Tē cha̍p chiuⁿ
Bı̂n-á-jı̍t Hó͘-ní beh khı̀ chiūⁿ kang ê sı̂ kóng, Kin-á-jı̍t beh ēng hé io̍h tı̄ iân-khòng lāi chhèng khui chio̍h-thâu hó thang iah iân, thiaⁿ-kı̀ⁿ teh kóng nā chhèng kàu chhut choē iân ê só͘-chāi,goán ê kang-chı̂ⁿ chiū beh ke-thiⁿ. Koh kóng, Goá siūⁿ kóng che sı̄ eng-kai tio̍h ê, hiān sı̂ kang-chı̂ⁿ chin-chiàⁿ chió. Hó͘-ní khı̀ liáu, lāu-bú kóng, Boē hiáu-tit chit ê gín-á sı̄ cháiⁿ-iūⁿ; i chí nn̄g jı̍t tiàm tı̄ goá sin-piⁿ chin hó, i ū chit hō hó khoán, hō͘ goá siūⁿ-tio̍h in lāu-pē; cha-bō͘-jı̍t lé-pài-jı̍t i pang-chān goá lóng bô lı̄-khui, siūⁿ sı̄ beh tùi chit tia̍p pı̀ⁿ hó lah. Kho-ní kap goá ū chai i m̄ lı̄-khui lāu-bú ê iân-kò͘. Kho-ní m̄ khéng chiong i khi-moâ ê tāi-chı̀ kóng phoà.
Hó͘-ní khı̀ tia̍p-á kú, hn̄g-hn̄g ū chhin-chhiūⁿ lûi tân ê siaⁿ, lāu-bú thiaⁿ-kı̀ⁿ chiū kóng, Goá chin oàn-hūn chit hō siaⁿ, lín pē tı̄-teh ê jı̍t sui sı̄ ke̍k ū tám-liōng, iáu-kú siông-siông teh kiaⁿ hé io̍h chhèng chio̍h-thâu ê sū, in-ūi bô lūn sím-mı̍h tāi-chı̀, nā ēng hé-io̍h lóng boē tú-tú thang chhèng cháiⁿ-iūⁿ, chóng-sı̄ nā bô ēng hé-io̍h iáu-bô pa̍t hoat thang ēng. Goán chiah tú-á teh kóng, hut-jiân khoàⁿ-kı̀ⁿ ū lâng tùi hí khòng-iá-nı̍h loān cháu, tùi ta̍k keng chhù iā ū lâng chhut-lâi teh kóng-oē. Koh khoàⁿ-kı̀ⁿ kúi-nā lâng khı̀ iân khòng loān cháu. Lāu-bú chiū kóng, Kui-lô ah, lí kín khı̀ thàm-thiaⁿ sı̄ siáⁿ tāi, goá kiaⁿ sı̄ khòng-lāi ū sím-mı̍h gûi-hiám, lí kín khı̀ lah. Goá chiū cháu khı̀ mn̄g goán hit ê chhù-piⁿ, i kā goá kóng, Iân-khòng lāi ū tú-tio̍h hui-siông ê chai-ē, khòng-lāi ū toā chio̍h tó-lo̍h-lâi teh-sí lâng, iáu ū lâng hō͘ chio̍h cha̍h tı̄ lāi-bı̄n boē-tit chhut-lâi.
Goá thiaⁿ-liáu kín-mé tò-lâi kā lāu-bú kóng. I chiū kap goá cháu-khı̀, goán sui-bóng cháu kín, Kho-ní cháu pí goán koh khah kín. Goán cháu bē kàu, i í-keng cháu kàu bô khoàⁿ-kı̀ⁿ lah. Kàu goán kàu tè khoàⁿ-kı̀ⁿ ū loā choē lâng chū-chı̍p tı̄ hí khòng kháu. Koh ū choē-choē iah khòng ê lâng tı̄ hia, in ê i-chiûⁿ kap thâu-bı̄n, lóng hō͘ hé-io̍h hahN o͘, ná tùi chàu-khang thoa-chhut-lâi ê, in ê bó͘ kiáⁿ lóng khiā tı̄ hia, ū-ê kı̀ⁿ-tio̍h bı̄n chiū chim-chhùi ê, sı̄ in-ūi i ê chhin-lâng bô siū siong, iā ū ê kūi-teh ai-siong kı̂-tó ê, koh iā ū cháu-lâi cháu-khı̀ ê, sı̄ teh chhē in ke-lāi ê lâng. Lāu-bú tùi chit kûn ê lâng, kàu hit kûn ê lâng, lâi mn̄g in kóng, Goá ê kiáⁿ Hó͘-ní tı̄ tá-lo̍h, lín ū khoàⁿ-kı̀ⁿ bô? In thiaⁿ-liáu lóng sı̄ iô thâu, iā ū bı̄n toà-tio̍h khó-lı̂n goán ê khoán. Goán khoàⁿ che kong-kéng, chiū chin kiaⁿ.
Āu-lâi ū tú-tio̍h chı̍t ê lāu-toā lâng, sı̄ tı̄ chí khòng-lāi choè kang sı̀-cha̍p nı̂ kú, kap goán lāu-pē chin siong hó, lāu-bú kàu i hia mn̄g kóng, Ngá-kok peh, lí chai goá ê kiáⁿ tı̄ tá-lo̍h mah? chhiáⁿ lí kā goá kóng, goá ài beh chai i sı̄ sí á oa̍h, á-sı̄ tı̄ khòng-lāi that teh boē-tit chhut-lâi nih, choè lí láu-sı̍t kóng. Hit-ê lāu-toā lâng chiū kóng, Chit ê tāi-chı̀ sı̄ boē moâ-tit, goá thái-thó chai oē m̄ kóng, hiān-sı̂ i chún-chún tı̄ hia, goá boē hiáu kóng, nā ū tı̄ téng-bı̄n ê Chú I oē chai, goá nā ū chai in beh chhèng chio̍h-thâu ê sı̂, Hó͘-ní tı̄ hí lāi-bı̄n. Tú-á teh kóng, lâng kng sí lâng tùi bı̄n-chêng kè, lāu-bú chiū khui siaⁿ khàu, cháu kàu hia hian-khui, khàm bı̄n ê pò͘, khoàⁿ m̄ sı̄ Hó͘-ní. Hit sı̂ Ngá-kok peh tiāⁿ-tiāⁿ kūn goán lāu-bú, iáu-beh kap i kóng oē, chóng-sı̄ goán lāu-bú sim-lāi tio̍h-kip, bô lūn chı̄-chūi kap i kóng sím-mı̍h oē, bô thiaⁿ siông-sè. Ngá-kok peh koh khǹg i kóng, Lí ê kiáⁿ m̄ chai sı̄ oa̍h-teh, á-sı̄ tio̍h tāng siong, lí nā choè chit ē tio̍h-kip siⁿ-chhut pı̄ⁿ lâi, chı̄-chūi oē ho̍k-sāi lí ê kiáⁿ nih? lí tı̄ chia tio̍h tēng sim-sı̂n, hit ê gín-á chóng tı̄ Chú ê chhiú-lāi.
Lāu-bú thiaⁿ-liáu chiū chē-teh m̄ káⁿ háu-kiò, soè-á-siaⁿ khàu kóng, Goá che kiông-khó͘ ê chiú-koáⁿ lâng, sı̍t-chāi kan-khó͘ ah; Hó͘-ní goá sim-koaⁿ kiáⁿ ah, lí kin-á-jı̍t chiah hó-hó teh kap goá kóng-oē, taⁿ siūⁿ kàu chit hō sū, kiaⁿ-liáu lín bú boē-oē koh kap lí saⁿ-kı̀ⁿ lah. Kóng-liáu koh toā siaⁿ khàu-khí-lâi.
