Lâng ê pı̀-bı̍t
Pı̀-bı̍t sı̄ sím-mı̍h? “Pı̀-bı̍t sı̄ m̄-ài hō͘ lâng chai, hoán-tńg lâng ài chai, ū-sı̂ sı̄ lâng só͘ boē-oē chai, á-sı̄ iáu-bē chai--ê.” Choè-kūn siông-siông thiaⁿ-kı̀ⁿ chı̍t kù “goân-chú-tân ê pı̀-bı̍t;” chit ê pı̀-bı̍t, Bí-kok m̄-ài tùi-te̍k chai, Te̍k-kok ài chai: cha̍p-goā nı̂ chêng lâng iáu m̄-chai, iáu ū pa̍t hāng pı̀-bı̍t, hiān-tāi lâng m̄-chai, iā boē-oē chai. Lâng ê pı̀-bı̍t sı̄ sím-mı̍h? Lâng ū hun lâm-sèng, lú-sèng; lâm-sèng ê pı̀-bı̍t kap lú-sèng ê pı̀-bı̍t bô tú-tú saⁿ-tâng. Lâm-sèng ê tiōng-hu ū-sı̂ ū pı̀-bı̍t; lú-sèng ê thài-thài ū-sı̂ iā ū pı̀-bı̍t. Ū-sı̂ pa-pah ū pı̀-bı̍t, ū-sı̂ ma-mah ū pı̀-bı̍t; ū-sı̂ hāu-siⁿ ū pı̀-bı̍t, ū-sı̂ cha-bó͘-kiáⁿ ū pı̀-bı̍t. Siā-hoē kok kài----chèng-tı̄, goā-kau, keng-chè, kàu-io̍k, kho-ha̍k, gē-su̍t, i-ha̍k, chong-kàu kok hong-bı̄n siông-siông ū pı̀-bı̍t chûn-chāi: sio̍k-gú kóng, “Kang-ô͘ chı̍t tiám koat, chhe-chú put-khó soat,” che sı̄ lâng ū pı̀-bı̍t ê pı̂n-kù, put-kò chit hō pı̀-bı̍t, pē-bú ê pı̀-bı̍t, chú-lú ê pı̀-bı̍t; tı̄ chiah ê siong-tùi-sèng ê tùi-chhiōng só͘ chûn-chāi ê pı̀-bı̍t, khah-siông ū pháiⁿ--ê. Só͘-í Pó-lô tı̄ Lô-má 1 chiuⁿ 24 chat kàu 32 chat só͘ kı̀ chit toāⁿ, lóng sı̄ lâng só͘ ài khǹg-ba̍t ê. Chhiáⁿ lán tùi lâm-lú ê pı̀-bı̍t lâi khoàⁿ; ū loân-ài, iā ū loān-ài, saⁿ-kak, sı̀-kak, to-kak ê loân-ài. Iā ū tông-sèng-ài, iā ū lâng ū i ê lāu-pē ê bó͘ (I Ko 5:1). Kū-iok, Siōng-tè beh kàng jiû-n̂g-hé sio Só͘-to-má siâⁿ ê sı̂, nn̄g ê thiⁿ-sài kàu Só͘-to-má Lô-tek ê chhù, hit siâⁿ ê lâng tùi siⁿ-hūn ê lâng-kheh hit khoán ê bô-lé. Lô-tek ūi-tio̍h beh kái-kiù chit nn̄g ê lâng, tah-èng beh chiong i nn̄g ê bē chhut-kè ê cha-bó͘-kiáⁿ chhut-chāi in pa-lē (Chhòng-sè-kí 19:4-8). Chit nn̄g-toāⁿ Sèng-keng só͘ kı̀, m̄-sı̄ hān-tiāⁿ kó͘-chá ê sū, hiān-sı̂ iā ū chit hō ê pı̀-bı̍t. Lūn tiōng-hu ê pı̀-bı̍t, tı̄ goā-bı̄n ê sū-chêng, i ê hū-jı̂n-lâng oh-tit chai; ū sı̂ tiōng-hu ta̍k jı̍t chhut-khûn sı̄ teh tiōng-lō͘, siàu koe-lō͘ chio̍h, á-sı̄ tı̄ hı̀-ı̄ⁿ, chiú-koán. Sui-jiân ū chèng-tong ê sū-gia̍p, ū sı̂ sı̄ teh bú-pè, á-sı̄ kiâⁿ kàu chū-sat, hū-jı̂n-lâng iā m̄-chai-iáⁿ. Hū-jı̂n-lâng ê pı̀-bı̍t, choē-choē chhut-khı̀ poa̍h-kiáu, khan-oē, thiu-chhiam, pok-koà, liap-chı̂ⁿ, thàn-chı̂ⁿ sai-khia, i ê tiōng-hu mā m̄-chai chiah ê pı̀-bı̍t. Lāu-pē ê