Lâng ê kè-ta̍t

 Lâng ê kè-ta̍t chāi-tı̄ tá-lo̍h? Goá siūⁿ lán nā jı̄n-bat Sèng-keng, chhim-chai í-hā só͘ kóng chit saⁿ-hāng sū, chiū oē bêng-pe̍k hit ê kè-ta̍t sı̄ sím-mı̍h: 
 (1) Lâng ê kè-ta̍t sı̄ chāi-tı̄ lí-kái lâng ê lâi-goân. Lâng sı̄ tùi tá-lo̍h lâi--ê? Chı̀n-hoà-lūn ê Ta̍t-ní-bûn kóng, “Lâng sı̄ tùi kâu lâi chı̀n-hoà--ê.” Pêng-iú! Lâng tàu-tí sı̄ kâu lâi piàn ê mah? Nā-sı̄ án-ni, lâng chiū-sı̄ kâu ê hō͘-è, lí siūⁿ hit ê kè-ta̍t ū goā-choē? Sı̍t-chāi kâu boē-oē piàn-choè lâng, in-ūi kâu kap lâng ê oa̍h-miā sı̄ bô sio-siâng. Lâng ū lêng, lâng oē-hiáu kèng-pài Sı̂n, kâu chiū boē-oē. Chı̀n-hoà-lūn put-kò sı̄ chı̍t ê ha̍k-soat nā-tiāⁿ, m̄-sı̄ chin-lí. Nā-sı̄ án-ni, lâng tàu-tí sı̄ tùi tá-lo̍h lâi--ê? Sèng-keng ê thâu-chı̍t pún kā lán kóng, “Lâng sı̄ Siōng-tè só͘ chhòng-chō--ê, sı̄ Siōng-tè ēng toē-chiūⁿ ê thô͘-hún chhiau choè lâng, pûn oa̍h-khùi jı̍p tı̄ lâng ê phı̄ⁿ-khang lāi, chiū chiâⁿ-choè oa̍h ê lêng-hûn, sı̄ chiàu Siōng-tè ê hêng-siōng kap khoán-sit lâi chō--ê, sı̄ chhòng-chō lâm--ê, lú--ê, in-ūi (1) Lán ê seng-khu sı̄ Siōng-tè chhin-chhiūⁿ só͘ chō ê kia̍t-chok. (2) Lâng ê lêng-hûn sı̄ Siōng-tè chhin-chhiūⁿ pûn oa̍h-khùi ê oa̍h-lâng. (3) Lâng ê sèng-chêng khoán-sit sı̄ chhiong-moá Siōng-tè ê tı̀-hūi kap chhong-bêng, koh ū Siōng-tè ê Sèng-kiat, jı̂n-ài, kong-gı̄, sı̀n-sı̍t kap lı̂n-bín, sı̄ ke̍k-kı̂ siān-bí kap êng-kng--ê, lí siūⁿ hit ê kè-ta̍t ū joā-choē? Siōng-tè ài thê-ko lâng ê tē-ūi, nā-sı̄ sè-kan lâng ka-kı̄ ài kàng-kē, jı̄n-tēng ka-kı̄ sı̄ kâu lâi chı̀n-hoā--ê. Sı̍t-chāi chin khó-sioh! Pêng-iú! Siōng-tè ài lí sı̀n I ê oē, I beh ko-seng lí, hō͘ lí thang lâi êng-kng I, lí ū hoaⁿ-hí á-bô? 
 (2) Lâng ê kè-ta̍t sı̄ chāi-tı̄ jı̄n-bat lâng ê oa̍h-miā. Lâng ū jio̍k-thé kap lêng-hûn, lâng ê kè-ta̍t sı̄ chāi-tı̄ i ê lêng-hûn kap oa̍h-miā. Goā-kok bat-ū chı̍t ê hoà-ha̍k-ka, i hun-sek lâng ê sin-thé, kiat-kó kóng, Lâng ê kè-ta̍t chí-ū chı̍t ê lêng-gûn nā-tiāⁿ, chiū-sı̄: 
 (1) Lâng ê sin-thé 100 hūn ê 70-80 sı̄ chúi-hun, chiū-sı̄ ke̍k piān-gı̂--ê. (2) Lâng ū chí-iû, thang choè sat-bûn 6 tè. (3) Lâng ū lı̂n-chit, thang choè hé-chhat 220 ki. (4) Lâng ū chio̍h-hoe chit, thang siau-to̍k chı̍t ê koe-nâ. (5) Lâng ū jiû-n̂g chit, thang thāu chı̍t-chiah káu ê ka-cháu. (6) Lâng ū thih-hun, thang phah chı̍t ki thih-teng. (7) Ū iâm chı̍t-pé. (8) Ū thn̂g chı̍t au. (9) Ū tām-po̍h iâm-khı̀ thang choè hé-io̍h lâi pàng chı̍t mn̂g chhèng. 