Ngá-kok peh khoàⁿ-kı̀ⁿ lāu-bú pi-siong bô soah, chiū tùi goá kóng, Lí chhoā lāu-bú khı̀ hí chháu-po͘ chhiáⁿ chē, thèng-hāu goá thàm-thiaⁿ khoàⁿ cháiⁿ-iūⁿ, thang kín-mé kā lín kóng. Koh tùi lāu-bú kóng, Kiám-chhái Hó͘-ní tāi-seng lâi iā káⁿ, lí m̄ sái khoà sim, phah-sǹg it-tēng sí bô ǹg-bāng lah, lí tio̍h khoàⁿ téng-bı̄n, i chiū chhun chhiú kí thiⁿ. Lāu-bú chiū kóng, Lí beh khı̀ khòng-lāi chhē goá ê kiáⁿ mah? I kóng, Goá beh khı̀ hia, khoàⁿ sı̄ cháiⁿ-iūⁿ.
Hit sı̂ iah khòng ê lâng, kiaⁿ-liáu khòng-lāi koh lak chio̍h-thâu lo̍h-lâi, lóng m̄ káⁿ koh khı̀ lāi-bı̄n chhē hí só͘ kiám ê saⁿ lâng, lia̍h choè hit saⁿ lâng it-tēng sı̄ sí-lah, mih-sái khı̀ chhē i, hō͘ chhē i ê lâng soà sí hí lāi-bı̄n. Ngá-kok peh m̄ káⁿ chiong che chêng-hêng kā lāu-bú kóng. Tùi chit tia̍p goá kun-tè lāu-bú khı̀ hí chháu-po͘-nih chē, hí chháu-po͘ lı̄ khòng-iá ū chı̍t tè-á niā-tiāⁿ, bô pa̍t lâng tı̄-teh, goá chiū an-ùi lāu-bú, chóng-sı̄ i lóng bô beh chhap goá, kù-kù siaⁿ-siaⁿ, kóng, Goá ê kiáⁿ ah, goá ê Hó͘-ní ah, bô lâng khı̀ kiù lí, in chhut-chāi lí sí tı̄ hia. Goá ê kiáⁿ ah, goá ê kiáⁿ ah!
Goá chiah kóng, Ngá-kok peh kóng, Thiⁿ Pē beh kap Hó͘-ní saⁿ-kap tı̄-teh. Lāu-bú kóng, Goá m̄ chai, Thiⁿ Pē ū kap Hó͘-ní tı̄-teh á bô? Goá chai Thiⁿ Pē bô kap goá tı̄-teh, goá chiông-lâi bô kà-sı̄ Hó͘-ní i thái-thó oē hiáu chhē Chú kiû I? pêng-sò͘ bô kiong-kèng Chú, kàu beh sí thái-thó oē ǹg-bāng Chú pó-hō͘.
Goá kóng, Siōng-tè chin thiàⁿ-sioh lán, iā tek-khak thiàⁿ-sioh Hó͘-ní, lán thang lâi kiû I, bô hō͘ Hó͘-ní sí tı̄ lāi-bı̄n.
Lāu-bú kóng, Nā-sı̄ lí oē hiáu kiû Chú, tio̍h thoè i kiû, goá ê sim í-keng ta-la-khı̀ lah; boē-oē kı̂-tó, iā boē kı̀-tit tio̍h cháiⁿ-iūⁿ kiû. Thêng tia̍p-á kú lāu-bú koh mn̄g, Khó-ní tı̄ tá-lo̍h nı̍h, i kiám m̄ sı̄ tú-á tı̄ chia mah? Goá kóng, Tùi lán cháu lâi chia, i chiū cháu chêng-bı̄n khı̀, kàu chit tia̍p lóng bô khoàⁿ-kı̀ⁿ i, tek-khak sı̄ kap hiah-ê lâng tı̄ khòng kháu nih, lí bián hoân-ló i. Lāu-bú boē pàng sim khí-lâi kóng, Chí nn̄g ê kiáⁿ lóng beh bô-khı̀ lah, Kho-ní chin koai kiáⁿ, hō͘ goá chin hoaⁿ-hí, chı̄-chūi-á m̄ chai? ū-sı̂ goá sui-bóng kóng i, i kiok m̄ chai goá cháiⁿ-iūⁿ thiàⁿ.
Goá kóng, Kho-ní toàn-toàn boē siū sím-mı̍h siong-hāi, in-ūi Sèng-keng kóng, “Bān hāng sū saⁿ-kap lâi hō͘ thiàⁿ Siōng-tè ê lâng tit-tio̍h lı̄-ek,” Kho-ní sı̍t-chāi sı̄ thiàⁿ Chú ê lâng. Goá chiū siūⁿ-khí Kho-ní cha-bō͘-jı̍t kap goá kóng-oē. Lāu-bú koh kí iân-khòng kóng, Goá kā lí kóng lah, in nn̄g ê lóng tı̄ hí lāi-bı̄n lah. Chit piⁿ kóng, chı̍t piⁿ thiàu-khí-lâi, beh cháu khı̀ iân-khòng lāi; cháu kàu poàⁿ lō͘ bô khùi-la̍t, chiū siak-tó, ū kúi ê hū-jı̂n-lâng khoàⁿ-kı̀ⁿ, chiū cháu oá-lâi, bong i ê chhiú, khǹg i bián kiaⁿ bián khoà-ı̀, kóng, Lí nn̄g ê kiáⁿ lóng oē tı̄-teh. In sui sı̄ án-ni teh kóng, goá kap lāu-bú khioh chai i sı̄ teh khǹg ê oē nā-tiāⁿ. Goán tú-á tı̄ iân-khòng, teh an-ùi lāu-bú, hut-jiân thiaⁿ-kı̀ⁿ khòng-goā ū hiàm-kiò ê siaⁿ, lāu-bú kóng, Lí kín khı̀, khoàⁿ sı̄ siáⁿ-sū? Goá chiū kín-mé cháu-khı̀, kè chı̍t tui chı̍t tui ê lâng, thiaⁿ-kı̀ⁿ in teh kóng, Sı̄ i ê sió-tı̄. Iā ū-ê kóng, M̄ sı̄. Koh thiaⁿ-kı̀ⁿ pa̍t ê kóng, I beh khı̀ lāi-bı̄n, iā sı̄ tio̍h sí. Koh kóng, Che sı̄ pe̍h-pe̍h khı̀ ê, in hiaⁿ tek-khak sí lah. Goá tı̍t-tı̍t cháu kàu khòng-kháu, khoàⁿ hit ê khòng-kháu ū chı̍t tiâu lō͘ thang lo̍h-khı̀, tùi chit tiâu lō͘ lo̍h kàu chı̄n thâu, koh lo̍h khı̀ ē-bı̄n choè chı̍t chân chı̍t chân ê thui. Goá mn̄g khòng-kháu teh khiā ê lâng kóng, Lín teh kóng Hó͘-ní mah? i chit tia̍p tı̄ tá-lo̍h?
Ū chı̍t lâng ûn-ûn-á kóng, Hé-io̍h chhèng chhùi liáu, i sı̄ bô chı̍t tiám-á ǹg-bāng lah, khó-sioh hit ê ke̍k hó ê gín-á ia̍h pe̍h-pe̍h khı̀ sàng sí, in nn̄g ê lán lóng bô thang koh khoàⁿ-kı̀ⁿ. Goá thiaⁿ-liáu chiū khàu, kiû in kóng, Goá boē bêng-pe̍k, lí koh kóng tàu-tí sı̄ teh kóng chı̄-chūi? Hit lâng ı̀n kóng, Sı̄ in sió-tı̄ khı̀ hí lāi-bı̄n chhē in hiaⁿ leh, i tek-khak beh khı̀, bô lâng noâ oē tiâu. Goá kóng Kho-ní khı̀ chhē in hiaⁿ, chit tia̍p iáu tı̄ lāi-bı̄n mah? Koh ū lâng kóng, Sı̍t-sı̍t tı̄ lāi-bı̄n, sı̄ sí sı̄ oa̍h chı̄-chūi-á oē chai?
