beh cháiⁿ-iūⁿ tha̍k Sèng-keng?” Siông-siông tú-tio̍h lâng mn̄g chit ê būn-toê. Tı̄ chia beh tùi lia̍t-ūi kóng-khí koan-hē tha̍k Sèng-keng ê kúi-hāng sū.
1. Kiù-sè-kun ê Ui-liâm Bú-sù Kài-siāu Tha̍k Sèng-keng ê Hong-hoat Tio̍h Chhin-chhiūⁿ Chia̍h Hı̂ ê Khoán.
Lán teh chia̍h hı̂, pèng-bô ū kui-tēng tek-khak tio̍h chiàu sūn-sū tùi hı̂-thâu chia̍h khí, chia̍h kàu hı̂-bé. Ū lâng hoaⁿ-hí án-ni, thang án-ni choè. Chóng-sı̄ ū ê ài seng chia̍h liám-tó͘, ū ê ài tāi-seng chhńg hı̂-bé, ta̍k-lâng thang chiàu ka-kı̄ ê só͘ ài, ài tāi-seng chia̍h tá-lo̍h chı̍t pō͘-hūn, chiū seng chia̍h hit pō͘-hūn. Chhin-chhiūⁿ án-ni, tha̍k Sèng-keng iā m̄-sı̄ kui-tēng tek-khak tio̍h chiàu sūn-sū tùi Chhòng-sè-kí it-tı̍t tha̍k kàu Khé-sı̄-lio̍k. Thang chiàu lí ê só͘-ài, ài beh tāi-seng tha̍k Chim-giân Si-phian, á-sı̄ beh seng tha̍k Iok-hān hok-im-su, á-sı̄ beh seng tha̍k Chhòng-sè-kí, lóng bô iàu-kín. Chóng-sı̄ ài chia̍h hı̂ liám-tó͘ ê lâng, nā ta̍k-pái lóng chia̍h hı̂ ê liám-tó͘, chiū m̄-chai choân bé hı̂ ê chu-bı̄. Chhin-chhiūⁿ án-ni, ài tha̍k Si-phian Chim-giân ê lâng m̄-thang ta̍k-pái kan-ta tha̍k Si-phian Chim-giân nā-tiāⁿ, su-iàu bān-bān chiong Sèng-keng choân-pō͘ iā lóng tha̍k-liáu, án-ni chiah oē chai choân-pún Sèng-keng ê chu-bı̄.
Koh lán chia̍h hı̂ ê sı̂, pêng-siông chí-ū chia̍h hı̂-bah nā-tiāⁿ, hı̂-kut hı̂-lân bô chia̍h. M̄-sı̄ hı̂-kut hı̂-lân boē-chia̍h-tit á-sı̄ bô chu-ióng, sı̄ in-ūi bô keng-kè tú-hó ê chú-hoat, pháiⁿ-sè chia̍h, só͘-í lán chiah bô chia̍h. Tng lán teh tha̍k Sèng-keng ê sı̂, ū ê pō͘-hūn sı̄ lán ê hı̂-kut kap hı̂-lân. Ū lâng tha̍k Bı̂n-sò͘-kı̀ ê sı̂, tha̍k kàu kı̀-lio̍k choē-choē lâng-miâ á-sı̄ só͘-chāi-miâ ê só͘-chāi, chiū kám-kak khùn-lân tha̍k, chia-ê sı̄ i ê hı̂-kut kap hı̂-lân. Tı̄ tha̍k Sèng-keng ê sı̂, oē hō͘ lí kám-kak khùn-lân tha̍k, khùn-lân liáu-kái ê pō͘-hūn, chiū-sı̄ lí ê hı̂-kut kap hı̂-lân. Lí thang chiong chia-ê làng kè-khı̀, bô tha̍k bô iàu-kín. Chóng-sı̄ chhiáⁿ m̄-thang ngō͘-hoē, pèng m̄-sı̄ kóng chia-ê ı̀-sù, bô lō͘-ēng. Lí put-kò sı̄ chiong chiah ê chiām-chhiáⁿ pàng hē-teh bô chia̍h, thèng-hāu í-āu ki-hoē tha̍k cha-keng ê chheh, á-sı̄ hù cha-keng-hoē ê sı̂, pa̍t-lâng oē chú hō͘ lí chia̍h. Ū sı̂ tha̍k Sèng-keng, hiān-chāi tha̍k boē liáu-kái, tio̍h thèng-hāu kúi-nı̂ āu, Sèng Sı̂n chiah oē hō͘ lí bêng-pe̍k, hō͘ lí hióng-siū. Só͘-í tha̍k Sèng-keng ê sı̂, chí-ū hióng-siū lí só͘ oē liáu-kái ê pō͘-hūn chiū hó, khùn-lân tha̍k ê pō͘-hūn thang chiām-chhiáⁿ làng kè-khı̀, bo̍h-tit hō͘ chia-ê hı̂-kut hı̂-lân lâi chó͘-tòng lí kè-sio̍k Sèng-keng. Í-siōng sı̄ Ui-liâm Bú-sù kài-siāu lán tha̍k Sèng-keng ê hoat-tō͘.
