“Lâm-bû o-bí-tô-hu̍t” chit 6 jı̄ sı̄ choân Hu̍t-kàu ê kin-pún chin-chhoè, sı̄ sèⁿ-miā ê tiong-sim. Iā sı̄ chò sian-hong ê kang-chok, ín-chhoā lâng lâi sı̀n Kiù-chú Iâ-so͘ Ki-tok. Hoat-bêng chit 6 jı̄ ê tang-iûⁿ lâng chin-chiàⁿ sı̄ chong-kàu thian-châi. Tang-iûⁿ lâng tı̄ sai-pêng ū chhut Ki-tok ê sı̍p-jı̄-kè, tang-pêng ū seⁿ-chhut chit 6 jı̄ ê kháu-hō. Chong-kàu sı̄ tùi tang-iûⁿ chhut, i ê kng chiò kàu choân sè-kài.
1.“O-bí-tô” sı̄ sím-mı̍h ı̀-sù?
Chit 3 jı̄ sı̄ hêng-iông-sû. Ì-sù sı̄ bû-liōng siū bû-liōng kong; chiū-sı̄ kóng, i ê sèⁿ-miā bô sı̂-kan ê chè-hān, i ê êng-kng, ui-giâm bô khong-kan ê chè-hān. Chiū-sı̄ éng-oán kàu éng-oán, bô khí-thâu bô soah-boé ê chûn-chāi, koh ta̍k só͘-chāi tı̄-teh; bû só͘ put-chāi. Che chiū-sı̄ Chin-jû ê sı̍t-chāi ê khoán-sit.
2.“Hu̍t” sı̄ sím-mı̍h?
Hu̍t sı̄ miâ-sû, chiū-sı̄ “Jû-lâi” . Jû-lâi ê ı̀-sù chiū-sı̄ chiông jû lâi seng-chiá. Ì-sù chiū-sı̄ tùi Chin-jû ê sè-kài lâi, ūi-tio̍h beh chín-kiù it-chhè chiòng-seng, kam-goān chiâⁿ-chò lâng lâi chhut-sı̀--ê.
Só͘-í O-bí-tô nā kan-ta tı̄ thiⁿ-nı̍h ê O-bí-tô nā-tiāⁿ, án-ni chiū m̄-sı̄ sı̍t-chāi ê O-bí-tô. In-ūi i ê êng-kng iā ē chiò kàu tē-chiūⁿ chiah tio̍h. Só͘-í O-bí-tô nā bô chiâⁿ-chò lâng lı̂m-kàu sè-kan, chiū bē thang hoat-hui O-bí-tô ê chin-sèng. Tùi O-bí-tô-hu̍t ---- O-bí-tô-jû-lâi chiah ē thang oân-sêng chín-kiù it-chhè chiòng-seng, chit ê úi-tāi kang-chok.
Kı̀-jiân O-bí-tô-jû-lâi chhú lâng ê hêng-chōng lâi sè-kan, tek-khak bē thang kap lâng bô koan-hē. Só͘-í tı̄ chia tio̍h koh nn̄g jı̄ “Lâm-bû” chhut--lâi chiah ē ēng-tit.
3.“Lâm-bû” sı̄ sím-mı̍h ı̀-sù?
Lâm-bû sı̄ tōng-sû, chiū-sı̄ kui-bēng; chiū-sı̄ piàⁿ choân sèⁿ-miā lâi oá-khò, sı̀n-gióng, kui-i kap ho̍k-sāi, hit ê “Bô khí-thâu bô soah-boé, ta̍k só͘-chāi tı̄-teh, tùi Chin-jû ê sè-kài lâi chhut-sı̀ chiâⁿ-chò sè-kan lâng, lâi beh kiù kı̀ⁿ-nā oa̍h-teh ê lâng, hit ê Kiù-chú” ê ı̀-sù.
