Lâng ná poe-chiáu

Lio̍k-tiâu ê sı̂, ū Kàu-su khı̀ Eng-kok, kā ông kóng, goá thoân Sèng-kàu tı̄ chia, chhiáⁿ ông ín-chún. Ông liâm-piⁿ chiū tiàu chèng gı̄-sū, tı̄ hit mê-hng saⁿ- kap chū-chı̍p, tāi-ke chham-gı̄ chit chân sū; gı̄-lūn liáu chhin-chhiūⁿ m̄ ín-chún. Hut-jiân ū chı̍t-chiah chiáu tùi goā-bı̄n poe-jı̍p-lâi, koh sûi-sı̂ poe-chhut-khı̀, chı̍t-tiap-á-kú hut-jiân bô khoàⁿ-kı̀ⁿ, Hit-sı̂ teh chū-hoē ê tiong-kan, ū chı̍t- ê lāu-lâng khí--lâi kóng, goá ū chı̍t-kù oē beh kóng, chhiáⁿ ông bo̍k-tit chó͘-chí. Ông kóng, tio̍h, chiū chún i kóng.

Lāu-lâng chiū kóng, Taⁿ lán chiah-ê chhut-sı̀ tı̄ chit sè-kan, ia̍h chhin-chhiūⁿ chit-hō poe--lâi ê chiáu chı̍t-iūⁿ, m̄-chai tùi tah-lo̍h lâi, koh m̄-chai beh tùi tah- lo̍h khı̀. Chóng-sı̄ chit lāi-tiong ê ò- biāu, liōng-pit chit-ê Kàu-su ē kà-sı̄--lán; nā-sı̄ án-ni chhiáⁿ ông bo̍k-tit chó͘-tòng i. Hit-tia̍p tâng chū-hoē ê lâng thiaⁿ lāu-lâng só͘ kóng ê oē, ta̍k-ê kóng, chin tio̍h, chin ū tō-lí. Tùi hit chı̍t-sı̂ Iâ-so͘ Sèng-kàu chiū piàn-piàn thoân tı̄ Eng- kok ê Lûn-tun siâⁿ.

Hiān-kim thiⁿ-ē bān peh-sı̀ⁿ ia̍h lóng chhin-chhiūⁿ chit-hō poe-chiáu, m̄ chai tùi tah-lo̍h lâi, iū m̄ chai tùi tah-lo̍h khı̀. Mn̄g sè-sio̍k lâng in tah-lo̍h lâi, i chiū ı̀n, sı̄ pē-bú siⁿ--ê; mn̄g pē-bú kap sí-chó͘ sı̄ tah-lo̍h lâi, i chiū kóng, in sı̄ thiⁿ siⁿ--ê. M̄-kú lūn Siōng-tè khí-thâu cháiⁿ-iūⁿ chhòng-chō sè-kan lâng, i lóng m̄ chai. Koh mn̄g in, lâng sí liáu-āu chiū khı̀ tah-lo̍h, i iû-goân bē-hiáu kóng. Só͘-í tio̍h thoân hok-im tı̄ in tiong-kan, hō͘ in thang tit-tio̍h bêng-pe̍k chit-hō ò-biāu ê tō-lí, iā ē tit-tio̍h toā lı̄-ek. In-ūi Iâ-hô- hoa ê lu̍t-hoat sı̄ chiâu-chn̂g, thang lâi hō͘ khùn-khó͘ ê lâng khoàⁿ-oa̍h; I-ê hoat-tō͘ sı̄ chin-sı̍t, thang tû-khı̀ lâng ê gû-chhún.

(Tâi-oân Hú-siâⁿ-kàu-hoē-pò tē 86 tiuⁿ,1892 nı̂ 6 ge̍h)