2. Ūi-tio̍h Ka-kı̄ Tha̍k.
Lán teh tha̍k Sèng-keng tio̍h chhin-chhiūⁿ niû-á teh chia̍h sng-châi-chhiū-hio̍h ê khoán. Tú-chiah chhut nn̄g ê niû-á, chin soè-bé o͘-phú-sek. Ná chia̍h sng-châi-chhiū-hio̍h, chiū chiām-chiām toā bé piàn pe̍h-sek, āu-lâi sin-thé piàn ná chhin-chhiūⁿ thàu-bêng ê khoán, sı̄m-chı̀ thò͘-chhut súi-súi ê si. Tha̍k Sèng-keng nā ūi-tio̍h ka-kı̄ tha̍k, iā beh chhin-chhiūⁿ án-ni. In-ūi Sèng-keng sı̄ Siōng-tè ê oē, m̄-nā oē hō͘ lán ê lêng-sèng tióng-toā, koh oē hō͘ lán tit-tio̍h chheng-khı̀ ê chok-iōng. Chú kóng: “Taⁿ lín in-ūi Goá só͘ kā lín kóng ê tō-lí í-keng chheng-khı̀ lah.” (Iok-hān 15:3).“Siàu-liân lâng tio̍h ēng sím-mı̍h lâi chheng-khı̀ i ê só͘-kiâⁿ? Sı̄ tio̍h chiàu Lí ê oē lâi soè-jı̄ kiâⁿ” (Si-phian 119:9). Só͘-í lán nā ūi-tio̍h ka-kı̄ tha̍k Sèng-keng, Sèng Sı̂n ê kong-chok beh hō͘ lán chhin-chhiūⁿ niû-á ê khoán, m̄-nā lêng-sèng tióng-chı̀n, ná-kú ná sèng-kiat, hoat-kng, koh oē thò͘-chhut si lâi lı̄-ek pa̍t-lâng.
Bat ū chı̍t-ūi ha̍k-hāu ê kàu-oân lâi tùi goá tâu i hū-jı̂n-lâng ê tāi-chı̀. Liân-sio̍k lâi tâu kúi-nā pái. Ū chı̍t-chá-khí chin chá lâi chhē goá, mn̄g khoàⁿ thang kap i ê hū-jı̂n-lâng lı̄-hun á-bô? Hit sı̂, goá hut-jiân siūⁿ-khí chit-ūi hiaⁿ-tı̄ boē thang thun-lún tek-sèng, kiám-chhái sı̄ bô teh tha̍k Sèng-keng kı̂-tó, só͘-í khiàm-kheh le̍k-liōng. Só͘-í goá mn̄g i múi chá-khí ū teh lêng-siu á-bô? Chá-khí ū tha̍k Sèng-keng á-bô? I kóng ū. Goá mn̄g i chá-khí tha̍k tó-ūi ê Sèng-keng. I kóng, tha̍k kàu Chim-giân tē 14 chiuⁿ.