Hit sı̂ bô lâng phah-sǹg goá beh khı̀ khòng-lāi, chiah bô chó͘-tòng goá, goá chiū cháu jı̍p khòng khı̀. Kàu hit tiâu lō͘, tı̍t-tı̍t lo̍h-khı̀ kàu chı̄n-thâu, chiah tùi lâu-thui koh lo̍h-khı̀, àm-àm bong chı̍t chân kè chı̍t chân bong lo̍h-khı̀, chı̍t piⁿ bong lo̍h-khı̀ chı̍t piⁿ kiò, Kho-ní lí tı̄ tá-lo̍h? Kui-lô lâi lah. Kiò-liáu-bô lâng ı̀n, iā m̄ chai ū loā kú ê kang-hu, chiah bong kàu bé chân; siūⁿ-khí pêng jı̍t thiaⁿ lâng kóng, che lâu-thui chı̍t chân chı̍t chân lâi sǹg, kiōng ū kúi cha̍p tn̄g tn̂g. Hit sı̂ iā bô iàu-kín tio̍h loā choē kang-hu, tio̍h loā hn̄g, sı̄m-lāi nā ū chı̍t ı̀, ná chhin-chhiūⁿ khoàⁿ-kı̀ⁿ goá hit ê saⁿ-thiàⁿ ê Kho-ní tó tı̄ khòng-lāi sí lah, iā boē hiáu-tit cháiⁿ-iūⁿ oē-tit bong lo̍h-khı̀.
Kàu tı̄ hí chı̄n toé, lāi-bı̄n o͘-o͘ àm-àm, chiū khiā tı̄ hia; tāi-seng goá chı̍t sim bô kò͘ ka-kı̄, iā bô kiaⁿ, āu-lâi chiū thong sin-khu gı̄-gı̄-chhoah, lāi-bı̄n iā bô thiaⁿ-kı̀ⁿ sím-mı̍h, chí ū thiaⁿ-kı̀ⁿ goá kiò Kho-ní ke̍k toā ê ı̀n siaⁿ. Goá bong-tio̍h lō͘, m̄ káⁿ kiâⁿ khah hn̄g, nā ū kiâⁿ nn̄g saⁿ pō͘, ná beh koh kiâⁿ ná chai kiaⁿ, soà ná beh hūn-khı̀ nih, siūⁿ beh tò-tńg, mı̄ m̄ káⁿ peh hit ê lâu-thui. Tı̄ hia iā bô thiaⁿ-kı̀ⁿ ū pa̍t lâng ê chhoán-khùi, ēng chhiú tı̄ lāi-bı̄n sı̀-koè bong, bong-tio̍h chı̍t ê léng piang-piang ê, m̄ sái bong-tio̍h bı̄n kap thâu-mn̂g, chiū chai sı̄ sí lâng, phah-sǹg sı̄ Kho-ní. Kı̀-tit hit sı̂, goá chhin-chhiūⁿ beh sí, chiū tó tı̄ sin-si ê sin-piⁿ, put-séng jı̂n-sū.
Tē cha̍p-it chiuⁿ
Kàu āu-lâi Kho-ní ū kā goá kóng i tı̄ khòng-lāi só͘ tú-tio̍h ê tāi-chı̀, taⁿ thang lâi kóng i. I kóng, Goá cháu khı̀ iân-khòng hit sı̂, pí goán lāu-bú kap lí cháu khah kín; kàu khòng-kháu, chiū mn̄g iah khòng ê lâng kóng, Hó͘-ní tı̄ tá-lo̍h? In kóng, I kap nn̄g ê tâng-phoāⁿ ê, lóng tı̄ khòng-lāi, phah-sǹg lóng sí lah. Goá chiū khan hit lâng ê chhiú, kiû kóng, In saⁿ lâng lâu tı̄ hia, bô lâng khı̀ lāi-bı̄n chhē i, lán thang jı̍p-lâi khı̀ chhı̀-khoàⁿ oē kiù in boē? Ū chı̍t ê iah khòng ê tùi goá kóng, Lí siūⁿ goán tau ū chı̍t ê bó͘ sı̀ ê kiáⁿ, thang pàng-sak sı̀ⁿ-miā thoè lí mō͘-hiám mah? in saⁿ ê sí, bô chı̍t tiám-á thang ǹg-bāng oa̍h lah, taⁿ put-kò chiong chit ê khı̀ kā lín lāu-bú kóng chiū hó, tio̍h chhut-la̍t an-ùi i; tû-liáu án-ni, iáu-bô pa̍t ê hoat-tō͘, lí thang choè lí khı̀. Tı̄ hia khiā ê lâng lóng thı̀m thâu kóng, Án-ni tio̍h. Hiah-ê lâng pún m̄ sı̄ bô sim kò͘ pa̍t lâng ê sū, nā ū chı̍t tiám-á ǹg-bāng thang kiù lâng ê sı̀ⁿ-miā, in iā bô kiaⁿ gûi-hiám, nā-sı̄ tāi-chı̀ kàu chit ê tē-pō͘, in khoàⁿ jı̍p-khı̀ iā bô lı̄-ek, koh-chài jı̍p khòng khı̀ chı̄n gûi-hiám. Khòng siū chhèng pang ê sı̂, lāi-bı̄n bô siū hāi ê lâng, lóng chiong teng chek hé-io̍h hiat tı̄ khòng-lāi, kok lâng tô-miā, hiān sı̂ teh kiaⁿ só͘ chhun ê hé-io̍h koh to̍h, só͘-í m̄ káⁿ jı̍p-khı̀.
Kho-ní sui-jiân chai gûi-hiám, m̄ kú put-jím Hó͘-ní sí tı̄ lāi-bı̄n, iā m̄ káⁿ tò-tńg lâi kā lāu-bú kóng Hó͘-ní kiù boē tio̍h lah, só͘-í bô koh kiû pa̍t lâng kap i khı̀, chiū ka-kı̄ chı̍t ê jı̍p khòng khı̀. Chiū koáⁿ-kín lo̍h hit ê lâu-thui kàu chı̄n toé, khoàⁿ-kı̀ⁿ ū iah khòng ê lâng só͘ tı̀ ê bō-á, téng-bı̄n ū tiám la̍h-chek teng, chiū kia̍h teng beh khı̀ Hó͘-ní choè kang ê só͘-chāi. Kiâⁿ bô loā hn̄g, chiū khoàⁿ-kı̀ⁿ chı̍t ê sin-si tı̄ hit tiâu oe̍h-lō͘ nih, ū tú-á lo̍h-lâi oē tín-tāng ê chio̍h-thâu, kak chiam pí to khah lāi, kha-chhiú kha̍p-tio̍h chiū lâu huih, i chı̍t sim siūⁿ beh kín cháu, chheng-chheng kiaⁿ Hó͘-ní beh sí, bô lâng kiù i.
