Lín-pē ê sū-kiāⁿ

Lí Teng-hui Chóng-thóng khı̀ Panama hóng-mn̄g ê sı̂, Panama ê koaⁿ-oân m̄-chai sím-mih kiò-chò Republic of China, tō gia̍h ngó͘-chheⁿ-kı̂ tı̄ hui-ki-tiûⁿ ngiâ-chih i. Tâi-oân ê goā-kau-koaⁿ kan-taⁿ chia̍h-pn̄g ē-hiáu niâ. Kàu-ūi í-āu, kı̀-chiá mn̄g Lí Chóng-thóng, Tiong-kok hiah-nı̍h toā, lí thài m̄-kiaⁿ--neh? Lí Chóng-thóng tō kā ı̀n kóng: "Tiong-kok sı̄ teh goā toā? Bô lín-pē hiah toā--lah!" Koè-mê-jı̍t, Tâi-oân ê Liân-ha̍p-pò tō siá kóng : “Lí Chóng-thóng tı̄ Panama kóng "Tiong-kok goā toā? Me-iu uo te pa-pa na mo ta!” Tiong-kok-sı̂-pò soah siá kóng: Lí Chóng-thóng kóng “Me-iu ni te pa-pa na mo ta!” Tong-jiân chia-ê Tiong-kok-lâng, bô-lūn kóng sím-mih: “ni te pa-pa” iah-sı̄ “uo te pa-pa” lóng m̄-tio̍h--lah. Lín-pē tō-sı̄ lín-pē--lah. Tiong-kok-lâng thiaⁿ bô lah. Ū chı̍t-jı̍t, tùi Canada ê sun-á tńg lâi Ko-hiông khoàⁿ A-kong. A-kong chiap sun-á chē kè-thêng-chhia tńg--khı̀. Tı̄ kè-thêng-chhia lāi-bı̄n ê ùn-chiàng chı̍t-lō͘--a lóng toā-siaⁿ sè-siaⁿ mē Tâi-oân hia-ê sái-tháng chèng-kheh, oan-nā kiāu, oan-nā kóng "lín-pē" chit nn̄g-jı̄. Sun-á Tâi-oân-oē thiaⁿ bô, tān-sı̄ chı̍t-lō͘ thiaⁿ ùn-chiàng it-tı̍t kóng "lín-pē" m̄-chai sı̄ sím-mih ı̀-sù. Tō mn̄g A-kong: "A-kong, lín-pē sı̄ sím-mih ı̀-sù?" A-kong khı̀ hō͘ i mn̄g chı̍t-ē soah gāng--khı̀, m̄-chai beh án-choáⁿ kā sun-á kái-soeh chiah hó. Beh kái-soeh mā kái-soeh bē chheng-chhò. Lú kóng ē lú hoe--lah. Choè-āu bô hoat-tō͘ tō kán-tan kā A-sun--a kóng: "Bô--lah! Lín-pē sı̄ teh kóng "goá" ê ı̀-sù niâ--lah!" A-sun--a chin khiáu, tı̄ i ê sim-koaⁿ lāi tō chhim-chhim ē-kı̀-tit: "lín-pē" chiū-sı̄ "goá" ê ı̀-sù. Bûn-tê chhut tı̄ chia --lah. Koè-nı̂ liáu, A-kong khı̀ Toronto khoàⁿ in sun-á. Sun-á in choân-ke lóng tı̄ hoe-lêng-ki-tiûⁿ teh tán A-kong chhut--lâi. Hui-lêng-ki bān-hun,tán kàu chin kú. Choè-āu, A-kong chin-chiàⁿ tùi hui-ki-tiûⁿ chhut-hiān. A-sun--a ūi-tio̍h beh hō͘ A-kong hoaⁿ-hí , te̍k-pia̍t tı̄ A-kong ê bı̄n-chêng beh tián chı̍t-ē Tâi-oân-oē hō͘ A-kong thiaⁿ: " A-kong, lí sı̄ án-choáⁿ hiah oàⁿ chiah kàu? Lín-pē tı̄ chia tán lí chiok kú ne!"