Goá koh mn̄g i tha̍k-liáu ū tit-tio̍h sím-mı̍h kà-sı̄ á-bô? I kóng tha̍k-tio̍h hit kù “Sò-sèng ê, toā hián gû-gōng”, put-chí ū só͘ kám-kak. I kóng che tú-tú sı̄ i hū-jı̂n-lâng ê khoán-sit. Goá kā i kóng: “Hiaⁿ-tı̄ ah, lí tha̍k Sèng-keng, sı̄ ūi-tio̍h lí ê hū-jı̂n-lâng teh tha̍k, bô ūi ka-kı̄ tha̍k, án-ni, tùi lí bô lı̄-ek.” Ū chı̍t-pái, tı̄ goá káng-tō liáu ê sı̂, liâm-piⁿ ū chı̍t-ūi chí-bē lâi chhē goá, kā goá kóng: “Ē-po͘ ê káng-tō chin hó, chin ha̍h bó͘-lâng thiaⁿ, chin khó-sioh, ē-po͘ khoàⁿ i lóng bô lâi chū-hoē.” Ū loā-choē lâng thiaⁿ káng-tō, sı̄ teh ūi-tio̍h pa̍t-lâng thiaⁿ, kan-ta teh chù-ı̀ “chit kù ha̍h sím-mı̍h hiaⁿ thiaⁿ, hit-kù ha̍h sím-mı̍h ché thiaⁿ, ”thoè pa̍t-lâng thiaⁿ-kàu chin bô êng, chóng-sı̄ ūi-tio̍h ka-kı̄ khiok bô thiaⁿ poàⁿ-kù, sı̍t-chāi chin khó-sioh. Bat ū chı̍t-ūi bo̍k-su siū chhiáⁿ khı̀ chı̍t-keng kàu-hoē chú-lí lé-pài. Hit-jı̍t in-ūi hong-hō͘ chin-toā, sui-jiân kòng-cheng liáu, lâi lé-pài ê lâng chí-ū chı̍t-ūi nā-tiāⁿ. Bo̍k-su pún-lâi siūⁿ m̄ kú-hêng lé-pài, chóng-sı̄ koh siūⁿ tò-tńg, siūⁿ kóng tio̍h choè Chú tiong-sim ê lô͘-po̍k, só͘-í chiū chiūⁿ káng-tâi téng, chhin-chhiūⁿ teh chhoā hoē-chiòng lé-pài ê khoán, chiàu i só͘ pı̄-pān ê, chhoā hit-ūi hiaⁿ-tı̄ choè lé-pài, lé-pài soah ê sı̂, hit-ūi hiaⁿ-tı̄ kā bo̍k-su kóng: “Bo̍k-su ah, chá-khí lí ê káng-tō toā-toā chhı̀-chha̍k goá ê sim. Í-chêng goá lâi lé-pài, lóng siūⁿ kóng tâi-téng ê káng-tō sı̄ tùi tāi-ke teh kóng, nā-sı̄ chá-khí kan-ta goá chı̍t-ê teh thiaⁿ tō-lí nā-tiāⁿ, só͘-í chiū siūⁿ kóng chá-khí lí só͘ kóng ê, lóng sı̄ teh tùi goá kóng--ê, só͘-í goá ê sim siū chhı̀-chha̍k. Taⁿ goá í-āu beh hoé-kái, choè tiong-sı̍t ê Ki-tok-tô͘.” Chit-ūi hiaⁿ-tı̄ í-chêng lóng sı̄ ūi-tio̍h hoē-chiòng teh thiaⁿ tō-lí, só͘-í ka-kı̄ bô tit-tio̍h pang-chān. Tı̄ chit-pái ūi-tio̍h ka-kı̄ thiaⁿ tō-lí ê sı̂, pún-sin chiah tit-tio̍h lı̄-ek. Só͘-í bô-lūn tha̍k Sèng-keng á-sı̄ thiaⁿ káng-tō, lóng tio̍h ūi-tio̍h ka-kı̄ tha̍k, ūi-tio̍h ka-kı̄ thiaⁿ, chiah ū lı̄-ek.
