Léng-chúi-kheⁿ ê A-pún peh--á

Chin chē nı̂ chêng, chı̍t-ê 6--goe̍h thàu-chá, thiⁿ chiām-chiām teh kng, lō͘-chúi iáu-boē ta, pe̍h-bū iáu tà tı̄ tiū-tiâⁿ--nih, tek-ûi lāi ê kū-chhù, iû-goân tiām-chih-chih. Hiông-hiông thiaⁿ-tio̍h chı̍t-chūn cha-po͘-lâng ê khàu-siaⁿ, kā sı̀-chiu-ûi ê tiām-chēng phah-phoà, khàu-siaⁿ ùi mn̂g-kháu ê chio̍k-thâu lō͘-kháu chı̍t-lō͘ thoân--jı̍p-lâi, choè-āu tiāⁿ tı̄ tiū-tiâⁿ-téng, cha-po͘-lâng siang-kha kūi tı̄ goán a-kong bı̄n-thâu-chêng. Ah! Sı̄ A-pún peh--á ê hāu-seⁿ----A-hoan--á, i lâi kā goán pò A-pún peh--á cha-mê koè-sin--khı̀ ê siau-sit. A-kong bı̄n-sek giâm-sio̍k, khin-khin kā A-hoan--á hû--khí-lâi, kā kau-tài kóng: “Goá chai--a, chit-má lí kín tńg-khı̀ bô-êng, hoa̍t-lo̍h toā-sè-hāng tāi-chı̀, chhut-soaⁿ ê jı̍t-chí khoàⁿ hō͘ hó chiah koh thong-ti--goá, hó--a, mài koh háu--a, kín tńg--khı̀, kín tńg--khı̀.” Sàng A-hoan--á lı̄-khui liáu-āu, a-kong tı̄ mn̂g-kháu-tiâⁿ chē kui chái-khí, ba̍k-chiu kim-kim-siòng ǹg chhù-goā ê sió-lō͘, chhin-chhiūⁿ teh tán siáⁿ-mih lâng. A-pún peh--á sı̄ a-kong siōng chhin ê kiat-pài sió-tı̄, goán a-kong sı̄ su-seng-chú mā sı̄ ko͘-kiáⁿ. A-pún peh--á kap a-kong siōng hó mā siōng kóng ū-oē. A-pún peh--á bô toà tı̄ goán chng-thâu, i toà tı̄ chin hn̄g ê soaⁿ-téng, hit-ê só͘-chāi kiò-chò “Léng-chúi-kheⁿ”. Lō͘-tô͘ iâu-oán, a-kong kap A-pún peh--á chin kú chiah ē-tàng kı̀ⁿ chı̍t-pái bı̄n, m̄-koh A-pún peh--á ē khiâ hit-tâi 50 c.c. gû-leng-sek ê su-khok-tat, khiâ chhiau-koè chı̍t-tiám-cheng ê lō͘, ùi Léng-chúi-kheⁿ lâi Ta-khe chhoē goán a-kong. Ta̍k-pái khoàⁿ-tio̍h A-pún peh--á tı̄ goán tau lō͘-kháu chhut-hiān ê sı̂, goá tō ē chin hoaⁿ-hí koh chin toā-siaⁿ hoah: “A-kong! A-kong! A-pún peh--á lâi--a!” 60 goē hoè ê A-pún peh--á, seⁿ-chò chin lò mā chin sán, toà chı̍t-hù o͘-kheng ba̍k-kiàⁿ, i chiàⁿ-lúi ba̍k-bâi téng seⁿ chı̍t-lia̍p sè-lia̍p bah-liû, chiam-chiam thóng--chhut-lâi. Sè-hàn ê sı̂ m̄-bat tāi-chı̀, goá lóng ē chim-chiok khoàⁿ hit-ê sè-lia̍p bah-liû. A-kong khoàⁿ A-pún peh--á lâi chhù-lāi chē, sim-lāi chin hoaⁿ-hí, ē chin jia̍t-chêng lâi kā khoán-thāi, lâu i chia̍h tiong-tàu-pn̄g, koh thı̂n-chiú chhiáⁿ--i. Nn̄g-ê lâng chē--lo̍h-lâi tō kóng bē soah, chóng--sı̄ chı̍t-choā lō͘ lò-lò-tn̂g, chin bô kán-tan chiah kı̀ⁿ chı̍t-pái bı̄n. Goá mn̄g-koè a-kong, sı̄ án-choáⁿ A-pún peh--á in tau ē tı̄ hiah hn̄g ê soaⁿ-khu--leh? Pêⁿ-tē m̄-sı̄ toà kah chin sù-sı̀? Goân-lâi, A-pún peh--á siàu-liân-sı̂ tı̄ Thài-pêng-soaⁿ chhò-chhâ, oá soaⁿ chia̍h soaⁿ, nı̂-kú goe̍h-chhim tō tı̄ hia lo̍h-thô͘ seⁿ-thoàⁿ, piàn kah kap soaⁿ-tē-lâng kāng-khoán--a. Léng-chúi-kheⁿ lı̄ Tayal ê pō͘-lo̍h chin kı̄n. sè-hàn, a-pà bat chhoā goá kap a-chí khı̀-koè A-pún peh--á in tau, chhù khí tı̄ chı̍t-ê tām-po̍h-á thóng--chhut-lâi ê koân-tē, chhù chêng khoàⁿ--chhut-khı̀ ē-tàng khoàⁿ-tio̍h khui-khoah ê khe-po͘ kap chiⁿ-leng-leng ê soaⁿ, tı̄ in tau tō thiaⁿ ē tio̍h Tayal cho̍k-jı̂n ùi soaⁿ-téng pō͘-lo̍h thoân--lâi ê koa-siaⁿ kap ho͘-hoah-siaⁿ, siaⁿ tı̄ soaⁿ-khàm lāi tńg-se̍h. Ē kı̀-tit hit-ê àm-mê goá khùn bē khı̀, chhá beh tńg--khı̀, A-pún peh--á tō kā goá hè-kiaⁿ: “Mài chhá, nā bô, soaⁿ-téng ê chhiⁿ-hoan ē lo̍h-lâi lia̍h gín-á khı̀ thâi-thâu.” Goá kiaⁿ kah m̄-káⁿ khàu--chhut-lâi. Tha̍k ko-saⁿ ê sı̂, goá tō poaⁿ-khı̀ lı̄ ha̍k-hāu khah kı̄n ê chhı̄-lāi soè-chhù toà, hioh-khùn sı̂-á chiah khiâ thih-bé tńg-lâi chhù. Ē kı̀-tit peh-goe̍h-poàⁿ(Tiong-chhiu) chêng chı̍t-ê lé-pài-jı̍t, goá tńg-khı̀ chhù--nih, chhím jı̍p-mn̂g tō khoàⁿ-tio̍h a-kong chhiú chéng-thâu-á giap chı̍t-ki hun chē tı̄ thiaⁿ mn̂g-kháu, lâng gōng-sı̂n gōng-sı̂n, goá chiâⁿ ū cheng-sı̂n toā-siaⁿ hiu: “A-kong, goá tńg--lâi-loh!” A-kong ná-chhiūⁿ bô siáⁿ sim-chêng, chhı̀n-chhái ı̀n chı̍t-siaⁿ “Ouh” liáu-āu, toā-chhùi koh suh chı̍t-chhùi hun. Goá kā thih-bé chhah hó, poaⁿ chı̍t-chiah sè-chiah í-thâu-á chē tı̄ a-kong kha piⁿ: “A-kong, lí lâng bô sóng-khoài sı̄--bô?” A-kong chiah kóng: “Lín A-pún peh--á chhut chhia-hō--a! Thàu-chá ùi Léng-chúi-kheⁿ khiâ o͘to͘bai beh lâi lán tau, koè séng-tō khı̀ hō͘ chhia lòng--tio̍h......” A-pún peh--á koè-sin, khoàⁿ ē chhut a-kong ê siok-bo̍k, tùi A-pún peh--á chē-chē ê su-liām, lóng tiām-tiām khǹg tı̄ i sim-koaⁿ-té, goá mā éng-oán ē kı̀-tit hit-kang thàu-chá, A-hoan--á kūi tı̄ tiū-tiâⁿ, chhiⁿ-chhám ê khàu-siaⁿ. A-kong kap A-pún peh--á chit-má ē-tàng tı̄ thiⁿ-téng kè-sio̍k khai-káng. Pó͘-kı̀: thiaⁿ a-pà kóng, A-pún peh--á in tau ná-chhiūⁿ bô hoat-tō͘ thoat-lı̄ chhia-hō ê àm-iáⁿ. I ê toā-hàn hāu-seⁿ A-hoan--á, tn̂g-nı̂ tı̄ Lê-san chèng ko-soaⁿ léng-chhài-se, A-hoan--á ê ko͘-kiáⁿ A-gı̄--á, chhoā-bó͘ liáu-āu mā khı̀ Lê-san kā lāu-pē tàu kha-chhiú. Ū chı̍t-kang, A-gı̄--á thàu-chá sái tho͘-lá-kuh chài ko-lē-chhài lo̍h-soaⁿ, kiâⁿ soaⁿ-lō͘, soaⁿ-téng tà-bâng, soah poa̍h-lo̍h khe-khàm, A-gı̄--á tō án-ne cháu--a, pàng tú kiat-hun bô joā kú ū-sin ê ke-āu ko͘ chı̍t-lâng. (TGB Thong-sı̀n tē 41 kı̂, 2003 nı̂ 2 goe̍h)