Koan-im-soaⁿ

Chit-tè thó͘-tē ū siáⁿ-mih bô kāng-khoán ê só͘-chāi? Tām-chúi-hô tı̄ pêⁿ-tē leh lâu, tān-sı̄ lí ē khoàⁿ-tio̍h chiok chē koài-chhiú ó͘ lâi ó͘ khı̀, lí bong bē tio̍h Tām-chúi-hô ê chúi, beh khoàⁿ Koan-im-soaⁿ ài tùi kang-têng ûi-chhiûⁿ-á ê khang thau-thau kā khoàⁿ, tō ná chhin-chhiūⁿ koaiⁿ tı̄ kaⁿ-ga̍k tán pàng-hong kāng-khoán. 10-goe̍h chhe-7 hit-kang, TGB kap Tâi-bûn-siā 1-tı̄n lâng chē tō͘-chûn chhoe hái-hong, ta̍k-ê thâu-mo iāⁿ-iāⁿ-poe, chhùi-kak tam-tio̍h hái-chúi leh bı̂-bı̂-á chhiò, chiàⁿ-káng sı̄ teh pàng-hong ê khoán. Lâi-kàu Koan-im-soaⁿ kha, sı̀-kè lóng sı̄ bōng-tē kap lêng-kut-thah, khak-sı̍t kap ùi Tām-chúi hit-thâu khoàⁿ--koè-lâi bô-kâng. Tı̄ chia, khoàⁿ khah chē khah chheng-chhó͘. Poàⁿ-tiong-hoâⁿ hioh-khùn, chē tı̄ chhêng-á kha lim-chúi nà-liâng, chhêng-á piⁿ sı̄ 1-keng kan-tan ê kám-á-tiàm, 2-ê toā-lâng tı̄ tiàm-thâu “Hun-chiú Kong-bē” pâi-á kha tuh-ku, 1-tūn gín-á thuh tiàm lō͘-piⁿ sńg sè-tâi koài-chhiú, gín-á ki-ki-chhiò ê sı̂, goán chit-tı̄n lâng kè-sio̍k tùi soaⁿ-téng kiâⁿ--khı̀. Ná ǹg soaⁿ-téng peh goá ná teh siūⁿ, tú-chiah hit-tı̄n gín-á kám chai-iáⁿ, chin-chiàⁿ ê koài-chhiú tı̄ soaⁿ-kha leh ó͘ in ê ka-hn̂g, tuh-ku ê a-peh kám ū tı̀-kak tio̍h thó͘-tē teh siau-sit? 1-pak chiâⁿ hō͘ lâng hoâi-liām ê chêng-kéng, soah ū chiah chē thó͘-tē ê siau-sit beh hō͘ lán chai-iáⁿ. (TGB Thong-sı̀n tē 26 kı̂, 2001 nı̂ 11 goe̍h)