3. M̄-thang In-ūi Tha̍k-liáu Khoài Boē Kı̀-tit Chiū Bô Tha̍k
Ū lâng kóng i tha̍k Sèng-keng bô chhái-kang, in-ūi tha̍k-liáu chin khoài boē-kı̀-tit, ūi-tio̍h án-ni soà thêng-chí bô koh kè-sio̍k tha̍k. Sèng-keng nā sı̄ sio̍k-lêng ê chia̍h-mı̍h, chiū tha̍k liáu boē-kı̀-tit, iā sı̄ ū lı̄-ek, m̄-thang kóng bô chhái-kang. Chhı̀-siūⁿ, lí iáu-kú oē kı̀-tit tı̄ chı̍t lé-pài chêng só͘ chia̍h--ê, sı̄ sím-mı̍h mı̍h-kiāⁿ á-bô? Tı̄ chı̍t lé-pài chêng ê kin-á-jı̍t, lí phoè kúi-hāng chhài? Sı̄ phoè-sím-mı̍h chhài? Kiám-chhái lí í-keng siūⁿ boē chhut-lâi, chóng-sı̄ lán tiong-kan pèng bô lâng in-ūi gâu boē-kı̀-tit ka-kı̄ só͘ chia̍h ê sı̄ sím-mı̍h mı̍h, chiū thêng-chí bô beh kè-sio̍k chia̍h. Lán ta̍k-jı̍t só͘ chia̍h ê mı̍h, sui-jiân chin khoài boē-kı̀-tit, lán iû-goân sı̄ kè-sio̍k beh chia̍h, in-ūi sui-jiân gâu boē-kı̀-tit, it-tàn nā ū chia̍h-lo̍h--khı̀, chóng-sı̄ tùi lán ê sin-thé ū lı̄-ek, siau-hoà í-āu, oē chiâⁿ-choè lán sin-thé ê le̍k-liōng. Tha̍k Sèng-keng ê chêng-hêng iā chhin-chhiūⁿ án-ni. Lí ēng kı̂-tó só͘ tha̍k ê Sèng-keng, ū Sèng Sı̂n ê kong-chok, tek-khak chiâⁿ choè lí lêng-sèng siōng ê chu-ióng, chiâⁿ-choè lí sio̍k-lêng ê khùi-la̍t.
Chiàu chı̍t-poaⁿ Ki-tok-tô͘ ê keng-giām, pêng-sı̂ só͘ tha̍k ê Sèng-keng chhin-chhiūⁿ chin gâu boē-kı̀-tit ê khoán, chóng-sı̄ it-tàn nā tú-tio̍h khiàm-ēng Siōng-tè ê oē ê sı̂, ū chin kı̂-biāu ê hiān-siōng, chiū-sı̄ oē èng hit-sı̂ ê khiàm-ēng, siūⁿ-chhut Siōng-tè ê oē. Che sı̄ Chú bat èng-ún ê sū, Chú kóng che sı̄ Sèng Sı̂n só͘ choè ê kang. “Nā sı̄ Pó-hūi-su chiū-sı̄ Sèng-Sı̂n, Pē tı̄ goá ê miâ só͘ beh chhe ê, I beh chiong it-chhè ê sū kà-sı̄ lín, koh beh hō͘ lín kı̀-tit (Tiong-bûn ê hoan-e̍k sı̄ “siūⁿ-khí”) goá it-chhè só͘ kā lín kóng ê.” (Iok-hān 14:26)
