Lí-á só͘ bāng-kı̀ⁿ ê sū

Ū chı̍t-ê sè kiáⁿ kiò Lí-á. I mı̂-sı̂ teh khùn bat bāng-kı̀ⁿ chı̍t ê bāng, hóng-hut chhin- chhiūⁿ i í-keng kàu tı̄ Thian- tông ê mn̂g-kháu, khiā tı̄ goā-bı̄n teh-beh chiū kı̄n siâⁿ-mn̂g. Mn̂g lio̍h-lio̍h-á khui, i chiū khoàⁿ-kı̀ⁿ siâⁿ-lāi, lóng ēng kng-nà-nà ê chin-chu lâi khí chhù. Chin- chiàⁿ sı̄ ke̍k êng-kng chhàn-lān ê só͘-chāi. Tı̄ hit lāi-bı̄n ū chin-chē ê gín-ná saⁿ- kap hoaⁿ-hí teh thit-thô. Hit ê gín-ná só͘ chhēng ê in-chiûⁿ pe̍h seh-seh chin chheng-khı̀ .Lí-á khoàⁿ-kı̀ⁿ chiah ê, sim it-hoat ài, it-tio̍h beh jı̍p khı̀.

Hit-tia̍p khoàⁿ-kı̀ⁿ chı̍t-lâng, chiū-sı̄ teh kò͘ siâⁿ-mn̂g--ê. I ê bı̄n-māu chin kng-siⁿ hó-khoàⁿ, koh ū un-jiû ê khoán-sit. Chit ê sè kiáⁿ kı̄n-oá, mn̄g i kóng, “Tùi chia ū lō͘ thang jı̍p hit ê siâⁿ á-bô? Goá khiok chin ài jı̍p khı̀.”

Hit ê lâng tı̍t-tı̍t siòng, kā i kóng, “Lí kiám m̄ chai lâng boeh ū hūn tı̄ chit siâⁿ- lāi ê khoài-lo̍k eng-kai tio̍h chhēng pe̍h- saⁿ, nā bô hit hō in-chiûⁿ, bē kham-tit toà chia. Taⁿ lí ka-tı̄ khoàⁿ lí ê saⁿ bô pe̍h kàu án-ni.” Lí-á chiū khoàⁿ i seng- khu só͘ chhēng hit niá, í-keng kiaⁿ-lâng ù-oè, bē bián-tit kiàn-siàu, chiū iu-thâu- khó͘-bı̄n khı̀.

Hut-jiân khoàⁿ-kı̀ⁿ sin-piⁿ ū chı̍t tiâu khe, teh siūⁿ, taⁿ kai-chài lah, thang lâi hia sé, ǹg-bāng āu-lâi bô lâ-sâm, chheng- chheng-khı̀-khı̀. Chiū chı̄n khùi-la̍t lâi sé; bô loā-kú koh-chài khı̀ chiū-kı̄n kò͘- mn̂g ê lâng kóng, “Taⁿ saⁿ í-keng sé liáu, chhiáⁿ lí hō͘ goá jı̍p khı̀ hó mah” ?

Hit ê lâng bı̄n-sek pı̀ⁿ-chò iu-chhiû kā i kóng, “Lí iáu-boē chiâu-chn̂g chheng-khı̀.” Chiū ēng chhiú lâi kí i kóng, “Lí ê saⁿ bē pí-tit chiah ê gín-ná, in-ūi lâ-sâm iáu tı̄-teh.”

Lí-á hí sı̂ chin toā iu-būn, chha-put-to beh choa̍t-bāng, phah-sǹg bô lō͘ thang jı̍p hit ê khoài-lo̍k ê só͘-chāi. Koh chē teh hoân-ló háu chı̍t siaⁿ.

Tú-tú hit sı̂ khoàⁿ-kı̀ⁿ ū chı̍t lâng khiā tı̄ i sin-piⁿ, bı̄n-māu chin súi, kng-bêng chhin-chhiūⁿ jı̍t, chiū mn̄g i kóng, “Lí- á! lí siáⁿ-sū thı̂-khàu kàu án-ni?” Ìn kóng, “Goá í-keng tio̍h-boâ chı̄n-la̍t khı̀ sé goá ê saⁿ, iáu-kú bô hoat-tit, iû- goân ū lâ-sâm tı̄-teh.”

Hit ê-lâng koh mn̄g i kóng, “Lí-á! lí kam-goān hō͘ goá sé--bô?”

Ìn kóng, “Kam-goān lah.”

Hit ê lâng chiū kā i sé, kàu pe̍h-pe̍h, ná chhin-chhiūⁿ seh.

Lí-á tē-saⁿ pái koh khı̀ mn̄g kò͘-mn̂g ê lâng kóng, “Goá chit-tia̍p sé kàu chheng-khı̀, Taⁿ beh jı̍p-khı̀, thang á m̄ thang” ?

Kò͘-mn̂g ê lâng kā i khoàⁿ-khoàⁿ teh, chiū kóng, “Taⁿ hó lah! chò lí jı̍p--khı̀.”

Lí-á chiū hoaⁿ-thâu-hí-bı̄n jı̍p--khı̀, tit-tio̍h tı̄ hia khoài-lo̍k ê hok-khı̀.

Taⁿ tùi téng-bı̄n só͘ siá ê tāi-chı̀ thang hun-pia̍t nn̄g hāng. Chı̍t hāng lūn hit- ê sè kiáⁿ ê sū, sı̄ pí-phēng lán tāi- ke ê sim, í-keng kiaⁿ-lâng ù-oè bē kham- tit jı̍p Thian-tông.

Iū chı̍t hāng, chiū-sı̄ kā i sé chheng-khı̀ hit ê lâng, thang phı̀-jū lán ê Kiù- chú Iâ-so͘.

Lán chèng-lâng hek-sı̄ lāu-lâng á-sı̄ gín-ná, nā hoaⁿ-hí kam-goān hō͘ i sé, siū i-ê ín-chhoā tit-tio̍h i-ê chheng-khı̀, sí-āu chiū ún-tàng ē-tit thang kàu hit-ê êng-kng khoài-lo̍k ê só͘-chāi.

Taⁿ tı̄ Sèng-keng ū kúi-nā chat tú-tú ha̍p tı̄ téng-bı̄n só͘ siá ê sū, chhin-chhiūⁿ tı̄ I-sài-a 1: 18, koh Si-phian 51: 7, Kàu-hoē-lāi ê gín-ná tio̍h chiong chit nn̄g chat lâi liām kàu se̍k, siông- siông khǹg tı̄ sim-lāi.

(Tâi-lâm-hú-siâⁿ Kàu-hoē-pò,tē 64 koàn, 1890 nı̂ 9 ge̍h)