pı̀-bı̍t, ka-cho̍k hiah choē lâng iā khoàⁿ boē chhut. Bô phah-sǹg nı̂-hè kè kàu poàⁿ-pah ê lâng, chhoā soè-ı̂ tı̄ piⁿ-á, á-sı̄ kim-ok chông-kiau chhı̄ cha-bó͘, hō͘ lâng liāu boē chhut. Ū ê lāu-bú pí lāu-pē ke siàu-liân chin-choē, khoàⁿ lāu-pē bô tio̍h, the̍h chı̂ⁿ hō͘ khah siàu-liân--ê ēng. Ū ê lāu-bú to̍k-sat lāu-pē, iā ū lāu-bú soah-sí kúi-nā ê tiōng-hu, lāi-tiong ū sı̂ iā ū pı̀-bı̍t, pı̀-bı̍t chāi-tı̄ tó-ūi, chió-chió lâng chhai oē tio̍h. Choè-āu lâi siūⁿ chú-lú ê pı̀-bı̍t; ū choē-choē chú-lú ê pháiⁿ ê sı̍p-koàn, sún-hoāi ka-kı̄ ê sin-thé, sı̂n-keng soà soe-jio̍k, pē-bú chhoā khı̀ chiū-kūn i-seng, i-seng iā bô hoat-tō͘ tı̄-liâu. Ū sı̂ chú-lú ū pháiⁿ ê su-sióng, kau-poê pháiⁿ-iú, kàu hō͘ koaⁿ-thiaⁿ hoat-kak, in ê pē-bú iā m̄-chai in ê pı̀-bı̍t. Bat ū ha̍k-hāu sian-siⁿ khı̀ gín-ná ê chhù kiò ha̍k-seng khı̀ tha̍k-chheh, chhù-nih ê lâng kóng, gín-ná to ta̍k-jı̍t toà piān-tong, phāiⁿ chu-pau khı̀ ha̍k-hāu, kiám bô khı̀ ha̍k-hāu? Hit-sı̂ chiah chai ha̍k-seng í-keng pı̀ⁿ lo̍k-tô. Sio̍k-gú kóng, “Oē siⁿ kiáⁿ sin, boē siⁿ kiáⁿ sim,” kiáⁿ sim chiū-sı̄ chú-lú ê pı̀-bı̍t. Ū sı̂ pē-bú beh kā hāu-seⁿ chhoā ke-āu, hāu-siⁿ m̄ tông-ı̀, hit-sı̂ chiah chai i ū ka-kı̄ tèng-ı̀ ê tùi-chhiōng. Ū sı̂ beh kā cha-bó͘-kiáⁿ phoè-chhin, hit-sı̂ chiah hoat-kiàn cha-bó͘-gín-ná í-keng ū sin-ı̄n. Lâng beh chò-chhin lóng chin gâu thàm-thiaⁿ, chóng-sı̄ chhoā sim-pū siông-siông koà-kūi lâi. Ta̍k-jı̍t tı̄ chhı̄-lāi teh kı̀ⁿ-bı̄n ê chú-lú to m̄-chai in ê pı̀-bı̍t, siat-sú in nā chhut-goā, tùi tá-lo̍h chai-iáⁿ? Chóng-jı̂ giân--chi, lâng ê pı̀-bı̍t toā-poàⁿ sı̄ lâng ê choē-ok, chit ê choē-ok liân kóng to kiàn-siàu. Lâng ê choē-ok, tùi kàu-io̍k, chèng-tı̄, hoat-lu̍t sı̄ boē thang kái-tû--tit. Chí-ū tio̍h khò Iâ-so͘ Ki-tok ê pó-huih thang tit-tio̍h soé-chheng, soà tit-tio̍h khùi-la̍t thang thoat-lı̄. Ko-san-cho̍k tit-tio̍h Ki-tok, boē koh thâi lâng-thâu, liân hun-chiú to bô chia̍h, hoán-tǹg iâⁿ kè pı̂ⁿ-toē hiaⁿ-tı̄. Lâng ê pı̀-bı̍t nā chiām-chiām kiám-chió, chiū-sı̄ chiām-chiām kūn tı̄ thian-kok. Lâng nā hoán-hoé jı̄n-choē, chiū-sı̄ lāu-chhut ka-kı̄ ê pı̀-bı̍t. Lán ài tit-tio̍h kiù, tio̍h hoán-hoé jı̄n-choē. Iâ-so͘ kóng, “Lín tio̍h hoán-hoé, in-ūi thian-kok kūn lah” (Má-thài 4:17). (Tâi-oân Kàu-hoē-kong-pò tē 783 kı̂, 1954 nı̂ 3 ge̍h)