Ū chı̍t-pái goá tùi Hok-kiàn ê Ko-phó͘ chhiàⁿ chı̍t-chiah sió-chûn beh khı̀ Āu-khoe. Kè-chı̂ⁿ kóng hó-sè í-āu, goán chiū chhut-hoat. Chóng-sı̄ chûn sái kàu Tàiⁿ-châiⁿ (só͘-chāi miâ), hit ê kò-chûn ê lâng chiū kiò goá chiū án-ni chiūⁿ hoāⁿ. Goá kā i kóng, goá sı̄ beh Āu-khoe, nā-sı̄ i bián-kióng goá ēng kiâⁿ lō͘ khı̀, in-ūi chí-ū chiâⁿ-lí-lō͘ nā-tiāⁿ. Goá kóng, goá ū toà hêng-lí, kiâⁿ-lō͘ bô lı̄-piān, koh goá kap i iok, sı̄ kàu Āu-khoe, m̄-sı̄ kàu Tàiⁿ-châiⁿ. I kóng koh khí-khı̀ hit chām, chúi lâu khah kip kan-khó͘ kò, iā jı̍t-thâu teh beh lo̍h-soaⁿ, kiaⁿ-liáu i beh tò-khı̀ Ko-phó͘ siuⁿ àm. Goá sı̍t-chāi bô goān-ı̀ koāⁿ hêng-lí kiâⁿ-lō͘, goá iā bô hoaⁿ-hí kò-chûn ê lâng bô chiàu iok kiâⁿ. Tı̄ hit-sı̂, hut-jiân tı̄ goá ê sim-lāi phû-chhut chı̍t-chat Sèng-keng ê oē, chiū-sı̄ Chú só͘ kóng ê oē: “Nā ū lâng bián-kióng lí kiâⁿ chı̍t lí, chiū tio̍h kap i kiâⁿ nn̄g lí.” (Má-thài 5:41) Tng Sèng Sı̂n hō͘ goá siūⁿ-khí chit kù oē ê sı̂, goá liâm-piⁿ chiū chin hoaⁿ-hí koāⁿ hêng-lí chiūⁿ hoāⁿ.
Pêng-sı̂ chhin-chhiūⁿ boē-kı̀-tit ê khoán, chóng-sı̄ tı̄ su-iàu ê sı̂, Sèng Sı̂n oē hō͘ lán siūⁿ-khí Chú ê oē. Só͘-í tha̍k Sèng-keng gâu boē-kı̀-tit, m̄-bián hoe-sim, m̄-thang thêng-chí bô tha̍k.
4. M̄-thang Sím-phoàⁿ Sèng-keng
Tng Chú Iâ-so͘ khiā tı̄ chóng-tok Pí-lia̍p-to ê bı̄n-chêng siū khòng-kò siū sím-mn̄g ê sı̂, “Chú Iâ-so͘ bô ı̀n i chı̍t-kù oē, tı̀-kàu chóng-tok toā kı̂-koài.” (Má-thài 27:14) Pêng-siông-sı̂ lán khoàⁿ-kı̀ⁿ Chú sı̄ un-jiû khiam-sùn, hō͘ lâng hó chhin-kūn. Ū sı̂ Chú Iâ-so͘ káng-tō soah, chin ià-siān, ha̍k-seng mn̄g i boē-bêng ê tāi-chı̀, Chú it-it siông-sè soat-bêng hō͘ in thiaⁿ. Tı̄ bô êng ê sı̂, choè lāu-bú ê lâng chhoā gín-ná lâi beh kiû Iâ-so͘ kā in chiok-hok. Chú Iâ-so͘ iā it-it chhin-chhiat chiap-thāi hiah ê gín-ná. Siāng chit chı̍t-ūi Iâ-so͘, tı̄ Pí-lia̍p-to ê bı̄n-chêng khiok koaiⁿ-chhùi m̄ ı̀n-tap, tı̀-kàu Pí-lia̍p-to toā kı̂-koài. Che sı̄ sím-mı̍h iân-kò͘? Chiū-sı̄ in-ūi Pí-lia̍p-to khiā tı̄ sím-phoàⁿ ê tē-ūi teh mn̄g Iâ-so͘. Bô-lūn siáⁿ-lâng nā ēng sím-phoàⁿ ê thāi-tō͘ tùi-thāi Iâ-so͘, Chú Iâ-so͘ lóng beh ǹg i chēng-be̍k m̄ ı̀n-tap. Só͘-í tha̍k Sèng-keng ê sı̂, nā ū chûn phêng-phoàⁿ ê sim lâi tha̍k, tha̍k iā bô chhái-kang, m̄-nā bô lı̄-ek hoán-tńg ū sún-hāi.