Hit sı̂ Kho-ní sim-lāi tı̍t-tı̍t kiû Chú, ài Chú chhoā i kàu Hó͘-ní hia, chiū chai tit-tio̍h Chú ū thiaⁿ i kı̂-tó. Teh siūⁿ ê sı̂ hóng-hut sı̄ kap Iâ-so͘ saⁿ-kap tı̄-teh, ū-sı̂ khoàⁿ-kı̀ⁿ siang-chhe lō͘, sim-lāi teh gı̂, m̄ chai tio̍h kiâⁿ tá-lo̍h chı̍t tiâu lō͘, ná chhin-chhiūⁿ Iâ-so͘ teh chí-sı̄ i chı̍t poaⁿ, lóng bô chı̍t tiám-á kiaⁿ, iā m̄ chai ū loā kú, chiah thiaⁿ-kı̀ⁿ ū chı̍t tiám-á ê siaⁿ-im, chiū chai chia iáu ū oa̍h lâng. Koh siông-sè thiaⁿ hit ê siaⁿ-im sı̄ hāiⁿ-hāiⁿ, ná sı̄ tùi hit tui toā chio̍h-thâu ē-toé chhut-lâi, che chio̍h-thâu tú-á lo̍h tı̄ lō͘-tiong, tı̄ hia ū soàⁿ ê hé-io̍h. I khoàⁿ-kı̀ⁿ chiū chiong teng khoà khah hn̄g, m̄ káⁿ the̍h chı̀n-chêng khı̀, chiū àm-àm bong, bong kàu hit tui, chio̍h-thâu ê só͘-chāi, chı̍t tè chı̍t tè chhut-la̍t soá-khui, thong chit tiâu lō͘, kàu hit ê lâng tó ê só͘-chāi, ǹg-bāng bong-tio̍h hit ê hāiⁿ-hāiⁿ ê sı̄ Hó͘-ní. Hit ê ke̍k tāng ê chio̍h-thâu, chı̄n oh-tit poaⁿ, chám-jiân chhut-la̍t poaⁿ, chiah kàu hit ê hāiⁿ-hāiⁿ ê só͘-chāi, chiū bong-tio̍h chı̍t khia oê, kap chı̍t tiâu phoà bı̄n-kun, tı̄ àm-àm ê só͘-chāi khoàⁿ khah siông-sè lio̍h-á oē khoàⁿ-kı̀ⁿ, jı̄n-tio̍h tó-teh m̄ sı̄ pa̍t lâng, sı̄ Hó͘-ní, iā khoàⁿ-chhut i tı̄ hia tó-teh ê chêng-hêng. Tı̄ hia kai-chài ū nn̄g tè toā chio̍h-thâu saⁿ-khè, pó-hō͘ i ê thâu-khak, lo̍h-lâi ê soè tè chio̍h-thâu, sui-jiân tı̀m siong seng-khu, i khiok iáu-kú oa̍h-teh. Kho-ní boē-oē phō i chhut-lâi, nā oē chiong i seng-khu só͘ teh soè tè chio̍h-thâu poaⁿ khui, hō͘ i thang chhoán-khùi, koh chhē chı̍t tiám-á chúi boah i ê chhùi, chiong i ê bı̄n kap chhiú ê huih soé-khı̀.
Hó͘-ní chiah oē tín-tāng, chiū hāiⁿ-hāiⁿ ê siaⁿ lio̍h-á khah toā. Thêng tia̍p-á kú, Kho-ní khoàⁿ i sin-khu khin-sang lio̍h-á khah pêng-an, chiū chē Hó͘-ní sin-piⁿ, teh siūⁿ tio̍h ēng sím-mı̍h hoat-tō͘ lâi kiù i chhut-khı̀, siūⁿ lóng bô. Lō͘-bé siūⁿ tio̍h chiūⁿ-khı̀ kiò lâng lâi tàu kha-chhiú; khah-sǹg khòng-goā ê lâng nā thiaⁿ-kı̀ⁿ Hó͘-ní iáu oa̍h-teh, liōng in tek-khak lóng khéng lo̍h-lâi kiù i. Chú-ı̀ tiāⁿ-tio̍h, chiū tùi lâu-thui hia khı̀. Keng-kè sí lâng tó-teh ê só͘-chāi, khoàⁿ-kı̀ⁿ goá iā tó tı̄ hia.
Siūⁿ goá jı̍p khòng ê sı̂, pún beh chān i kap Hó͘-ní, bô phah-sǹg boē-oē chān i, hoán-tńg hō͘ i ke kan-khó͘. Hit sı̂ i kiò goá ê miâ, goá chiū cheng-sı̂n, iáu kı̀-tit chı̍t ē cheng-sı̂n, tāi-seng khoàⁿ-kı̀ⁿ Kho-ní kap i phō thâu-khak thı̂-khàu, bô phah-sǹg só͘ thiàⁿ ê a-hiaⁿ, iáu kap goá tı̄ chit só͘-chāi. Thêng chı̍t ba̍k-nih kú, i kā goá kóng só͘ tú-tio̍h ê tāi-chı̀, goá chiah oē bêng-pe̍k, iā chai Hó͘-ní siū tāng-siong iáu-bô sí, tó tı̄ hia lı̄ goá bô hn̄g.
Kho-ní kóng, Lí khah hó khı̀ kap Hó͘-ní hia chē, thèng-hāu goá khı̀ khòng-goā chhē lâng lo̍h-lâi kiù i. Hit sı̂ goá siūⁿ Kho-ní nā chiūⁿ-khı̀, lâu goá kap Hó͘-ní tı̄ hí o͘-o͘ àm-àm ê só͘-chāi, kiám-chhái nā sí, kiám m̄ sı̄ sı̄n goá chı̍t ê? chiū kiû i chhoā goá saⁿ-kap chiūⁿ-khı̀, á-sı̄ i kap goá tiàm chia.
Kho-ní kóng, Lí tio̍h siūⁿ a-hiaⁿ kap lí tı̄-teh. Goá iáu-kú tı̍t-tı̍t kóng, Goá kiaⁿ, goá kiaⁿ. I kóng, Iâ-so͘ iā tı̄ chia. Hit sı̂ goá lóng bô siūⁿ-tio̍h Iâ-so͘, tāi-seng chiah ū hiah kiaⁿ, iā bô siūⁿ-khí goán ê Kiù-chú Iâ-so͘ tı̄ hia, koh bô siūⁿ kàu tı̄ hí o͘-àm ê só͘-chāi oē kiaⁿ, koh bô khùi-la̍t, Iâ-so͘ bô kap goá saⁿ-lı̄, siōng-chhiáⁿ goán ê tāi-chı̀ I lóng chai, iā hoaⁿ-hí pang-chān goán. Só͘-í goá chı̍t ē thiaⁿ che oē, liâm-piⁿ choè chı̍t ē siūⁿ-khí-lâi, tùi i kóng, Lí tāi-seng chiong khı̀ Hó͘-ní hia ê lō͘ kā goá kóng, chiah khı̀ khòng-goā, goá beh kap i hia chē, thèng-hāu lí koh lâi. Chiū kia̍h teng thiaⁿ i hoan-hù, beh siám ū hé-io̍h ê só͘-chāi, chı̍t piⁿ kiâⁿ chı̍t piⁿ ka-kı̄ kóng, Iâ-so͘ tı̄ chí khòng-lāi. Ū chit hō ê ı̀-sù chiū pêng-an, bô chı̍t lı̂-si-á kiaⁿ, iā kiû Chú kap Kho-ní tı̄-teh, koh lı̂n-bín Hó͘-ní, hō͘ hiah-ê beh kiù lâng ê m̄ thang iân-chhiân.
Kiâⁿ kàu Hó͘-ní hia, chiah beh iúⁿ chúi, khoà i chhùi-tûn, chiū thiaⁿ-kı̀ⁿ ū kha-pō͘ siaⁿ, iā thiaⁿ-kı̀ⁿ ū lâng iân lō͘ teh kóng-oē, sı̄ Kho-ní ê siaⁿ teh kóng, Kui-lô, Kui-lô, goán lâi lah.