Chóng-kóng, Kiù-chú O-bí-tô-jû-lâi í-keng chhut-hiān, koh lâng kam-goān kui i, piàⁿ sèⁿ-miā lâi sı̀n-khò i. Che kiám m̄-sı̄ chong-kàu ê ke̍k-tı̀ mah?
Ū chı̍t tiám tio̍h chù-ı̀ ê, chiū-sı̄ lâng tio̍h piàⁿ sèⁿ-miā lâi ho̍k-sāi O-bí-tô-hu̍t chiah tio̍h; m̄-kú kı̂-sı̍t tò-péng, O-bí-tô-hu̍t ūi-tio̍h beh kiù chiòng-seng, kam-goān pàng-sak it-chhè lâi ho̍k-sāi lâng. Che kiò chò tāi-chû tāi-pi kiù khó͘ kiù lān. Só͘-í lâng hoaⁿ-hí pàng-sak it-chhè lâi oá-khò Jû-lâi, Jû-lâi iā piàⁿ i só͘ ū ê lóng-chóng lâi oân-sêng kiù lâng ê kang. Chit ê chong-kàu ê ke̍k-tı̀ tı̄ “Lâm-bû o-bí-tô-hu̍t” 6 jı̄ ê lāi-bı̄n kóng chin oân-choân.
Hoat-bêng chit 6 jı̄ ê sı̄ Sek-kia Mô͘-nı̂, chóng-sı̄ Sek-kia Mô͘-nı̂ bô kóng O-bí-tô-hu̍t sı̄ i pún-sin, á-sı̄ tó-ūi chı̍t ê. Nā-sı̄ án-ni, chit 6 jı̄ sı̄ chí-ū chı̍t khoán ê si-koa á m̄-sı̄? Á-sı̄ chı̍t khoán ê O-bí-tô chú-koan ê be̍k-sı̄ nā-tiāⁿ á m̄-sı̄? Un2-tàng m̄-sı̄ án-ni. Che tek-khak tio̍h kū-thé-hoà , tio̍h chiâⁿ-chò le̍k-sú-siōng chı̍t ê giâm-jiân ê khek-koan ê toā sū-sı̍t. Che m̄-sı̄ ká-siat ká-khong ê, sı̄ sū-sı̍t ū oa̍h-miā ê chin-lí chiah tio̍h.
Tàu-tí O-bí-tô-hu̍t sı̄ sím-mı̍h lâng, chit ê būn-tê tı̄ Sin-iok Sèng-keng ū kā lán kái-tap. Sek-kia Mô͘-nı̂ sı̄ chhin-chhiūⁿ kiâⁿ sé-lé Iok-hān lâi kan-chèng Bí-sài-a beh lâi; i m̄-sı̄ kiù-chú. Bí-sài-a chiū-sı̄ Ki-tok, chiū-sı̄ Kiù-sè-chú, chiū-sı̄ O-bí-tô-hu̍t. Iâ-so͘ Ki-tok í-goā bô ū pa̍t ê miâ thang oá-khò lâi tit-tio̍h kiù.
Chhiáⁿ lán khoàⁿ chit kúi chām Sèng-keng, chiū ē koh khah bêng-pe̍k, Hui-lı̍p-pí 2:6-8; Iok-hān 1:14, 11:25, 7:37, 38, 8:12, 12:46. Tû-khı̀ Ki-tok Iâ-so͘ í-goā, kiám ū 南無? Kiám ū阿彌陀? Kiám ū佛? Koh tı̄ pa̍t-ê pèng bô chín-kiù; in-ūi tı̄ thiⁿ-ē bô siúⁿ-sù pa̍t ê miâ tı̄ lâng ê tiong-kan, hō͘ lán tiàm tı̄ i lâi tit-kiù (Hēng-toān 4:12).
(Tâi-oân Kàu-hoē Kong-pò tē 789 kı̂, 1954 nı̂ 9 goe̍h)
