Lâu Tiong-kian bo̍k-su tı̄ Iû-thài kok

Ùi Wiki Tô·-su-kóan

Goán toà tı̄ Ai-kı̍p Khai-jiû (Cairo) ê só͘-chāi gō͘ jı̍t kú. Ū peh tı̄ Toā Kim-jı̄-thah ê boé-liu, sı̍t-chāi kan-khó͘ peh, chóng-sı̄ kong-kéng khoàⁿ chin hn̄g. Iā ū khı̀ tı̄ Phok-bu̍t-koán khoàⁿ chit kin-nı̂ khui-tio̍h ê Hoat-ló bōng ê pó-mı̍h chin hi-hán; hit ê kim-lūi sǹg bē liáu. Tı̄ 3 goe̍h 16 hō chē àm chhia khı̀ tang-pak, kàu thiⁿ-kng chiū kàu tı̄ Ka-sat (chiū-sı̄ chá Hui-lı̄-sū lâng ê siâⁿ), iā téng-po͘ 10 tiám cheng chiūⁿ Iâ-lō͘-sat-léng. In-ūi hiān-sı̂ ū chū-tōng-chhia, chiū lú-hêng khah lı̄-piān. Thâu-chı̍t jı̍t goán ū khoàⁿ Hoê-hoê-kàu ê toā Lé-pài-sı̄ (Mosqoe of Omar) chiū-sı̄ tı̄ éng-koè Sèng Tiān ê tē. Iā ū khı̀ tı̄ Iû-thài lâng Ai-khàu-só͘, in iû-goân teh khàu pún-kok só͘ sit-lo̍h ê êng-kng, thiaⁿ-liáu sı̍t-chāi khó-lı̂n. Iâ-lō͘-sat-léng pí hái-bı̄n koân 2000 chhioh, goán tùi hia khı̀ tı̄ Sí Hái, pí hái-bı̄n kē 1400 chhioh, lı̄ 25 Eng-lí. Ū koè Iâ-lı̄-ko, iā khoàⁿ Iok-tàn hô. Tı̄ Sí Hái sé-e̍k; chhı̀-khoàⁿ tı̂m, bē tı̂m, in-ūi chúi hiah-nı̍h kiâm! Keh jı̍t khı̀ tı̄ Pek-lı̄-hêng; tı̄ lō͘-nı̍h khoàⁿ-kı̀ⁿ Lia̍p-kiat ê bōng. Tı̄ Pek-lı̄-hêng ū só͘ lia̍h chò Chú chhut-sı̀ ê bé-tiâu, m̄-chai sı̄ á m̄-sı̄. Khó-sioh hit só͘-chāi tùi tı̄ Lô-má kàu kap Hi-lia̍p-kàu khiàn-sńg ê chng-thāⁿ chiū lóng sit-lo̍h hit ê pún-lâi ê bı̄n-bo̍k. Tńg-lâi Iâ-lō͘-sat-léng chiū khı̀ Ka-ná soaⁿ, chia in-ūi ū chē-chē kiàn-tiok chiū oh-tit sióng-siōng chá-jı̍t ê chōng-thài. Iā ū khoàⁿ Pit-sū-tāi ê tı̂, kap hit ê lia̍h-chò Chú giâ sı̍p-jı̄-kè ê lō͘ (Via Dolorosa). Lé-pài-jı̍t khı̀ Sèng Bōng Pài-tn̂g. Chit keng sui-jiân sı̄ ı̂ⁿ-ı̂ⁿ ê chin toā keng, iáu-kú tı̄ piⁿ-á ū hun kúi-nā keng, hō͘ Thian-chú, Hi-lia̍p, Sū-lı̄-a, Ai-kı̍p (Coptic) chiah-ê Ki-tok-kàu siāng chı̍t sı̂ sûi-ê chò ka-tı̄ ê lé-pài-sek!! Chin kiáu-jiáu-bē-ē chòng-giâm. Iā ū Eng-kok ê kéng-chhat teh siú, kiaⁿ-liáu ū saⁿ-chiⁿ ! Lı̄-khui hia khı̀ pak-sı̀. Tı̄ ē-tàu-sı̂ keng-koè Sat-má-lı̄-a, iā ū lim Ngá-kok ê chéⁿ ê chúi chin liâng. Ū oá Kı̂-lí-sim kap Í-pat ê soaⁿ-kha, iā ū khı̀ Sı̄-kiàm (Nablus, chit só͘-chāi tı̄ kı̄n-lâi ê tē-tāng ū toā sún-hāi). Tı̄-hia ū kó͘-chá Sat-má-li-a phài ê lāu chè-si, i ū chiong ke̍k chá Mô͘-se Ngó͘-keng ê bûn hō͘ goán khoàⁿ. Koh koè soaⁿ chiū keng koè Iâ-su-lia̍t ê pêⁿ-iûⁿ. Che sı̄ pûi-tē, chêng boē bat khoàⁿ pûi-tē tı̄ Ka-lâm ! Chiah kàu Ná-sat-le̍k; tı̄-chia só͘ siū ê kám-chhiok oh-tit kóng. Ū thang khoàⁿ Má-lı̄-a ê chéⁿ, iā ū peh hit pêng ê soaⁿ. Tı̄-hia khoàⁿ-kı̀ⁿ chheh-bı̄n só͘ kı̀ ê kong-kéng chiū-sı̄ lán Sèng-tō ū chhut-miâ ê só͘-chāi. Tı̄ pak-pêng lı̄ 60 Eng-lí ū Hek-bûn soaⁿ khàm-seh teh sih. Lı̄ Ná-sat-le̍k koè Ka-ná siâⁿ chiū ē-po͘ 4 tiám kàu Ka-lı̄-lı̄ Hái ê Thê-pí-lı̄-a, chiū-sı̄ tı̄ hái ê sai-lâm. Chit ê tē-hng sı̄ chin kē, pí hái-bı̄n kē 682 chhioh. Tı̄ Chú ê sı̂ Hi-lu̍t An-thê-phàⁿ ū i ê ông-kiong tı̄ kı̄n-hū ê soaⁿ-piⁿ; iā ū chhut-miâ ê jiû-n̂g choâⁿ tı̄-hia. Hiān-sı̂ So͘-kek-lân ê Tiúⁿ-ló-kàu ū siat i-koán tú tı̄ hái-kı̂ⁿ, goán ū toà tı̄-hia kap Sòng Ko͘-niû (Hazel chiū-sı̄ He-sù) chò-hoé. Goán tùi hia chē chûn-á tı̄ hái-bı̄n iā ū khı̀ Ka-pek-lông. Koh put-sı̂ teh khoàⁿ hit ê ge̍k-soaⁿ Hek-bûn. Khó-sioh sı̂-kan chin pek, chiū beh liâm-piⁿ tńg-khı̀ Tē-tiong-hái piⁿ ài koè Lé-pài-jı̍t tı̄ Ka-bı̍t soaⁿ. (Téng-bı̄n chiah-ê sı̄ tùi Lâu Bo̍k-su ê phoe e̍k--ê. Liâm Bo̍k-su iā kap i khı̀) (Tâi-oân Kàu-hoē-pò tē 521 koàn,1928 nı̂ 8 ge̍h)