Goân-lâi sı̄ Kho-ní tú-á chiūⁿ thâu chı̍t chàn lâu-thui, chiū khoàⁿ-kı̀ⁿ teng kng, koh thiaⁿ-kı̀ⁿ lâng ê siaⁿ teh lo̍h-lâi; kàu kūn-oá chiah chai sı̄ Ngá-kok peh kap kúi ê iah khòng ê lâng lâi chhē goán. Ngá-kok peh kiâⁿ kàu Kho-ní ê bı̄n-chêng, thiaⁿ-kı̀ⁿ Kho-ní kóng-oē, chiū khan i ê chhiú o-ló i hó-táⁿ, koh tùi i kóng, Goá thiaⁿ gín-á lo̍h kàu khòng-lāi, chiū siūⁿ goán chiah toā lâng, hoán-tńg m̄ káⁿ lo̍h-khı̀, sim-lāi boē bián-tit kiàn-siàu. Iáu-bē lo̍h-lâi ê sı̂, tùi hiah-ê khòng-goā ê chèng lâng kóng, Chit tia̍p chiū beh kàu khòng-lāi chhē in. Goá chı̍t ē kóng án-ni, hiah-ê iah khòng ê lâng toā poàⁿ beh tè goá lo̍h-lâi, só͘-í lóng lâi.
Kho-ní kap goá kiû in tāi-seng kng Hó͘-ní chiūⁿ-khı̀, in-ūi i tó tı̄ chia, bı̄n-sek pı̀ⁿ pe̍h, boē siáⁿ oē tín-tāng, hūn lāu-bú boē-tit khah chá lâi-teh, thàn i iáu oa̍h thang kı̀ⁿ i chı̍t bı̄n. In ū toà chı̍t niá thán-á, chiū chiong Hó͘-ní hē tı̄ téng-bı̄n, kng kàu ū kng thong-hong ê só͘-chāi, iā phō goá lâi. Lāu-bú tú-á tı̄ khòng-kháu teh thèng-hāu, in-ūi ū lâng tāi-seng pò khòng-kháu ê lâng kóng, Hó͘-ní iáu oa̍h-teh, hí nn̄g ê choè kang phoāⁿ lóng sí lah. Lāu-bú bô cha̍p hun sı̀n. Kàu in chiong Hó͘-ní kng chhut-lâi khoà tı̄ chháu-po͘ téng, lāu-bú khoàⁿ-kı̀ⁿ hit iūⁿ chiū kóng, Sı̄ sí lah, sı̄ sí lah; koáⁿ-kín khû tı̄ i sin-piⁿ, ēng chhiú bong i ê sim-koaⁿ khut-á, beh khoàⁿ i iáu oa̍h-teh.
Lāu-bú chiū kóng, Chit tia̍p goá oē kı̂-tó lah. Chiū in-ūi Chú ê toā un, o-ló Chú, ū koáⁿ hū-jı̂n lâng iā tè i kūi-teh, iā ū-ê tı̄ piⁿ-á teh khiā kóng, Goá pē ah; bı̄n oa̍t kè-khı̀ lâu ba̍k-sái, in-ūi m̄ ài hō͘ lâng khoàⁿ-kı̀ⁿ. Koh tia̍p-á kú i-seng lâi khoàⁿ Hó͘-ní, chhòng io̍h hō͘ i chia̍h, chiū liâm-piⁿ thí-khui ba̍k-chiu, oē jı̄n-tit lāu-bú; bô loā kú koh sit-khı̀. Hit ê i-seng kiò lâng chiong i kng kàu goán tau; goán lāu-bú tāi-seng tò-khı̀ pı̄-pān bı̂n-chhn̂g. Kho-ní iā kap goá saⁿ-khan chhiú tò-khı̀, teh kiâⁿ lō͘ ê sı̂ i tùi goá kóng, Ū chı̍t hāng sū goá m̄ khéng tùi pa̍t lâng kóng, chheng-chheng kā lí kóng nā-tiāⁿ. Cha-bō͘-jı̍t bat kóng chı̄n ài choè Iâ-so͘ só͘ hoaⁿ-hí ê sū, goá siūⁿ kin-á-jı̍t hō͘ goá oē chō͘ Hó͘-ní, chiah sı̄ hō͘ i chai-kiò goá ê sim ı̀, liōng pit lí iā chai nā m̄ sı̄ Iâ-so͘ kap goá tı̄ hia, chiū boē choè sím-mı̍h. Taⁿ choè chit ê tāi-chı̀, hō͘ goá koh khah thiàⁿ Iâ-so͘.
Āu-lâi Hó͘-ní só͘ teh ê siong ū kúi jı̍t chı̄n tı̂m-tāng, boē tiāⁿ-tio̍h sı̄ oē sí á-sı̄ oē oa̍h. Lāu-bú chiū mı̂ jı̍t bô lı̄-khui i. Ū hó sèng-chêng ê i-seng siông-siông lâi kā i i-tı̄. Chit ê tāi-chı̀ lóng sı̄ āu-lâi thiaⁿ lâng kā goá kóng ê, in-ūi hit jı̍t tò-lâi goán tau liáu-āu, goá chiū hoān-tio̍h jia̍t pı̄ⁿ, tı̍t-tı̍t pı̄ⁿ kàu kúi-nā lé-pài kú. Hit kúi jı̍t, goá ū-sı̂ cheng-sı̂n cheng-sı̂n, ū-sı̂ bâng-bâng, só͘-í ke-lāi sū choân-jiân m̄ chai, sı̄ āu-lâi chiah thiaⁿ-kı̀ⁿ lâng kā goá kóng ê.
Tē cha̍p-jı̄ chiuⁿ
Ū chı̍t chá-khí goá pı̄ⁿ lio̍h-á khah khin, sim-lāi bô put-chí bâng, tó tı̄ hia iā oē jı̄n-tit só͘-chāi, chóng-sı̄ chhù-lāi siuⁿ kng, ba̍k-chiu koh khoeh-khı̀. Kho-ní khoàⁿ-kı̀ⁿ goá boē bâng oē jı̄n-tit i, chiū khan goá ê chhiú kóng, Kui-lô, Kui-lô, lí khah cheng-sı̂n cheh.
Hit sı̂ goá thong sin-khu lóng bô la̍t, iā boē ı̀n, nā ū chiong chhiú chhun chhut-lâi. I chiū ēng nn̄g chhiú kā goá phô͘-teh. Tia̍p-á kú khoàⁿ i ûn-ûn-á chhut-khı̀, thiaⁿ i soè siaⁿ kap lāu-bú teh kóng-oē. Lāu-bú kóng, I ū khah cheng-sı̂n mah? Chiah kú lóng bô thiaⁿ-kı̀ⁿ i kah chiah hó siau-sit. I chiū pàng-lo̍h só͘ soé ê i-chiûⁿ, lâi kàu chhn̂g piⁿ; goá bı̄n oa̍t kè-lâi khoàⁿ i. I kóng, M̄ thang tín-tāng, m̄ thang tín-tāng; che sı̄ Kho-ní kā lí kûn ê thng, lí chia̍h lah; i tı̄ chia teh chiàu-kò͘ lí, ū saⁿ lé-pài lah, lóng bô lı̄-khui lí. Goá sim siūⁿ ū hiah kú, chiah kóng, Ū saⁿ lé-pài mah? Hit ê chá chêng ê sū, lóng kı̀ boē chheng-chhó, beh siūⁿ-chhut-lâi, iū bô cheng-sı̂n. Āu-lâi chiah chı̍t jı̍t chı̍t jı̍t khah hó nā-sı̄ iáu-boē khí lâi chē, ko͘-put-chiong tó-teh, khoàⁿ-kı̀ⁿ lāu-bú chhut-chhut jı̍p-jı̍p, teh choè kang, Pí-tek tı̄ mn̂g-kháu teh so soh-á, Kho-ní tı̄ goā-bı̄n, ū-sı̂ pó͘ bāng, ū-sı̂ pha̍k bāng, ū-sı̂ ka-kı̄ jı̍p siâⁿ khı̀ boē hê.
