Chit chân sū ê khí-goân put-chí hô͘-hūn, bē thang khak-sı̍t chai-iáⁿ. Chiàu liû-thoân kóng, Kô͘-choá sai-hū ū ho̍k-sāi 2 sian ê sı̂n-bêng. Chiū-sı̄ Ông-iâ kap Tiông-sèng-sian.
Ho̍k-sāi Ông-iâ: In-ūi in bat kā lâng kô͘ Ông-iâ chûn, hō͘ lâng sàng goā-hng. Ho̍k-sāi Tiông-sèng-sian: Chit ê lâng kóng sı̄ chá bat kò͘ choá-siâⁿ kap tùi-te̍k kau-chiàn, āu-lâi ū khah-iâⁿ: só͘-í āu-sin ê lâng siat lêng-chhù teh hiàn hō͘ chó͘-kong soà lóng ēng Tiông-sèng-sian chò phiau-chún. Koh chhù-lāi ta̍k hāng chin chiâu-pı̄, chāi-siⁿ bô lâng ū án-ni thang hióng-hok. Chhin-chhiūⁿ lô͘-châi, cha-bó͘-kán, chho͘-iù-kán, oe-lâng, cheng-khū, boé-boē èng-chiap lóng ū. Koh ta̍k sin ê hûn-sin iā soà kah chı̍t tiuⁿ chhù-khoè tı̄ āu-piah.
Só͘ siá ê chhù-khoè-jı̄ chhin-chhiūⁿ ē-toé:
Iông, ū iông-kan, im, ū im-hú; im-iông nn̄g ūi, mı̍h kok ū Chú. Chhù-toē it-chı̄n boē tn̄g, lı̍p khoè-jı̄ ê lâng, chiū-sı̄ Phoân-kó͘ bú-ı̂ tāi-ông. Ū chhù-toē chı̍t só͘-chāi, chiū-sı̄ tı̄ thó͘-miâ Hong-tō͘-soaⁿ ê soaⁿ-kha. Tang-pêng kàu Chhiⁿ-lêng-soaⁿ, sai-pêng kàu Pe̍h-hó͘-hia̍t, lâm-pêng kàu Chu-chhiok-tı̂, pak-pêng kàu Hiân-hú-lūn, téng-bı̄n kàu chhiⁿ-thiⁿ, ē-bı̄n kàu n̂g-choâⁿ, sı̀-bı̄n ê kài-chí lóng bêng-pe̍k.
Taⁿ in-ūi khiàm chı̂ⁿ, pài-thok tiong-lâng Tiuⁿ Kian-kò͘, tùi iông-kan pò-un ê hàu-lâm bó͘ bó͘ lâng kan-sia̍p, chhut-thâu sêng-boé, 3 bı̄n gı̄-tiāⁿ boē lêng-gûn 200 kho͘, siāng-jı̍t siu gûn chheng-chhó.
Sûi-sı̂ bēng-lēng sai-hū tāng-kang khí-chō toā chhù 1 chō, tài sù-sûi kap mn̂g-thang hō͘-sı̀ⁿ, tih-chúi liân-chhiûⁿ, ke-lāi ê ke-si cha̍p-bu̍t hiah-ê, lóng kau sí-lâng bó͘ bó͘ ūi chhin-hûn poaⁿ-jı̍p khı̀ chiáng-koán, éng-oán chò i ê ki-gia̍p, pa̍t lâng m̄ káⁿ chhim-chiàm kài-hān, in-ūi bu̍t-gia̍p lóng ū bêng-pe̍k. Nā ū bô bêng-pe̍k--ê, boē-chú tio̍h tam-tng, bô sí-lâng ê kan-hē. Jı̄-pí kam-goān, lóng bô hoán-hoé, kiaⁿ-liáu chhùi kóng bô sı̀n-pı̂n, taⁿ ài ū sı̀n-pı̂n, chiū saⁿ-kap tùi Sam-pó ê bı̄n-chêng, niá chhut i tiuⁿ chhù-khoè-jı̄, the̍h hō͘ sí-lâng bó͘ bó͘ siu-chûn khı̀ chiáng-koán, soà kau i choè ûi-kù. Siāng-jı̍t tâng tiong chhin-sin siu-kè khoè-jı̄-lāi só͘ siá ê lêng-gûn kàu-gia̍h, koh-chài kı̀-bêng choè ûi-kù. Soà phe-bêng hàu-soaⁿ 1 chō, kim-soaⁿ 1 chō, gûn-soaⁿ 1 chō, kau hō͘ sí-lâng bó͘ bó͘ khı̀ chiáng-koán. Chiong 1 tiuⁿ kau i choè ûi-kù.
Chai khoàⁿ-kı̀ⁿ ê lâng, Thó͘-tı̄-kong.
Thoè siá-jı̄ ê lâng, Lí Tēng-khèng.
Choè tiong-lâng--ê, Tiuⁿ Kian-kò͘.
Thài-soè bó͘ nı̂, bó͘ ge̍h, bó͘ jı̍t, lı̍p it-chı̄n boē tn̄g-kun chhù-toē khoè-jı̄ ê lâng, Phoân-kó͘ bú-ı̂ tāi-ông.
Chiàu chit kúi hāng, chhiáⁿ tāi-ke chim-chiok kā i gián-kiù sı̄ sı̍t á-sı̄ hu.
(Tâi-oân Kàu-hoē-pò tē 439 koàn, 1921 nı̂ 9 ge̍h)