5. Tio̍h Sı̀n-ho̍k Siōng-tè ê Oē
Ū chı̍t-ūi se-kàu-sū kóng: “Lín Tiong-kok lâng teh tha̍k Sèng-keng ê thāi-tō͘ chin-hó. Ná tha̍k ná teh thı̀m-thâu.” (In-ūi Tiong-bûn ê Sèng-keng sı̄ siá tı̍t-choā, tha̍k ê sı̂ tùi téng-bı̄n khoàⁿ lo̍h ē-bı̄n, chhin-chhiūⁿ teh thı̀m-thâu ê khoán.) I koh kóng: “Goán goā-kok lâng tha̍k Sèng-keng ê thāi-tō͘ chin m̄-hó,ná tha̍k ná iô-thâu.” (In-ūi Eng-bûn ê Sèng-keng sı̄ siá hoâiⁿ-choā, tha̍k ê sı̂ tùi tò-pêng khoàⁿ-kàu chiàⁿ-pêng, chhin-chhiūⁿ teh iô-thâu ê khoán.) I án-ni kóng, sı̄ teh kóng chhiò. Tı̄ Tâi-oân,só͘ teh ēng Pe̍h-oē-jı̄ ê Sèng-keng, iā sı̄ siá hoâiⁿ-choā ê, chóng-sı̄ lán ê goā-bı̄n sui-jiân iô-thâu, sim-lāi khiok tio̍h thı̀m-thâu.“Tio̍h sı̀n-ho̍k Siōng-tè ê oē!”
Ū lâng chō chı̍t-ê kò͘-sū, kóng ū chı̍t-ê sin-phài ê sı̂n-ha̍k-hāu, tı̄ siōng-khò kà Sèng-keng ê sı̂, hoan-hù ha̍k-seng lóng tio̍h oē-kı̀-tit toà ka-to lâi. Tı̄ siōng-khò, kàu-siū káng-kái Sèng-keng ê sı̂, nā hoat-hiān bô ha̍p lí-tı̀, bô ha̍p kho-ha̍k ê pō͘-hūn, thang ēng ka-to kā i ka khí--lâi, kā i san-tû. Kiat-kó, chiong Sèng-keng lóng cha-oân chı̍t-piàn liáu-āu, chí-ū ka chhun 2 tiuⁿ nā-tiāⁿ, chiū-sı̄ chí-ū chhun 2 tiuⁿ Sèng-keng phê. Che sı̄ teh hóng-chhı̀ sin phài sı̂n-ha̍k ê kò͘-sū. Ì-sù sı̄ kóng tùi Sèng-keng nā ū khǹg giâu-gı̂, chiū choân-pún ê Sèng-keng lóng beh chiâⁿ choè gı̂-būn, sı̀n boē lo̍h.
Nā-sı̄ án-ni, Sèng-keng tiong hiah ê boē thang liáu-kái ê pō͘-hūn beh cháiⁿ-iūⁿ chhú-lí nih? To̍k-to̍k sı̀n-ho̍k Sèng-keng ê oē, in-ūi Sèng-keng lóng sı̄ Siōng-tè só͘ be̍k-sı̄ ê! (II Thê-mô͘-thài 3:16). Ū chı̍t-chat Sèng-keng pang-chān goá tùi Sèng-keng m̄-káⁿ khǹg giâu-gı̂. Chiū-sı̄ Pí-tek hō͘-su tē 3 chiuⁿ tē 8 chat, kóng: “Hiaⁿ-tı̄ ah, ū chı̍t-hāng lín m̄-thang boē-kı̀-tit, chiū-sı̄ Chú khoàⁿ chı̍t-jı̍t chhin-chhiūⁿ chı̍t-chheng nı̂, chı̍t-chheng nı̂ chhin-chhiūⁿ chı̍t-jı̍t. ” Chú khoàⁿ lán ê chı̍t-chheng nı̂ chhin-chhiūⁿ chı̍t-jı̍t! Chú nā khoàⁿ lán ê chı̍t-chheng nı̂ chhin-chhiūⁿ chı̍t-jı̍t, án-ni, Chú khoàⁿ lán só͘ teh kóng ê “jı̂n-seng 50 nı̂”sı̄ loā-kú? Put-kò sı̄ 1 tiám koh 12 hun-cheng nā-tiāⁿ! Lán kóng“Jı̂n-seng 50 nı̂”, Chú kóng “Jı̂n-seng sı̄ 1 tiám koh 12 hun-cheng.” Oāⁿ kù oē kóng, chı̍t-ê í-keng 50 hè ê lâng, kiám-chhái í-keng choè a-kong lah, keng-giām choē lah, nā-sı̄ tı̄ Siōng-tè ê ba̍k-chiu tiong sı̄ chhin-chhiūⁿ lán teh khoàⁿ chı̍t-ê tú chhut-sı̀ 1 tiám 12 hun-cheng ê eⁿ-á chı̍t-iūⁿ. Chit ê su-sióng, pó-siú goá khiam-pi m̄-káⁿ giâu-gı̂ Sèng-keng ê oē.