 Che-sı̄ hun-sek liáu ê kè-ta̍t. Chóng-sı̄ lâng ê si-thé, lí siūⁿ hit ê kè-ta̍t ū joā-choē? Chiū-sı̄ tian-tò the̍h-chı̂ⁿ thiap--lâng, lâng iā m̄-ài ín-siū. Án-ni lán thang chai lâng ê kè-ta̍t sı̄ chāi-tı̄ lâng ê oa̍h-miā. Chú Iâ-so͘ bat kóng, “Lâng tit-tio̍h choân sè-kài lâi sòng-sit i ê sèⁿ-miā ū sím-mı̍h lı̄-ek? In-ūi lâng beh chhut sím-mı̍h lâi tùi-oāⁿ i ê sèⁿ-miā? (Mk 8:36)” Iâ-so͘ khoàⁿ chı̍t ê lâng ê kè-ta̍t sı̄ chāi-tı̄ i ê oa̍h-miā, chı̍t ê lâng ê lêng-hûn sı̄ pí choân sè-kài khah kùi-khı̀. 
 Chóng-sı̄ kin-á-jı̍t ū choē-choē lâng ūi-tio̍h ài tit-tio̍h bêng, lı̄, hù, kùi, chiū chiong oa̍h-miā pàng-khı̀, sio̍k-gú kóng, “Niáu ûi sı̍t bông, lâng ûi châi sú”, choē-choē lâng tham-ài chı̂ⁿ-châi lâi sòng-sit in ê sèⁿ-miā, iā ū choē-choē lâng ūi-tio̍h ài hòng-chhiòng jio̍k-thé ê su-io̍k, khí phiâu, tó͘, ı̂m, lâi hāi in ê sin-thé kap lêng-hûn, sı̍t-chāi chin khó-sioh. Téng-kù Chú Iâ-so͘ só͘ kóng ê oē, sı̄ pau-hâm lêng ê oa̍h-miā, in-ūi tē-it ê A-tong, jı̂n-lūi ê sí-chó͘ hoān-choē sit-lo̍h Siōng-tè só͘ sù ê lêng-miā, nā-sı̄ tē-jı̄ ê A-tong, Iâ-so͘ Ki-tok tùi sí koh-oa̍h lâi ho̍k-tò i, beh hō͘ lán sı̀n-khò I, tiàm tı̄ I lâi tit-tio̍h lêng-miā, hō͘ lán oa̍h teh ū ǹg-bāng, ū pêng-an kap hoaⁿ-hí, lâng nā tit-tio̍h chit ê lêng-miā, oē-thang sêng-siū éng-oa̍h, hit ê kè-ta̍t sı̄ iâⁿ-koè choân sè-kài. Pêng-iú! Lí ū hoaⁿ-hí tiàm tı̄ Ki-tok lâi chiap-siū I ê oa̍h-miā bô? 
 (3) Lâng ê kè-ta̍t sı̄ chāi-tı̄ chhim-bat Siōng-tè. Kó͘-chá ū chı̍t ê Hi-pek-lâi ê ông, i ê miâ kiò-choè Só͘-lô-bûn, lūn i ê êng-hoâ hù-kùi kap tı̀-hūi, sı̄ bô lâng oē ta̍t-tio̍h i, i kàu nı̂-lâu ê sı̂, ū siá chı̍t pún chheh kiò-choè Thoân-tō-su, i kám-thàn jı̂n-seng kóng, “Bān-sū lóng sı̄ hi-khang! Lâng tı̄ jı̍t-kng ê ē-bı̄n it-chhè só͘ lô-le̍k ê, sı̄ chhin-chhiūⁿ sa-iáⁿ lia̍h-hong. Lâng ê kè-ta̍t sui-jiân sı̄ án-ni, I koh kóng, nā-sı̄ lâng oē-hiáu-tit thàn i siàu-liân ê jı̍t lâi kı̀-liām chhòng-chō i ê Chú, lâi kèng-ùi I, án-ni chiū ū kè-ta̍t. Pêng-iú! Lí ū hoaⁿ-hí jı̄n-bat chhòng-chō lí ê Chú lâi kèng-ùi I á-bô? Só͘-lô-bûn ông ê lāu-pē Tāi-pı̍t ông, iā bat chò si kóng, Lâng sı̄ cháiⁿ-iūⁿ ê pi-bı̂, i kóng, “Lâng chhin-chhiūⁿ pûn chı̍t ê khùi, i ê jı̍t chhin-chhiūⁿ iáⁿ (Si-phian 144:4).”
