Kok-ài Kok-oàn

Bat khoàⁿ-tio̍h sin-bûn kóng, Tı̄ bô-iáⁿ-kok, bô-iáⁿ-sı̂, bô-iáⁿ-ông ū nn̄g ê cha-bó͘-kiáⁿ, siⁿ-chò put-chí hó ki-kut. Nn̄g lâng bı̄n-māu chin súi, bo̍k-ní-hı̄ⁿ,liân-chí-bı̄n, tāi-hı̂-chhùi, liú-hio̍h-bâi, sia̍h-liû-khí, chhang-kóng-phı̄ⁿ, chhùi-phé hún-âng hún-âng, ba̍k-chhiu kim-tang-tang, o͘ pe̍h hun-bêng, seng-khu bô koân bô kē, sêng-sêng hó-khoàⁿ. Khó-sioh in ê sèng-chêng bô saⁿ tâng.Toā ê cha-bó͘-kiáⁿ khoán-sit thiâm-chēng, jı̂n-ài, un-sûn, ia̍h put-chí jı̂n-jiá chhiò-chhùi; siông-siông kóng hó-thiaⁿ ê oē, lâng chin ài chhin-kı̄n i, ài kap i kau-poê, kā i hō miâ Kok-ài. I ê sió-moē ài pe̍h-chha̍t, tham-sim, oàn-tò͘, kan-kúi, koh pháiⁿ-phiah àu-náu siông-siông ài kóng pháiⁿ-thiaⁿ ê oē, lâng m̄ káⁿ chhin-kı̄n i, hō miâ Kok-oàn. Ū chı̍t mı̂ chí-moē nn̄g lâng teh khùn, tú-tio̍h chı̍t hāng koài-sū,chiū-sı̄ khùn kàu poàⁿ-mı̂ hut-jiân-kan ū sian lâi bong in ê chhùi. Kè chá-khí Kok-ài tú-á teh khui chhùi beh mn̄g pêng-an, liâm-piⁿ ū chı̍t lia̍p chin toā-lia̍p ê chin-chu tùi i ê chhùi ka-la̍uh chhut-lâi. Kok-ài kín-kín khioh khí lâi hō͘ thong-ke ê lâng khoàⁿ. Sió-thêng teh kóng oē ê sı̂ ū koh khah súi ê mı̍h tı̍t-tı̍t liàn-chhut-lâi, chiū-sı̄ pó-ge̍k, âng sian-hô, bé-ló-chu, soān-chio̍h.Tāi-ke koáⁿ-kín cháu-oá lâi khioh, chı̄n-chāi hoaⁿ-hí.kok-oàn khoàⁿ-kı̀ⁿ chiū oàn-tò͘ i,khui chhùi beh mē, sûi-sı̂ ū chhân-kap-á, ka-choa̍h, siān-lâng, mn̂g-káu-á-thâng, giâ-kang, to̍k-choâ, tùi chhùi-nı̍h tı̍t-tı̍t sô chhut-lâi, lâng khoàⁿ-kı̀ⁿ chin kiaⁿ kàu ke̍k, m̄ káⁿ kı̄n-oá i. Taⁿ chit ê phı̀-jū tàu-tí ū sím-mı̍h ı̀-sù tı̄-teh? Sèng-keng kóng, Sim chek-thiok hó hián-chhut i ê hó, sim chek-thiok pháiⁿ hián-chhut i ê pháiⁿ. Ū tı̄ sim-nı̍h, kóng chhut tı̄ chhùi-nı̍h. Hó chhiū bē kiat pháiⁿ koé-chí, pháiⁿ chhiū bē kiat hó koé-chí (Thài. 7:15-20). Hoān-nā chhiū thang tùi i ê koé-chí bat i, hoān-nā lâng iā thang tùi i ê koé-chí bat i: hoān-nā lâng iā thang tùi i ê só͘ kiâⁿ lâi chhún-to̍k--i. só͘-í thang tùi i ê koé-chí bat-i.