Lí sı̄ sai-hū goá sı̄ nı̂-thô͘

e̍k Sio-hûi sai-hū ēng chı̍t tè thô͘ chio̍h, noá liáu-āu chiū chiong i liâm tı̄ chhia-lûn téng, khai-sí chù-chō chı̍t ê khı̀-khū. Chhia-lûn ū sı̂ choán khah bān, ū sı̂ choán khah kín, ū sı̂ kek-lia̍t choán, ū sı̂ ûn-ûn-á choán lóng-sı̄ chiàu sai-hū ê kui-tēng, chhia-lûn choán-tōng ê sı̂ sai-hū ê chhiú chı̍t-ê bong, nı̂-thô͘ chiū pı̀ⁿ-choè ı̂ⁿ-hêng, koh bong chı̍t-ē chiū chiong thò͘ chhut-lâi bô pêⁿ ê só͘-chāi pı̀ⁿ-choè kng-kut là! Té-té ê sı̂-kan lāi chí-ū ēng chhiú bong kúi-ē, chiū chiong hit tè nı̂-thô͘ chō-chiâⁿ ha̍p tı̄ sai-hū sim-ı̀ ê khı̀-khū là! Ki-tok-tô͘ tı̄ Siōng-tè só͘ an-pâi ê khoân-kéng ê chhia-lûn téng, iā-sı̄ án-ni. Bô-lūn i kín choán, bān choán, kek-lia̍t choán, ûn-ûn-á choán lóng ū Siōng tè ê chí-ı̀ kap siat-kè. “Bān-hāng sū saⁿ-kap lâi, hō͘ thiàⁿ Siōng-tè ê lâng tı̍t lı̄-ek. (Lô-má 8:28). Siōng-tè ēng khoân-kéng só͘ hō͘ lán ê kok-chióng chhú-tı̀ bô m̄ sı̄ ài lán chiâⁿ-choè ha̍p tı̄ i sim-ı̀ ê hêng-chōng; Siōng-tè kā lán siu-siah bô m̄ sı̄ ài tû-khı̀ lán sin-chiūⁿ oē siong--lâng ê phín-keh. Bô keng-koè khoân-kéng, chhia-lûn ê tùi-hù, chiū boē oē chiâⁿ-choè ha̍p ēng ê khı̀-khū. Só͘-í goān lán tı̄ chhia-lûn téng choán-tōng ê sı̂, chiū hoat-chhut chàn-bí kap kám-siā kóng, Kai-chài siū siu-siah, thang hō͘ lán ha̍k-sı̍p kong-khò, í-āu chò I ha̍p ēng ê khı̀-khū. (Oa̍h-miā ê Bí-niû tē 65 kı̂, 1959 nı̂ 10 ge̍h)