Koh koè kúi-jı̍t iū-koh khah hó, chiah ē khò chím-thâu chē tı̄ chhn̂g-nih. Chit-sı̂ goá beh khoàⁿ sèng-chheh, kà Kho-ní chiong hit-pún chheh tiong pó-poè ê oē tha̍k hō͘ goá thiaⁿ, in-ūi ka-tı̄ beh khoàⁿ-chheh iáu-bô-la̍t. Kho-ní ta̍k-ē-hng kang chò liáu, chiū toà goá sin-piⁿ chē teh tha̍k sèng-chheh, lāu-bú khoán-sit iā chin ài thiaⁿ, ûn-ûn-á koè-lâi khı̀ chò-kang. Pí-tek chē tı̄ goá ê chhn̂g-piⁿ, the̍h tio̍h chháu-á, chı̍t-pêng thiaⁿ chı̍t-pêng so soh-á. Hó͘-ní chē tı̄ chhù-lāi bı̄n, oa̍t lı̀n-tńg, lóng bô choè siaⁿ, m̄ chai i ài thiaⁿ á m̄ ài thiaⁿ, chit sı̂ i chha-put-to lóng hó lah. Lūn i ê tāi-chı̀, Kho-ní ū choē-choē bô kā goá kóng, só͘ kóng ê sı̄ Hó͘-ní ê tāng pı̄ⁿ beh sí tiāⁿ-tiāⁿ, chı̄n kiaⁿ i sí-āu ê tāi-chı̀. Iok ū saⁿ jı̍t, Hó͘-ní tı̍t-tı̍t kóng ka-kı̄ hoán-hoé ê oē, kiaⁿ-liáu chiong-lâi bô ǹg-bāng.
Hit sı̂ ū bo̍k-su lâi kap Hó͘-ní kóng, Kiù-chú sí sı̄ ūi-tio̍h sio̍k lán ê choē, iā kóng Siōng-tè thiàⁿ-sioh lâng, chhin-chhiūⁿ pē thiàⁿ kiáⁿ, ēng to̍k siⁿ ê Kiáⁿ thoè ū choē ê lâng pàng-sak sı̀ⁿ-miā; koh kūi-lo̍h thoè sit-bāng ê lâng kı̂-tó. Chóng-sı̄ bo̍k-su kà-sı̄ Hó͘-ní ê oē, kap i só͘ kiû ê, lóng boē-oē hō͘ Hó͘-ní ê sim pêng-an. Kai-chài Chú khó-lı̂n Hó͘-ní, hō͘ i bô sí, kàu khah hó, i ê sim-sū, chiū m̄ khéng kóng. Bo̍k-su nā lâi kap Hó͘-ní kóng-oē, i ba̍k-chiu kim-kim siòng teh thiaⁿ, lóng bô mn̄g sím-mı̍h. Bo̍k-su mn̄g i, iā bô ı̀n. Kàu chit sı̂ Hó͘-ní put-chí ū un-jiû thun-lún ê khoán-sit, kap chá-chêng toā koh-iūⁿ; goán iáu m̄ chai i sim-lāi ū tit-tio̍h pêng-an á bô. Che lóng sı̄ Kho-ní kā goá kóng ê.
Hit ê-hng lé-pài-tn̂g kòng-cheng ê sı̂, khoàⁿ-kı̀ⁿ goán lāu-bú jı̍p-khı̀ pâng-nih, the̍h bō chhēng hó i-chiûⁿ, ná beh chhut mn̂g nih, chiū mn̄g, Chı̄-chūi beh kap goá khı̀ lé-pài-tn̂g? Hit sı̂ Pí-tek bô tı̄ chhù-lāi, Hó͘-ní iā bô choè siaⁿ, Kho-ní kóng, goá m̄ sı̄ bô beh kap lí khı̀, sı̄ in-ūi Kui-lô tı̄ chia. Lāu-bú kóng, Goán boē-tit thang pàng i ka-kı̄ chı̍t ê tı̄-teh, sı̄ beh hō͘ lí kap i tiàm chit chhù nih. Koh kā Hó͘-ní kóng, Lí beh kap goá khı̀ mah? I chiū ûn-ûn-á peh-khí-lâi, iā bô kóng sím-mı̍h, ná m̄ ài khı̀ ê khoán, ū chhin-chhiūⁿ chı̄n kiàn-siàu; goá khoàⁿ án-ni chı̄n kı̂-koài. Kho-ní khoàⁿ-kı̀ⁿ goá ū che ı̀-sù, chiū kóng, Lāu-bú chí kúi pái ta̍k lé-pài lóng ū khı̀, iáu ū chı̍t hāng lí m̄ chai, i ū chı̍t pún Sèng-chheh. Goá kóng, I hit pún kap lán ê saⁿ chhin-chhiūⁿ mah? I kóng, Bô; i hit pún sı̄ Ui-lı̄-sū oē ê, chı̄n toā pún, pí Le̍k-tek-ko͘ hit pún iáu khah toā; chit pún chheh sı̄ goán ḿ ê, i chí kúi nı̂ siu tı̄ siuⁿ-lāi.
Goá kóng, Lāu-bú ū tha̍k á bô? I kóng, Ū. Koh kā goán kóng, I siàu-liân ê sı̂ lóng oē tha̍k, kàu chí kúi nı̂ toā poàⁿ boē kı̀-tit lah, hō͘ i chin kiàn-siàu. Koh kóng, tùi i bô thàn chit ê tō-lí, sim-lāi lóng bô pêng-an, taⁿ beh koé-pı̀ⁿ lah, iā ǹg-bāng lán ha̍k-sı̍p chit ê chheh, oē thàn chit ê tō-lí. Koh kóng, i sui-jiân bêng-pe̍k tō-lí bô joā choē, tek-khak chai lâng bô lūn sím-mı̍h m̄ tio̍h, ū sím-mı̍h tāng choē, nā beh hoán-hoé koé-pı̀ⁿ, oá-khò Kiù-chú Iâ-so͘ kiû sià-bián, hit ê thiàⁿ lán ê Thiⁿ Pē, tek-khak m̄ châu-bia̍t hit lâng.
Goá thiaⁿ Kho-ní án-ni kóng, chiū kā i kóng, Goá sı̍t-chāi ài thiaⁿ chit hō oē; goá ta̍k jı̍t kap lí choè chı̍t tui, thái-thó m̄ chai chit ê tāi-chı̀? I kóng, Lóng sı̄ in-ūi lí pı̄ⁿ tı̂m-tāng, liân lâng to boē jı̄n-tit lah, beh thái oē koè-tit lí m̄ chai! Goá kóng, Goá pı̄ⁿ tāng ê sı̂, lí ū kiû Siōng-tè hō͘ goá hó mah? I kóng, Bô án-ni kiû. Goá kóng, Lí bô án-ni kiû, ū sím-mı̍h ı̀-sù? I kóng, Goá kı̂-tó Chú, siông-siông ūi-tio̍h lí ê tāi-chı̀, kóng, Che sió Kui-lô pı̄ⁿ chı̄n tāng, kiaⁿ-liáu oē sí, Chú lí nā m̄ ài lâu i tı̄ sè-kan, goá iā m̄ káⁿ kiông kiû, chóng-sı̄ i nā sí-liáu, chiū sı̄n goá chı̍t ê. Kui-lô lí siūⁿ-khoàⁿ cheh, goá thái-thó oē chai lâu lí tı̄ sè-kan á-sı̄ hō͘ lí lı̄-khui sè-kan, tá-lo̍h chı̍t hāng sı̄ khah hó? Chú tek-khak oē chai, só͘-í goān thàn I ê chí-ı̀.
