Lêng-jio̍k chiâⁿ-chò Êng-kng

Ū-sı̂ lâng kóng-oē bô sím-mı̍h tú-hó, sı̄ tùi in bô chim-chiok siūⁿ, kan-ta khoàⁿ goā-phoê, bô kiù-khàm chin-sı̍t. Tı̀-kàu lia̍h kiàn-siàu chò êng-hián, lia̍h thé-biān chò kiàn-siàu. Chāi-chá sù-tô͘ hō͘ in ê sı̄-toā lâng lia̍h khı̀ koaiⁿ-kaⁿ siū phah , in lia̍h chò êng-hián (Hēng-toān 5 :40 , 41 ) ; kiaⁿ-liáu lán nā tú-tio̍h hit hō ê tāi-chı̀ chiū beh lia̍h chò chin làu-khùi. Tong-sı̂ Iâ-so͘ sí tı̄ sı̍p-jı̄-kè, hit-tia̍p chiàu lâng khoàⁿ sı̄ tú-tio̍h toā kiàn-siàu ke̍k lêng-jio̍k; i-ê tùi-te̍k lóng tek-sèng thé-biān tò khı̀ in chhù. Chóng--sı̄ kiù-sı̍t ū án-ni á-bô ? Lán tio̍h chim-chiok siūⁿ chiàⁿ chai, hit chı̍t jı̍t chí-ū Iâ-so͘ ū miâ-siaⁿ thé-biān, kı̂-û chèng-lâng lóng kiàn-siàu lak-lián. Taⁿ lâi siūⁿ in chı̍t-lâng chı̍t-lâng ê chêng-hêng, khoàⁿ ū-iáⁿ sı̄ án-ni á-bô. 1. Pún-tiu Pí-liap2-to. I sı̄ Lô-má kok ê toā-koaⁿ, teh koán Iû-thài Sat- má-lı̄-a nn̄g séng , ū chē-chē peng sio̍k i koán-hat , peh-sèⁿ lóng tio̍h sūn-thàn i ; i ū koân thang hō͘ lâng sí , iā ū koân thang kā lâng tháu-pàng. Hit-jı̍t gí-tiāⁿ Iâ-so͘ ê sí-choē liáu-āu i tò-khı̀ kū ông-kiong ū lô͘-po̍k lú-pı̄ teh ho̍k-sāi i; i thang toà tı̄ hia khoài-lo̍k, bô lâng káⁿ ûi-ke̍h i. Án-ni kiám m̄-sı̄ toā miâ-siaⁿ ? Kı̂-sı̍t tı̄ hit jı̍t chin iú-khùi. In-ūi i chai Iâ-so͘ sı̄ bô choē ê lâng , siūⁿ beh tháu-pàng i , m̄-kú m̄-káⁿ chū-choan. I sı̄ koaⁿ-hú, iáu-kú hō͘ peh-sèⁿ chı̍t-ē háⁿ, i chiū hâng-ho̍k in. I chin khoàⁿ-khin hiah-ê chè-si tha̍k-chheh lâng, iáu-kú hō͘ in ah lo̍h-thâu khı̀ chiū in, chiâⁿ in ê pháiⁿ ı̀-sù. M̄-nā án-ni , koh kàu hiān-kim thiⁿ-ē bān-kok lóng ū tit-tio̍h hok-im, chē-chē lâng chai Pí-lia̍p-to ê chêng-iû , m̄-kú bô chı̍t-lâng o-ló i-ê bêng-bōng, ta̍k lâng lóng hiâm i bô táⁿ m̄ chiâⁿ koaⁿ-hú ê thé-thóng ; in-ūi hit jı̍t thiⁿ-ē tē-it hó ê lâng lâi hō͘ i sím-mn̄g , i iā bô châi-tiāu thang pó-hō͘ i. 2. Hi-lu̍t-ông. Hit-jı̍t i lâi Iâ-lō͘-sat-léng chē i-ê chō-ūi , i-ê jı̂n-sûn lóng ûi teh kā i pho͘-pâi ; i ū thiaⁿ-kı̀ⁿ Iâ-so͘ ê tāi-chı̀, kú-kú ài khoàⁿ i. Taⁿ Pí-lia̍p- to kè Iâ-so͘ khı̀ hō͘ i pān ; chāi Hi-lu̍t-ông phah-sǹg Iâ-so͘ ún-tàng hoaⁿ-hí thàn i-ê ı̀-sù beh kiâⁿ chı̍t-ê khah