Lí Tek-bûn Tiúⁿ-ló Sió-toān

Ùi Wiki Tô·-su-kóan

Lí Tek-bûn sı̄ Kim-pau-lí ê lâng, tùi siàu-liân ê sı̂-chūn sı̄ keng-lông, choè seng-lí, it-seng khûn-khiām phok-sò͘, kap lâng chin hó kau-poê. Tı̄ 25 nı̂ chêng, Lâu Tiong-kian Bo̍k-su ū kap Ia̍p Thô͘-hé Thoân-tō í-kı̍p goá, khı̀ Kim-pau-lí pò͘-tō, hit-tia̍p Lí Tek-bûn ū thiaⁿ-tio̍h tō-lí, sim kàu ke̍k hoaⁿ-hí. Chiū chio nn̄g ūi ê sian-siⁿ kàu i ê chhù, kóng tō-lí hō͘ i ê lāu-bú kap i ê Tiúⁿ-ló-niû thiaⁿ. Hit-tia̍p liáu-āu, i ê lāu-bú kap ke-lāi ê lâng iā tâng-sim kap I sı̀n tō-lí. I pún-sin chiū chio i ê pêng-iú tùi Thoân-tō-kio̍k chhéng siat Káng-gı̄-só͘ tı̄ Kim-pau-lí, Thoân-tō-kio̍k ū chún i só͘ chhéng. Hit-tia̍p ū phài Iûⁿ Chiong khı̀ thoân-tō, i chiū chhut-la̍t tàu pang-chān i, tùi án-ni kàu-hoē jı̍t-jı̍t chı̀n-pō͘. Āu-lâi ū hō͘ kàu-hoē kéng i choè Tiúⁿ-ló, i chin chhut-la̍t pang-chān kàu-hoē. I sı̄ khûn-khiām ê lâng, tùi kàu-hoē ta̍k hāng ê iân-hāng, i chin khek-kí lâi hiàn, gâu hó khoán-thāi lâng, ài kap lâng tâm-lūn tō-lí. Iáu-bē sı̀n tō-lí í-chêng, i ê Tiúⁿ-ló-niû só͘ seng-sán--ê lóng boē oa̍h, kàu sı̀n tō-lí āu, chiū seng-sán chı̍t ūi ta-po͘ kiáⁿ miâ Thian-sù, ū khı̀ Lāi-toē liû-ha̍k tńg-lâi, hiān-sı̂ tı̄ Koe-lâng chhı̄-ia̍h-só͘ choè Siù-i. Kin-nı̂ ū cho͘-chit Tiong-iong chhı̄-tiûⁿ, hiān-sı̂ ū choè Siā-tiúⁿ, tùi kàu-hoē iû-goân put-chí koan-sim. Āu-lâi ū koh tit-tio̍h chı̍t ūi ê ta-po͘ kiáⁿ miâ Chhun-seng, hiān-sı̂ khı̀ Lāi-toē liû-ha̍k. I tı̄ Chiau-hô 7 nı̂ chiū khí chı̍t keng pài-tn̂g thiaⁿ tı̄ Kim-pau-lí lâi hiàn, hoē-iú chiū khí chı̍t keng siok-sià. Kàu pài-tn̂g lo̍k-sêng āu, i chiū kap i ê kiáⁿ choè-tı̄n khı̀ toà tı̄ Pang-kiô, chóng-sı̄ i iû-goân chin khoà-lū Kim-pau-lí kàu-hoē, ta̍k nı̂ iû-goân toê-iân choè hit kàu-hoē ê keng-hùi. Chin khó-sioh, tı̄ kū-nı̂ chiū khí pı̄ⁿ, seng-khu keng-kè choē-choē kan-khó͘. I tú-tio̍h kan-khó͘ ê sı̂, ka-kı̄ tı̀-ı̀ kı̂-tó, iā kiò i ke-lāi ê lâng kı̂-tó. Beh lı̄-pia̍t sè-kan í-chêng, i ê kiáⁿ, sim-pū, Tiúⁿ-ló ū kap i lé-pài, i ta̍k pái kóng tio̍h thoè i jı̄n-choē. I ê sim-pū kóng, A-pa lí tùi kàu-hoē ū chiah jia̍t-sim, m̄ bián khoà-ı̀. I kóng, m̄-thang án-ni khoa-kháu, tio̍h jı̄n-choē. Kàu 8 ge̍h 8 jı̍t, hit ē-po͘ 2 tiám an-jiân kui thian. Kàu 8 ge̍h 16 jı̍t, tı̄ pún-tn̂g choè kò-pia̍t-sek. Chit jı̍t ū tùi pún-tn̂g kap hū-kūn kap kúi-nā ūi kàu-hoē Bo̍k-su, thoân-tō, tióng-chip, hoē-iú kap Úi Bo̍k-su, Kai Sian-siⁿ, í-kı̍p Koe-lâng-chhı̄ chhı̄-ún tāi-lí, kap choē-choē ūi ê koaⁿ-oân, kap toē-hng ê iú-le̍k-chiá, iā ū choē-choē hoe-khoân, tiàu-kı̂, tiàu-tiān, tiàu-sû, sı̍t-chāi sı̄ chin sēng-hoē, che sı̄ hián-bêng i choè lâng ê kiat-kó. Beh lı̄-khui sè-kan í-chêng, ū kau-tài i ê kiáⁿ tio̍h hiàn tām-po̍h ê chı̂ⁿ, lâi choè Koe-lâng Kim-pau-lí kàu-hoē ê kı̀-liām hiàn-kim. Sı̍t-chāi sı̄ chin thang siàu-liām ê Tiúⁿ-ló, ū hó bô͘-iūⁿ thang hō͘ lâng o̍h. Kiû Chú pang-chān i ê kiáⁿ-jı̂, oē chiap-soà i ê kha-pō͘. (Tâi-oân Kàu-hoē Kong-pò tē 607 koàn, 1935 nı̂ 10 ge̍h)