Goá kóng, Goá phah-sǹg lí beh thoè goá pek-chhiat kiû Chú, lâu goá tı̄ sè-kan. Kho-ní chiū khan goá ê chhiú kóng, Goá sui sı̄ chı̄n ài lí tiàm tı̄ sè-kan, nā-sı̄ Chú pí goá khah thiàⁿ lí, pí goá khah chai tio̍h cháiⁿ-iūⁿ khah hó. Goá kóng, Lí nā ū pı̄ⁿ goá tek-khak thong jı̍t kiû Chú hō͘ lí tiàm tı̄ sè-kan. I kóng, Kui-lô, lí bô siūⁿ kàu Chú Iâ-so͘ tiàm ê só͘-chāi sı̄ cháiⁿ-iūⁿ hó mah? Hiān-sı̂ ū lāu-bú kap lí koh choē-choē, goá sim só͘ thiàⁿ ê, chin-chiàⁿ goān tiàm tı̄ sè-kan, chóng-sı̄ goá ê ı̀-sù, tiāⁿ-tiāⁿ teh siūⁿ thèng-hāu Chú chiap-la̍p kàu I hia ê sı̂, he chiah sǹg sı̄ khah hó lah.
Tı̄ chí pài-sı̀, lāu-bú kap goá kap Kho-ní lóng tı̄ chhù-lāi, lāu-bú teh choè chiam-chí, goá tı̄ toā í-téng khò-tio̍h chím-thâu, the̍h-tio̍h hit jı̍t só͘ boé nı̂ soàⁿ chhiah be̍h, Kho-ní tú-tú teh tha̍k Sèng-chheh hō͘ goá thiaⁿ. Hó͘-ní tùi goā-bı̄n jı̍p-lâi, khiā tı̄ lāu-bú hia, bı̄n-sek pı̀ⁿ pe̍h, chhiú ná teh so chiū kóng, Lāu-bú kap Kho-ní ah, goá beh kā lín kóng chı̍t hāng tāi-chı̀, goá siūⁿ chit ê tāi-chı̀ sı̄ lín eng-kai tio̍h chai ê. Kho-ní kap Kui-lô í-keng lio̍h-á chai, lí iáu-bē ū thiaⁿ-kı̀ⁿ. Chit ê tāi-chı̀ lí nā chai sı̍t-chāi sı̄ hō͘ lí ê sim kan-khó͘, phah-sǹg lí koat-toàn m̄ jiâu goá.
Lāu-bú thiaⁿ i chiah-ê oē, iā bô ı̀n i, chí ū thong sin-khu gı̄-gı̄ chhoah. Tia̍p-á kú i koh ûn-ûn-á kóng, Goá bat choè chha̍t, thau khòng-lāi ê iân. I kóng chiah-ê oē, chhùi é-siaⁿ kóng boē sím-mı̍h chhut chhùi. Lāu-bú iáu-bô kóng chı̍t kù oē ná chhin-chhiūⁿ chhiú teh thiàⁿ, tı̍t-tı̍t so chhiú. I iū-koh kóng, Goá chai put-hàu lāu-bú, sı̄ ke̍k m̄ hó; m̄ kú í-keng choè liáu chit hō sū, iáu ū sím-mı̍h oē thang the-sı̂? Chóng-sı̄ chit ê tāi-chı̀ sı̍t-chāi sı̄ goá bû ı̀-tiong khı̀ choè ê, in-ūi goá tāi-seng ū khiàm lâng ê chı̂ⁿ. Āu-lâi hit ê chè-chú tek-khak kah goá tio̍h pang i thau iân, só͘-í chiah khı̀ choè. I thau-tio̍h iân chiū kah goá khı̀ lok tı̄ chı̍t ê chio̍h tōng lāi, beh thèng-hāu kàu ū chı̍t chûn-chāi, chiah chài khı̀.
Kho-ní kap goá thiaⁿ-liáu, chiū chai hit jı̍t tı̄ soaⁿ tōng-lāi, i choè chit hō tāi-chı̀, iā chai i siáⁿ-sū kàu chiah kiaⁿ. Hó͘-ní oē kóng-liáu iáu khiā tı̄ hia, sı̄ beh thiaⁿ khoàⁿ ū lâng kóng sím-mı̍h á bô. Khiā tia̍p-á kú, bô lâng kóng sím-mı̍h, i chiū bı̄n oa̍t-kè-khı̀, bı̄n-sek pı̀ⁿ kóng, Só͘ choè ê sū, goá lóng kā lín kóng lah, chai lín tek-khak m̄ jiâu goá; chhut-chāi lín chiū-sı̄ lah. Kóng-liáu chiū kiâⁿ kàu mn̂g beh chhut-khı̀. Lāu-bú chiū khí-lâi tè i, phō i ê ām-kún kóng, Goá ê kiáⁿ ah, khó-sioh goá che thiàⁿ ê kiáⁿ ah! I kóng Lāu-bú siáⁿ-sū in-ūi goá lâi khàu? goá boē kham-tit ū lâng khàu. Chı̍t piⁿ kóng, chı̍t piⁿ kap lāu-bú tò-tńg-lâi, chē tı̄ i ê sin-piⁿ.
Lāu-bú kóng, M̄ sı̄ goá tio̍h jiâu lí; hit-ê jiâu lí ê sı̄ lí só͘ tek-choē ê lâng, lí toàn-toàn tio̍h kā khòng-chú kóng. Hó͘-ní kín-mé ı̀n kóng, Khòng-chú í-keng chai lah, goá tı̄ pı̄ⁿ iáu-bē hó ê sı̂, chit ê tāi-chı̀ í-keng lō͘-chhut lah; chóng-sı̄ m̄ chai choè che sū goá iā ū hūn. Tú-á-chiah í-keng khı̀ kā khòng-chú kóng lah. Tùi goá hó-liáu ê sı̂, siông-siông siūⁿ tio̍h chiong che tāi-chı̀ kā khòng-chú kóng, chóng-sı̄ beh kóng chit ê tāi-chı̀, sim-lāi chin hoân-ló, pí beh sí khah kan-khó͘. Pa̍t lâng beh thái oē chai goá ê sim tòng boē tiâu kap sit-bāng nih?
Lāu-bú kóng, Lí kā khòng-chú kóng, i tek-khak m̄ ēng lí, iā-sı̄ bô iàu-kín; chóng-sı̄ lí tùi chit tia̍p tio̍h koé-pı̀ⁿ choè hó lâng; goán iā chiū chiong chêng ê sū bô thê-khí lah.
Hó͘-ní kóng, Kú bô beh m̄ ēng goá, hit-ê khòng-chú kóng, Taⁿ toà-tio̍h lín lāu-pē, beh koh chhı̀-khoàⁿ lí thang ēng, á m̄ thang ēng. Lāu-bú kóng, Goān Chú pò-tap i chit hō ê un-tián, lí taⁿ tio̍h choè hó lâng, m̄ thang hō͘ i in-ūi ēng lí āu-lâi siuⁿ hoán-hoé.
Hó͘-ní kóng, Taⁿ chin beh án-ni lah. Chit tia̍p ū chı̄n choē oē, goá kóng boē chhut, pún phah-sǹg lí kap khòng-chú, éng bô beh jiâu goá, taⁿ lóng khoán-thāi goá án-ni, sı̄ hō͘ goá kàu sè-boa̍t ê sı̂, ū thang ǹg-bāng Chú ê jiâu goá. Lāu-bú chiū kap i bān-bān-á kóng, Goá ê kiáⁿ ah, chit ê tō-lí goá bô sím-mı̍h oē hiáu kóng, in-ūi goá iā sı̄ chiah bêng-pe̍k sió-khoá-á; nā-sı̄ goá sui-bóng boē hiáu-tit kóng, m̄ kú chai lâng nā hoé choē koé-pı̀ⁿ, chin sim ǹg Chú, I chiū liâm-piⁿ jiâu i, m̄ sái tio̍h thèng-hāu kàu āu-lâi chiah jiâu i. Lí tú-á-chiah bē kóng-chhut, Chú Iâ-so͘ í-keng jiâu lí lah. Lí siūⁿ-khoàⁿ goá chit hō ū choē ê lâng, khoàⁿ-kı̀ⁿ lí hoán-hoé beh choè hó lâng, siōng-chhiáⁿ hoaⁿ-hí, hô-hòng hit ê thiàⁿ-sioh lí ê Thiⁿ Pē, I thái-thó khéng pàng-sak lí?