kı̂-koài ê sū, hō͘ ông chhin-ba̍k khoàⁿ-kı̀ⁿ, khoàⁿ liáu chiū khah kam-sim lâi tháu-pàng i. M̄-kú Iâ-so͘ m̄-nā bô kiâⁿ hit-hō sū , liân kok-ông teh mn̄g i , iā bô chhut-siaⁿ in chı̍t kù ; ché sı̄ cháiⁿ-iūⁿ ? Sı̄ in-ūi Hi- lu̍t ông só͘ kiâⁿ ê tāi-chı̀ chin pháiⁿ , ū pāi-hoāi jı̂n-lûn ( Má-khó 6 : 17 , 18 ) , m̄ nā bē kham-tit chò ông , iā sı̄ bē kham-tit kap láu-sı̍t lâng kóng oē. Ông liōng- pit chai-iáⁿ Iâ-so͘ ê ı̀-sù, m̄-káⁿ pān i , kan-ta hı̀-lāng i, sàng i tò-khı̀ hō͘ Pí- lia̍p-to pān. M̄-kú sim-lāi àm-chı̄ⁿ ū chin kiàn-siàu, in-ūi tng chèng-lâng ê bı̄n-chêng tú-tio̍h Iâ-so͘ biáu-sı̄ (Lô͘-ka 13 : 31 , 32 ). Āu--lâi Hi-lu̍t ông hō͘ Hông-tè pián i-ê ông-ūi chhiong-kun liû khı̀ sai-pêng , soà sí tı̄-hia , bô koh tò- tńg--lâi i-ê pún-kok. 3. Chè-si tha̍k-chheh lâng. In lia̍h Iâ-so͘ chò oan-siû tùi-te̍k ; Iâ-so͘ bat tng chèng-lâng ê bı̄n-chêng toā chek-pı̄ in. In kú-kú kè-bô͘ beh lia̍h Iâ-so͘, chóng--sı̄ bô ki-hoē, lia̍h bē koè-chhiú. Kàu hit jı̍t in ê tô͘-bô͘ chiàⁿ chiâⁿ, ū thàn in ê sim-ı̀ , lia̍h Iâ-so͘ hō͘ koaⁿ-hú gí-choē tèng tı̄ sı̍p-jı̄-kè , sǹg-sı̄ tek-sèng hong-biān tò-khı̀ in chhù ; kiám m̄-sı̄ chin lâng-khı̀ , hián-bêng in ê pún-sū hō͘ peh-sèⁿ koh khah kiaⁿ-ùi i ? Kı̂-sı̍t iā sı̄ bô. Hit-jı̍t in saⁿ-pái làu-khùi. Chı̍t pái sı̄ tùi Pí-lia̍p-to kóng , Kai-sat í-goā goán bô pa̍t ê ông. Chit kù khiok iā ū hó ı̀-sù , m̄-kú in kóng hiah-ê oē giám-jiân chhin-chhiūⁿ teh kóng in sı̄ pêng-siông ê kok bô koh-iūⁿ pa̍t pang-kok , lián-chún m̄-sı̄ Siōng-tè ê peh-sèⁿ iā bô teh ǹg-bāng Bí-sài-a lâi chò in ê ông. Iū-koh chı̍t-pái kóng, I-ê hoeh kui tı̄ goán í-kı̍p goán ê kiáⁿ-sun. Āu-lâi chit kù oē chin-chiàⁿ ū èng-giām. Tùi hit-sı̂ kàu taⁿ Iû-thài-lâng lô-lo̍k sı̀-soàⁿ tú-tio̍h chē-chē hāng ê kan-khó͘ ( Má-khó 13 : 19 , 20 ). Goā-kok lâng pháiⁿ khoán-thāi in, khiok toā-toā thang hiâm : m̄-kú iā thang kóng ché sı̄ in chū-chhú-jio̍k--ê, ka-tı̄ chò tit lâi--ê. Tē saⁿ hāng sı̄ in chhut-khı̀ khoàⁿ Iâ-so͘ sí tı̄ sı̍p-jı̄-kè khoàⁿ-kı̀ⁿ i-ê thâu-khak-téng ū siá chám-tiâu kóng , Ché sı̄ Iû-thài ông Ná-sat-le̍k lâng Iâ-so͘. In khoàⁿ tio̍h ché jı̄-iūⁿ chin-chiàⁿ kiàn-siàu , bē bián-tit hō͘ Lô-má lâng thí-chhiò