Tı̄ chia nā ū chı̍t-ê gō͘, la̍k-hè ê kiáⁿ-jı̂ thiaⁿ lâng kóng “Siā-hoē chú-gı̄” chit ê bêng-sû chiū lâi mn̄g lāu-pē khoàⁿ “Siā-hoē chú-gı̄” sı̄ sím-mı̍h ı̀-sù, lāu-pē chai-iáⁿ gín-ná ê lí-kái-le̍k iáu bô kàu-gia̍h thang bêng-pe̍k, chit-khoán ê soat-bêng, chiū chí-ū oē tùi i kóng “thèng-hāu khah toā-hàn ê sı̂ chiah kā lí kóng.” Siōng-tè tùi lán iā sı̄ án-ni, tı̄ Sèng-keng tiong só͘ kı̀-chài ê sū, ū ê lán tha̍k liáu boē bêng-pe̍k, chia-ê pèng m̄-sı̄ siá m̄-tio̍h á-sı̄ bô ı̀-sù. Sı̄ hiān-chāi lán boē thang liáu-kái, chóng-sı̄ ū chı̍t-jı̍t Sèng Sı̂n beh hō͘ lán liáu-kái. Chú kóng: “Goá iáu ū choē-choē hāng beh kā lín kóng, to̍k-to̍k lín hiān-kim boē oē liáu-kái, kàu chin-lí ê Sı̂n lâi, I beh chhoā lín bêng-pe̍k it-chhè ê chin-lí.” (Iok-hān 16:12,13. Tiong-bûn ê hoan-e̍k.) Só͘-í hiān-chāi lán tha̍k Sèng-keng ū boē liáu-kái ê pō͘-hūn, lán tio̍h siong-sı̀n. Chiàu lán lêng-sèng tióng-chı̀n ê thêng-tō͘, Sèng Sı̂n beh bān-bān chhoā lán bêng-pe̍k it-chhè ê chin-lí. Ū ê, kiám-chhái tio̍h bān kàu lı̄-khui sè-kan í-āu chiah hoē bêng-pe̍k. Só͘-í lán tha̍k Sèng-keng sui-jiân ū boē bêng-pe̍k ê só͘-chāi, iā tio̍h sı̀n-ho̍k lāi-bı̄n só͘ kóng ê!
6. Sèng-keng Kı̀ Hoān Choē ê Sū-sı̍t, Sı̄ Beh Choè Lán ê Kàm-kài
Ū-lâng tha̍k Sèng-keng, khoàⁿ-kı̀ⁿ lāi-bı̄n ū kı̀-chài Siōng-tè ê peh-sèⁿ chhoā sè-ı̂, chiú-chùi, ia̍h-sı̄ kóng pe̍h-chha̍t chióng-chióng hoān-choē ê sū-sı̍t, chiū siūⁿ-kóng án-ni chò, káⁿ sı̄ bô iàu-kín. Chhiáⁿ m̄-thang boē-kı̀-tit, Sèng-keng kı̀ chia-ê sū, sı̄ beh chò lán ê kàm-kài, m̄-sı̄ beh chò lán ê bô͘-iūⁿ. Sèng-keng m̄-nā kı̀ chiah ê hoān-choē ê hêng-ûi, iā-ū kı̀ chia-ê choē ê kiat-kó, sı̄ ūi-tio̍h beh hō͘ lán bêng-pe̍k “chèng sím-mı̍h chiū siu sím-mı̍h” ê tō-lí, thang choè kàm-kài siū kà-sı̄. Só͘-í m̄-thang lām-sám kú Sèng-keng tiong só͘ kı̀ hoān-choē ê lē lâi choè iam-hō͘ ê oē lâi hòng-chhiòng ka-kı̄ ê su-io̍k.
