Kui-hoē tāi-chū-jiân
e̍k Ū chı̍t-ê siâⁿ-chhı̄ lâng kap chng-kha lâng sio-iok kı̀ⁿ-bı̄n, iok-tēng ê sı̂-kan koè chin-kú, chng-kha lâng chiah kín-pia̍k-pia̍k koáⁿ kàu ūi, it-tı̍t hoē sit-lé, goân-in sı̄ lâi kàu poàⁿ-lō͘ sái-kín, lı̂m-sı̂ chhoē chı̍t-hio̍h ō͘-á-hio̍h pau tńg--khı̀, chiah koh koáⁿ--lâi. Siàu-liân lâng ê sı̂ thiaⁿ tio̍h lāu-poè teh kóng chng-kha lâng án-choáⁿ teh thiàⁿ-sioh pûi-hun ê kò͘-sū, lóng siūⁿ kóng he teh kóng-kó͘, tòng chò chhiò-oē kā thiaⁿ, sè-hàn ê sı̂ kap a-bú taⁿ toā-pùn khı̀ chhân--lı̀n, ûn-nā siūⁿ-kóng sı̄ in-ūi bô tè tò, chiah tò toà chhân--lı̀n. Lóng m̄-bat siūⁿ-koè he ū sím-mı̍h kè-ta̍t, tı̍t-kàu pit-gia̍p tńg-lâi kò͘-hiong, sı̍t-chè chò-sit, chiah thé-hoē tio̍h chng-kha lâng tùi tui-pûi, toā-pûi ê tiōng-sı̄. Cha̍p-nı̂-chêng, goá beh kiat-hun ê chêng kúi-kang, in-ūi hō͘-chúi, chhù-āu ê sái-ha̍k chá tō tı̄ⁿ--à, pàng-sái nā bô chù-ı̀, lóng ē phùn kah kui kha-chhng, nā bô chheng-chheng leh, tùi chhin-iú lâng-kheh tō chin pháiⁿ-sè, chiū khı̀ pài-thok keh-piah a-chím lâi tàu-saⁿ-kāng, in-ūi i sı̄ ta̍k-jı̍t lâi goán-tau sú-iōng sái-ha̍k ê chhù-piⁿ chi it, koh sı̄ chhin-chiâⁿ. A-chím soah thê-chhut tiâu-kiāⁿ, nā kā toā-pùn lo̍h toà in-ê chhân, i tō goān-ı̀ pang-bâng. A-bú khiok m̄ tap-èng: “Chiong hiah-choē pûi-hun hō͘ pa̍t-lâng, ká hiah khó-sioh. Lán ka-tı̄ ê chhân iā su-iàu ah! Lán boē-hiáu ka-tı̄ taⁿ hio͘h, sı̄ án-choáⁿ tō mâ-hoân pa̍t-lâng ?” Siūⁿ-boē-kàu it-hiòng khóng-khài ê a-bú, kèng-jiân chiah-nih m̄-kam hiah-ê toā-pûi. A-chím iā kian-chhı̂ nā bô beh lo̍h toà in-ê chhân, tō bô beh pang-bâng, a-chím kóng: “Goán nā m̄-sı̄ sàn koh bô só͘-chāi khí sái-ha̍k, goán-ê sái-jiō koh m̄-kam lóng pàng hō͘--lín leh.” Khah-chá goán-chhù múi chı̍t-keng pâng-keng ê kak--à lóng hē chı̍t-ê chhâ--chò-ê toā-jiō-tháng, té-tı̄ⁿ--ā tō taⁿ khı̀ ak-chhài. Tān-sı̄ pâng-keng-lāi lóng chhàu-hiam-hiam. Kàu goá kiat-hun liáu-āu chiah bô koh ēng jiō-tháng. Tān-sı̄ án-ni àm-sı̂ khı̀ piān-só͘ tio̍h gia̍h chhiú-tiān, chin bô hong-piān, só͘-í chiū hoê-ho̍k sè-hàn ê sı̂ tı̄ lı̂-pa-piⁿ, chhiū-á-kha, sı̀-koè pàng-jiō ê sı̍p-koàn. Ū-sı̂ jı̍t--sı̂ iā sūn-ki-hoē ak koé-chí chhiū-á. Ū iūⁿ khoàⁿ iūⁿ, goá nn̄g-ê hāu-siⁿ tong-jiân koh khah ē-hiáu án-ni. Ta̍k-pái nā tú-hó khoàⁿ-kı̀ⁿ goá kiâⁿ khı̀ lı̂-pa-piⁿ, tō ē tı̄ āu-piah toā-siaⁿ hoah: “A-pa tán--goá!” kín cháu lâi kap goá khiā chò-hoé, “Iáu-boē o͘h! iáu-boē o͘h!” Jiân-āu hoah: “Í, ó, san khai-sí!” a-bú khoàⁿ--tio̍h, sı̂-siông piáu-sı̄ chin bô hoaⁿ-hí, m̄-sı̄ bô hoaⁿ-hí goán pē-á-kiáⁿ bô oē-seng, sı̄ pàng lı̂-pa-piⁿ siuⁿ-koè khó-sioh. A-bú m̄-nā cheng-siⁿ-á ê sái ài khioh--khí-lâi, liân chı̍t-koá bô-lō͘-ēng ê choá iā ài sio-sio leh iā toà chhân--lı̀n. Khoàⁿ goán tò-chhù lōng-hùi, khó͘-khǹg boē-thiaⁿ, a-bú chiū tı̄ khah ún-ba̍t, goán siông-siông khı̀ “khiā” ê só͘-chāi hē chı̍t-ê toā jiō-tháng, thang hó ak-chhài. Sı̂-tāi chı̀n-pō͘, liân goán chng-kha só͘-chāi, sin-khí ê chhù to lóng ū hiān-tāi-hoà ê chhiong-chúi piān-só͘, siàu-liân-poè ê chò-sit-lâng, liân í-chêng ke-ke-hō͘-hō͘ khoàⁿ chò pó-poè ê tui-pûi to lóng bô tiōng-sı̄ ah, koh khah bián kóng ē khı̀ khioh toā-pûi. A-bú ū kúi-nā-pái chin kám-khài: “Chit-má teh chèng-choh chiah-ê chhân-tē, koè-khı̀ sı̄ khioh kúi-nā gû-chhia ê chio̍h-thâu khí-lâi, chiah khai-khún chhut-lâi. Chı̍t-nı̂ chı̍t-nı̂ m̄-chai lo̍h goā-choē chhia tui-pûi kap toā-pûi, chiok bô kán-tan chiah chiong thô͘-chit kái-piàn kah ē chèng-choh--tit, chit-má ê siàu-liân lâng kan-nā tham tio̍h chheng-khı̀ hong-piān, boē-hiáu--tit ki-pûi chiah ē-tàng pó-chhı̂ thó͘-tē pûi-súi.” Sui-jiân ū khah oē-seng, tān-sı̄, it-tı̍t tùi thó͘-tē the̍h, lóng bô hêng, bô chı̍t-thò oē-seng koh kho-ha̍k ê pān-hoat, chiong-hun lı̄-iōng pûi-hun lâi bı̂-pó͘, kan-nā it-bı̄ i-nāi hoà-ha̍k pûi-liāu, kàu-boé it-tēng sı̄ thó͘-tē lú sán, phoà-pı̄ⁿ, án-ni tàu-té sı̄ chı̀n-pō͘ á-sı̄ thè-pō͘ leh ? (Hong-hiòng Tē 15 kı̂, 1992 nı̂ 3 goe̍h)