in ; m̄-kú bô hoat-tit ta-oâ, in-ūi Pí-lia̍p-to tiâu-kang siá án-ni beh phı̀-siùⁿ in ; in-ūi m̄ kam-goān hō͘ in khah iâⁿ khı̀. Sui-jiân kóng sı̄ tek-sèng , iáu-kú in bô sím-mı̍h miâ-siaⁿ. 4. Iâ-so͘ ê ha̍k-seng. Iâ-so͘ tú-tio̍h kan-khó͘ ê sı̂ i ê ha̍k-seng khiok lóng bô tú-tio̍h ; in lóng cháu-lı̄, an-jiân tò-khı̀ in chhù. chóng--sı̄ sim-lāi bô sím-mı̍h an-jiân , bē bián-tit ū loé-chı̀ , in-ūi āu-lāi ē hō͘ lâng hiâm in hit mê-hng bô chı̄n-la̍t lâi pó-hō͘ in ê sian-seⁿ, lún-neh tô-cháu. Pí-tek m̄-nā án-ni , iū koh ēng kè-tı̀ lâi pó i-ê sèⁿ-miā chhut-la̍t kóng pe̍h-chha̍t-oē bô-beh jı̄n Iâ-so͘; m̄-kú i liâm-piⁿ siūⁿ khó͘-chheh, bē bián-tit ū thı̂-khàu lâu-ba̍k-sái. Chiàu lán phah-sǹg i ún-tàng chı̍t-sı̀-lâng m̄-káⁿ bē kı̀-tit hit mê-hng ê só͘-chò. Iû-tāi m̄-nā sioh-miā iū-koh ū thàn 30 ê gı̂n-chı̂ⁿ; m̄-kú kàu-boé chin chhi-chhám sı̍t-chāi thang khó-liân. Chiàu án-ni khoàⁿ hit-chı̍t-jı̍t Iâ-so͘ ê ha̍k-seng lóng ū mâu-pēng tı̄-teh; chí-ū hiah-ê hū-jı̂n-lâng chı̄n-tiong khó-chhú, in ū kiâⁿ-oá tiàm tı̄ i-ê sı̍p-jı̄-kè-kha , thè Iâ-so͘ hoân-ló ; kàu tē 3 jı̍t i tāi-seng khı̀ sûn bōng , khoàⁿ-kı̀ⁿ i koh-oa̍h. Chiàu lâng teh khoàⁿ, hit-sı̂ Iâ-so͘ toā kiàn-siàu, hō͘ lâng tèng-sí tı̄ hoān-lâng ê tiong-kan, i-ê tùi-te̍k kap koè-lō͘ ê lâng lóng thí-chhiò khoàⁿ-khin i ; i kan-ta tiām-tiām thun-lún. chóng--sı̄ lán chai hit-tia̍p sı̄ toā êng-kng ê sı̂ , tùi hit-sı̀ i chò sè-kan lâng ê Kiù-chú. I pún-sin kóng, Goá nā hō͘ lâng kú-khí lı̄-khui tē chiū ín-chhoā chèng-lâng chiū-kı̄n goá ( Hān. 12 : 32 ). In-ūi án-ni Siōng-tè ko-seng i ke̍k koân, hián-hek ê miâ siúⁿ-sù i iâⁿ-koè bān miâ ( Hui. 2 : 9 ). In-ūi án-ni tē-bı̄n-chiūⁿ ê kàu-hoē kap thiⁿ-téng ê thiⁿ-sài éng-oán o-ló i kóng, Hō͘ lâng thâi ê Iûⁿ-ko ē kham-tit tit-tio̍h koân-pèng, hó-gia̍h , tı̀-hūi , châi-lêng, chun-kùi , êng-hián , hok-khı̀ ( Be̍k. 5 : 12 ). Sim só͘ goān. Só͘-í lán tio̍h hun-pia̍t hi-sı̍t. Nā chı̄n-tiong toè Chú lâi tú-tio̍h khún- tio̍k hō͘ lâng chhiò , che thang sǹg chò lán ê êng-kng : nā khı̀-choa̍t Chú lâi tit- tio̍h chun-kùi , chı̂ⁿ-châi, sè-kan ê miâ-siaⁿ, che thang sǹg chò kiàn-siàu. (Tâi-lâm Kàu-hoē-pò tē 300 koàn, 1910 nı̂ 3 ge̍h)