Hó͘-ní kóng, Che lóng sı̄ goá tùi chá bô thiaⁿ-kı̀ⁿ chit ê sin tō-lí, ı̀-sù chin ò-biāu hō͘ goá ûn-ûn-á siūⁿ-siūⁿ khoàⁿ cheh; lí kap Kho-ní tio̍h thoè goá kı̂-tó. Kóng-liáu iā bô koh kóng sím-mı̍h, chiū khı̀.
Tē cha̍p-saⁿ chiuⁿ
Ū chı̍t jı̍t tú-á khùn-chhíⁿ, khoàⁿ-kı̀ⁿ tı̄ goá chím-thâu piⁿ khoà-tio̍h chı̍t ki ke̍k súi ê ge̍h-kı̀ⁿ hoe, goá kóng, Kho-ní lí tùi tá-lo̍h the̍h-lâi? I kóng, Lí ioh khoàⁿ goá tùi tá-lo̍h tit-tio̍h che hó hoe, lí nā ioh m̄ tio̍h, thang koh-chài ioh. Goá kóng, Káⁿ sı̄ hit ê i-seng the̍h-lâi mah? I chiū chhiò kóng, M̄ tio̍h, lí koh ioh khoàⁿ cheh.
Goá khoàⁿ i ê bı̄n hiah hoaⁿ-hí, chiū siūⁿ khí-lâi, mn̄g i kóng, Sı̄ goá hit ūi thài-thài mah? I kóng, Sı̄ hit ūi thài-thài kap I-tí ko͘-niû tò-lâi lah, beh tı̄ chia kè tang-thiⁿ. Téng ê pài-sı̀, goá khı̀ boē hê, in khoàⁿ-kı̀ⁿ iáu oē jı̄n-tit goá, iā chı̄n hoaⁿ-hí, mn̄g goá kóng, Sió Kui-lô tı̄ tá-lo̍h? Goá kā i kóng lí phoà-pı̄ⁿ iáu-bē oē khí-lâi, nā beh lâi siâⁿ boē hê, kiaⁿ-liáu tio̍h khah chhiân teh. Hit ê thài-thài mn̄g goá tiàm tı̄ tá-lo̍h? Goá chiū chiong lán tiàm tı̄ tá-lo̍h kā i kóng. I kóng, Lí tò-khı̀, m̄ sái kā Kui-lô kóng goá lâi chia lah, thèng-hāu goá kè-khı̀ thàm i. Kin chá-khí i kap I-tí ko͘-niû lâi, chhin chhiú chiong che hoe khoà tı̄ chia. Goá kóng, In lâi goá iā bô kı̀ⁿ-tio̍h in. Kóng-liáu chiū beh khàu, sı̄ in-ūi tùi goá pı̄ⁿ ê sı̂, chiūⁿ siàu-liām i, chit tia̍p lâi goán tau, iā m̄ chai, iáu-bô kı̀ⁿ-tio̍h i.
Kho-ní kóng, Lí m̄ sái háu; che sı̄ thài-thài m̄ hō͘ lāu-bú kiò lí chhíⁿ ê. Lāu-bú iā kóng, lí nā chhíⁿ chai i lâi, tek-khak kóng, Hit sı̂ siáⁿ-sū bô beh kiò goá chhíⁿ. Hit ê thài-thài kóng, Bı̂n-á-jı̍t goá beh koh lâi.
Kè jı̍t i chin-chiàⁿ koh lâi, khoeh tı̄ goá ê bı̂n-chhn̂g chē, goá chiū chiong tùi i khí-sin liáu, kúi ge̍h-jı̍t ê tāi-chı̀ kā i kóng, iā chiong goá ê Sèng-keng the̍h lâi hō͘ i khoàⁿ. Sui-jiân chheh phê kap chheh piⁿ ê kim lóng kū lah, i iā bô kóng sím-mı̍h, chı̄n hoaⁿ-hí goá oē bêng-pe̍k chheh tiong ê ı̀-sù. Goá koh chiong Le̍k-tek-ko͘ só͘ kà ê hí kúi chiuⁿ chheh, tha̍k hō͘ i thiaⁿ. Hí tiong-ng iáu ū choē-choē ı̀-sù boē hiáu-tit ê, i lóng siông-sè kā goá kóng bêng.
Āu-lâi hit ê thài-thài ta̍k jı̍t lâi kà-sı̄ goá, lāu-bú iā siông-siông lâi thiaⁿ. Hí kúi jı̍t sǹg sı̄ ke̍k hó ki-hoē, goá chin hoaⁿ-hí, sin-khu iā chai-kiò khah ū khùi-la̍t, chiām-chiām thang chhut-khı̀ mn̂g-kháu, kap Pí-tek chē tı̄ soa thô͘ téng, á-sı̄ Kho-ní hû goá, iā thang kàu hái piⁿ.
Ū chı̍t jı̍t, sı̄ cha̍p-it ge̍h chhoe nih, hit ê thài-thài tùi goá kóng, Kui-lô, chit tia̍p sı̄ tang-thiⁿ, goá beh tò-khı̀ goán chhù; tı̄ hia iáu ū nn̄g ê ko͘-niû pí I-tí ko͘-niû khah soè, goá chı̄n ài in thiaⁿ-kı̀ⁿ lí ê tāi-chı̀, lí chiong só͘ ū ê tāi-chı̀, lí lóng siông-sè kā goá kóng, goá beh siá i, thèng-hāu kàu goán chhù tha̍k hō͘ in thiaⁿ.
In-ūi chit ê thài-thài siūⁿ beh siá goá ê tāi-chı̀, goá chiū kóng chhut-lâi, i chiah chhòng choè chı̍t pún chheh. Goá siūⁿ iā bô sím-mı̍h oē kham-tit siá, chóng-sı̄ ū chı̍t hāng goá chin hoaⁿ-hí, lâng khoàⁿ chit pún chheh, thang chai Kho-ní ū sím-mı̍h hó phín-hēng, cháiⁿ-iūⁿ toā táⁿ. Tùi chá kàu chit tia̍p Kho-ní bô lūn choè sím-mı̍h tāi-chı̀, lóng bô kóng ka-kı̄ hó, tàu-tí sı̄ goán ke-lāi ê hok-khı̀, toā poàⁿ sı̄ i ê khùi-la̍t.
Goá só͘ kā thài-thài kóng ê tāi-chı̀, i lóng siá-liáu, koh mn̄g, Lō͘-bé kúi kù lí beh siá mah? Goá kóng, Lō͘-bé beh siá Kho-ní chit chat chheh. Mn̄g goá, Tá-lo̍h chı̍t chat sǹg sı̄ i ê? Goá chiū oa̍t-liām hit jı̍t goán tùi Le̍k-tek-ko͘ hit pún toā pún só͘ tha̍k ê chheh kúi kù kóng, “Lán chiah-ê oē ê lâng eng-kai tio̍h tam-tài boē ê lâng ê loán-jio̍k, m̄ thang kiû ka-kı̄ ê hoaⁿ-hí.... Ki-tok iā bô kiû ka-kı̄ ê hoaⁿ-hí;” che sǹg sı̄ Kho-ní chı̍t chat ê chheh.
Kui-lô toān ê lō͘-bé.