7. Tha̍k Sèng-keng ê Sı̂ Tio̍h Kı̂-kiû Sèng Sı̂n Kà-sı̄
Chú èng-ún: “chin-lí ê Sı̂n lâi, I beh ín-chhoā lín bêng-pe̍k it-chhè ê chin-lí.” (Iok-hān 16:13) Só͘-í tha̍k Sèng-keng ê sı̂ tio̍h kiû Sèng Sı̂n khui lán ê sim-khiàu, hō͘ lán oē hiáu-ngō͘ bêng-pe̍k. Sèng Sı̂n sı̄ chin-lí ê Sı̂n, iā sı̄ tı̀-hūi ê Sı̂n, I sı̄ chiàu ta̍k-lâng só͘ oē liáu-kái ê thêng-tō͘ khé-sı̄ chin-lí. Tú-chiah í-keng ū kóng liáu, ū ê būn-toê, Sèng Sı̂n bô liâm-piⁿ hō͘ lán bêng-pe̍k, chóng-sı̄ lí nā ū kı̂-kiû I kà-sı̄, lí thang chiong só͘ ū boē bêng ê būn-toê lóng kau-tài I, I oē thoè lí kı̀ hiah ê būn-toê, í-āu tı̄ tú-hó ê ki-hoē, i heh chiàu lí só͘ oē liáu-kái ê thêng-tō͘, chı̍t-hāng chı̍t-hāng tùi lí soat-bêng. Goá pún-sin sı̄ án-ni siong-sı̀n, iā sı̄ án-ni keng-giām.
Ū chı̍t-pái tı̄ chham-ka chheng-liân lâng ê chō-tâm-hoē ê sı̂, ū chı̍t-ūi tiong-ha̍k-seng khí-lâi kóng i iā ū chit-khoán ê keng giām. I kóng ū chı̍t chá-khí, i tha̍k kàu Lô-má tē 12 chiuⁿ tē 20 chat, kóng: “Lí ê tùi-te̍k nā iau, tio̍h hō͘ i chia̍h, chhùi-ta tio̍h hō͘ i lim, in-ūi kiâⁿ án-ni, sı̄ chiong jia̍t-jia̍t ê hé-thoàⁿ thia̍p tı̄ i ê thâu-khak téng.” I boē liáu-kái chit-chat ê ı̀-sù, chiū kı̂-tó kiû Sèng Sı̂n kà-sı̄ i bêng-pe̍k. Kı̂-tó liáu, Sèng Sı̂n chiū hō͘ i siūⁿ kàu nā chiong jia̍t-jia̍t ê hé-thoàⁿ thia̍p tı̄ thâu-khak téng sı̄ sím-mı̍h khoán ê kám-kak. Chiū-sı̄ oē sio, oē thiàⁿ, oē kám-kak tòng-boē-tiâu peh-khí-lâi thiàu. Sèng Sı̂n chı̍t-ē án-ni khui i ê sim-khiàu, i chiū liâm-piⁿ hiáu-ngō͘ bêng-pe̍k lah. I bêng-pe̍k,tùi-te̍k iau ê sı̂, nā hō͘ i chia̍h, chhùi-ta ê sı̂, nā hō͘ i lim, ēng thiàⁿ-sim, ēng hó, khoán-thāi i, chiū tùi-te̍k beh siū toā ê kám-kek kàu tòng-boē-tiâu, tú chhin-chhiūⁿ chiong jia̍t-jia̍t ê hé-thoàⁿ thia̍p tı̄ thâu-khak téng hit-khoán kiông-lia̍t tòng-boē-tiâu ê kám-kak. Kám-siā Sèng Sı̂n, I beh ín-chhoā lán bêng-pe̍k it-chhè ê chin-lí.
(Oa̍h-miā ê Bí-niû tē 33 kı̂, 1957 nı̂ 2 ge̍h)