 Lâng lóng sı̄ hu-ké, pí khong-khı̀ khah khin (S. 62:9). Lâng ê jı̍t-chí chhin-chhiūⁿ chı̍t-pa-chiúⁿ (S. 39:5). Sui-jiân sı̄ án-ni, i koh kóng, Goá ê ǹg-bāng sı̄ chāi-tı̄ lí (S. 39:7). Án-ni hō͘ lán thang chai lâng ê kè-ta̍t sı̄ chāi-tı̄ i jı̄n-bat ka-kı̄ tı̄ Siōng-tè ê bı̄n-chêng sı̄ cháiⁿ-iūⁿ ê pi-bı̂, pāi-hoāi, tông-sı̂ oē-hiáu-tit jı̄n-bat Siōng-tè lâi ǹg-bāng oá-khò I, koh lán nā chhim-chai jı̄n-bat Siōng-tè, I beh hō͘ lán chai-iáⁿ I cháiⁿ-iūⁿ koan-sim thiàⁿ lán sè-kan lâng. Tāi-pı̍t kóng, “Lâng sı̄ sím-mı̍h, lí kèng-jiân bat i, siàu-liām i” (S. 144:3), koh kóng, “Lâng ê kiáⁿ sı̄ sím-mı̍h, lí koàn-kò͘ i?” (S. 8:4). 
 Lán tı̄ Siōng-tè ê bı̄n-chêng sı̍t-chāi sı̄ pi-bı̂, bô kè-ta̍t. Sui-jiân sı̄ án-ni, iáu-kú Siōng-tè jı̄n-bat lán, siàu-liām lán, koàn-kò͘ lán, lí khoàⁿ Siōng-tè thiàⁿ lán kàu án-ni! Lí siūⁿ hit ê kè-ta̍t ū joā-toā ah! Iok-pek i bat kóng, “Lâng sı̄ sím-mı̍h, tı̀-kàu lí lia̍h i choè toā, tı̀-kàu lí chiong i khoà tı̄ sím-mı̍h (Ip. 7:17), án-ni lâng sui-jiân sı̄ bı̂-soè, iáu-kú Siōng-tè lia̍h lán choè toā, khoà-sim tı̄ lán. Lí khoàⁿ Siōng-tè chiong to̍k-seⁿ Kiáⁿ lán ê Chú Iâ-so͘ siúⁿ-sù lán, ūi-tio̍h lán ê choē sí tı̄ sı̍p-jı̄-kè téng, lí siūⁿ Siōng-tè cháiⁿ-iūⁿ khoà-sim tı̄ lán! Iok-pek koh kóng, “Sè-kan lâng sı̄ sím-mı̍h, oē sǹg choè chheng-khı̀ ah? Hū-jı̂n-lâng só͘ seⁿ ê sı̄ sím-mı̍h, oē sǹg choè kong-gı̄ mah?” (Ip. 15:14)
 Lán m̄-nā sı̄ pi-bı̂ koh chài chhut-sı̀, chiū-sı̄ ù-oè ê choē-jı̂n, sı̄ put-gı̄ ê lâng, chóng-sı̄ Siōng-tè thiàⁿ lán, hō͘ lán sı̀n-khò Iâ-so͘, choē thang tit-tio̍h sià-bián, hō͘ lán tùi Chú Iâ-so͘ ê pó-huih, choē thang tit-tio̍h soé-chheng. Siōng-tè koh chheng lán chit ê choē-jı̂n choè-gı̄, hō͘ lán kap I koh hô, koh thang choè I ê kiáⁿ-jı̂, hō͘ lán m̄-bián tı̂m-lûn, oē-thang tit-tio̍h éng-oán oa̍h! Lí khoàⁿ Siōng-tè thiàⁿ lán kàu án-ni! Pêng-iú, lí siūⁿ án-ni lâng ê kè-ta̍t ū joā-toā ah! Án-ni lâng ê kè-ta̍t sı̄ chāi-tı̄ chhim-chai jı̄n-bat Siōng-tè lâi sı̀n-khò I. 

(Tâi-oân Kàu-hoē Kong-pò tē 800 kı̂, 1955 nı̂ 8 goe̍h)